ইফিষীয় 6:9 - Chakma Bible

⁹ তুমি যিগুনে গিরোজ্, তুমিয়ো তমার চাগরুনো উগুরে ঠিগ্ সেবাবোত্যে বেবহার গরঅ। তারারে দর্‌বুগ্ দেগানা বাদ্ দুয়ো, কিয়া তুমি দঅ কোই পারঅ যে, তারার্ আর তমার একই প্রভু আর তে স্বর্গত্ আঘে; তা চোগেদি বেক্কুনে সং সং।

ইফিষীয় 6:9 Iomraidhean Croise

নহিমিয় 5:5

যুনিয়ো আমি এক্‌ জাদর্‌ মানুচ্‌ আর আমা ঝি-পূঅগুনে তারার্‌ ঝি-পূঅগুনো ধোক্কেন্‌ তো আমা ঝি-পূঅগুনোরে চাগর্‌ বানা পোজ্যে, আর আমা ঝি-গুনোর্‌ ভিদিরে কয়েকজনে আগেত্তুন্‌ ধুরি চাগর্‌ ওই যেইয়োন্‌। ইক্কিনে আমাত্তুন্‌ কনঅ্‌ খেমতা নেই, কিত্যে আমার ভূইয়ানি আর আংগুর ক্ষেত্‌তানি অন্যর্‌ ওই যেইয়্যে।”

ইয়োব 34:19

তে শাজন্‌গুরিয়্যেগুনোর তপ্পে ন-লয়, নাঢা মানুচ্চুনোরে ফেলেইনে তাগোয়্যেগুনোরে দাঙর্ মনে ন-গরে, কিত্যে তারা বেক্কুনে তার্ আঢ্‌‌তোই বানেয়্যে।

গীতসংহিতা 140:12

মুই হবর্ পাং লগেপ্রভু দুঘিমানুচ্চুনোর্ তপ্পে রায় দিবো আর নাঢা মানুচ্চুনোত্তে দোল্ বিচের গুরিবো।

উপদেশক 5:8

তঅ চাগালাত্ যুনি কনঅ নাঢা মান্‌জ্যরে অত্যেচার্ অদে দেগচ্ বা কনজনরে ন্যায়বিচের্ বা তার পেবার্ অধিকার ন-পাদে দেগচ্ মাত্তর্ ন-দোরেচ্, কিত্তে এক্কো কামগুরিয়্যে উগুরে দাঙর্ আর এক্কো কামগুরিয়্যে আঘে আর তারার্ দ্বিজন উগুরে আরঅ দাঙর্ দাঙর্ নেতা আগন্।

যিশাইয় 47:6

মঅ মানুচ্চুনো উগুরে মঅ রাগ্‌‌কান জুলি উঠ্যে আর মঅ সোম্বোত্তিগানরে মুই অসিজি অবাত্তে দুয়োং। তারারে মুই তঅ আঢত্ তুলি দুয়োং আর তুই তারা উগুরে কনঅ মেয়্যে ন-দেগাচ্। এমন্ কি, বুড়ো মানুচ্চুনো উগুরেয়ো তুই গুয়োর্ বুদি চাপি দুয়োচ্।

দানিয়েল 3:15

ইক্কিনে তুমি যুনি শিংগা, বাশী, হার্‌‌‌‌‌‌‌মোনি, চিগোন-দাঙর্ বীণা, মোড়োলী আর অন্য নানান্ বাবোত্যে বাজানার্ রঅ শুনিনে মাঢা নিগিরি পড়িনে মর্ বানেয়্যে মূত্তিবোরে জু জু জানেবাত্তে যুক্কোল্ থাগঅ সালে দঅ গম্। মাত্তর্ যুনি জু জু ন-জানঅ সালে দোগ্‌দোক্যে আগুনো চুলোত্ সেক্কে তমারে ফেলেই দিয়্যে অবঅ। সেক্কে কন্ দেবেদা মঅ আঢত্তুন্ তমারে উদ্ধোর্ গুরি পারিবো?

দানিয়েল 3:6

যে মানুচ্চুনে মাঢা নিগিরি পড়িনে জু জু ন-জানেবাক্ তারে সেক্কে জোল্‌জোল্যে আগুনো চুলোত্ ফেলে দিয়্যে অবঅ।‌‌”

লেবীয় 19:13

কনঅ মান্‌জ্য উগুরে অন্যেয় গুরি সুবিধা আদায়্‌ গরানা বা জোর্‌ গুরি তার জিনিস্‌চান্‌ নেযানা ন-চলিবো। কামগুরিয়েগুনোর দিনোর্‌ পাওনা দিনেই দিয়া পুরিবো; সিগুন্‌ বেন্যেমাদান্ সং আক্‌সো রাগানা ন-চলিবো।

মালাখি 3:5

বেগত্তুন্ খেমতাবলা লগেপ্রভু কত্তে, সেক্কে মুই বিচের্ গুরিবাত্তে তমা ইদু এইম্; সে অক্তত্ যাদুগুরিয়্যেগুন, বেশ্যেমিগুরিয়্যেগুন, মিজে সাক্ষীদিয়্যেগুন আর যিগুনে চাগরুনোরে ঠগান্, যিগুনে রানি মিলেগুনোরে আর মা-বাপ্ নেইয়্যেগুনোরে অত্যেচার গরন্ আর বিদেশীগুনোরে ন্যায়বিচের্ পেবাত্তে ন-দুয়োন, অত্তাৎ যিগুনে মরে ন-দরান্ তারা বেক্কুনো বিরুদ্ধে মুই সাক্ষী দিবাত্তে দেরি ন-গুরিম।

