১ শমূয়েল 2:8 - Chakma Bible

⁸ তে নাদামান্‌জ্যরে ধুল্যেত্তুন তুলে, আর অভাবীরে তুলে ছেইয়োর কুরোত্তুন্। দাঙর্‌ পোজিশন মান্‌জ্যর্ লগে তে তারারে ববাত্তে দে, আর সর্মানর সিংহাসন দে; কিত্যে পিত্‌থিমীর খুদো বেক্কুন লগেপ্রভুরই, তে সিগুনো উগুরে দুনিয়েগানরে থিদেবর্ গোজ্যে।

১ শমূয়েল 2:8 Iomraidhean Croise

পত্থম 41:14

সেক্কে ফরৌণ যোষেফরে ডাগি আনিবাত্তে মানুজ্‌ পাদেল, আর তারা যাদিগুরি জেলখানাত্তুন্‌ তারে নিগিলেই আনিলাক্। যোষেফে দাড়ি কাবিনে কাবড়-চুগোর্‌ বুদুলিনে ফরৌণ মুজুঙোত্ যেইনে আঝিল্ অলঅ।

পত্থম 41:40

সেনত্তে রাজঘরর্‌ বেক ভারান তত্তুন লঅ পড়িবো। তঅ মুয়োর্‌ উগুম্‌ মানিনে মর্‌ বেক্‌ মানুচ্চুনে চুলিবাক্। বানা রাজা ইজেবে মুই তঅ উগুরে থেম্।”

২ শমূয়েল 7:8

ইক্কিনে তুই মঅ চাগর দায়ূদরে কঅ, বেগত্তুন্‌ খেমতাবান লগেপ্রভু এ কধাগান কত্তে, মঅ মানুচ্‌ ইস্রায়েলীয়গুনোর শাজন্‌গুরিয়্যে অবাত্তে মুয়ই তরে এ্যমান চোড়েবার্‌ হলাত্তুন্‌, ভেড়া পালর্‌ পিচ্ছোত্তুন্‌ অান্যং।

১ রাজাবলী 16:2

“ও বাশা, মুই তরে ধূল্যেত্তুন্‌ তুলি আনিনে মঅ মানুচ্‌ ইস্রায়েলীয়গুনোর নেতা বানেয়োং। মাত্তর্‌ তুই যারবিয়ামর্‌ পধেন্দি যর্‌ আর মঅ মানুচ্‌ ইস্রায়েলীয়গুনোরে দিইনে পাপ গোরেয়োচ্‌ আর সে পাপর্‌ কারণে মরে বেজার্ গোজ্যচ্‌।

২ রাজাবলী 9:6

সেক্কে যেহূ উদিনে ঘরঅ ভিদিরে গেলঅ। সেক্কে সে ভাববাদীবো যেহূর মাধাবোত্‌ সে তেলান্‌ ঢালিনে কলঅ, “ইস্রায়েলর গোজেন লগেপ্রভু এ কধাগান কোইয়্যেদে, ‘লগেপ্রভুর মানুচ্চুনো উগুরে, অত্তাৎ ইস্রায়েলর উগুরে রাজা ইজেবে মুই তরে অভিষেগ্ গুরিলুঙ্‌।

ইয়োব 1:21

“মা পেদত্তুন্‌ মুই লাংটা-বাংটা এচ্ছোং আর লাংটা-বাংটা যেম্‌। লগেপ্রভুই দিয়্যে আর লগেপ্রভুই নেযেয়্যে; লগেপ্রভুর বাঈনী ওক্‌।”

ইয়োব 2:8

সেক্কে ইয়োবে ছেইয়োর সংমোধ্যে বজিনে সার্‌ভাঙালোই নিজো কিয়্যেগান্‌ ঘজা ধুরিলো।

গীতসংহিতা 102:25

ভালোক্ বজর আগে তুই পিত্‌থিমীর গড়াগান গারেয়োচ্; দেবাবোয়ো তঅ আঢ্‌তোই বানেয়্যে।

গীতসংহিতা 104:5

তুই পিত্‌থিমীগানরে তা নিজো গড়াগান উগুরে থিদেবর্ গোজ্যস্; সিয়েন কনদিন্‌অ ন-লুড়িবো।

গীতসংহিতা 107:41

মাত্তর্ তে নাদা মানুচ্চুনোরে গমেডালে রাগায়, ভেড়া পাল ধোক্ক্যেন্ তারার পুয়ো-ছাগুনোরে বাড়ায়।

গীতসংহিতা 24:2

কিত্যে তেয়ই গভীন্ পানি উগুরে পিত্‌‌থিমীর গোড়াগান গাড়েল, আর সেই পিত্‌‌থিমীর মাদিগান তলেদি পানি উগুরে ধুরি রাগেল।

গীতসংহিতা 75:3

পিত্‌থিমী আর তার মানব-সমাজর সুদোমানি যেক্কে ভাঙি যায়, সেক্কেনে মুয়ই তার খুদোগুন টিগেই রাগেয়োং।

গীতসংহিতা 75:4

“মুই বার্‌বোগুনোরে কং, ‘বার্‌বো ন-গোজ্য,’ আর পাজিগুনোরে কং, শিঙুন্ ন-পাত্যেয়ো।

গীতসংহিতা 75:7

মাত্তর্ গোজেনে বিচের গরে; তে একজনরে তলে লামায় আর আর একজনরে উগুরে তুলে।

উপদেশক 4:14

সে গাবুজ্যেবো যুনিয়ো সে রেজ্যর্ এক্কো নাঢা পরিবারত্ জোর্মেয়্যে তো তে জেল্‌খানাত্তুন্ নিগিলিনে যেরেদি রাজা ওইয়্যে।

