হোশেয় 2:3 - Chakma Bible

³ আঃ ন-অলে মুই তারে লাংটা-বাংটা গুরি দিম আর তে তার্ জর্ম দিনোত্ যেবাবোত্যে লাংটা-বাংটা এলঅ সেবাবোত্যে গুরিম। মুই তারে ধূল্যেচর-চাগালা ধোক্ক্যেন গুরিম, উগুজ্যে ভূইয়ো ধোক্ক্যেন গুরি দিম আর পানি তিরেজে তারে মারে ফেলেম।

হোশেয় 2:3 Iomraidhean Croise

যাত্রা 17:3

মাত্তর্‌ মানুচ্চুনে পানি খাজে অরান্‌ ওইয়োন্‌, সেনত্তেই তারা মোশির্‌ বিরুদ্ধে নানান্‌ কধা কোইয়োন্‌। তারা কলাক্, “আমি যেনে পানির অভাবে মুরি যেই সেনত্তেই কি তুই আমারে আর আমা পূঅ-ঝিগুনোরে আর য়েমানুনোরে মিসর দেজত্তুন্‌ আন্ন্যচ্?”

যিশাইয় 33:9

দেজ্‌চানে আবিলেচ্ গরের্ আর শুগেই যার্, লেবাননে লাজ্ পেইয়্যে আর শুগেই যার্, শারোণানে ধূল্যেচর-চাগালা ধোক্ক্যেন ওইয়্যে আর বাশন আর কর্মিলো বেক্ গাজ পাদানি ঝুরি পড়ের্।

যিশাইয় 47:3

তর্ লাঙ্‌‌তা অনাগান ফগদাং অবঅ আর তর্ লাজানাগান্ ঢাক্যে ন-থেবঅ। মুই হেনা সুজিম, কারঅ কোজোলিগান্ ন-মানিম‌।”

যিশাইয় 64:10

তর্ সুদ্ধো-সাংগ শঅরানি ধূল্যেচর চাগালা ওই যেইয়্যে; এমন্ কি, সিয়োনর্‌‌অ সেই অবস্থা ওইয়্যে, অয়, যিরূশালেম মানুচ্ নেইয়্যে ওইয়্যে।

যিরমিয় 12:10

বোউত্ গরগে মর্ আংগুর খেত্‌‌‌তান বর্‌‌‌বাত লাগেয়োন আর সিগুন টেঙোই মাজ্যন্; মর্ দোল্ খেত্‌তানরে তারা মানুচ্ নেইয়্যে আঙ্যা ভূই বানেয়োন। ‌‌

যিরমিয় 13:22

যুনি তুই নিজোরে পুযোর্ গরচ্, মঅ উগুরে ইয়েন কি ঘুদিলো? মাত্তর্ ইয়েনর জোব্ অলঅ, তর্ বোউত্ পাপত্তে তঅ কাবড়ান ফাদি ফেলা ওইয়্যে আর কিয়্যে উগুরে অত্যেচার গরা ওইয়্যে।

যিরমিয় 13:26

মুই তঅ কাবড়ানি তঅ মুয়ো উগুরে তুলি দিম যেনে তর্ লাজ্‌চান দেগা যায়।

যিরমিয় 14:3

মুরুব্বীগুনে পানিত্তে তারার চাগরুনোরে পাদান; তারা পানি জাগাত্ এইনে পানি ন-পেইনে সুদো কুম্‌‌বোই ফিরি যান; তারা লাজে আর আশা আরেইনে ওইনে মাঢাগুন নাঢি রাগান্।

যিরমিয় 17:6

তে অবদে পুরি থেইয়্যে ভূইয়োত্ এক্কো ঝুবো ধোক্ক্যেন; গম্ সময় এলে তে সিয়েন ন-দেগিবো। ধূল্যেচর-চাগালাত্ গরম শুগুনো জাগাত্, অত্তাৎ যিয়েনত্ কনজন বজত্তি ন-গরন এবাবোত্যে নুন্‌‌‍‌জো জাগাত্ তে বজত্তি গুরিবো। ‍‌

যিরমিয় 2:31

এ যুগোর্ মানুচ্চুন, তুমি মঅ কধানি শুনো। ইস্রায়েলর ইধু কি মুই ধূল্যেচর-চাগালা ধোক্ক্যেন ওইয়োং? মুই কি ঘুর্‌‌‌ঘুজ্যে আন্ধারর্ দেজ ওইয়োং? মঅ মানুচ্চুনে কিত্তে কন্, আমি খুলোমেলা গুরি ঘুরিনে বেড়েই পারিই; আমি তইধু আর ন-এবং?

