হোশেয় 9:3 - Chakma Bible

³ তারা লগেপ্রভুর দেজত্ ন-থেবাক্; ইফ্রয়িমে মিসরত্ ফিরি যেবঅ আর আসিরিয়ার অসিজি হানা হেবঅ।

হোশেয় 9:3 Iomraidhean Croise

১ রাজাবলী 9:7

মাত্তর্‌ ইস্রায়েলীয়গুনোরে যে দেজ্‌ছান মুই দুয়োং সিয়োত্তুন্‌ মুই তারারে ধাবেই দিম্‌। যে তবনা-ঘরান মুই মর্‌ থেবারঘর্‌ ইজেবে যুদো গোজ্যং সিয়েন্অ মঅ চোগো মুজুঙেত্তুন্‌ দূর্‌ গুরি দিম। সেক্কে ইস্রায়েলানে অন্য বেক্‌ জাত্তুনোর্‌ ইদু ঈচ্‌গোজ্যা আর চোগোছাল্ অবঅ।

২ রাজাবলী 17:6

হোশেয়র রাজাগিরির্‌ নয় বজরত্‌ আসিরিয়ার রাজা শমরিয়াগান্‌ গজক্ গুরিনে ইস্রায়েলীয়গুনোরে বন্দী গুরি আসিরিয়াত্‌ নেযেল। তারারে তে হলহেত, হাবোর গাঙ পারত্‌ গোষণ চাগালাত্‌ আর মাদীয়গুনোর শঅরানিত্‌ বজত্তি গুরিবাত্তে দিলো।

যিরমিয় 16:18

তারার পাজিগানিত্তে আর পাপ্পানিত্তে মুই তারারে দ্বিগুন ফল দিম, কিত্তে তারা মঅ দেজ্‌‍‍‍চানরে অসিজি গোজ্যন আর তারাত্তে জঘন্য মূত্তি আর পুজোলোই মর্ সেই অধিকারানরে পুরোন গোজ্যন‍।”

যিরমিয় 2:7

মুই তমারে এক্কান বোল্‌বোল্যে দেজত্ আন্যং যেন তুমি সিদুগোর্ গুলোগুলি আর গম্ গম্ জিনিস হেই পার; মাত্তর্ তুমি এইনে মঅ দেজ্‌‍‍ছানরে অসিজি গোজ্য, মর্ অধিকারানরে ঈচ্ গরেদে জিনিস গোজ্য।

আবিলেচ্ 5:6

যগাজ্যে হানা পেবাত্তে আমি মিসর আর আসিরিয়ার অধিন্ ওইয়্যেই।

যিহিষ্কেল 4:13

যিদুক্কুন জাদ ভিদিরে মুই ইস্রায়েলীয়গুনোরে ধাবেই দিম্ তারা ভিদিরে থেবার অক্তত্ তারা এবাবোত্যেগুরি অসিজি হানা হেবাক্।” এ কধাগান লগেপ্রভু কোইয়্যেদে।

দানিয়েল 1:8

মাত্তর্ দানিয়েলে মনে মনে ঠিগ্ গুরিলো, তে রাজার হানা আর আংগুর-রস দিইনে নিজোরে অসিজি ন-গুরিবো। এবাবোত্যেগুরি যেনে নিজোরে অসিজি গরা ন-পড়ে সেনত্তে তে রাজার কামগুরিয়্যে আজল্লো ইধু অনুমতি চেলঅ।

হোশেয় 11:11

মিসরত্তুন্ পেগো ধোক্ক্যেন, আসিরিয়াত্তুন্ কঅ ধোক্ক্যেন তারা গির্‌‌‌গিরাদে গির্‌‌‌গিরাদে এবাক্। মুই তারার্ ঘরত্ তারারে বোজেই দিম। মুই লগেপ্রভু এ কধাগান কঙর্।”

হোশেয় 11:5

ইস্রায়েলীয়গুন মন ফিরেদে রাজী ন-অন্ বিলি তারা মিসরত্ ফিরি ন-যেবাক্, বরং আসিরিয়া তারা উগুরে রাজাগিরি গুরিবো।

হোশেয় 7:11

ইফ্রয়িমে যেন এক্কো অঘা কোদোর্; তে এক্কুবারে বুদ্ধি নেইয়্যে। একবার তে মিসররে ডাগে আর একবার যায় আসিরিয়া ইধু।

হোশেয় 7:16

তারা স্বর্গ ইন্দি ন-ফিরোন্; তারা বেঙাটেরা এক্কান ধনু ধোক্ক্যেন। তারার্ নেতাগুনে তারার্ অহংকারবলা কধাবাত্তানিত্তে মুরি যেবাক্, আর সেনত্তে ইস্রায়েলীয়গুনে মিসর দেজত্ আজি-তামাজার্ মান্‌জ্য ধোক্ক্যেন অবাক্।‌‌‌‌‌‌‌‌

হোশেয় 8:13

তারা মঅ নাঙে য়েমান-উৎসর্ব গুরিনে সিগুনোর য়েরানি হান্ মাত্তর্ মুই লগেপ্রভু তারা উগুরে হুজি নয়। ইক্কিনে মুই তারার্ পাজিগানির্ কধা ইদোত্ তুলিনে পাপর্ সাজা দিম; তারা মিসরত্ ফিরি যেবাক্।

হোশেয় 9:6

যেক্কেনে তারা ভস্ত অইদ্যে আঢত্তুন্ ধেই যেবাক্ সেক্কেনে মিসরে তারারে এগত্তর্ গুরিবো আর মোফ শঅরত্ তারারে গোর্ দিবো। তারার্ তুবেয়্যে রূবো আর তারার্ থেবার ঘরানি হেরপদনা আরি কাদাগাজে ঢাগি ফেলেব।

