১ শমূয়েল 12:3 - Chakma Bible

³ মুই ইয়োদোই আগং; মর্‌ বিরুদ্ধে যুনি তমার কিজু কবার্‌ থায় সালে লগেপ্রভু আর তার অভিষেগ-গোজ্যে মানুচ্চোর মুজুঙোত্‌ সিয়েনিই কঅ। তুমি সাক্ষি দুয়ো, মুই কার্ বলত্তো বা কার্ গাধাবো অন্যেয়গুরি নেযেয়োং? মুই কার উগুরে অত্যেচার গোজ্যং? কার উগুরে বজং বেবহার গোজ্যং? কাত্তুন্‌ ঘুষ নেযেইনে মুয়োন বন্ধ গুরি রাগেয়োং? ইয়েনির কনগান যুনি মুই গুরি থাং সালে সিয়েনির ক্ষতিপূরণ দিম।”

১ শমূয়েল 12:3 Iomraidhean Croise

২ শমূয়েল 22:22

কিত্যে লগেপ্রভুর পধেন্দি মুই আদা-উদো গোজ্যং; বজং কাম গুরিনে মঅ গোজেনর মুজুঙোত্তুন্‌ সুরি ন-যাং।

নহিমিয় 5:11

ইক্কিনে তুমি তারার্‌ ভূইয়ানি, আংগুর ক্ষেত্‌তানি, জলপাইয়োর্‌ বাগানানি আর ঘরানি তারারে ফিরেই দুয়ো, আর টেঙা, ধান, নূয়ো আংগুর-রস আর তেলত্তেই শতকরা যে সুদ্‌তুন তুমি নেযেয়ো সিয়েনঅ তারারে ফিরেই দুয়ো।”

গীতসংহিতা 15:5

সুদ ছাড়া টেঙা উদোর্ দে, আর ঘুষ্ খেইনে নিদ্দুজিগুনোরে ক্ষেতি ন-গরে। যে এধোক্ক্যেন্ গুরি চলে তে আমিঝে থির্ থেবঅ।

যাত্রা 20:17

“অন্য মান্‌জ্যর্‌ ঘর-দুয়োর্‌, মোক্‌, চাগর-চাগরানী, গোরু-গাধা বা আরঅ কনঅ কিজু উগুরে লুভ্‌ ন-গোজ্য।”

যাত্রা 22:4

চুর্‌ গোজ্যে গোরু, গাধা বা ভেড়াছাগল যুনি চুরোর আদত্‌ জেদাবাদে পাহ্ যায়্‌ সালে চুর্‌বোত্তুন্‌ সিগুন এক্কোর্‌ বদলে দ্বিবে গুরি ফিরেই দিয়্যে পুরিবো।

যাত্রা 23:8

ঘুষ ন-হেবা, কিত্তে যার্‌ চোগ আঘে তারেয়ো ঘুষে চোগ্‌ কান গুরিদে। ঘুষ গম্‌ মান্‌জ্যর্‌ কধাত্‌‌অ‌ প্যাজাল্‌ লাগেই দে।

গম্ উপদেজ্ 15:27

লুভি মান্‌জ্যে তা পরিবারত্ দুঘ্ তাঙায়, মাত্তর্ যে মান্‌জ্যে ঘুষ্ ঘিনায় তে দোল্ জিংকানি পেবঅ।

গণাণা 16:15

এই কধাগান্‌ শুনিনে মোশি অমহদ রাগ্‌ তুলিনে লগেপ্রভুরে কলঅ, “তুই তারার উৎসর্বগানি গুজি ন-লোচ্‌। মুই তারাত্তুন্‌ এক্কো গাধায়ো ন-নেযাং আর তারার কনঅ ক্ষোতিয়ো ন-গরং।”

মথি লেখ্যে গম্ হবর্ 22:21

তারা কলাক্, “রোম-সম্রাটর্।” যীশু তারারে কলঅ, “সালে যিবে সম্রাটর্ সিবে সম্রাটরে দুয়ো, আর যিবে গোজেনর্ সিবে গোজেনরে দুয়ো।”

লূকে লেখ্যে গম্ হবর্ 19:8

সক্কেয় সিধু থিয়্যেইনে প্রভুরে কলঅ, “প্রভু, মুই মর্ ধন সোম্বোত্তির্ অদ্দেক্ নাঢাগুনোরে দি দুয়োঙর্ আর যুনি কাররে থোগেই থাং সালে সিগুনোর্ চেরগুন্ ফিরেই দোঙর্।”

প্রেরিত্‌ 20:33

কারঅ সনা, রূবো বা কাবড়-চুগোর উগুরে মুই লুভ্ ন-গরং।

২ করিন্হীয় 12:14

মুই ইক্কিনে এই তিন বার তমা ইধু যেবাত্যে যুক্কোল্ ওই আঘং। মুই তমার্ লবাদোস্যে ন-ওম্, কিয়া মুই তমার্ কনঅ কিজু পেবাত্যে ন-চাং, তমারে পেবাত্যে চাং। পুয়ো-ছাগুনে যে তারার্ মা-বাবত্যে টেঙা-পৌইজ্যে জোমেবাক্ সিয়েন নয়, বরং পুয়ো-ছাগুনোত্যে টেঙা-পৌইজ্যে থুবোনা মা-বাব্‌পুনোর্ উচিত।

দ্বি’লম্বর বিররণ 16:19

তুমি অন্যেয়গুরিনে বিচের ন গুরিবা বা কারঅ পক্ষ ন নেযেবা। তুমি ঘুষ ন নেযেবা, কিত্যে ঘুষ জ্ঞানী মানুচ্চুনোর চোক্কুন কান্‌ গুরি দে আর নিদ্দুষী মানুচ্চুনোর কধাত্‌ প্যাঁচ লাগেই দে।

