১ শমূয়েল 2:30 - Chakma Bible

³⁰ “সেনত্তেই ইস্রায়েলীয়গুনোর গোজেন লগেপ্রভু কত্তে, ‘মুই হামাক্কায় কোইয়োঙে, তর্‌ আর তর্‌ পুরোণি মানুচ্চুনোর বংশর মানুচ্চুনে সারা জিংকানিবর্‌ মর্‌ সেবা কাম গুরিবাক্’; মাত্তর্‌ ইক্কিনে লগেপ্রভু কত্তে, ‘সিয়েন আর ন-চলিবো। যিগুনে মরে সর্মান গুরিবাক্ মুই তারারে সর্মান গুরিম আর যিগুনে মরে ঈচ্ গুরিবাক্ তারারে ঈচ্ গরা অবঅ।

১ শমূয়েল 2:30 Iomraidhean Croise

১ রাজাবলী 11:11

সেনত্তে লগেপ্রভু শলোমনরে কলঅ, “তর্‌ এ বেবহারত্তে আর মর্‌ দিয়্যে বেবস্থা আর সুদোম অমান্য গরানাত্তে মুই হামাক্কাই তত্তুন্‌ রেজ্যগানি কারি লোইনে তর্‌ ইক্কো চাগররে দিম্‌।

১ রাজাবলী 2:27

এসাইন্যাগুরি শলোমনে অবিয়াথররে লগেপ্রভুর ধর্মগুরু পধত্তুন্‌ সোরেই দিলো। লগেপ্রভু শীলোত্‌ এলির গুট্টিগুনো পৌইদ্যেনে যিয়েনি কোইয়্যে তার্‌ সেই কধানি এবাবোত্যেগুরি পূরোণ অলঅ।

১ বংশধর 17:18

তঅ চাগর্‌ মরে যে সর্মানান দেগেলে সেক্কে মুই তইদু আর বেশ্‌ কি কোই পারিম্‌? তুই দঅ তঅ চাগর্‌বোরে হবর্‌ পাজ্‌।

২ বংশধর 15:2

সেক্কে অসরিয় আসার লগে দেগা গুরিবাত্তে যেইনে কলঅ, “ও আসা, ও যিহূদা আর বিন্যামীনর বেক্‌ মানুচ্চুন্‌, মঅ কধাগান শুনো। তুমি যেদকদিন লগেপ্রভুর লগে থেবা সেদকদিন তেয়ো তমা লগে থেবঅ। তা আওজ্‌চান্‌ জানিবাত্তে চেলে তুমি সিয়েন্‌ জানি পারিবা, মাত্তর্‌ তারে যুনি ছাড়ি যঅ সালে তেয়ো তমারে ছাড়ি যেবঅ।

২ বংশধর 26:18

তারা তারে মানা গুরিবাত্তে কলাক্‌, “উষিয়, লগেপ্রভুর নাঙে আগর্‌বাট্টি জ্বালেবার অধিকার তর্‌ নেই। হারোণর বংশধরুন, যিগুনোরে আগর্‌বাট্টি জ্বালেবাত্তে ফারক্‌ গরা ওইয়্যে, সে ধর্মগুরুগুনোর অধিকার আঘে। এ সুদ্ধো-সাংগ জাগানত্তুন্‌ তুই নিগিলি যাহ্, কিত্তে তুই পাপ গোজ্যস্‌। ইয়েনত্তে গোজেন লগেপ্রভু হামাক্কাই তরে সাজা দিবো।”

গীতসংহিতা 18:20

মর্ ন্যায় কাম্ মজিম্ লগেপ্রভু মরে দান গুরিলো, মঅ কামর্ সিজি মজিম্ বক্‌শিজ্ দিলো;

গীতসংহিতা 18:26

গম্ মানুচ্চুনো সমারে গম্ বেবহার গর্, আর কুজুরোমিগুনোরে দেগা তর্ বুদ্ধির্ খেলা।

গীতসংহিতা 50:23

যিবের জিংকানিত্ ভালেদিগানই অলঅ তার উৎসর্ব তেয়ই মরে সর্মান গরে; যে মঅ পধেন্দি আঢে তারে মুই উদ্ধোর গুরিম।”

গীতসংহিতা 73:20

ঘুম ভাঙিলে মানজ্যর্ স্ববনান্ যেধোক্ক্যেন তুচ্চো ওই যায়, সেধোক্ক্যেন ও প্রভু, তুই জাগিলে তারায়ো তইদু তুচ্চো ওই যেবাক্।

গীতসংহিতা 91:14

লগেপ্রভু কোইয়্যেদে, “কোচ্‌পানালোই যে মরে আজাবোধে ধোজ্যে, তারে মুই রোক্ষ্যে গুরিম; মুই তারে দজাত্ ন-ফেলেম, কিত্তে তে মরে ঘেচ্ছেক্‌গুরি চিন্যে।

