১ পিতর 5:8 - Chakma Bible

⁸ নিজোরে দোঙেই রাগঅ আর সজাক্ থাগঅ, কিয়া তমার শত্রু শদানে গুজুরি উঠ্যে সিংহ ধোক্ক্যেন গুরি কারে হেই ফেলেব তারে তোগেইনে বেড়ার্।

১ পিতর 5:8 Iomraidhean Croise

ইষ্টের 7:6

ইষ্টেরে কলঅ, “সেই বিপক্ষ আর শত্রু অলদে এই পাজি হামনে।” সেক্কে হামনে রাজা আর রাণীর মুজুঙোত্‌ থেবাত্তে অমকদ দোরেল।

ইয়োব 2:2

লগেপ্রভু শদান্‌নোরে কলঅ, “তুই কুত্তুন্‌ এচ্ছোস্‌?” জোবত্‌ শদান্‌নো লগেপ্রভুরে কলঅ, “পিত্‌থিমীর ভিদিরে ইন্দি-উন্দি ঘুরিনে এলুঙ্‌।”

গীতসংহিতা 104:21

দামারা সিংহগুনে শিগের্ তোগেবাত্তে যেইনে রঅ ছাড়ন্, গোজেন ইদু তারা হানা চান্।

গীতসংহিতা 109:6

তুই তারা উগুরে পাজি বিচেরক্ নেযা; যিগুনে তারারে দুষি গুরিবাক্ সিগুনে তারার ডেন্ ঢাগেন্দি থিয়্যেদোক্।

গম্ উপদেজ্ 19:12

রাজার রাগ্‌কান সিংহ গুজুরোনি ধোক্ক্যেন্, মাত্তর্ তা দোয়্যেগান যেন ঘাস উগুরে পোজ্যে শিরোপানি।

গম্ উপদেজ্ 20:2

রাজার রাগ্‌কান সিংহ গুজুরোনি ধোক্ক্যেন্; তারে যে রাগ্ তুলি দে তে নিজো পরানানরে দজাত্ ফেলায়।

গম্ উপদেজ্ 28:15

গুজুরি উদেদে সিংহবো আর আক্রমন গুরিয়্যে ভালুক্কো যেধোক্ক্যেন্, সেধোক্ক্যেন্ সেই পাজি মানুচ্চো যে নাঢা মানুচ্চুনোর শাজন্ গুরিয়্যে অয়।

যিশাইয় 50:8

যিবে মরে নিদ্দুযি বিলি প্রমাণ গোজ্যে তে কায়কুরে আঘে; সালে কন্না মঅ বিরুদ্ধে আবিত্তি গুরিবো? এজঅ, আমি মুয়োমি ওই। কন্না মরে দুযি গোজ্যে? তে মঅ মুজুঙোত্ এজোক্।

যিরমিয় 2:15

সিংহগুনে গুজুরি উঠ্যন্; তারে দেগিনে গো গো গোজ্যন্। তা দেজ্‌ছান তারা উগুজ্জ্যে ভুইয়ো ধোক্ক্যেন গুরি রাগেয়োন; তার শঅরানি ভস্ত গরা ওইয়্যে, সিয়েনত্ মানুচ্ জন নেই।‍‍‍

যিরমিয় 51:38

তা মানুচ্চুনে বেক্কুনে সিংহ ধোক্ক্যেন গুজুরিবাক্, সিংহ ছঅগুনো ধোক্ক্যেন গোঁ গোঁ গুরিবাক্।

যিহিষ্কেল 19:7

তে তারার্ ঘরানি ভাঙিলো আর শঅরান্ বেক্কান ভস্ত গুরি ফেলেল। তার গুজুরোনিলোই দেজর্ বেক্কুনে দোরেলাক্।

যিহিষ্কেল 22:25

সেই দেজ মানুচ্চুনে কুজুরোমি গরন্; তারা গুজুরি উদোন্দে সিংহ ধোক্ক্যেন শিগের্ গরন। তারা মানুচ্চুনোরে গিলোন, ধন-সম্পদ আর মংগা মংগা জিনিস নেযান্ আর দেজ ভিদিরে ভালোক্কুন্ মিলেরে রানি বানেয়োন্।

