১ শমূয়েল 4:3 - Chakma Bible

³ ইস্রায়েলীয় সৈন্যগুনে তারার তাম্বুলোত্ ফিরি যানার পরেন্দি তারার বুড়ো নেতাগুনে কলাক্, “পলেষ্টীয়গুনো ইদু কিত্তে লগেপ্রভু এচ্চ্যে আমারে ওদেই দিলো? আদঅ, আমি লগেপ্রভুর সাক্ষ্য-সুন্দুক্কো শীলোত্তুন্ লোই আনিই যেনে লগেপ্রভু আমা লগে থেইনে শত্রুগুনোর আঢত্তুন্ আমারে রোক্ষ্যে গরে।”

১ শমূয়েল 4:3 Iomraidhean Croise

২ শমূয়েল 15:25

বেক্‌ মানুচ্চুন নিগিলি যানার পরেন্দি রাজা সাদোকরে কলঅ, “গোজেনর সুন্দুক্কো শঅরত্‌ ফিরেই নেযা। লগেপ্রভু যুনি মরে কোচপানার্‌ চোগেন্দি দেগে সালে তে মরে ফিরেই আনিবো আর এ সুন্দুক্কো আর তার থেবার জাগাগান আরঅ মরে চেবাত্তে দিবো।

১ বংশধর 17:1

রাজঘরত্‌ বজত্তি গুরিবার অক্তত্‌ একদিন্যে দায়ূদ ভাববাদী নাথনরে কলঅ, “মুই ইক্কিনে এরস গাজ ঘরত্‌ বজত্তি গরঙর্‌ মাত্তর্‌ লগেপ্রভুর সুদোম-সুন্দুক্কো রোইয়্যেদে এক্কান তাম্বুলো ভিদিরে।”

গীতসংহিতা 74:1

ও গোজেন, তুই উমরত্যে কিত্তে আমারে ফেলেই যেয়োচ্? তর্ চড়েদে জাগানর্ ভেড়াগুনোর বিরুদ্ধে কিত্তে তর্ রাগর আগুনান্ ধূমেই উদের্?

গীতসংহিতা 74:11

কিত্তেই তুই তর্ আঢ্‌তান, সেই ডেন্ আঢ্‌তান লুগেই রাগেয়োচ্? সিয়েন বুগো ভিদিরেত্তুন নিগিলেই আনিনে তারারে শেজ্ গুরি দে।

যিশাইয় 50:1

লগেপ্রভু কত্তে, “মুই যে ছুড়্ কাবোজ্‌চান দিইনে তমা মাবোরে দূর্ গুরি দুয়োং সিয়েন কুদু? মর্ লোনদিয়্যেগুনোর ভিদিরেত্তুন্ কাইদু মুই তমারে বিজি দুয়োং? তমা পাপত্তে তুমি বেজা যেইয়ো; তমা অন্যেয়ত্তে তমা মাবোরে দূর্ গরা ওইয়্যে।

যিশাইয় 58:3

তারা কন্, আমি উবোস্ থেইয়্যেই আর তুই সিয়েন ন-চেলে কিত্তে? আমি দুঘ্ স্বিগের্ গোজ্যেই আর তুই সিয়েন খিয়েল্ ন-গুরিলে কিত্তে? মাত্তর্ চঅ, তমা উবোস্ থেবার দিন্নোত্ তুমি দঅ নিজোরে বুঝেই রাগঅ, আর তমার বেক্ কামগুরিয়্যেগুনো উগুরে অত্যেচার গুরি থাগঅ।

যিশাইয় 59:1

চঅ, লগেপ্রভুর আঢ্‌‍‌‌‌তান এদক্ বাদি নয়দে যে, তে উদ্ধোর্ গুরি ন-পারে; তা কানান্‌অ এদক্ গুয়োর্ নয় যে, তে ন-শুনে।