লেবীয় 18:28

তুমিয়ো যুনি দেজ্‌চান ফি-বলা গরঅ সালে সিদুগোর্‌ আগঅ জাদ্‌তুনো ধোক্ক্যেন দেজ্‌চানে তমারেয়ো উগুলিনে ফেলেই দিবো।

লেবীয় 20:22

মুই তমারে যে দেজ্‌চানত্‌ বজত্তি গুরিবাত্তে নেযাঙর্‌ সেই দেজচানে যেনে তমারে উগুলি ফেলেই ন-দে সেনত্তে মর্‌ বেক্‌ সুদোমানি আর রীদি-সুদোমানি তমাত্তুন্ পালন গরা পুরিবো।

লেবীয় 25:23

উমরত্তে কারঅ‌ ভূই বেজানা ন-চলিবো, কিত্যে বেক্‌ ভূইয়ানি মর্‌ আরঅ মঅ মুজুঙোত্ তুমি সিয়েনত্‌ পরবাস্যে ওইনে বজত্তি গুরিবা।

আমোষ 7:17

সেনত্তে লগেপ্রভু কত্তে, ‘তঅ মোক্কো শঅর ভিদিরে বেশ্যে অবঅ, আর তঅ পুয়ো-ঝিগুনে যুদ্ধোত্ মুরি যেবাক্। তঅ ভূইয়ানি মাবি মাবি অন্যরে ভাগ্ গুরি দিয়্যে অবঅ আর তুই নিজে এক্কান অসিজি দেজত্ মুরি যেবে। ইস্রায়েল মানুচ্চুন হামাক্কায় তারা দেজত্তুন্ বন্দী ওইনে অন্য দেজত্ যাহ্ পুরিবো।’ ”

মীখা 2:10

তুমি উদো, যগোই, ইয়েন দঅ তমার জিরেবার জাগা নয়; কিয়া তুমি দেজ্‌‌‌চানরে অসিজি গোজ্য, সেনত্তে সিয়েন জদবদে ভস্ত ওই যেবঅ।

প্রেরিত্‌ 10:14

পিতরে কলঅ, “না, না, প্রভু, কনঅ বাবদে না। অপবিত্র বা অসিজি কনঅ কিজু মুই কনদিন্অ ন-হাং।”

দ্বি’লম্বর বিররণ 28:63

যে খুজিলোই লগেপ্রভু তমারে ভালেদি গোজ্যে আর তমার মান্‌জ্যর সোংখ্যে বাড়েই দিয়্যে সেই খুজিলোই সেক্কে তে তমারে ভস্ত গুরিনে শেজ্‌ গুরি দিবো। যে দেজ্‌ছান তুমি গজক্ গুরিবাত্তে যর্‌ সে দেজ্‌ছানত্তুন শিঙোর্‌ সুদ্ধো তমারে তুলি ফেলা অবঅ।

দ্বি’লম্বর বিররণ 28:68

মিসরত যানা পৌইদ্যেনে মুই তারারে কোইয়োং, সেই পথতানন্দি আর কনদিনঅ তমাত্তুন টেং দিয়্যে ন-পুরিবো; মাত্তর্‌ লগেপ্রভু সেক্কে জাহাজত্‌ ভোরেইনে তমারে মিসরত ফেরৎ পাদেব। সিয়েনত্ তুমি চাগর আর চাগরানি ইজেবে শত্রুগুনো ইদু নিজোরে বিজি দিবাত্তে চেবা মাত্তর্‌ কনজনে তমারে ন-কিনিবাক্।”

দ্বি’লম্বর বিররণ 4:26

সে সময়ানত্তে মুই এচ্ছ্যে এ দিনোত্‌ আগাজ আর পিত্‌থিমীগান্‌ তমা বিরুদ্ধে সাক্ষী রাগেইনে কঙর্‌, তুমি যর্দন গাঙান্‌ পার্‌ ওইনে যে দেজ্‌ছান কারি লবাত্তে যর্‌ সে দেজত্‌ তুমি কয়েক দিনে শেজ্ ওই যেবা। তুমি সিদু ভালোক্‌ দিন সং বজত্তি গুরি ন-পারিবা, হামাক্কায় ভস্ত ওই যেবা।

যিহোশূয় 23:15

মাত্তর্‌ যুনি তুমি তমার গোজেন লগেপ্রভুর দিয়্যে সুদোমানি তে পালেবাত্তে কোইয়্যে সিয়েনি ন-পালঅ‌, আর যুনি তুমি যেইনে দেব-দেবেদাগুনোরে পূজো গরঅ‌ আর তারার্‌ মুজুঙোত্‌ মাদাবো নিগিরো, সালে তমার গোজেন লগেপ্রভু ভালেদি গুরিবাত্তে যেদক্কানি এগেম্ গোজ্যে সিয়েনির বেক্কানি যেধোক্ক্যেন্‌ পূরণ ওইয়্যে সেধোক্ক্যেন্‌ লগেপ্রভু যেদক্কানি অমংগলর দর্‌ দেগেয়্যে সিয়েনি বেক্কানি তে তমা উগুরে ঘোদেব আর যে দোল্‌ দেজ্‌চান তে তমারে দিয়্যে যেরেন্দি সিয়োত্তুন্‌ তমারে ভস্ত গুরি ফেলেব। লগেপ্রভুর রাগ্‌কান্‌ তমার বিরুদ্ধে জুলিবো, আর যে দোল্‌ দেজ্‌চান তে তমারে দিয়্যে সিয়েনত্তুন যাদিমাদি তুমি ভস্ত ওই যেবা।”