কলসীয় 1:6 - Chakma Bible

⁶ এ গম্ হবরান গোদা পিত্‌থিমীত ছিদি পড়িনে ফল ধরের্ আর দিন দিন উজেই যার্। যেদিন্ন্যে তুমি এ গম্ হবরান শুন্ন্য আর গোজেনর্ দোয়্যের কধা ঘেচ্চ্যেক্ গুরি কোই পাজ্জ্য সে দিন্নোত্তুন্ ধুরি সিয়েন তমা ভিদিরেয়ো ঠিগ্ সেবাবোত্যেগুরি কাম গরের্।

কলসীয় 1:6 Iomraidhean Croise

গীতসংহিতা 110:3

যুদ্ধোত্ তঅ মানুচ্চুনে নিজে যুদ্ধো গুরিবাত্তে এবাক্; পবিত্রগুরি সাজিসাজাই বেন্যেপোত্যে যেবাবোত্যে শিরোপানি, সেদোক্ক্যেন্ তইদু তঅ গাবুজ্যেগুনে।

গীতসংহিতা 98:3

ইস্রায়েল জাদ্‌তুনোত্যে তার অমকদ কোচ্‌পানা আর বিশ্বেজর কধা তে মনত্ রাগেয়্যে; আমা গোজেন উদ্ধোরর্ কামানি পিত্‌থিমীর বেক মানুচ্চুনে দেখ্যন্।

মথি লেখ্যে গম্ হবর্ 24:14

বেক্ জাদ ইধু সাক্ষি দিবাত্তে স্বর্গ-রেজ্যর্ গম্ হবর্ গোদা পিত্‌থিমীত্ ফগদাং গরা অবঅ আর সে পরেদি শেজ্ সময় আজির্ অবঅ।

মথি লেখ্যে গম্ হবর্ 28:19

ইয়েনত্তে তুমি যেইনে বেক্ জাদ মানুচ্চুনোরে মর্ শিচ্চ্য বানঅ। বাব্‌‌‌পো, পুয়োবো আর পবিত্র আত্মার্ নাঙে তারারে বাপ্তিস্ম দুয়ো।

মার্ক 16:15

যীশু সে শিচ্চ্যগুনোরে কলঅ, “তুমি পিত্‌থিমীর বেক্ জাগাইধু যঅ আর বেক্ মানুচ্চুনো ইধু গোজেনর্ দিয়্যে গম্ হবরান্ ফগদাং গরঅ।

মার্ক 4:8

মাত্তর্ আর কয়েক্কো বীজ্ গম্ ভূইয়োত্ পড়িলাক্ আর গাজ্ গেজেইনে বাড়ি উদিলাক্ আর ফল দিলাক্; কনবোত্ ত্রিশ গুন্, কনবোত্ ষায়েট্ গুন্, আরঅ কনবোত্ একশগুন্ ফসল জোর্মেল।”

যোহন 15:16

তুমি মরে বেঈ ন-লঅ, মাত্তর্ মুয়ই তমারে বেঈ লোইনে কামত্ লাগেয়োং যেন তমা জিংকানিত্ গুলো ধরন্ আর তমার্ সেই গুলোগুন্ যেন থিগি থায়। সালে মঅ নাঙে বাবা ইধু যিয়েনি মাগিবা সিয়েনি তে তমারে দিবো।

যোহন 17:19

তারাত্যে তর্ নাঙে মুই নিজোরে যুদো গোজ্যং যেন সত্যলোই তারারেয়ো ফারগ্ গরা অয়।

যোহন 4:23

মাত্তর্ এমন্‌ সময় এজের্, এমন্‌ কি, ইক্কিনে সেই সময় এচ্চ্যে যেক্কে আজল্ উবোসনা গুরিয়্যেগুনে আত্মায় আর সত্যলোই বাবার্ উবোসনা গুরিবাক্। বাপ্পোয়ো এবাবোত্যে উবোসনা গুরিয়্যেগুনোরে তগায়।

