প্রেরিত্‌ 7:5 - Chakma Bible

⁵ নিজোর অধিকারত্যে গোজেনে অব্রাহামরে সিয়েনত্ কিচ্চু ন-দিলো, এক্কান ঠেং রাগাইদ্যে ধোক্ক্যেন ভূইয়ো নয়। মাত্তর্ গোজেনে তাইধু এগেম্ গোজ্যেদে যে, তারে আর সে পরেদি তা গুট্টিগুনোত্ত্যে অধিকার ইজেবে তে সেই দেশ্‌চান দিবো। মাত্তর্ সেক্কে অব্রাহামর কনঅ পুয়ো-ছা ন-এলঅ।

প্রেরিত্‌ 7:5 Iomraidhean Croise

পত্থম 12:7

পরেদি লগেপ্রভু অব্রামরে দেগা দিইনে কলঅ,“এ দেজ্‌চান্‌ মুই তঅ বংশবোরে দিম্‌।” যিবে তারে দেগা দিয়্যে সে লগেপ্রভুর্ নাঙে অব্রামে সেক্কে সিয়েনত্‌ এক্কো ডালিপূজো বানেল।

পত্থম 13:15

যেদক্কানি জাগা তুই দেগিবে সিয়েনি মুই তরে আর তঅ বংশবোরে উমরত্তে দিম্‌।

পত্থম 15:18

লগেপ্রভু সেদিন্যে অব্রামত্তে ইয়ান্‌ কোইনে এক্কান্‌ সুদোম্‌ রোক্ষ্যে গুরিলো, “মিসর গাঙত্তুন্‌ ধুরি আরাম্ভ গুরিনে বড়্‌ গাঙ্‌ ইউফ্রেটিস সং বেক্‌ দেজ্‌ছান্‌ মুই তঅ বংশবোরে দিলুং।

পত্থম 16:2

একদিন্যে সারী অব্রামরে কলঅ, “চাহ্, লগেপ্রভু মরে ভাজ্‌ বানেয়্যে। সেনত্তে তুই মঅ চাগরানীবো ইধু যাহ্। ধগে অলে তারে দিইনে মুই গুর-গারা পেইম্‌।”

পত্থম 17:8

যে কনান দেজত্‌ তুই ইক্কিনে বিদেশী ওইনে বজত্তি গরর্‌ তার বেক্কানি উমরর্‌ সোম্বোত্তি ইজেবে মুই তরে আর তঅ বংশবোরে দিলুং। মুই তারার বেক্কুনোর্‌ গোজেন ওলুং।”

পত্থম 23:4

“মুই অন্য দেজত্তুন্‌ এইনে বিদেশী ইজেবে তমা সমারে বজত্তি গরঙর্‌। সেনত্তে দোয়্যে গুরি গোর জাগা গুরিবাত্তে মরে তমা ভিদিরেত্তুন্‌ এক্কেনা জাগা ছাড়ি দুয়ো যেনে সিয়েনত্‌ মুই মর্‌ মোজ্যেদে মোক্কোরে গোর্ দি পারং।”

পত্থম 26:3

ইক্কিনে এ দেজত্‌ তুই কয়েক দিনোত্তে বজত্তি গুরিবে। মুই নিজে তঅ সমারে থেইনে তরে বর্ দিম। এ দেজ্‌ছানি মুই তরে আর তঅ বংশর্‌ মানুচ্চুনোরে দিম্‌। ইয়েন বাদে মুই তঅ বাব্‌ অব্রাহাম ইধু যে শমত্তান্‌ গোজ্যং সিয়েনঅ অদে অদে রাগেম্‌।

নহিমিয় 9:8

তুই তার্‌ মনান্‌ বিশ্বেজি দেগিনে কনানীয়, হিত্তীয়, ইমোরীয়, পরিষীয়, যিবূষীয় আর গির্গাশীয়গুনোর্‌ দেজত্‌ তা বংশবোরে দিবাত্তে তাত্তেই এক্কান্‌ বেবস্থা থিদেবর্ গোজ্যস্‌। তুই গম্‌ বিলিনে তর্‌ এগেম্ তুই রোক্ষ্যে গোজ্যস্‌।

যিহিষ্কেল 33:24

ও মান্‌‌‌‌‌‌‌‌‌জ্যর পুয়োবো, ইস্রায়েল দেজর্ ভস্ত ওইয়্যে জাগানত্ যিগুনে বজত্তি গত্তন্ তারা কদন্, অব্রাহামে বানা এক্কো মানুচ্ ওইনেয়ো দেজর্ অধিকার পেইয়্যে। মাত্তর্ আমি দঅ ভালোকজন; সেনত্তে দেজ্‌‌‌‌‌‌‌‌‌‌চান ঘেচ্চেকগুরি আমা অধিকারত্তে দিয়্যে ওইয়্যে।

দ্বি’লম্বর বিররণ 10:11

লগেপ্রভু মরে কোইয়্যেদে, তুই যেইনে তারারে চালেইনে নেযা, যেনে তারার্‌ পুরোণি মানুচ্চুনো ইদু মুই যে দেজ্‌ছান দিবার্‌ শমক্‌ গোজ্যং সিয়েনত্‌ যেইনে তারা সিয়েন্‌ অধিকার্‌ গুরিনে লোই পারন।

দ্বি’লম্বর বিররণ 2:5

তুমি এষৌর বংশধরুনোরে যুদ্ধোর্‌ উস্‌কানি ন-দিবা, কিত্যে মুই তারার্‌ দেজর্‌ কনঅ ভাগই তমারে ন-দিম্‌, এন্‌ কি, টেং রাগেবার্‌ জাগা পর্যন্ত ন-দিম্‌। মুই সেয়ীরর্‌ এই মুড়ো-মুড়ি চাগালাত্‌ এষৌরে তার্‌ নিজোর্‌ দেজ্‌ ইজেবে দুয়োং।

দ্বি’লম্বর বিররণ 34:4

সে পরেন্দি লগেপ্রভু তারে কলঅ, “ইয়েনই সেই দেজ্‌চান যিয়েন অব্রাহাম, ইসহাক আর যাকোব ইদু শমক্ গুরি কোইয়োং, ‘দেজ্‌চান মুই তর বংশধরুনোরে দিম্‌।’ দেজ্‌চান মুই তরে নিজোর চোগেদি চেবার সুযোগ দিলুং, মাত্তর গাঙ্‌ পার ওইনে তর্‌ সিয়েনত্‌ যেই ন-পারিবো।”

দ্বি’লম্বর বিররণ 9:5

ধার্মিক বা গম্‌ বিলিনেই যে তুমি তারার্‌ দেজ্‌ছান্‌ গজক্ গুরিবাত্তে যর্‌ সিয়েন্‌ নয়, বরং তমার্‌ গোজেন লগেপ্রভু তমা পুরোণি মানুচ্‌ অব্রাহাম, ইসহাক আর যাকোব ইদু যে কধাগান্‌ এগেম্ গুরিনে কোইয়্যে সিয়েনি ছিড়েবাত্তে তে এ বেক্‌ জাদর্‌ ভান্ন্যেয়ানির্‌ কারনে তমা মুজুঙোত্তুন্‌ তারারে ধাবেই দিবো।