যিরমিয় 2:6

তারা পুযোর্‌অ ন-গরন, সেই লগেপ্রভু কুধু যিবে মিসরত্তুন আমারে নিগিলেনে এমন্ ধূল্যেচর-চাগালা ভিদিরেদি আন্যে যিয়েন এলদে পানি নেইয়্যে, ফুল্যে-কাট্য, শুগুনো আর আন্ধার? সিয়েনত্ দঅ কনজনে যানা-এজানা আর বজত্তি ন-গুরিদাক্।

যিরমিয় 22:6

যিহূদার রাজঘরর বেক জাগানি পৌইদ্যেনে লগেপ্রভু কোইয়্যেদে, যুনিয়ো তুই মইধু গিলিয়দ ধোক্ক্যেন আর লেবানন মোন তোগোন ধোক্ক্যেন তো মুই তরে হামাক্কায় ধূল্যেচর-চাগালা ধোক্ক্যেন বা মানুচ্ নেইয়্যে শঅর ধোক্ক্যেন গুরিম।

যিরমিয় 4:26

মুই রিনি চেলুং লগেপ্রভুর মুজুঙোত্, তার দর্‌গরেপারা রাগর্ মুজুঙোত্ বোল্‌‌‍‌‍বোল্যে দেজ্‌‌‍চান ধূল্যেচর ধোক্ক্যেন ওই যেইয়্যে; তার বেক্ শঅরানি ভস্ত ওই পড়ি আঘে।

যিরমিয় 51:43

তার শঅরানি ভস্ত ওই যেবঅ। সিয়েনি অবঅ শুগুনো আর ধূল্যেচর দেজ্; সেই দেজত্ কনজনে বজত্তি ন-গুরিবাক্, সিয়েন ভিদিরেদি কনজনে যানা-এযানা ন-গুরিবাক্।

যিরমিয় 51:5

ইস্রায়েল আর যিহূদারে তারার গোজেন বেগত্তুন্ খেমতাবলা লগেপ্রভু ছাড়ি ন-যায়, যুনিয়ো ইস্রায়েলর সেই সুদ্ধো-সাংগ মানুচ্চোর্ মুজুঙোত্ তারার্ দেজ্‌‌চান দুষে ভরা ওইয়্যে।

যিহিষ্কেল 16:22

তর্ বেক জঘন্য কামানিত্ আর তর্ সিনেলীত্ তুই তর্ চিগোন অক্তর্ কধানি ইদোত্ ন-তুলোচ্ যেক্কে তুই লাংটা-বাংটা এলে আর উট্যেবুট্যে নিজো লো-গান উগুরে ছদফদর্।

যিহিষ্কেল 19:13

ইক্কিনে সিগুনোরে ধূল্যেচরত্, শুগুনো, পানিনেইয়্যে দেজত্ লাগা ওইয়্যে।

হোশেয় 13:15

যুনিয়ো বা ইফ্রয়িমে তা ভেইয়ুনো ভিদিরে ফলায় তো লগেপ্রভুত্তুন্ এক্কান পূগো বোইয়্যের ধূল্যেচর-চাগালাত্তুন্ বেঈ এবঅ; তার্ পয়নালাবোত্ পানি ন-থেবঅ আর তার্ কুয়োবো শুগেই যেবঅ। তার্ ভান্ডালর্ বেক মংগা জিনিসচানি লুদো অবঅ।

হোশেয় 2:10

মুই ইক্কিনে তা লাঙেগুনো চোগো মুজুঙোত্ তার্ লাজেবার কামানি ফগদাং গুরিম; মঅ আঢত্তুন্ কনজনে তারে উদ্ধোর্ ন-গুরিবাক্।

ফগদাং পেইয়্যে 17:16

তুই যে দোচ্চো শিং দেখ্যচ্ সিগুনে আর সেই য়েমান্নো সেই বেশ্যেবোরে ঘিনেবাক্। তারা তারে ভস্ত আর লাংদা গুরিবাক্ আর তা য়েরাগান্ হেবাক্; সে পরেদি তারে আগুন্দোই পুড়ি ফেলেবাক্।

বিচের গুরিয়্যেগুন 15:18

ইয়েনর্ পরেন্দি শিম্‌শোনর অমহদ পানি তিরেচ্‌ পেলঅ। তে লগেপ্রভুর ইদু তবনা গুরিনে কলঅ, “তুই তঅ চাগরবোরে দাঙর্‌ যচ্‌ দান গোজ্যচ্‌। ইক্কিনে কি মত্তুন্‌ পানি তিরেচে মুড়িনে এ সুন্নত ন-গোজ্যে মানুচ্চুনোর আঢত্‌ পড়া পুরিবো?”