গীতসংহিতা 91:15

তে মরে ডাগিলে মুই তারে শমক্ দিম; দযাত্ মুই তা সমারে থেম্; তারে মুই রোক্ষ্যে গুরিম আর সর্মানর জাগা দিম্।

যাত্রা 28:43

হারোণ আর তার্‌ পূঅগুনে যেক্কে মিলন-তাম্বুলত চোমেবাক্‌ বা পবিত্র জাগার্‌ ডালিপূজোত্‌ সেবা কাম্‌ গুরিবাত্যে উজেই যেবাক্ সেক্কে তারা এই জাংগিগুন্‌ পিনিবাক্‌। সেক্কে তারা দুষ্‌নেইয়্যে গুরি থেবাক্‌ আর মারা ন-পুড়িবাক্‌। হারোণ আর তার্‌ বংশধরুনোত্তে ইয়েনই অবঅ‌ এক্কান জিংকানিবর্‌ সুদোম।

গম্ উপদেজ্ 12:8

মান্‌জ্যে যেবাবোত্যেগুরি বুদ্ধি খাদান্ সেই মজিম্ নাঙ্ গিনেনাগান্ পান, মাত্তর্ কুজুরো মন মানুচ্চুনোরে ঈচ্ গরা অয়।

গম্ উপদেজ্ 4:8

জ্ঞানানরে পত্তমে রাগা, তেয়ই তরে অজলত্ তুলিবো; তারে আজাবোদে ধর্, তে তরে সর্মান দিবো।

গম্ উপদেজ্ 8:17

যিগুনে মরে কোচ্‌পান মুইয়ো তারারে কোচ্‌পেম; যিগুনে মনদিইনে মরে তগান্ তারা মরে পান্।

যিশাইয় 29:13

প্রভু কোইয়্যেদে, “এ মানুচ্চুনে মুয়োদি মরে উবোসনা গরন্ আর মুয়োদি মরে সর্মান গরন্, মাত্তর্ তারার্ মনানি মত্তুন্ দূরোত্ থায়। তারা বানা মান্‌জ্যর শিগেয়্যে সুদোম্বোই মরে উবোসনা গরন্।

যিরমিয় 29:32

মুই হামাক্কায় নিহিলামীয় শময়িয় আর তা বংশধরুনোরে সাজা দিম। এ জাদ্‌‌‌তো ভিদিরে তার কনজন ন-থেবাক্ আর মুই মঅ মানুচ্চুনোত্তে যেদক্কানি ভালেদি গুরিম সিয়েনঅ তে ন-দেগিবো, কিত্তে তে মঅ বিরুদ্ধে উল্লোমী ফগদাং গোজ্যে। মুই লগেপ্রভু এ কধাগান কঙর্।’ ”

যিরমিয় 49:15

লগেপ্রভু কোইয়্যেদে, ইক্কিনে মুই জাদ্‌‍‍তুনো ভিদিরে তরে বেগত্তুন চিগোন্ বানেম আর মানুচ্চুনো ভিদিরে ঈচ্ গরেদে বাবোত্যে গুরিম।

যিহিষ্কেল 34:10

মুই প্রভু লগেপ্রভু কঙর্, মুই গরগ্‌‌কুনোর বিপক্ষে; মুই তারার্ আঢত্তুন্ মর্ ভেড়াগুনোরে আদায় গুরি নেযেম। মর্ পাল চরানার্ কামত্তুন্ মুই তারারে সোরেই দিম যেনে তারা আর নিজে লাভবান ওই ন-পারন্। তারা মুয়োত্তুন্ মুই মঅ পালুন্ রোক্ষ্যে গুরিম আর ভেড়াগুন আর্ তারার হানা ন-অবাক্।

দানিয়েল 4:34

সে সময়ান শেজ্ ওই গেলে পরেদি মুই নবূখদ্‌নিৎসর স্বর্গ ইন্দি রিনি চেলুং আর মর্ মনান্ গম্ পেলুং। সেক্কে মুই মহান গোজেনরে বাঈনী গুরিলুং; যিবে উমরত্যে বাঁজি আঘে মুই তারে সর্মান দেগেলুং আর তারে নাঙ্ গিনিলুং। মুই কলুং, “গোজেনর রেজ্যগান উমরর্ রেজ্য; তাঁর রাজাগিরি যুগে যুগে থিদেবর্ গোজ্যে।

মালাখি 1:6

বেগত্তুন্ খেমতাবলা লগেপ্রভু কত্তে, “পুয়ো তা বাবরে আর চাগর্ তা গিরোজোরে সর্মান গরে। যুনি মুই বাপ্ ওই থাং সালে মুই পাঙ্গে সর্মানান্ কুদু? যুনি গিরোজ্ ওই থাং সালে মর্ পাওনা শ্রদ্ধাগান্ কুদু? ও ধর্মগুরুগুন, তুমি মরে ঈচ্ গোজ্য। মাত্তর্ তুমি কত্তে, ‘আমি কেধোক্ক্যেনগুরি তরে ঈচ্ গোজ্যেই?’

