ইব্রীয় 12:9 - Chakma Bible

⁹ ইয়েন বাদে আমি দেক্ক্যেই, আমা জগদ বাব্‌পুনে আমারে শাসন গুরিদাক্ আর আমি তারারে সর্মান গুরিদোং। সালে যিবে বেক্ আত্মাগুনোর্ বাপ্ তা অধিনোত্ থানা কি আমার্ আরঅ উজিত্ নয়, যেনে আমি জিংকানি পেই?

ইব্রীয় 12:9 Iomraidhean Croise

ইয়োব 12:10

তা আধত্‌ বেক্‌ পরাণবলাগুনোর্‌ জীংকানিগানি আঘে; বেক্‌ মানুচ্চুনোর্‌ নিজেস্‌ছুনো তা আধত্‌ আঘে।

যাত্রা 20:12

তমার মা-বাবরে সর্মান গুরিনে চুলিবা। সেক্কে তমার গোজেন লগেপ্রভুর্‌ দিয়্যে দেজত্‌ তুমি ভালোক্‌ দিন বাঁজি থেবা।

গম্ উপদেজ্ 30:17

যে চোগ্‌‌কুনে বাবরে ঠাট্টা গরন্ আর মাবোর বাধ্য অবাত্তে ঈচ্ গুরিনে অস্বিগের্ গরন্, সে চোগ্‌‌কুন কলগ কবাগুনে কুদি কাদায় নিগিলে দিবাক্, আর শকুন ছঅগুনে সিগুন হেই ফেলেবাক্।

উপদেশক 12:7

মাদিগান্ মাদিত্ ফিরি যেবঅ, আর যে আত্মাগান্ গোজেনে দিয়্যে সে আত্মাগান্ তাইদু ফিরি যেবঅ।

যিশাইয় 38:16

ও প্রভু, তঅ কধা আর কাম্‌বোই দঅ মানুচ্ বাঁজি থান্; ইয়েনি ভিদিরে মঅ আত্মাগান জেদা থেবঅ। তুই মঅ কিয়্যেগান ফিরেই দিইনে মরে বাঁজিবাত্তে দিবে।

যিশাইয় 42:5

লগেপ্রভু গোজেনে আগাজ্‌ছান বানেইনে মিলি দিয়্যে; তে পিত্‌‌‍‌‍থিমী আর যিয়েনি জোর্মেয়্যে সিয়েনি বেক্কানি বিজেই দিয়্যে; তে সিদুগোর্ মানুচ্চুনোরে নিজেস্ দে আর সিদু আঢাউদো গুরিনে তারারে জিংকানি দে। তে কোইয়্যেদে,

যিশাইয় 45:10

অভিশাব্ পোড়োক সেই মানুচ্চোর্, যে তা বাবরে কয়, তুই কি জর্ম দুয়োচ্? বা তা মাবোরে কয় তুই কি পুদেয়োচ্?

যিশাইয় 57:16

মুই উমরত্তে মান্‌জ্যরে দুষি ন-গুরিম বা মঅ রাগ্‌কান নিত্য তারা উগুরে ন-থেবঅ। যুনি থায় সালে মানুচ্, যে মানুচ্চোরে মুই বানেয়োং তারা দঅ মঅ মুজুঙোত্ শেজ্ ওই যেবাক্।

যিহিষ্কেল 22:7

তঅ ভিদিরে মান্‌‌‌‌‌‌‌‌‌‌জ্যে মা-বাবরে ঈচ্ গত্তন্, বিদেশীগুনোরে অত্যেচার গত্তন্ আর মা-বাপ নেইয়্যে আহ্ রানিমিলেগুনো সমারে ভান্ন্যেই বেবহার গত্তন্।

লেবীয় 19:3

তুমি তমার মা-বাবরে ভোক্তি গুরিবা আর মর্‌ জিরেবার্‌ দিন্নো পালন্‌ গুরিবা। মুই লগেপ্রভু তমার গোজেন।

সখরিয় 12:1

ইবে অলঅ ইস্রায়েল পৌইদ্যেনে লগেপ্রভুর্ কধা। লগেপ্রভু, যিবে আগাজ্‌‌‌‌চানরে মিলি দিয়্যে, যিবে পিত্‌‌‌‌থিমীর গোড়াগানরে থিদেবর্ গোজ্যে, যিবে মান্‌‌‌‌জ্য ভিদিরে আত্মা বানেই দিয়্যে, তে কোইয়্যেদে,

মালাখি 1:6

বেগত্তুন্ খেমতাবলা লগেপ্রভু কত্তে, “পুয়ো তা বাবরে আর চাগর্ তা গিরোজোরে সর্মান গরে। যুনি মুই বাপ্ ওই থাং সালে মুই পাঙ্গে সর্মানান্ কুদু? যুনি গিরোজ্ ওই থাং সালে মর্ পাওনা শ্রদ্ধাগান্ কুদু? ও ধর্মগুরুগুন, তুমি মরে ঈচ্ গোজ্য। মাত্তর্ তুমি কত্তে, ‘আমি কেধোক্ক্যেনগুরি তরে ঈচ্ গোজ্যেই?’