যিশাইয় 22:23

এক্কান দরমর জাগাত্ মুই তারে খুদো ধোক্ক্যেন গুরি লাগেই দিম্, তা বাব বংশবোত্তে তে অবদে এক্কান সর্মানর মানুচ্।

দানিয়েল 2:48

সে পরেদি দানিয়েলরে রাজা এক্কান দাঙর্ পোজিশন্ দিলো আর বোউত্ গম্ গম্ বক্‌‌‌শিজ্ দিলো। তে তারে গোদা বাবিল রেজ্যর্ আজল্ পরিচালক ইজেবে নেযেল আর তার্ বেক সল্লাদিয়্যেগুনোর্ ভারান্ তা উগুরে দিলো।

দানিয়েল 4:17

যে রায়য়ান দিয়্যে অলঅ সিয়েন চুগিদারুনে, অত্তাৎ পবিত্র দূত্‌‌‌‌‌‌তুনে ফগদাং গত্তন্, যেনে জেদা মানুচ্চুনে হবর্ পান যে, মান্‌জ্য রেজ্যনি উগুরে দাঙর্ গোজেনে সদ্দারি গরে আর তে যিবেরে হুজি তারে রেজ্য দান গরে আর মান্‌‌‌‌‌‌‌জ্য ভিদিরে বেগত্তুন্ যে তলে তারে তে উগুরে বজায়‌‌‌‌।

দানিয়েল 6:3

দানিয়েলে নিজোর্ গুণোত্তে অন্য রাজ-পরিচালক আর রেজ্যর্ শাজন্‌গুরিয়্যেগুনোত্তুন্ নিজোরে আরঅ গম্ বিলি প্রমাণ গুরিলো। সিয়েনর্ কারনে মহারাজে তারে গোদা রেজ্যগানি উগুরে নেযেব বিলি ঠিগ্ গুরিলো।

ইব্রীয় 1:3

গোজেনর্ বেক্‌ গুণানি সেই পুয়োবো ইধু আঘে; পুয়োবোই গোজেনর্ পুরো ফোটু ধোক্ক্যেন। পুয়োবো তার্ খেমতাবলা কধালোই বেক্কানি ধুরি রাগেইনে পরিচালনা গরে। মান্‌জ্যর পাপ্পানি দূর্ গরানার্ পরে পুয়োবো স্বর্গত্ মহান গোজেনর্ ডেন্ ধাগেদি বজিলো।

যাকোব 2:5

মর্ কোচ্‌‌পেইয়্যে ভেইয়ুন্, শুনো। এই জগদর্ চোগেদি যিগুনে নাঢা মানুচ্, বিশ্বাজে তাগোয়্যে অবাত্যে গোজেনে কি তারারে বেঈ ন-লয়? যিগুনে গোজেনরে কোচ্‌পান সিগুনোরে তে যে রেজ্যগান দিবার্ এগেম্ গোজ্জ্যে সেই রেজ্যগানর্ অধিকারী অবাত্যে এই নাঢা মানুচ্চুনোরে কি তে বেঈ ন-লয়?

ফগদাং পেইয়্যে 1:6

তে আমারে নিইনে এক্কান রেজ্য বানেয়্যে আর তার বাব আর গোজেনর্ সেবাত্যে ধর্মগুরু বানেয়্যে। উমরত্যে যীশু খ্রীষ্টর নাঙে বাঈনী ওক্‌ আর উমরত্যে তা খেমতাগান থোক্। আমেন।

ফগদাং পেইয়্যে 22:5

রেত্ আর ন-থেবঅ আর তারার্ আর চেরাগ পহ্‌র বা বেল পহ্‌রর্ দরকার ন-অবঅ, কিয়া প্রভু গোজেনে নিজেই তারার পহ্‌র অবঅ। তারা উমর্ সং রাজাগিরি গুরিবাক্।

ফগদাং পেইয়্যে 3:21

“মুই জিদিনেই যেধোক্ক্যেন গুরি মঅ বাবা সমারে তা সিংহাসনানত্ বোস্যং, ঠিগ্ সেধোক্ক্যেন যে জিদিবো তারে মুই মঅ সমারে মঅ সিংহাসনানত্ বুজিবার্ অধিকার দিম।

ফগদাং পেইয়্যে 5:10

তুই তারারে লোইনে এক্কান রেজ্য বানেয়োচ্ আর আমা গোজেনরে সেবা গুরিবাত্যে ধর্মগুরু বানেয়োচ্। পিত্‌‌থিমীত্ তারা রাজাগিরি গুরিবাক্।”

১ শমূয়েল 15:17

শমূয়েলে কলঅ, “একদিন তুই নিজোর্ চোগেন্দি চিগোন্‌ এলে, মাত্তর্‌ তো কি তুই ইস্রায়েলীয়গুনোর বেক্‌ গুট্টিগুনোর চেলা ন-অচ্‌? লগেপ্রভুই তরে ইস্রায়েল দেজ উগুরে রাজা ইজেবে অভিষেগ্ গোজ্যে।