যাত্রা 23:33 - Chakma Bible

³³ তমা দেজ ভিদিরে তারারে বজত্তি গুরিবাত্তে ন-দিবা। সিয়েন গুরিলে তারা মঅ বিরুদ্ধে তমারে পাপ কামত্‌ টানি নেযেবাক্, কিত্তে যুনি তুমি তারার্‌ দেব-দেবেদাগুনোরে পূজো গরঅ‌ সালে হামাক্কায়্‌ তুমি সিয়েনর কাবুগোত্‌ আক্‌সো যেবা।

যাত্রা 23:33 Iomraidhean Croise

১ রাজাবলী 14:16

যারবিয়ামে নিজে যেদক্কানি পাপ গোজ্যে আর ইস্রায়েলর্‌ মানুচ্চুনোরে দিইনে গোজ্যে তাত্তেই লগেপ্রভু তারারে ছাড়ি যেবঅ।”

২ বংশধর 33:9

যিহূদা আর যিরূশালেমর মানুচ্চুনোরে মনঃশি ভান্ন্যেই পধেন্দি নেযেল; সিয়েনত্তে লগেপ্রভু ইস্রায়েলীয়গুনো মুজুঙোত্তুন্‌ যিদুক্কুন্‌ জাদরে ভস্ত গুরি দিয়্যে তারাত্তুন্‌ বেশ্‌ তারা আরঅ ভান্ন্যেই কাম্‌ গরা ধুরিলাক্‌।

গীতসংহিতা 106:36

তারার মূত্তিগুনোরে তারা পূজো গুরিলাক্ আর সিগুন তারার ফাল্ অলঅ।

যাত্রা 10:7

সেক্কে ফরৌণর্‌ কাম্‌গুরিয়্যেগুনে তারে কলাক্, “এ মানুচ্চো আর কয়দিন্‌ আমারে ফাল্ ফাদি থেবঅ? উই মানুচ্চুনে যেনে তারার্‌ গোজেন লগেপ্রভুর্‌ উবোসনা গুরি পারন সেনত্যে তারারে যেবাত্তে দে। তুই কি বুঝি ন-পারত্‌তে, মিসর্‌ দেজ্‌চান্‌ এক্কুবারে শেজ্ ওই গেলঅ?”

যাত্রা 23:24

তুমি তারার্‌ দেবেদাগুনোরে পূজো বা সেবা ন-গুরিবা আর সিদুগোর্‌ মানুচ্চুনে যিয়েনি গরন্‌ সিয়েনি ন-গুরিবা। তুমি তারার্‌ দেব-দেবেদার মুর্তিগুন্‌ ভাঙি ফেলেবা আর তারার্‌ পূজো গোজ্যে পাত্তরুন কট্টা কট্টা গুরি ফেলেবা।

যাত্রা 34:12

উজিয়ার্‌! যে দেজত্‌ তুমি যর্‌ সেই দেজর্‌ মানুচ্চুনো লগে তুমি কনঅ‌ চুক্তি ন-গুরিবা; সিয়েন্‌ গুরিলে তারা তমা ভিদিরে এক্কো ফাল্‌ ওইনে থেবাক্‌।

দ্বি’লম্বর বিররণ 20:18

সিয়েন ন গুরিলে তারা তারার দেব-দেবেদার পূজো গুরিবার অক্তত্‌ যেদক্কানি জঘন্য কাম্‌ গরন্‌ সিয়েনি তুমিয়ো শিগিবা আর সেক্কে তুমি গোজেন লগেপ্রভুর বিরুদ্ধে পাপ গুরিবা।

দ্বি’লম্বর বিররণ 7:1

তুমি যে দেজ্‌ছান গজক্ গুরিবাত্তে যর্‌ সিদু তমার্‌ গোজেন লগেপ্রভু তমারে নেযেব আর নানান্‌ জাদরে তমা মুজুঙোত্তুন্‌ ধাবেই দিবো। এ জাদ্‌তুনে অলাক্‌ হিত্তীয়, গির্গাষীয়, ইমোরীয়, কনানীয়, পরিষীয়, হিব্বীয় আর যিবূষীয়। এ সাত্তো জাদ মান্‌জ্যর সোংখ্যেন্দি আর বলেদি তমাত্তুন্‌ দাঙর্‌।