গণাণা 16:22

মাত্তর্‌ মোশি আর হারোণে মাদিত্‌ আদু পাড়ি পড়িনে কলাক্কে, “ও গোজেন, তুই বেক্‌ মানুচ্চুনোর পরাণর গিরোজ্‌। বানা এক্কো মান্‌জে পাপ গোজ্যে বিলি কি তুই গোদা ইস্রায়েলীয় সমাজ উগুরে তর্‌ রাক্কান্‌ দেগেবে?”

লূকে লেখ্যে গম্ হবর্ 18:4

সেই বিচেরক্কো কয়েক্ দিন সং কিচ্চু ন-গুরিলো। মাত্তর্ জেরেদি তে মনে মনে কলঅ, ‘যুনিয়ো মুই গোজেনরে ন-দরাং আর মান্‌জ্যরেয়ো গ্রাজ্য ন-গরং,

যোহন 3:6

মান্‌জ্যত্তুন্ যিবে জর্মায় সিবে মানুচ্‌, আর যিয়েন্ পবিত্র আত্মাত্তুন্ জর্মায় সিয়েন্ আত্মা।

প্রেরিত্‌ 2:30

তে এক্কো ভাববাদী এলঅ আর তে কোই পাত্ত গোজেনে শমক্ হেইনে এ এগেমান্ গোজ্যেদে যে, তা সিংহাসনত্ তার এক্কো গুট্টিরে তে বোজেব।

রোমীয় 1:3

সেই গম্ হবরান্ অলঅ তার্ পুয়োবো পৌইদ্যেনে। সেই পুয়োবো যীশু খ্রীষ্ট, আমার্ গিরোজ্। কিয়্যেগানদি তে রাজা দায়ূদোর গুট্টি এলঅ, আর তার্ পাপ-নেইয়্যে আত্মাগান ইন্দিত্তুন্ তে দাঙর্ খেমতালোই মরণত্তুন্ জেদা ওইনে গোজেনর্ পুয়ো ইজেবে ফগদাং ওইয়্যে।

রোমীয় 9:3

মঅ ভেইয়ুনো বদলে, অত্তাৎ যিগুনে মঅ জাদর্ মানুচ্‌ তারার্ বদলে যুনি সম্ভব অদঅ সালে মুই নিজেই খ্রীষ্ট কায়-কুরেত্তুন দূর্ ওই যেবার্ অভিশাব্ মানি লোদুং।

রোমীয় 9:5

গোজেনর্ দাঙর্ ভক্তগুনে তারার্ পুরোণি মানুচ্ এলাক্ আর মানুচ্ ইজেবে মশীহ তারা গুট্টিত্ জোর্মেয়্যে। তেয়ই গোজেন, যিবে বেক্কুনো উগুরে; বেক্ বাঈনীগান্ তার্। আমেন।

দ্বি’লম্বর বিররণ 27:16

সে মানুচ্চো অভিশাবখেইয়্যে, যে মাবোরে বা বাবরে অসর্মান গরে। সেক্কে বেক্কুনে কবাক, আমেন।

যাকোব 4:10

প্রভুর মুজুঙোত্ নিজোরে তলে গরঅ, সালে তেয়ই তমারে তুলি ধুরিবো।

যাকোব 4:7

ইয়েনত্যে গোজেনর্ অধীনোত্ থাগঅ। শদান বিরুদ্ধে দরমর গুরি থাগঅ, সালে তে তমাত্তুন্ ধেই যেবঅ।

১ পিতর 5:6

সেনত্যে গোজেন খেমতার্ মুজুঙোত্ নিজোরে তলে গরঅ, যেন ঠিগ্ সময়োত্ তমারে অজল্ গরে।

ফগদাং পেইয়্যে 22:6

যেরেদি সেই স্বর্গদুত্‌তো মরে কলঅ, এই বেক্‌ কধানি বিশ্বেজ্‌গুরিবার আর সত্য। প্রভু গোজেন, যিবে ভাববাদীগুনোরে দিইনে কধা কোইয়্যে তে তার্ দূত্‌তোরে পাধেই দিয়্যে, যেন কয়েক দিনো ভিদিরে যিয়েন খামাক্কায় ঘুদিবাত্যে যার্ সিয়েন সেই স্বর্গদূত্‌‌তো তা চাগরুনোরে দেগেই পারে।