কলসীয় 3:5 - Chakma Bible

⁵ সেনত্যে তমা পাপ-খাচ্চ্যদ ভিদিরে যিয়েনি আঘে সিয়েনি ভস্ত গুরি ফেলঅ। সিয়েনত্ আঘেদে নানান্ বাবোত্যে সিনেলী, অসিজি, কুবাসনা, ভান্ন্যেই আওজ্ আর লুভ্ যিয়েনরে এক বাবোত্যে মূত্তি পূজোয়ো কুয়ো অয়।

কলসীয় 3:5 Iomraidhean Croise

যাত্রা 37:22

কুড়ি আর ডেলা বেক্কুন্‌ চেরাগ বদঙত্তুন্‌ নিগিলি এলাক্‌ আর বেক্কানিয়ে মিজেনেই এক্কান জিনিস অলঅ‌। বেক্কান্‌ খাটি সনা পিদেইনে বানা অলঅ‌।

মথি লেখ্যে গম্ হবর্ 15:19

মনত্তুন্ ভান্ন্যেই চিন্তে, খুন, নানান্ বাবোত্যে বেভিচের্, চুর্, মিজে মাদানা আর ইংসে-নিন্দে নিগিলি এজে।

রোমীয় 1:26

মানুচ্‌ ইয়েনি গোজ্জ্যন্ বিলিনে গোজেনে লাজত্ পড়েদে কামনার্ আঢত্ তারারে ইরি দিয়্যে। মিলেগুনেয়ো মরদ সমারে তারার্ স্বাভাবিক বেবহারর্ বদলে অন্য মিলেগুনো সমারে অস্বাভাবিক্ গুরিনে বজং কাম্ গোজ্জ্যন্।

রোমীয় 1:29

নানান্ বাবোত্যে অন্যেয়, ভান্ন্যেই, লুভ্, নীচুতা, ইংসে, খুন্, মারামারি, ছলনা আর অন্যরে ক্ষতি গুরিবার আয়োজে তারা যুক্কোল্।

রোমীয় 6:13

কিয়্যেগানর্ কনঅ জিনিজোরে অন্যেয় কাম্ গুরিবার্ আত্যের্ ইজেবে পাপ আঢত্ তুলি ন-দুয়ো। মরণত্তুন্ জেদা ওইয়্যে মানুচ্ ইজেবে তুমি বরং গোজেন আঢত্ নিজোরে তুলি দুয়ো আর গম্ কাম্ গুরিবার আত্যের্ ইজেবে তমা পুরো কিয়্যেগানরে গোজেনরে দি দুয়ো।

রোমীয় 6:6

আমি কোই পারিই, আমা পাপ খাচ্চ্যত্তানরে অকেজো গুরিবাত্যে আমা পুরোণি মুই মরে খ্রীষ্ট সমারে ক্রুশোত্ দিয়্যে ওইয়্যে যেন পাপর্ চাগর্ ওইনে আর আমার্ থা ন-পরে;

রোমীয় 7:23

তো মুই দেগঙত্তে, এক্কান যুদো সুদোম মঅ কিয়্যে ভিদিরে কাম্ গরের্। যিয়েন গম্ মঅ মনানে সিয়েন গম্ বিলিনে মানি লয়, মাত্তর্ এই যুদো সুদোমান্ মঅ মন বিরুদ্ধে যুদ্ধো গরের্ আর মরে বন্দী গুরি রাগেয়্যে। মঅ ভিদিরে যে পাপ্পান্ আঘে এ সুদোমান্ তার্।

রোমীয় 7:5

আমি যেক্কে পাপ খাচ্চ্যদর্ অধীনোত্ এলং সেক্কে আইন-কানুনানি আমা ভিদিরে পাপর্ কামনা-বাসনা জাগেই তুলিদো আর সেই কামনা-বাসনাগান্ আমা কিয়্যেগান ভিদিরে কাম্ গত্ত; সেনত্তে আমা জিংকানিগানি মরণত্যে ফলবান অদঅ।

