১ শমূয়েল 14:6 - Chakma Bible6 যোনাথনে তার বন্দুক বোইয়্যে গাবুজ্যেবোরে কলদে, “আদঅ, আমি উই পারত্ সেই চুনুগুলোবো তনা ন-গোজ্যে মানুচ্চুনোর তাম্বুলোত্ যেই। অয়ত লগেপ্রভু আমাত্তে কিজু গুরিবো, কিত্যে তে তার নিজোর মনে মন্জক্কাগুরি কম মানুচ্চোই ওক্ বা বেশ্ মানুচ্চোই ওক্ জিদি যেই পারে।” Faic an caibideil |
১ শমূয়েল 14:6
31 Iomraidhean Croise
সেক্কে আসা তার্ গোজেন লগেপ্রভুরে ডাগিনে কলঅ, “ও লগেপ্রভু, তুই যেধোক্ক্যেন বোলী মানুচ্চুনোরে বল্ দি থাচ্ সেধোক্ক্যেন দঅ বল্নেইয়্যে মানুচ্চুনোরেয়ো বল্ দি পারচ্। সেনত্তেই ও আমা গোজেন্ লগেপ্রভু, আমারে বল্ দে, কিত্তে আমি তঅ উগুরে বিশ্বেজ্ গুরিই আর তর্ নাঙে আমি এ দাঙর্ সৈন্যদল বিরুদ্ধে এচ্ছ্যেই। ও লগেপ্রভু, তুয়ই আমার্ গোজেন, মানুচ্চুনোরে তর্ বিরুদ্ধে জিদিবাত্তে ন-দিস্।”
লগেপ্রভু কোইয়্যেদে, “এমন দিন এজের্ যেক্কে মুই মিসর, যিহূদা, ইদোম, অম্মোন, মোয়াব আর ধূল্যেচর-চাগালাত্ বজত্তি গুরিয়্যে যিগুনে মাঢাবোর দ্বি ডাগেদি চুল কাবন্ তারারে বেক্কুনোরে সাজা দিম। তারারে বানা কিয়্যেদি চুনুগুলোবোর মাঢাবো চামান্ কাবা ওইয়্যে, মনেদি চুনুগুলোবোর্ মাঢাবোর্ চামান্ কাবা ন-অয়; আর ইস্রায়েলীয়গুনোরেয়ো মনেদি চুনুগুলোগুনোর্ মাঢাগুনোর্ চামান্ কাবা ন-অয়।”
শৌল সেক্কে তার অাত্যের্ বুয়োইয়্যে মানুচ্চোরে কলঅ, “তর্ লাম্বা ছুড়িগান নিগিলেনে মর্ কিয়্যেগান এফুর্-উফুর্ গুরি দে। সিয়েন ন-গুরিলে সেই চুনুগুলোবোর্ মাঢাবোর চামান্ ন-কাপ্যে মানুচ্চুনে এইনে মর্ কিয়্যেগান এফুড়-উফুড় গুরিবাক্ আর মরে অগমান গুরিবাক্।” মাত্তর্ তার অাত্যের্ বোইয়্যেবো সিয়েন্ গুরিবাত্যে রাজী ন-অলঅ, কিত্যে তে অমকদ দোরেইয়্যে। সেক্কে শৌল তার লাম্বাছুড়িগান্ লোইনে নিজেই তা উগুরে পড়িলো।
Sanasan