হোশেয় 9:4 - Chakma Bible

⁴ তারা লগেপ্রভুর নাঙে আংগুর-রসচোই পানীয়-উৎসর্ব ন-গুরিবাক্ আর তারার্ য়েমান-উৎসর্বগানিয়ো তারে হুজি ন-গুরিবাক্। সেবাবোত্যে উৎসর্ব তারা ইধু আবিলেচ্‌গুরিয়্যেগুনো হানা ধোক্ক্যেন অবঅ; যিগুনে সিয়েন হেবাক্ তারা বেক্কুনে অসিজি অবাক্। সে হানাগান তারার্ নিজোর পেট্‌পরা মারেবাত্তে অবঅ, সিয়েন লগেপ্রভুর ঘরত্ ন-এবঅ।

হোশেয় 9:4 Iomraidhean Croise

যাত্রা 29:40

পত্তম ভেড়াছাগল্লো সমারে এক কেজি আস্‌তোশ গ্রাম নিগুজ্‌ মোয়্‌দে প্রায় এক লিটার ছিঁজেয়ে জলপাইয়োর্‌ তেল সমারে মিজেইনে উৎসর্ব গরা পুরিবো। ইয়েনিবাদে ঢালন-উৎসর্ব ইজেবে প্রায় এক লিটার আংগুর-রস্‌‌অ‌ উৎসর্ব গরা পুরিবো।

যিশাইয় 57:6

ও ইস্রায়েল, তুই লাঙেল সং পাত্তরুন্ পূজো গরচ্; সিগুন, সিগুনই তর্ সোম্বোত্তি। অয়, সিগুনো ইদু তুই ঢাল্যে-উৎসর্ব ঢালি দুয়োচ্ আর শোজ্য-উৎসর্ব গোজ্যস্। ইয়েনি দেগিনে কি মুই জুরো গুরি থেম্?

যিশাইয় 66:3

মাত্তর্ যে এক্কো গোরু উৎসর্ব গোজ্যে তে যেন মানুচ্ খুন গোজ্যে, যে এক্কো ভেড়া ছঅ উৎসর্ব গোজ্যে তে যেন কুগুরো গত্তনাবো ভাঙি দের্, যে শোজ্য উৎসর্ব গোজ্যে তে যেন শূগোর লো দের্, আর যে মঅ নাঙে আগর্‌বাট্টি জালার্ তে যেন মূত্তি পূজো গরের্। তারা তারার্ নিজো নিজো পথ বেঈ লোইয়োন; তারার ঈচ্ গরেদে পযাপিরানিলোই তারা হুজি অন্।

যিরমিয় 16:7

যিগুনে সেই মরাগুনোত্তে আবিলেচ্ গরন, এন্ কি, বাবা বা মাবোত্তে আবিলেচ্ গরন তারারে বুঝেবাত্তে কনজনে হানায়ো ন-দিবা বা পানিয়োও ন-দিবা।

যিরমিয় 6:20

ও মর্ মানুচ্চুন, শিবা দেজত্তুন্ যে আগর্‌বাট্টি এজে বা দূর্ দেজত্তুন্ যে মিদে বচ এজে সিয়েনত্ মর্ কি দরকার? তমার পুজ্যে-উৎসর্বর অনুষ্ঠানানে মরে হুজি ন-গরে।”

যিহিষ্কেল 24:17

তুই ভিদিরে ভিদিরে ভঅ নিজেস্ ফেলেবে। তুই মরাগুনোত্তে আব্‌‌‌‌‌‌‌‌‌সোজ্ ন-গুরিচ্। তুই মাপালার্ বান্ আর টেঙত্ জদা পিন্; তর্ মুয়োর্ তলেদিগান ন-ঢাগিচ্ বা মানুচ্চুনোর পাদেয়্যে হানাগানি ন-খেয়ো।”

যিহিষ্কেল 24:22

সেক্কে যিহিষ্কেলে যিয়েনি গোজ্যে তুমিয়ো সিয়েনি গুরিবা। মুয়োর্ তলেদিগান তুমি ন-ঢাগিবা বা মানুচ্চুনোর পাদেয়্যে হানাগান ন-হেবা।

দানিয়েল 1:8

মাত্তর্ দানিয়েলে মনে মনে ঠিগ্ গুরিলো, তে রাজার হানা আর আংগুর-রস দিইনে নিজোরে অসিজি ন-গুরিবো। এবাবোত্যেগুরি যেনে নিজোরে অসিজি গরা ন-পড়ে সেনত্তে তে রাজার কামগুরিয়্যে আজল্লো ইধু অনুমতি চেলঅ।