রোমীয় 8:13

যুনি তুমি পাপ-খাচ্চ্যদ্ মজিম চলঅ সালে তুমি উমরত্তে মুরিবা। মাত্তর্ যুনি পবিত্র আত্মালোই কিয়্যের্ বেক্‌ ভান্ন্যেই কামানি ভস্ত গুরি ফেলঅ সালে উমরত্তে জেদা থেবা,

১ করিন্হীয় 5:1

শুনো যাত্তে, তমা ইধু সিনেলীর্ পাপ আঘে, আর সেই সিনেলীগান এদক্ বেশ্ ওইয়্যেদে, অযিহূদীগুনেয়ো সিয়েনি ন-গরন্। এন্‌ কি, একজনে তার্ সাদাঙা মাবোরে নিজো মোগো ধোক্ক্যেন গুরি থোইয়্যে।

১ করিন্হীয় 6:11

তমা ভিদিরে কেঅ কেঅ সেবাবোত্যে এলা, মাত্তর্ প্রভু যীশু খ্রীষ্টর্ মাধ্যমে আর আমা গোজেন আত্মার্ মাধ্যমে তমারে ধোইনে সাব্ গরা ওইয়্যে, গোজেন নাঙে যুদো গরা ওইয়্যে আর নিদ্দুজি বিলিনে মানি লুয়ো ওইয়্যে।

১ করিন্হীয় 6:13

আরঅ কেঅ কেঅ এ কধাগান-অ কন্, “হানা পেদত্যে আর পেট্‌তো হানাত্যে।” ভারী গম্ কধা, মাত্তর্ এ দ্বিয়েন জিনিস এক দিন গোজেনে বাদ্ দি দিবো। কিয়্যেগান বেভিচার গুরিবাত্যে নয় বরং সিয়েন প্রভুত্যে, আর প্রভু কিয়্যেগানত্তে।

১ করিন্হীয় 6:18

বেক্ বেভিচারানিত্তুন্ ধেই যঅ। মানুচ্‌ অন্য যেদক্কানি পাপ্ গরন্ সিয়েনি তার্ কিয়্যের্ বারেদি গরন্, মাত্তর্ যে বেভিচের্ গরে তে নিজোর্ কিয়্যের্ বিরুদ্ধে পাপ গরে।

২ করিন্হীয় 12:21

মত্তুন্ দর্ লাগেত্তে, মুই যেক্কে আরঅ তমা ইধু যেম্ সেক্কে মঅ গোজেনে তমা মুজুঙোত্ মরে লাজত্ ফেলেব, আর যিগুনে আগে পাপ গোজ্জ্যন্ অদচ তারার্ অসিজিগানি, বেভিচের্ আর জঘন্য কামত্তুন্ মনানি ন-ফিরেন্, তারার্ বেক্কুনোত্যে মুই দুঘ্ পেম্।

গালাতীয় 5:24

যিগুনে খ্রীষ্ট যীশুর্, সিগুনে তারার্ পাপ-খাচ্চ্যত্‌তানরে বেক্‌ কামনা-বাসনা সমত্ ক্রুশোত্ দিইনে শেজ্ গুরি ফেল্ল্যন্।

ইফিষীয় 4:19

তারার বিবেগ্‌কানি বাজে ওই যেইয়্যে, সেনত্যে ঈল্ ন-ওইয়্যে আওজ্‌চোই নানান্ বাবোত্যে অসিজি কাম্ গুরিবাত্যে তারা লাগাম নেইয়্যে কামনার্ আঢত্ নিজোরে ইরি দুয়োন্।

কলসীয় 2:11

ইয়েন বাদে তুমি খ্রীষ্ট লগে এগত্তর্ ওইয়ো বিলিনে তমার্ চুনু মাঢায়ো কাবা ওইয়্যে। এ চুনু মাঢা কাবানাগান কনঅ মান্‌জ্যর্ আঢে কাবানা ন-অয়, খ্রীষ্ট নিজেই সিয়েন গোজ্জ্যে; অত্তাৎ কিয়্যে উগুরে পাপ খাচ্চ্যদর্ যে খেমতাগান এলঅ সেই খেমতাত্তুন্ তে তমারে উদ্ধোর্ গোজ্জ্যে।