প্রেরিত্‌ 11:18

এ কধাগান্ শুনিনে যিহূদিয়ার বিশ্বেজিগুনে আর্ আবিত্তি ন-গুরিনে গোজেনরে বাঈনী গুরিনে কলাক্, “সালে গোজেনে অযিহূদীগুনোরেয়ো জিংকানি পেবাত্যে পাপত্তুন্ মনানি ফিরেবার সুযোগ্ দিলো।”

প্রেরিত্‌ 12:24

মাত্তর্ গোজেনর্ কধানি ছিদি পড়িলো আর ভালোক্কুন্ মান্‌জ্যে সিয়েন বিশ্বেজ্ গরা ধুরিলাক্।

প্রেরিত্‌ 16:14

যিগুনে শুনোদন্ তারা ভিদিরে থুয়াতীরা শঅরর্ লুদিয়া নাঙে এক্কো মিলে এলঅ। তে বিগুনী রংয়র্ কাবর বেবসা গুরিদো। যিহূদী ন-অলেয়ো তে গোজেনর্ উবোসনা গুরিদো। প্রভু লুদিয়ার্ মনান্ এমন্‌ গুরিনে মিলি দিলো যাতে তে পৌলর কধা মন দিইনে শুনিনে বিশ্বেজ্ গরে।

রোমীয় 1:13

ভেইলগ্, এ কধাগান্ হবর্ পেইয়ো, মুই ভালোক্ বার্ তমা ইধু যেবাত্তে চেইনেয়ো এজঅ সং মানা গরদন্। অন্য জাগাত্ অযিহূদীগুনো ইধু প্রচার গুরিনে যেবাবোত্যে ফল পেয়োং, ঠিগ্ সেবাবোত্যেগুরি তমাত্তুন্অ কিজু ফল দেগিবার আজায় মুই তমা ইধু যেবাত্তে চেইয়োং।

রোমীয় 15:28

মর্ এ কামান্ থুম্ অলে পরেদি যেক্কে মুই কোই পারিম, সেই টেঙাগুন্ গমেডালে লুমেই দুয়োন্ সেক্কে তমা কায় কুরে গুরি মুই স্পেইনত্ যেম্।

রোমীয় 16:26

মাত্তর্ ইক্কিনে গম্ হবরানর্ মাধ্যমে সিয়েন ফগদাং ওইয়্যে আর সেবাবোত্যেগুরি মুই প্রচার গরঙর্। উমর গোজেনর্ উগুম মজিম ভাববাদীগুনোর্ লেঘার্ মাধ্যমে বেক্ জাদর্ মানুচ্চুনো ইধু সিয়েন জানা ওইয়্যে, যেন তারা খ্রীষ্ট উগুরে বিশ্বেজ্ গুরিনে গোজেনর্ বাধ্য ওই পারন্।

২ করিন্হীয় 10:14

সেনত্যে তমা কধা কোইনে যেক্কে আমি দেমাগ্ গুরিই সেক্কে দুযির্ বারেদি কিচ্চু ন-কোই। যুনি আমি তমা ইধু ন-যেদং সালে আমার্ এবাবোত্যে দেমাগ্ গরানা দুযির্ বারেদি যেদঅ। মাত্তর্ আমি খ্রীষ্ট পৌইদ্যেনে গম্ হবর্ প্রচার গত্তে গত্তে তমা ইধুয়ো যেইয়্যেই।

২ করিন্হীয় 6:1

গোজেন সমারে কাম গুরিয়্যে ইজেবে আমি তমারে এ কোজোলিগান্ গুরির্, তুমি যেক্কে গোজেনর্ দোয়্যে পেইয়ো সেক্কে সিয়েন বিফল্ অবাত্তে ন-দুয়ো।

ইফিষীয় 3:2

তুমি খামাক্কায় শুন্ন্যদে যে, গোজেনে তার্ দোয়্যের্ বেবস্থা তমারে জানেবার ভারান্ মঅ উগুরে দিয়্যে।

ইফিষীয় 4:21

তুমি তা পৌইদ্যেনে শুন্ন্য, আর তা সমারে মিলিনে তা ভিদিরে যে সত্যগান আঘে সেই অনুসারে শিক্ষ্যে পেয়ো।