যিশাইয় 59:2

মাত্তর্ তমা ভান্ন্যেয়ানিয়ে লগেপ্রভুত্তুন্ তমারে ফারগ্ গুরি দিয়্যে। তমা পাপত্তে তে তা মুয়োন তমাত্তুন্ ফিরেই নেযেয়্যে; সেনত্তে তে ন-শুনে।

যিরমিয় 3:16

সে অক্তত্ মুই যেক্কে দেজত্ তমা মানুচ্চুন বেশগুরি বাড়েই দিম্ সেক্কে মান্‌জ্যে আর্ লগেপ্রভুর সুদোম-সুন্দুক্কো পৌইদ্যেনে ন-কবাক্। তা কধানি কনদিন্‌অ তারার মনত্ ন-পড়িবো বা ইদোত্‌অ ন-থেবঅ; তার আর দরকার ন-অবঅ বা অন্য আর এক্কো বানায়ো ন-অবঅ।

যিরমিয় 7:4

লগেপ্রভুর ঘরর নাঙান্দোই বার বার যে মিজে কধা কুয়ো অয় তুমি সিয়েন বিশ্বেজ্ ন-গোজ্য।

গণাণা 10:33

ইঙিরিনে ইস্রায়েলীয়গুনে লগেপ্রভুর মুড়োবো ইত্তুন্‌ আদা মারিনে তিন দিনোর পদথ্‌ উজেই গেলাক্। তারা ঝিরেবাত্তে এক্কান্‌ জাগা তোগেইনে নিগিলেবার্‌ আজাই সেই তিন দিন সং লগেপ্রভুর বেবস্থা-সুন্দুক্কো তারার্‌ আগে আগে যাহ্ ধুরিলো।

গণাণা 10:35

যেক্কে সাক্ষ্য-সুন্দুক্কো যাহ্ ধুরিদো সেক্কে মোশি কদঅ, “ও লগেপ্রভু, উঠ্‌। তর্‌ শত্রুগুনে বেক্কুন ছিদি পোত্তোক্‌ আর যিগুনে তরে ঘিনাইদে চোগেন্দি দেগন্‌ তারা তর্‌ মুজুঙোত্তুন্‌ ধেই যাদোক।”

গণাণা 31:6

মোশি পত্তি গুট্টিত্তুন্‌ এক আজার্ গুরি মানুচ্‌ নেযেইনে তারারে যুদ্ধোত্‌ পাধেই দিলো। তারা সমারে ধর্মগুরু ইলিয়াসরর্‌ পূঅ পীনহসে গেলঅ। ইজিরে দিবার তূরীগুন্‌ আর কয়েক্কো সুদ্ধো-সাংগ জিনিস তে লগে নেযেল।

দ্বি’লম্বর বিররণ 29:24

সিয়েন দেগিনে অন্য বেক্‌ জাদ্‌তুনে পুযোর্ গুরিবাক, লগেপ্রভু কিত্তে এ দেজ্‌ছানরে এ দজা গুরিলো? কিত্তে তাঁর এই জোল্‌জোল্যে রাগ?

দ্বি’লম্বর বিররণ 31:26

“রীদি-সুদোমর্ এ বোইবো নেযেইনে তুমি তমার গোজেন লগেপ্রভুর সুদোম-সুন্দুগোর কায়কুরে রাগঅ। ইবে ইস্রায়েলীয়গুনোর বিরুদ্ধে সাক্ষী ওইনে সিয়েনত্ থেবঅ।

২ তীমথিয় 3:5

বারেদি চেঙারাগান দেগিনে মনে অবঅ যেন গোজেনরে তারা কত্তমান ভোক্তি গরন, মাত্তর্ আজলে গোজেন ভোক্তির্ খেমতাগানরে তারা অস্বিগের্ গরন্। এবাবোত্যে মানুচ্চুনোত্তুন্ দূরোত্ থেইস্।