দ্বি’লম্বর বিররণ 7:16

তমার গোজেন লগেপ্রভু তমা আদঅ মুদোত্‌ যিদুক্কুন্‌ জাদরে আনি দিবো বেক্কুনোরে তমাত্তুন্‌ ভস্ত গুরি ফেলা পুরিবো। তারারে তুমি মেইয়্যে ন-দেগেবা আর তারার্‌ দেবেদাগুনোরেয়ো পূজো ন-গুরিবা, কিত্যে সিয়েনি তমা পক্ষে ইদি ওইনে থেবঅ।

২ তীমথিয় 2:26

সিয়েনর্ ফলে তারা শদানর্ ফালত্তুন্ ধেই এবাক্, কিয়া শদানে তার্ আওজ্‌চান পালেবাত্যে তারারে ধোজ্জ্যে।

যিহোশূয় 10:40

এবাবোত্যেগুরি যিহোশূয় বেক্‌ চাগালাগান্‌ জিদি নেযেল। সে ভিদিরে এলদে অজল্‌ মুড়ো-মুড়ি চাগালা, নেগেভ, তলেদি মুড়ো-মুড়ি চাগালা আর মুড়ো-মুড়ির কামা জাগানি। তে সে চাগালার রাজাগুনোরেয়ো ওদেই দিলো আর সিদুগোর্ কাররে বাঁজেই ন-রাগেল। ইস্রায়েলীয়গুনোর গোজেন লগেপ্রভু যেধোক্ক্যেন্‌ উগুম গোজ্যে সেধোক্ক্যেন্‌ তে বেক্‌ জেদা পরাণবলাগুনোরে এক্কুবারে শেজ্‌ গুরি দিলো।

যিহোশূয় 23:13

সালে তুমি এ কধাগান গমেডালে জানি লঅ‌, তমা গোজেন লগেপ্রভু এ বেক্‌ জাদ্‌তুনোরে তমা মুজুঙোত্তুন্‌ আর ধাবেই ন-দিবো। সিয়েনর্‌ বদলে তারা এন্‌ জাল্‌ আর ফাল্‌ ওইনে উদিবাক্‌ যিয়েন ভিদিরে তুমি যেইনে ধরা পড়িবা আর তারা অবাক্‌ তমার পিঠ্‌তানির্‌ চাবুক্‌ আর চোগোর্‌ কাদা। যে দোল্‌ দেজ্‌চান তমার্‌ গোজেন লগেপ্রভু তমারে দিয়্যে যেরেন্দি সিয়েনত্তুন্‌ তুমি ভস্ত ওই যেবা।

বিচের গুরিয়্যেগুন 2:2

তুমি এ দেজর মানুচ্চুনো সমারে কনঅ‌ চুক্তি ন-গুরিবা বরং তারার্‌ ডালিপূজোগুন ভাঙি ফেলেবা।’ মাত্তর্‌ তুমি মঅ কধার অবাধ্য ওইয়ো। তুমি কেধোক্কেন্ গুরিনে এ বাবোত্যে কাম্‌ গুরিলা।

বিচের গুরিয়্যেগুন 2:3

সেনত্তেই ইক্কিনে মুই তমারে কঙত্তে, মুই তমাত্তুন এ মানুচ্চুনোরে ধাবেই ন-দিম্‌; তারা তমাত্যেই ফাল্‌ ধোক্ক্যেন অবাক্‌, কিত্যে তুমি তারার দেব-দেবেদাগুনোর ফালদ্‌ পুরিবা।”

১ শমূয়েল 18:21

তে মনে মনে কলঅ, “মুই দায়ূদোরে মর্‌ ঝিবো দিম্বে যেনে ঝিবো তাইদু এক্কো ফাল্‌ অয় আর পলেষ্টীয়গুনে তার বিরুদ্ধে উদোন্‌।” ইয়েন ভাবিনে শৌল দায়ূদোরে কলঅ, “মর্‌ জামেই অবাত্তে ইবেয়ই তর্‌ দ্বিলম্বর সুযোগ।”