২ যোহন 1:1 - Chakma Bible

¹ গোজেনে যিবেরে বেঈ লোইয়্যে সেই মিলেবো আর তা পুয়ো-ছাগুনো ইধু সেই বুড়ো নেতাবো মুই এ চিধিগান লেগঙর্। গোজেনর্ সত্যগানত্যে মুই তমারে বেক্কুনোরে কোচ্‌পাং। বানা যে মুই তমারে কোচ্‌পাং সিয়েন নয়, মাত্তর্ যিগুনে গোজেনর্ সত্যগান হবর্ পেইয়োন সিগুনে বেক্কুনে তমারে কোচ্‌পান।

২ যোহন 1:1 Iomraidhean Croise

লূকে লেখ্যে গম্ হবর্ 1:3

সেই বেক্ বিষয়ানি পৌইদ্যেনে পৌইল্যাত্তুন্ ধুরি গমেডালে হবরা-হবর্ লোইনে তত্তে সিয়েন এক্কান্ এক্কান্ গুরি লেগানা মুইয়ো গম্ বিলি মনে গুরিলুং।

যোহন 8:32

সিয়েন বাদে তুমি সত্যগানরে কোই পারিবা, আর সে সত্যগানে তমারে উদ্ধোর্ গুরিবো।”

প্রেরিত্‌ 11:30

তারা বার্ণবা আর শৌল আঢত্ যিহূদিয়া মন্ডলীগুনোর বুড়ো নেতাগুনো ইধু সেই সাহায্যগানি পাধেই দিলাক্।

রোমীয় 16:13

খ্রীষ্ট উগুরে গম্ বিশ্বেজি বিলিনে যিবের্ সুনাঙ্ আঘে সেই রূফরে আর তা মারে ভালেদি জানেয়ো। তা মাবো মইধু মঅ মা ধোক্ক্যেন।

গালাতীয় 2:14

মাত্তর্ মুই যেক্কে দেগিলুং, গম হবরর্ সত্যর্ লগে তারার্ কামর কনঅ মিল্ নেই সেক্কে মুই বেক্কুনো মুজুঙোত্ পিতররে কলুং, তুই যিহূদী ওইনেয়ো যেক্কে যিহূদী ধোক্ক্যেন গুরি ন-চলিনে অযিহূদীগুনো ধোক্ক্যেন চলর্ সেক্কে কেধোক্ক্যেন গুরিনে অযিহূদীগুনোরে যিহূদীগুনো ধোক্ক্যেন চলিবাত্যে বাধ্য গরর্ ?

গালাতীয় 2:5

মাত্তর্ গম হবরানর্ সত্যগান যেন তমাত্যে রোক্ষ্যে গুরি পারং সেনত্যে এক মুহূত্তত্যেয়ো আমি তারার্ কধানি মানি ন-লোই।

গালাতীয় 3:1

ও অবুঝ্ গালাতীয়গুন! কন্না তমারে যাদু গোজ্জ্যে? তমা ইধু দঅ গমেদালে প্রচার গরা ওইয়্যেদে যে, যীশু খ্রীষ্টরে ক্রুশোত্ দিয়্যে ওইয়্যে।

গালাতীয় 5:7

তুমি দঅ ভারী গমেডালে চোল্ল্য; মাত্তর্ সত্যর্ বাধ্য অদে কন্না তমারে মানা গুরিলো?

কলসীয় 1:5

স্বর্গত্ তমাত্যে যিয়েনি থুবেয়্যে আঘে সিয়েনি পেবার আজা তমা ইধু এ বিশ্বেজ্ আর কোচ্‌পানাগান জোর্মেয়্যে। যে গম্ হবরান, অত্তাৎ সত্যর্ কধাগান তমা ইধু লুম্মেগি সিয়েনি ভিদিরে তুমি এ আজাগানর্ কধা শুন্ন্য।

১ তীমথিয় 2:4

তে চায় যেন বেক্কুনে পাপত্তুন্ উদ্ধোর্ পান আর খ্রীষ্ট পৌইদ্যেনে সত্যগানরে মূড়োত্ পুরিনে বুঝি পারন্।

ইব্রীয় 10:26

গোজেনর্ সত্যগানরে জানানার্ পরেদি যুনি আমি ইচ্চ্যে গুরিনে পাপ গরানাত্ থেই সালে পাপত্যে আমার আর্ কনঅ উৎসর্ব নেই;

১ পিতর 1:2

বাবা গোজেনে তার্ পরিকল্পনা মজিম তমারে বেঈ লোইয়্যে, আর তার্ নাঙে পবিত্র আত্মা তমারে যুদো গুরি থোইয়্যে। ইয়েনর্ উদ্দেশ্য অলঅ, যেনে তুমি যীশু খ্রীষ্টর বাধ্য অ আর তার লো-গান ছিদেনার্ মাধ্যমে তমারে সিজি গরা অয়। গোজেনে তমারে বেশ্ গুরি দোয়্যে আর শান্তি দান গোরোক্।

১ পিতর 5:1

মুই খ্রীষ্টর্ দুঘ্ ভুগোনার সাক্ষী আর খ্রীষ্টর্ যে মহিমা ফগদাং অবঅ সিয়েনর্ ভাগী। সেনত্যে তমা ভিদিরে যিগুনে মন্ডলীর আজল্ নেতা তারারে মুই আর এক্কো আজল্ নেতা ইজেবে এ উপদেচ্‌‌চান দোঙর্-

১ পিতর 5:13

গোজেনে তমা সমারে যিগুনোরে বেঈ লোইয়্যে বাবিলর সেই মন্ডলীর্ মানুচ্চুনে তমারে পাত্তুরু তুরু জানাদন্, আর মর্ পুয়োবো মার্কেয়ো তমারে পাত্তুরু তুরু জানার্।

১ যোহন 2:21

সত্যগানরে কোই ন-পারঅ বিলি মুই যে তমা ইধু লিগিলুং সিয়েন নয়, মাত্তর্ তুমি সত্যগানরে কোই পারঅ আর ইয়েন-অ কোই পারঅ যে, সত্যত্তুন্ মিজে কধানি ন-এজে; আর সেনত্যে মুই তমা ইধু লিগিলুং।

১ যোহন 3:18

পুয়ো-ছা লগ্, আমি যেন বানা মুয়োর্ কোচ্‌পানা ন-দেগেইনে কামানিলোই ঘেচ্চ্যেকগুরি কোচ্‌পানা দেগেই।

২ যোহন 1:13

গোজেনর্ বেঈ লোইয়্যে তঅ বোনুনোর্ পুয়ো-ঝিগুনে তরে ভালেদি জানাদন্।

২ যোহন 1:5

আমি যেন একজন আরেকজনরে কোচ্‌পেই, ইয়েনই অলঅ তইধু মর্ কোজোলি। কোচ্‌পেইয়্যে বোন্নো, মুই যিয়েন লেগঙর্ সিয়েন কনঅ নুয়ো উগুম নয়, বরং এ উগুমান আমি পৌইল্যাত্তুন্ ধুরি পেইয়্যেই।

৩ যোহন 1:1

গোজেনর্ সত্যর্ কারনে মুই যিবেরে কোচ্‌পাং মর্ সেই পরাণর্ সমাজ্জ্যে গাইয় ইধু সেই বুড়ো নেতাবো মুই এ চিধিগান লেগঙর্।