ইব্রীয় 9:4

এ ভাগ্‌কানত্ আগর্‌বাট্টি জ্বালেবাত্যে সনার্ ডালিপূজো আর সাক্ষ্য সুন্দুক এলঅ। সিবের্ চেরোকিত্যেদি সনালোই বেড়েয়্যে এলঅ। সিবে ভিদিরে এলঅ সনার্ পিলেত্ থোইয়্যে মান্না, হারোণর যে লুদিক্কোত্ ফুল ফুট্যে সেই লুদিক্কো, আর বেবস্থা-লেগা দ্বিয়েন পাত্তর আরুগ্।

যিহোশূয় 6:6

সেক্কে নূনর পূঅ‌ যিহোশূয় ধর্মগুরুগুনোরে ডাগিনে কলঅ, “তুমি সাক্ষ্য-সুন্দুক্কো তুলি নেযঅ‌ আর সাতজন ধর্মগুরু সাত্‌তো বাশি লোইনে লগেপ্রভুর সুন্দুগোর আগে আগে যঅ।”

যিহোশূয় 7:7

যিহোশূয় কলঅ‌, “ও প্রভু লগেপ্রভু, তুই কিত্যে আমার এ জাদ্‌তোরে যর্দন গাঙান্‌ পার্‌ গুরি আনিনে ভস্ত গুরিবাত্তে ইমোরীয়গুনোর আদত্‌ তুলি দিলে? হায়, আমি যুনি যর্দনর ওপারত্‌ থেদং গম্‌ থেদং!

যিহোশূয় 7:8

ও প্রভু, ইস্রায়েলীয়গুনে শত্রুগুনো ইদু ঊদি যেইনে ধেই এজানার পরেন্দি মত্তুন্‌ আর কবার্ কি আঘে?

১ পিতর 3:21

ইয়েন অলঅ বাপ্তিষ্মর এক্কান ফটু যিয়েন ইক্কিনে তমারে উদ্ধর গরে। বাপ্তিষ্মগানে যে তমা কিয়্যেগানত্তুন্ পের্‌গা দূর্ গরে সিয়েন নয়; গোজেন ইধু ইয়েন এক্কান সাব্ বিবেগর্ ইংগিত। যীশু খ্রীষ্টর মরণত্তুন্ জেদা ওইনে উদোনার্ মাধ্যমে তমারে উদ্ধোর্ গরা অয়।

যিহূদা 1:5

তুমি খালিক্ এ বেপারানি গমেডালে কোই পারঅ; তো মুই তমারে এ কধাগান ইদোত্ তুলি দিবাত্যে চাং, মিসর দেজত্তুন্ ইস্রায়েলীয়গুনোরে উদ্ধোর্ গুরি আনিবার পরেদি যিগুনে বিশ্বেজ্ ন-গরন প্রভু তারারে ভস্ত গোজ্জ্যে।

১ শমূয়েল 1:24

পূঅবোরে দুধ এরানার পরেন্দি হান্না তিন্নো দামাড়া গোরু, আদার কেজি মোইদে, চামর্‌ থৈইলেত্‌ গুরিনে এক থৈল্যে আংগুর-রস আর পূঅবোরে লগে নেযেইনে শীলোদত্ লগেপ্রভুর ঘরত্‌ গেলঅ। পূঅবো সেক্কেয়ো চিগোন এলঅ।

১ শমূয়েল 14:18

শৌল সেক্কে অহিয়রে কলদে, “তুই গোজেনর সুন্দুক্কো আন্‌।” (সেই অক্তত্‌ সুন্দুক্কো ইস্রায়েলীয়গুনো ইদু এলঅ।)

১ শমূয়েল 4:2

পলেষ্টীয়গুনে ইস্রায়েলীয়গুনোর বিরুদ্ধে যুদ্ধো গুরিবাত্তে সৈন্য সাজেলাক্। যুদ্ধোগান যেক্কে চেরোকিত্তে ছিদি পড়িলো সেক্কে ইস্রায়েলীয়গুনে পলেষ্টীয়গুনো ইদু উদিই গেলাক্। যুদ্ধোর মাদঠ্‌ পলেষ্টীয়গুনে প্রায় চের আজার ইস্রায়েলীয় সৈন্যরে মারে ফেলেলাক্।