মালাখি 2:3

তমাত্যে মুই তমা বংশধরুনোরে সাজা দিম; তমা পরবর্ উৎসর্বর য়েমানুনোর্ কাজরানি মুই তমা মুয়োত্ লিবি দিম আর সেই কাজরান্ সুমুত্তো তমারে দূর্ গুরি দিয়্যে অবঅ।”

গণাণা 11:20

পুরো একমাস সং হেবা। সেক্কে সেই য়েরাগান্‌ তমার্‌ নাগন্দি নিগিলি এবঅ আর য়েরালোই তমার্‌ ন-রুচ্যে মু-অবঅ। এদক্কানি অবঅ কারন যিবে তমা ভিদিরে আঘে সেই লগেপ্রভুরে তুমি অগ্রাজ্য গোজ্য আর তা মুজুঙোত্‌ কাঁনি কাঁনি কোইয়ো, মিসর দেজ্‌চান্‌ ফেলেই এজানা তমার্‌ উজিত্‌ ন-এলঅ।

গণাণা 35:34

তুমি যে দেজত্‌ থেবা মুইয়ো সিদু থেম্‌ বিলি সেই দেজ্‌ছান ফি-বলা গুরি ন-পারিবা। মুই লগেপ্রভু ইস্রায়েলীয়গুনো ভিদিরে বজত্তি গরঙর্‌।”

যোহন 12:26

কনজনে যুনি মরে সেবা গুরিবাত্তে চায় সালে তে মঅ পধেদি চোলোক্। মুই যিধু আঘং মর্ সেবাগুরিয়্যেবোয়ো সিধু থেবঅ। কনজনে যুনি মরে সেবা গরে সালে বাবা তারে সর্মান গুরিবো।

যোহন 5:23

যেন বাবরে যেবাবোত্যেগুরি বেক্কুনে সর্মান গরন্ সেবাবোত্যেগুরি পুয়োবোরেয়ো সর্মান গরন্। পুয়োবোরে যে সর্মান ন-গরে, যে তারে দিপাধেয়্যে সেই বাপ্পোরেয়ো তে সর্মান ন-গরে।

যোহন 5:44

তুমি একজন অন্যজনত্তুন্ বাঈনী পেবার্ আজা গরঅ, মাত্তর্ যে বাঈনীগান্ বানা গোজেনত্তুন্ পাহ্-যায় সিয়েনর্ চেট্ট্যায়ো ন-গরঅ। ইয়েনর্ পরেদি তুমি কিবাবোত্যেগুরি বিশ্বেজ্ গুরি পারঅ?

যোহন 8:49

যীশু জোবত্ কলঅ, “মরে ভুদে ন-পায়। মুই মঅ বাবারে সর্মান গরং, মাত্তর্ তুমি মরে অসর্মান্ গরর্।

১ করিন্হীয় 4:5

সেনত্তে প্রভু এবার্ আগেদি, অত্তাৎ সেই ঠিগ্ গোজ্জ্যে সময়ানর্ আগে তুমি কনঅ কিচ্চু দুষ্ ধুরিবাত্তে ন-যেয়ো। আন্ধারত্ যিয়েন লুগেইয়্যে আঘে তেয়ই সেক্কে সিয়েন পহ্‌রত্ আনিবো আর মান্‌জ্য মনর্ গুমুরো কধানি ফগদাং গুরিবো। সেই অক্তত্ গোজেনত্তুন্ যে যার্ পাওনার্ বাঈনী পেবাক্।

১ পিতর 1:7

এ পোরোক্ষ্যেগানি এজে যেন তমা বিশ্বেজ্‌চানি খাটি বিলি প্রমাণ অয়, আর সিয়েনত্যে যীশু খ্রীষ্ট ফগদাং অবার্ সময়োত্ তুমি নাঙ্ গিনো, বাঈনী গরঅ আর সর্মান পঅ। যে সনাগান ক্ষয় ওই যেবঅ সিয়েনরেয়ো আগুনোত্ খাটি গুরি নেযা অয়; মাত্তর্ তমার বিশ্বেজর্ দামান্ দঅ সেই সনাত্তুন্অ আরঅ বেশ্।

বিচের গুরিয়্যেগুন 9:10

ইয়েনর্ পরেন্দি গাছ্‌‌‌‌চুনে ডোমোর্‌ গাছ্‌‌‌‌সোরে কলাক্‌, তুই আমার রাজা অ।