মথি লেখ্যে গম্ হবর্ 22:10

সেক্কেনে সেই চাগরুনে বারেদি পধত্ যেইনে গম্-বজং যিগুনোরে পেলাক্ বেক্কুনোরে ডাগি আনিলাক্। সেক্কে মেলা-ঘরান্ সেই গর্বালোই ভুরি গেলঅ।

মথি লেখ্যে গম্ হবর্ 22:8

পরেদি তে তার্ চাগরুনোরে ডাগিনে কলঅ, মেলার্ হানা যুক্কোল্, মাত্তর্ যিগুনোরে মুই বাত্যেয়োং তারা ইয়েনর্ যগাজ্যে নয়।

মথি লেখ্যে গম্ হবর্ 24:48

মাত্তর্ যুনি সেই চাগর্‌বো পাজি, তে নিজে মনে মনে কয়, মঅ গিরোজ্‌সো ফিরি এত্তে বোউত্ দেরি অবঅ ।

মথি লেখ্যে গম্ হবর্ 24:51

সেক্কে তে তারে কাবিনে দি'কট্টা গুরি ফক্করুনো সমারে তা জাগায়ান্ ঠিগ্ গুরিবো। সিয়েনত্ মানুচ্চুনে কানাকুদি গুরিবাক্ আর যন্ত্রণালোই দাত্ কামেরেবাক্।

মথি লেখ্যে গম্ হবর্ 7:12

তুমি অন্য মানুচ্চুনোত্তুন্ যেবাবোত্যে বেবহার পেবাত্তে চঅ তুমিয়ো তারা লগে সেবাবোত্যে বেবহার গরঅ। ইয়েনই অলঅ মোশির সুদোম আর ভাববাদীগুনোর শিক্ষ্যের্ আজল্ কধা।

লূকে লেখ্যে গম্ হবর্ 6:31

মান্‌‌‌জ্যত্তুন্ তুমি যেবাবোত্যে বেবহার পেবাত্তে চঅ তুমিয়ো তারা সমারে সেবাবোত্যে বেবহার গরঅ।

যোহন 13:13

তুমি মরে মাষ্টর্ আর প্রভু বিলি ডাগঅ, আর সিয়েন্ থিগই কঅ কিয়া মুয়ই সিবে।

প্রেরিত্‌ 10:34

সেক্কে পিতরে কধে আরাম্ভ গুরিলো, ইক্কিনে মুই ঘেচ্চ্যেক্‌গুরি বুঝিলুং গোজেন চোগোত্ বেক্কুনে সং।

রোমীয় 2:11

ইয়েনত্ দেগা যায়, গোজেনর্ চোগেদি বেক্কুনে সং সং।

১ করিন্হীয় 7:22

চাগর্ থানা অবস্থায় প্রভু যারে ডাক্ক্যে তে প্রভুলোই স্বাধীন ওইয়্যে। সেবাবোত্যে যারে স্বাধীন অবস্থায় ডাগা ওইয়্যে তে খ্রীষ্টর্ চাগর্ ওইয়্যে।

দ্বি’লম্বর বিররণ 10:17

তমা গোজেন লগেপ্রভু বেগ্‌ দেব-দেবেদাগুনো উগুরে আর তে প্রভুগুনোর্‌ প্রভু। তে দাঙর্‌, খেমতাবলা আর ভোক্তিপূর্ণ দর্‌ জাগেয়্যে গোজেন। তে কারঅ পক্ষ ন-নেযায় আর ঘুষঅ ন-খায়।

কলসীয় 3:25

যে অন্যেয় গরে তে তার্ ফল পেবঅ। প্রভুর্ চোগেদি বেক্কুনে সং সং।

কলসীয় 4:1

গিরোজ্‌চুন্, স্বর্গত্ তমার্‌অ এক্কো গিরোজ্ আঘে জানিনে তুমি তমার চাগরুনো লগে গম্ আর ন্যায় বেবহার গরঅ।

যাকোব 2:13

কিয়া যে দোয়্যে ন-গরে, বিচেরর্ সময়োত্ তেয়ো দোয়্যে ন-পেবঅ। বিচের উগুরে দোয়্যেগানে জিদিবো।

যাকোব 2:8

পবিত্র বোইবোত্ লেগা আঘে, “তঅ পাড়াল্ল্যেগুনোরে নিজো ধোক্ক্যেন কোচ্‌পেবে।” তুমি যুনি সত্য গুরিনে খ্রীষ্ট রেজ্যর্ এ সুদোমান মানি চলঅ সালে গম গরর্।

যাকোব 5:4

তমা খেদত্ যে কাম গুরিয়্যেগুনে ফসল কাপ্প্যন্ তুমি তারারে বেতন ন-দুয়ো; আর চঅ, সেই বেতনুনে ইক্কিনে রঅ ছাড়িনে তমারে দুষি বানাদন্। বেগত্তুন্ খেমতাবলা প্রভুর কানত্ সেই কাম গুরিয়্যেগুনোর রঅ ছাড়ানাগানি লুম্মেগোই।

১ শমূয়েল 15:17

শমূয়েলে কলঅ, “একদিন তুই নিজোর্ চোগেন্দি চিগোন্‌ এলে, মাত্তর্‌ তো কি তুই ইস্রায়েলীয়গুনোর বেক্‌ গুট্টিগুনোর চেলা ন-অচ্‌? লগেপ্রভুই তরে ইস্রায়েল দেজ উগুরে রাজা ইজেবে অভিষেগ্ গোজ্যে।