দানিয়েল 6:24

যে মানুচ্চুনে ইংসে গুরিনে দানিয়েলরে দুষ দুয়োন্ রাজার উগুমে তারারে আনা অলঅ আর মোগ্ আহ্ ঝি-পুয়ো সুমুত্তো তারারে সেই সিংহ গাদত্ ফেলেই দিয়্যে অলঅ। তারা সেই গাদত্ পত্তে ন-পত্তে সিংহগুনে তারারে আক্রমণ গুরিনে তারার্ আড়্‌গোড়াগুন সং নিগুজ্ গুরি দিলাক্।

হোশেয় 11:10

তঅ মানুচ্চুনে মঅ পিজে পিজে যেবাক্, কিত্যে মুই সিংহ ধোক্ক্যেন ডাগিম। মুই ডাগানার্ পরেদি মঅ পুয়ো-ছাগুনে পোজিমেত্তুন্ গির্‌‌‌গিরাদে গির্‌‌‌গিরাদে এবাক্।

হোশেয় 13:8

ছঅ চুর্ ওই যেইয়্যে ভাল্লুগো ধোক্ক্যেন মুই তারারে আক্রমণ গুরিনে তারা বুগ্‌‌‌‌‌কুন ছিনি ফেলেম। সিংহ ধোক্ক্যেন মুই তারারে গিলি ফেলেম; ঝার্‌‌‌‌‌বো য়েমান ধোক্ক্যেন মুই তারারে কট্টা কট্টা গুরি ছিনি ফেলেম।

যোয়েল 3:16

লগেপ্রভু সিয়োনত্তুন্ গুজুরিবো, যিরূশালেমত্তুন্ জোরে কধা কবঅ; পিত্‌‌‌থিমীগান আর আগাজ্‌‌‌চানে গির্‌‌‌গিরে ধুরিবো। মাত্তর্ লগেপ্রভু অবদে তা মানুচ্চুনোত্তে আশ্রয়র্ জাগা, ইস্রায়েল মানুচ্চুনোত্তে এক্কান ঘর্।

আমোষ 1:2

আমোষে কলঅ, “লগেপ্রভু সিয়োনত্তুন্ রঅ ছাড়ের্ আর যিরূশালেমত্তুন্ জোরে জোরে কধা কর্। সেনত্তে গরগ্‌‌কুনোর চড়াইদ্যে ভূইয়ানি বেক্কানি শুগেই যার্ আর কর্মিল মুড়োবো মাঢাত্ গাজপালা মুরি যার্।”

আমোষ 3:4

শিগের্ গোজ্যে য়েমান্ ন-থেলে কি সিংহ ঝুব্-ঝাড় ভিদিরে গুজুরে? কিজু ধুরি ন-পারিলে কি বোল্যে সিংহবো তা গাঢ ভিদিরে গো গো গরে?

আমোষ 3:8

সিংহবো গুজুরিলে কন্না ন-দোরেব? প্রভু লগেপ্রভু কবাত্তে কলে কন্না ভাববাদী ইজেবে কধা ন-কোই পারিবো?

সখরিয় 11:3

ভেড়া গরগ্‌কুনোর আবিলেচ্ শুনো; তারার্ গম্ গম্ চড়াইদ্যে বামানি বর্‌বাত্ ওই যেইয়্যে। সিংহগুনোর গুজুরোনি শুনো; যর্দনর ঝারানি ভস্ত ওই যেইয়্যে।

সখরিয় 3:1

পরেদি সেই স্বর্গদূত্‌‌‌‌তো মরে দেগেল দাঙর্ ধর্মগুরু যিহোশূয় লগেপ্রভুর দূত্‌‌‌‌তো মুজুঙোত্ থিয়্যেই আঘে আর তারে দুষ্ দিবাত্তে শদানে তা ডেনেদি থিয়্যেই আঘে।