হোশেয় 3:4

ঠিগ্ এবাবোত্যেগুরি ইস্রায়েলীয়গুনে ভালোক্ দিন সং রাজা, নেতা, উৎসর্বর অনুষ্ঠান, পূজোর্ পাত্তর্, এফোদ আর মূত্তি ছাড়া থেবাক্।

হোশেয় 7:16

তারা স্বর্গ ইন্দি ন-ফিরোন্; তারা বেঙাটেরা এক্কান ধনু ধোক্ক্যেন। তারার্ নেতাগুনে তারার্ অহংকারবলা কধাবাত্তানিত্তে মুরি যেবাক্, আর সেনত্তে ইস্রায়েলীয়গুনে মিসর দেজত্ আজি-তামাজার্ মান্‌জ্য ধোক্ক্যেন অবাক্।‌‌‌‌‌‌‌‌

হোশেয় 8:13

তারা মঅ নাঙে য়েমান-উৎসর্ব গুরিনে সিগুনোর য়েরানি হান্ মাত্তর্ মুই লগেপ্রভু তারা উগুরে হুজি নয়। ইক্কিনে মুই তারার্ পাজিগানির্ কধা ইদোত্ তুলিনে পাপর্ সাজা দিম; তারা মিসরত্ ফিরি যেবাক্।

যোয়েল 1:13

ও ধর্মগুরুগুন, তুমি বস্তা পিনিনে আবিলেচ্ গরঅ; পূজোত্ যিগুনে সেবার কাম গরঅ তুমি আবিলেচ্ গরঅ। যিগুনে মর্ গোজেনর সেবা গরঅ তুমি এইনে বস্তা পিনিনে রেত্তো কাদঅ, কিত্যেই তমা গোজেন ঘরত্ শোজ্য-উৎসর্ব আর পানীয়-উৎসর্বর অনুষ্ঠান বন্ধ গরা ওইয়্যে।

যোয়েল 1:9

লগেপ্রভুর ঘরত্তুন্ শোজ্য-উৎসর্ব আর পানীয়-উৎসর্বর্ অনুষ্ঠান বাদ দিয়্যে ওইয়্যে। যিগুনে লগেপ্রভুর সেবা গরন্ সেই ধর্মগুরুগুনে আবিলেচ্ খাদন্।

যোয়েল 2:14

কন্না হবর্ পায়, অয়ত তে আরঅ মনান্ বুদুলিবো আর বর্ দি যেবঅ, যেনে তুমি তমার্ গোজেন লগেপ্রভুর নাঙে শোজ্য আর পানীয়-উৎসর্বর্ অনুষ্ঠান গুরি পার।

লেবীয় 17:11

কিত্তে লো-গান ভিদিরে থাইদে পরাণবলাগুনোর্‌ পরানান্‌। সেনত্তেই তমার্‌ পরানর্‌ বদলে মুই সিয়েন্দোই পূজোবো উগুরে তমা পাপ্পানি ঢাগি দিবার্‌ বেবস্থা দুয়োং। লো-গান ভিদিরে পরানান্‌ আঘে বিলিই সিয়েন্‌ পাপ কাদেই দে।

লেবীয় 21:17

তুই হারোণরে কঅ, কিয়্যেত্ থুদো বলা তার্ কোন বংশধর তার্‌ গোজেনর নাঙে হানা উৎসর্ব গুরিবাত্তে পূজোবো ইদু যেই ন-পারিবো।

লেবীয় 21:21

কিয়্যেত্‌ দাগ্‌ পোজ্যে লোইনে ধর্মগুরু হারোণর্‌ কনঅ বংশধর্‌ পুজোবো ইদু যেইনে লগেপ্রভুর নাঙে আগুন্দোই-গোজ্যে কনঅ উৎসর্বর্ অনুষ্ঠান গুরি ন-পারিবাক্। দাগ্‌ আঘে বিলিনে তে পূজোবো ইদু যেইনে তার্‌ গোজেন নাঙে কনঅ হানা উৎসর্ব গুরি ন-পারিবো।