১ থিষলনীকীয় 4:3

গোজেনর্ আওজ্‌চান ইয়েন-তুমি পবিত্র অ, অত্তাৎ নানান্ বাবোত্যে সিনেলীত্তুন্ দূরোত্ থাগঅ,

১ তীমথিয় 6:10

নানান্ বাবোত্যে ভান্ন্যেয়র্ গোড়াত্ রোইয়্যেদে টেঙা-পৌইজ্যে উগুরে কোচ্‌‌পানা। ভালোক্ জনে টেঙা-পৌইজ্যের্ লুভে খ্রীষ্টীয় ধর্ম-বিশ্বেজত্তুন্ সুরি যেইনে নিজো উগুরে বোউত্ দুঘ্ ডাগি আন্ন্যন্।

ইব্রীয় 12:16

চঅ, কেঅ যেন এষৌ ধোক্ক্যেন নীতি নেইয়্যে বা গোজেন উগুরে ভোক্তি নেইয়্যে ন-অন্। এষৌ এক সাচ্ হানাত্যে দাঙর্ পুয়োবোর্ অধিকারান্ বেজি দিয়্যে।

ইব্রীয় 13:4

পত্তিজনে যেন জড়া সুগুলোং বানানা বেপারান্ সর্মানর্ চোগেদি দেগন্। নেক্-মোগোর্ ভিদিরে জড়া সুগুলোং বানানা বেপারান পবিত্র রাগানা উজিত্, কিয়া যে কনঅ বাবোত্যে পর্‌পাগোল্যে অদঅ সাৎ, যিগুনে সেই দুষে দুষী গোজেনে তারারে সাজা দিবো।

ইব্রীয় 13:5

টেঙা-পৌইজ্যের্ লুভোত্তুন্ নিজোরে দূরোত্ রাগঅ। তমার্ যিয়েনি আঘে সিয়েনিলোই হুজি থাগঅ। গোজেনে কোইয়্যেদে, “মুই কনদিন্অ তরে ফেলেই ন-যেম্ বা কনদিন্অ তরে বাদ্ ন-দিম্।”

যাকোব 4:1

তমা ভিদিরে কোল্-কোজ্যে আর মারামারি কুত্তুন্ এজে? যেদক্কানি কামনা-বাসনা তমা কিয়্যে ভিদিরে যুদ্ধো গরে সে ভিদিরেত্তুন্ কি সিয়েনি নিগিলি ন-এজে?

১ পিতর 2:11

কোচ্‌‌পেইয়্যে সমাজ্জ্যেগুন, এ পিত্‌থিমীত তুমি বিদেশী আর পরদেজত্ কয়েকদিন বজত্তি গুরিয়্যে বিলিনে মুই তমারে বিশেষ গুরিনে কোজোলী গরঙত্তে, তুমি পাপ-খাচ্চ্যদর্ কামনা-বাসনাত্তুন্ দূরোত্ থাগঅ,

ফগদাং পেইয়্যে 21:8

মাত্তর্ জ্বোল্‌জোল্যে আগুন আর গন্ধকর্ পুয়োর ভিদিরে থানা অবঅ দোরেয়্যে গুনোর্, অবিশ্বেজি, ঈচ্ গরা হেইয়্যে, পর্‌পাগোল্যে, যাদুকর, মূত্তি পূজো গুরিয়্যে আর বেক্‌ মিজে মাদিয়্যেগুনোর শেজ্ দজা। ইবেয়ই অলঅ দ্বি বার্ মরাণা।”

ফগদাং পেইয়্যে 22:15

কুগুরো ধোক্ক্যেন জঘন্য মানুচ্, যাদুকর, পর্‌পাগোল্যে, খুনী, মূত্তি পূজোগুরিয়্যে, আর যিগুনে মিজে মাদানা কোচ্‌পান্ আর মিজে কধালোই চলন্, তারা বেক্কুনে বারেদি পড়ি আঘন্।