২ শমূয়েল 24:12 - Chakma Bible

¹² “তুই যেইনে দায়ূদরে এ কধাগান কঅ, ‘মুই লগেপ্রভু কঙর্‌, মুই তত্তে তিনেন্‌ সাজা ঠিগ্ গোজ্যং। তুই সিয়েনিত্তুন্‌ যিয়েনি বেই নিবে মুই তঅ উগুরে সিয়েনি গুরিম্।’”

২ শমূয়েল 24:12 Iomraidhean Croise

২ শমূয়েল 12:14

মাত্তর্‌ এ কামান্‌ গুরিনে তুই লগেপ্রভুর শত্রুগুনোরে তারে পিজুং গুরিবার্‌ এক্কান্‌ সুযোগ গুরি দুয়োচ্‌। সেনত্তে তর্‌ যে পূঅবো জোর্মেয়্যে তে হামাক্কায় মুরি যেবঅ।”

২ শমূয়েল 24:11

তার্‌কেল্যে বেন্যে দায়ূদে ঘুমোত্তুন্‌ উদোনার্ পর্ তা দর্শক ভাববাদী গাদর ইদু লগেপ্রভুর এ কধাগান ফগদাঙ্‌ গুরিলো,

২ শমূয়েল 24:13

গাদ যেক্কে দায়ূদো ইদু যেইনে কলঅ, “তঅ দেজত্‌ কি সাত বজর্‌ ধুরিনে ভাদরাত্‌ অবঅ? নাহি তুই শত্রুগুনোত্তুন্‌ লড়া হেইনে তিন মাস সং ধেই ধেই বেড়েবে? নাকি তিন দিন সং তঅ দেজত্‌ ভানা অবঅ? যে মরে পাদেয়্যে তারে মুই কি জবাব্ দিম্‌ তুই ইক্কিনে ভাবিনে মরে কঅ।”

১ বংশধর 27:24

সরূয়ার পুয়ো যোয়াবে মানুচ্‌ গণা আরাম্ভ গুরিলো, মাত্তর্‌ থুম্‌ গুরি ন-পারে। মানুচ্‌ গুণিবাত্তে ইস্রায়েল উগুরে লগেপ্রভুর রাগ্‌কান লামি এচ্ছে। সেনত্তে রাজা দায়ূদোর বিজগ বোইবোত্‌ মানুচ্চুনোর কুদুক্কুন্‌ লেগা ন-অয়।

গম্ উপদেজ্ 3:12

কিত্তে বাব্‌পো যেবাবোত্যেগুরি তা কোচ্‌পেয়্যে পুয়োবোরে অমকদ গেইল্ দে, ঠিগ্ সেবাবোত্যেগুরি লগেপ্রভু যিবেরে কোচ্‌পায় তারে গেইল্ দে।

যিরমিয় 30:11

মুই তঅ সমারে সমারে আগং আর মুই তরে উদ্ধোর গুরিম। যিদুক্কুন জাদ ভিদিরে মুই তমারে ছিদি রাগেয়োং মুই তারারে পুরোপুরি গুরিনে ভস্ত গুরিম, মাত্তর্ তমারে মুই পুরোপুরি গুরিনে ভস্ত ন-গুরিম। তো এক্কুবারে সাজা ন-দিলেয়ো মুই তমারে ন-ছাড়িম, মাত্তর্ ন্যায়বিচেরলোই মুই তমারে শাজন্ গুরিম।”

লেবীয় 26:43

বাধ্য ওই দেজ্‌ ছাড়ি যেবার্‌ পরেদি ভস্ত ওইনে পড়ি থেইয়্যে তারার্‌ দেজ্‌চান্‌ তার্‌ পাওনা বেক্‌ জিরেবার্‌-বজরুন্‌ ভোগ গুরি থেবঅ। মর্‌ রীদি-সুদোমানি অগ্রাজ্য আর সুদোমানি ঘিনেনার্‌ কারনে দুজোর্‌ সাজা তারার্‌ পাহ্‌ পুরিবো।

ফগদাং পেইয়্যে 3:19

মুই যিগুনোরে কোচ্‌পাং সিগুনোরে দুষ্ দেগেই দুয়োং আর শাসন গরং। সেনত্যে এ অবস্থাত্তুন্ মনানি ফিরেবাত্যে আওজি অং।