লেবীয় 21:6

সিয়েন্‌ গুরিনে তারা তারার্‌ গোজেনর্‌‌ নাঙানর্‌ পবিত্রতাগান বর্বাদ গুরি ন-পারিবো। তারা যেন তারার্‌ গোজেনর্‌‌ নাঙে ফারগ্ ওই থান্‌। ধর্মগুরুগুনে লগেপ্রভুর্ নাঙে আগুন্দোই-গোজ্যে উৎসর্বর অনুষ্ঠান্‌ গুরিবাক্, আর সেনত্তে লগেপ্রভুর নাঙে তারাত্তুন যুদো ওই থাহ্‌ পুরিবো। এ উৎসর্বর্‌ জিনিস্‌চান অলঅ তারার্‌ গোজেনর্‌‌ নাঙে উৎসর্ব গোজ্যে হানা।

লেবীয় 21:8

ও ইস্রায়েলীয়গুন্‌, তুমিয়ো ধর্মগুরুগুনোরে গোজেনর্‌‌ নাঙে যুদো গুরি রাগেয়্যে মানুচ্‌ ইজেবে চেবা, কিত্যে তারা তমার্‌ গোজেনর্‌‌ নাঙে হেবার্‌ উৎসর্ব গুরিবার্‌ কাম গরন্‌। যুদো গুরি রাগেয়্যে মানুচ্‌ বিলিই তারারে চাহ্ পুরিবো, কিত্যে মুই লগেপ্রভু নিজেই পবিত্র আর মুয়ই তমারে মর্‌ নাঙে যুদো গুরি রাগেয়োং।

আমোষ 5:22

তুমি মঅ নাঙে পুজ্যে-উৎসর্ব আর শোজ্য-উৎসর্ব গুরিলেয়ো মুই সিগুন গুজি ন-লোম্। যুনিয়ো তুমি পক্তামক্তা য়েমান্দোই উদোলোলি-উৎসর্বর অনুষ্ঠান গরঅ তো সিয়েন ইন্দি মুই রিনিয়ো ন-চেইম্।

মালাখি 2:13

আর এক্কান ভান্ন্যেই কাম্ তুমি গুরি থাগঅ; সিয়েন অলঅ, চোগো পানিয়ে তুমি লগেপ্রভুর পূজোবো ভাজঅ। তুমি কানাকুদি আর বিলেপ্ গরঅ, কিত্যেই তুমি যিয়েনি দুয়ো সিয়েনি উগুরে তে আর মনযোগ্ ন-দে বা হুজি মনে তমা আঢত্তুন্ সিয়েনি গুজিয়ো ন-লয়।

গণাণা 19:11

যুনি কনজনে কারর্ মরাকিয়্যে ধরন সালে তে সাতদিন সং অসিজি অবস্থায় থেবঅ।

গণাণা 4:7

মুজুঙো-রুটি রাগেবার টেবিলো উগুরে তারা এক্কান্‌ য়েল্‌ কাবড়্‌ বিজিইনে সিবে উগুরে টেবিলোর্‌ দাঙর্‌ আর চিগোন্‌ বাজোনুন্‌, কদরা আর ঢালেদে-উৎসর্বর কুমুন্‌ রাগেবা। যে রুটিগানি নিত্য টেবিলো উগুরে থায় সিয়েনি টেবিলো উগুরেই থেবঅ।

যোহন 6:51

মুয়ই সেই জিংকানি-রুটিগান্ যিয়েন স্বর্গত্তুন্ লামি এচ্চ্যে। এ রুটিগান্ যে হেবঅ তে উমরত্তে জিংকানি পেবঅ। মঅ কিয়্যেগানই সেই রুটিগান্। মান্‌জ্যে যেন জিংকানি পান্ সেনত্তে মুই মর্ এ কিয়্যেগান্ দিম্।”

দ্বি’লম্বর বিররণ 26:14

মরাগুনোত্যে আবিলেচ্‌ গরানা অবস্থায় মুই তর্‌ নাঙে যুদো গুরি রাগেয়্যে ভাগত্তুন কনঅ কিজু ন-খাং, বা অসিজি অবস্থায় সিগুন ঘরত্তুন ন-নিগিলাং, বা সিয়োত্তুন কনঅ ভাগ মরা মানুচ্চুনোর নাঙে দান ন-গরং। মুই মর্‌ গোজেন লগেপ্রভুর কধামজিম কাম্‌ গোজ্যং। তর্‌ উগুম গোজ্যেত্তুন বেক্কানিই মুই গোজ্যং।