ইফিষীয় 4:23

সিয়েনর্ বদলে গোজেনরে তমার মনানিরে নুয়ো গুরিনে গাঢেই তুলিবাত্যে দুয়ো,

ইফিষীয় 5:9

কিয়া যিয়েন গম, নিদ্দুষ আর সত্য সিয়েনই অলঅ পহ্‌রর ফল।

ফিলিপীয় 4:17

কনঅ বক্‌শিজ্ যে মুই মাগঙর্ সিয়েন নয়, মাত্তর্ মুই এমন্‌ ফলর্ আজা গরঙর্ যিগুন তমা নাঙে জমা অনাত্ থেবঅ।

কলসীয় 1:10

ইয়েন্দোই যেন তুমি গম কাম্ গুরিনে ফলবান অ আর গোজেনরে আরঅ গমেডালে জানি পারঅ; আর এবাবোত্যেগুরি যেন বেক্কানিত্ প্রভুরে হুজী গুরিবাত্যে তার যগাজ্জ্যে ওইনে চলি পারঅ।

কলসীয় 1:23

খালিক্ ইয়েনত্যে খ্রীষ্ট পৌইদ্যেনে গম হবরানত্তুন্ যে ঘেচ্চ্যেকগুরি আজাগান তুমি পেয়ো সিয়েনত্তুন্ দূরোত্ সুরি ন-যেইনে তমার বিশ্বেজে থির্ থা পড়িবো। সেই গম হবরান সারা জগদত্ প্রচার গরা ওইয়্যে আর তুমি সিয়েন শুন্ন্য। মুই পৌল এ গম হবরানর্ প্রচারক ওইয়োং।

১ থিষলনীকীয় 1:5

কিয়া আমার ফগদাং গোজ্জ্যে গম্ হবরান বানা কধালোই তমা ইধু ন-এজে, মাত্তর্ সিয়েন খেমতা, পবিত্র আত্মা আর পুরোপুরি নিচ্চিত্ গুরি এচ্চ্যে। তমা সমারে থেবার অক্তত্ তমার ভালেদিত্যে আমি কেধোক্ক্যেন গুরিনে আঢাউদো গোজ্জ্যেই সিয়েন তুমি কোই পারঅ।

১ থিষলনীকীয় 2:13

আমি নিত্য গোজেনরে ভালেদি জানের্, কিয়া গোজেনর্ কধানি আমাত্তুন্ শুনিনে যেক্কে তুমি বিশ্বেজ্ গোজ্জ্য সেক্কে তুমি সিয়েন মান্‌জ্যর বিলিনে নয়, মাত্তর্ গোজেনর্ কধা বিলিনেই মানি লোইয়ো। আর ঘেচ্চ্যেকগুরি সিয়েন গোজেনর্ কধা। তুমি যিগুনে বিশ্বেজ্ গোজ্জ্য, তমা মনত্ সেই কধানিয়ে কাম গোজ্জ্যে।

২ থিষলনীকীয় 2:13

প্রভুর্ কোচ্‌পেইয়্যে মঅ ভেই-বোনলগ্, তমাত্যে নিত্য গোজেনরে আমার ভালেদি জানানা উচিত, কিয়া পাপত্তুন্ উদ্ধোর পেবাত্যে গোজেনে পৌইল্যাত্তুন ধুরি তমারে বেঈ লোইয়্যে। পবিত্র আত্মালোই গোজেনত্যে তমারে ফারগ্ গুরি থনার্ মাধ্যমে আর গম্ হবরর্ সত্যগান তমার বিশ্বেজর্ মাধ্যমে তুমি পাপত্তুন্ উদ্ধোর্ পেইয়ো।

১ পিতর 5:12

সীল, যিবেরে মুই মর্ বিশ্বেজি ভেই মনে গরং, তারে দিইনে এই চিধিগান মুই কম কধালোই তমা ইধু লিগিলুং, যেন মুই তমারে উচ্চোমি দি পারং আর গোজেনর্ ঘেচ্চ্যেকগুরি দোয়্যের্ সাক্ষি দি পারং। তুমি গোজেনর্ এই দোয়্যেলোই থির্ থেইনে বজত্তি গরঅ।