দানিয়েল 11:16 - Chakma Bible

¹⁶ আক্রমন গুরিয়্যেবো যিয়েন হুজি সিয়েনই গুরিবো; তা বিরুদ্ধে কনজনে থিয়্যেই ন-পারিবাক্। দোল্ দেজ ভিদিরে তে নিজোরে থিদেবর্ গুরিবো আর সিয়েন ভস্ত গুরিবার খেমতা তার থেবঅ।

দানিয়েল 11:16 Iomraidhean Croise

যিশাইয় 8:8

আর সিয়েন যিহূদা দেজ ভিদিরে জোড়ে এইনে পুরিবো আর উদুরে উদিনে গত্তনা সং বাড়িবো। ও ইম্মানূয়েল, আসিরিয়ার রাজা তা মেল্যে ডুয়োগানিলোই তঅ পুরো দেজ্‌ছান নাঢি ফেলেব।

যিরমিয় 3:19

“মুই নিজে কোইয়োং, ‘মুই পুয়ো ইজেবে তমারে গুজি লোম্ আর চাইদ্যে ধোক্ক্যেন এক্কান দেজ্, জাদ্‌তুনো ভিদিরেত্তুন্ বেগত্তুন দোল্ এক্কান অধিকার তমারে দিম্।’ মুই মনে গোজ্যংগে তুমি মরে বাপ্ বিলি ডাগিবা আর মঅ পিজেদি আঢানাত্তুন্ ফিরি ন-যেবা।‌

দানিয়েল 11:3

সেক্কে এক্কো খেমতাবলা রাজা উদিবো আর দাঙর্ খেমতালোই রাজাগিরি গুরিবো; তে যিয়েন হুজি সিয়েনই গুরিবো।

দানিয়েল 11:36

উত্তরেদি রাজাবো নিজো আওজ্ মজিম কাম্ গুরিবো। বেক্ দেবেদাগুনোত্তুন্ তে নিজোরে দাঙর্ গুরি দেগিবো আর যিবে দেবেদগুনোর গোজেন তা বিরুদ্ধেয়ো দাঙর্ দাঙর্ কধা কবঅ। গোজেনর রাগ্‌‌কান পুরোপুরিগুরি ঢালি ন-দেনা সং তে সফল অবঅ, কিত্যে যিয়েন থির্ গরা ওইয়্যে সিয়েন ‌‌হামাক্কায় ঘুদিবো।‌‌

দানিয়েল 11:41

তে দোল্ দেজ্‌‌‌‌চান আক্রমণ গুরিবো। ভালোক্কানি দেজ্ উদি যেবঅ, মাত্তর্ পুরো ইদোম্ আর মোয়াব আহ্ অম্মোনর বেগত্তুন্ গম মানুচ্চুনে তা আঢত্তুন্ উদ্ধোর পেবাক্।

দানিয়েল 11:45

সাগর আর দোল্ সুদ্ধো-সাংগ মুড়োবোর্ সংমোধ্যে তে তার্ রাজ-তাম্বুলান্ টাঙেব। তো তার শেজ্ আজিলান্ অবঅ, কনজনে তারে বল্ ন-দিবাক্।

দানিয়েল 5:19

তারে সেই খেমতা দিইনে বেক্ জাদ্‌‌‌তুনোর্, দেজর আর ভাষার মানুচ্চুনে তা মুজুঙোত্ দরে গির্‌গিরেদাক। তে যিবেরে আওজ্ তারে মারে ফেলেদ, যিবেরে আওজ্ তারে জেদা রাগেদ, যিবেরে আওজ্ তারে দাঙর্ পধত্ তুলিদো আর যিবেরে আওজ্ তারে তলেদি লামেই দিদো।‌‌

দানিয়েল 8:4

মুই দেগিলুং ভেড়াবো পোজিমেদি, উত্তোরেদি আর দোগিণেদি গুদো মারিলো। তা মুজুঙোত্ কনঅ য়েমানে ঠিগি ন-পারিলো আর তা আঢত্তুন্ উদ্ধোর গুরি পারন্ এমন কনজন ন-এলাক্। তে যিয়েন হুজি সিয়েনই গুরিদো আর তে খেমতাবলা ওই উদিলো।

দানিয়েল 8:7

মুই দেগিলুং ছাগল্লো সেই ভেড়াবোরে অমকদ আঘাত্ গুরিনে তার শিং দ্বিবে ভাঙি ফেলেল। তা মুজুঙোত্ ভেড়াবোর থিয়্যেবার কনঅ খেমতা ন-রলঅ; ছাগল্লো তারে মাদিত্ ফেলেইনে টেঙোই উরো ধুরিলো। তা আঢত্তুন্ ভেড়াবোরে উদ্ধোর্ গুরি পারে এবাবোত্যে কনজন ন-এলঅ।

দানিয়েল 8:9

সেই শিঙুনোত্ এক্কোত্তুন্ আর এক্কো শিং উদিলাক্; সিগুন পৌইল্যাদি চিগোন এলাক্ মাত্তর্ পরেদি দোগিণ, পূগ আর দোল্ দেজ ইন্দি দাঙর্ উয়ো ধুরিলাক্।

যিহোশূয় 1:5

তুই যেদকদিন বাঁজি থেবে কনঅ জনে তর্‌ বিরুদ্ধে থিয়্যেই ন-পারিবাক্‌। মুই যেধোক্ক্যেন গুরি মোশি লগে এলুং সেধোক্ক্যেন তঅ লগেয়ো থেম্‌; মুই কনঅ‌ দিনঅ‌ তরে ছাড়ি ন যেম্‌ বা ফেলেই ন-যেম্‌।