১ থিষলনীকীয় 2:10

তুমি যিগুনে বিশ্বেজ্ গোজ্জ্য, তমা লগে আমার বেবহার যে পবিত্র, গম্ আর থুদো নেইয়্যে এলঅ, সিয়েনর সাক্ষী তুমিয়ো আঘঅ আর গোজেনেয়ো আঘে।

১ থিষলনীকীয় 2:5

তুমি কোই পারঅ আমি কনদিন্অ বিগিদি গুরিনে কধা ন-কোই, আর লুভ্‌পানরে নাঢি থোইনেয়ো যে ছলনা গুরিনে কনঅ কধা আমি ন-কোই, গোজেনে তার্ সাক্ষী।

১ পিতর 5:2

তমা ইধু যে গোজেনর্ পাল আঘে তুমি সিবের্ গরক্ অ। দেগাশুনো গরা পরিবো বিলিনে যে তারারে দেগাশুনো গুরিবে সিয়েন নয়, বরং নিজোর আওজে সিয়েন গরঅ, কিয়া গোজেনে তমা ইধু সিয়েনই চায়। লাভর্ আজায় এ কামান ন-গোজ্জ্য, মাত্তর্ আওজ্‌ গুরিনে গরঅ;

১ শমূয়েল 10:1

সে পরেন্দি শমূয়েলে এক্কো তেলর শিঝিরি নেযেইনে শৌলর মাদাবো উগুরে তেল ঢালি দিলো। তে তারে গালত্‌ চুমিনে কলঅ, লগেপ্রভু তা মানুচ্চুনো উগুরে তরে নেতা ইজেবে অভিষেগ্ গুরিলো।

১ শমূয়েল 12:4

মানুচ্চুনে কলাক্, “না, তুই আমার কারঅ উগুরে অত্যেচার ন-গরচ্‌, কারঅ উগুরে ভান্ন্যেই বেবহার ন-গরচ্‌ আর কারত্তুন্‌ কিচ্ছু ন-নেযাচ্‌।”

১ শমূয়েল 12:5

শমূয়েলে তারারে কলদে, “এচ্চ্যে লগেপ্রভু সাক্ষী আর তার অভিষেগ গোজ্যে মানুচ্চোয়ো সাক্ষী, তুমি মত্তুন্‌ তমার কনঅ জিনিস ন-পঅ।” সেক্কে মানুচ্চুনে কলাক্, “তে সাক্ষী।”

১ শমূয়েল 2:35

মাত্তর্‌ মুই মত্তে এক্কো বিশ্বেজি ধর্মগুরু বানেম্‌, যে মর্‌ মনান্‌ বুঝিনে মর্‌ আওজ্‌ মজিম কাম গুরিবো। মুই তার বংশবোরে থিদেবর্ গুরিম আর তে নিত্য মর্‌ অভিষেগ-গোজ্যে মানুচ্চুনোরে সেবা গুরিবো।

১ শমূয়েল 24:11

ও মর্‌ বাবা, এই চাহ্, মঅ আঢত্‌ তর্‌ পোজাগর্‌ এক্কান কট্টা। মুয়ই তর্‌ পোজাগত্তুন্‌ এ কট্টাগান কাবি নেযেয়োং মাত্তর্‌ তরে মারেই ন-ফেলাং। সালে তুই এবেরা বুঝি পারিলে আর হবর্‌ পেলে, তর্‌ উগুরে কনঅ অন্যেয় বা উল্লোমীর্ মনভাব মর্‌ মনত্‌ নেই। মুই তর্‌ বিরুদ্ধে কনঅ পাপ ন-গরং, মাত্তর্‌ তুই মরে মারে ফেলেবাত্তে উৎ পাদিনে আগচ্‌।

১ শমূয়েল 24:6

তে তার মানুচ্চুনোরে কলঅ, “মর্‌ গিরোচ্ছো বিরুদ্ধে, লগেপ্রভুর অভিষেগ্ গোজ্যে মানুচ্চুনোর বিরুদ্ধে আঢ্ তুলোদে লগেপ্রভু কনদিন্‌অ মরে অনুমতি ন-দিবো, কিত্যে তে দঅ লগেপ্রভুর অভিষেগ্ গোজ্যে মানুচ্‌।”

১ শমূয়েল 24:7

এ কধাগান কোইনে দায়ূদে তা মানুচ্চুনোরে থামেই দিলো আর শৌলরে আক্রমণ গুরিবাত্তে ন-দিলো। পরেন্দি শৌল গাদত্তুন্‌ নিগিলিনে আঢা মারিলো।

১ শমূয়েল 26:11

মাত্তর্‌ লগেপ্রভুর অভিষেগ্ গোজ্যে মান্‌জ্য উগুরে আঢ্ তুলিবাত্তে লগেপ্রভু কনদিন্‌অ মরে অনুমতি ন-দিবো। আদঅ, ইক্কিনে আমি তার মাদাবো কায়-কুরেত্তুন্‌ সেল্‌লো আর পানির পিলেবো তুলি নেযেইনে ফিরি যেই।”

১ শমূয়েল 26:9

দায়ূদে তারে কলঅ, “না, তারে মারে ন-ফেলেয়ো। লগেপ্রভুর অভিষেগ্ গোজ্যে মান্‌জ্য উগুরে আঢ তুলিনে কন্না নিদ্দুষী তেই পাজ্যে?