মথি লেখ্যে গম্ হবর্ 13:39

যে শত্রুবো বীজি ফেলেয়্যে তে অলঅ শদান্, আর শোজ্য কাবিবার অক্তবো অলঅ এ যুগোর্ থুম্ সময়। যিগুনে শোজ্য কাবিবাক্ তারা অলাক্ স্বর্গদূত।

মথি লেখ্যে গম্ হবর্ 24:42

তুমি সজাগ্ থাগঅ, কিয়া তমা জিংকানির গিরোজ্‌সো কমলে এবঅ সিয়েন্ তুমি হবর্ ন-পঅ।

মথি লেখ্যে গম্ হবর্ 25:41

পরেদি তে তার্ বাঙেদি মানুচ্চুনোরে কবঅ, ও অভিশাব্ পেইয়্যে মানুচ্চুন্, মত্তুন্ তুমি দূর্ অ। শদান্ আর তা দূত্‌তুনোত্তে যে উমর কালর্ আগুন যুক্কোল্ গরা ওইয়্যে সিয়েন ভিদিরে যঅ।

মথি লেখ্যে গম্ হবর্ 4:1

ইয়েনর্ পরেদি পবিত্র আত্মাগানে যীশুরে ধূল্যেচর-চাগালাত্ নেযেল যেনে শদানে যীশুরে লুভ্ দেগেইনে পাপত্ ফেলেবার চেট্ট্যা গুরি পারে।

মথি লেখ্যে গম্ হবর্ 4:11

সেক্কে শদান্নো তারে ফেলেই গেলগোই, আর স্বর্গদূত্তুনে এইনে তার্ সেবা যত্তন্ গরা ধুরিলাক্।

মার্ক 4:15

পধ কুরে পোজ্যে বীজিগুনো মাধ্যমে তারা পৌইদ্যেনে কুয়ো ওইয়্যে যিগুনে সে কধানি শুনোন্, মাত্তর্ শদানে সেক্কে এইনে তারা মনত্ যে কধানি জমা ওইয়্যে সিয়েনি নেযায়।

লূকে লেখ্যে গম্ হবর্ 21:34

“তুমি উজিয়ার্ থেয়ো যেন তমা মনানি ওলোমোত্ত্য, মাত্তলে ধুরিনে আর সংসারর্ চিদেলোই লুঙি ন-পড়। সিয়েন ন-অলে ফাল্ যেবাবোত্যেগুরি অদাদত্ বানা যায় সেবাবোত্যেগুরি অদাদত্ সে দিন্নো তমা উগুরে, এমন কি, পিত্‌থিমীর বেক্ মানুচ্চুনো উগুরে এইনে পুড়িবো।

লূকে লেখ্যে গম্ হবর্ 21:36

সজাক্ থেয়ো আর নিত্য তবনা গরঅ যেন যিয়েনি ঘুদিবো সিয়েনি পার্ ওই যাদে আর মান্‌জ্য পুয়োবো মুজুঙোত্ যেইনে থিয়্যেবার্ তুমি বল্ পঅ।”

লূকে লেখ্যে গম্ হবর্ 22:31

“শিমোন, শিমোন, চাহ্, শদানে তমারে গম ধোক্ক্যেন্ গুরি চালোন্দোই ঝারি চেবাত্যে অনুমতি চেইয়্যে।

যোহন 8:44

শদানে তমা বাপ্ আর তুমি তার্ পুয়ো-ছা; সেনত্তে তুমি তা আওজ্‌চান্ পুরেবাত্তে চঅ। শদানে পৌইল্যাত্তুন্ ধুরি খুনী। তে কনদিন্অ সত্যত্ বজত্তি ন-গরে, কিয়া তা ভিদিরে সত্য নেই। তে যেক্কে মিজে কধা কয় সেক্কে তে সিয়েন্ নিজোত্তুন্ কয়, কিয়া তে মিজে কধা মাদিয়্যে আর বেক্‌ মিজে কধার্ জর্ম তা ভিদিরেত্তুন্ ওইয়্যে।

২ করিন্হীয় 2:11

যেন শদানে আমা উগুরে কনঅ সুযোগ-সুবিধে ন-পায়। তার্ ফন্দির্ কধা দঅ আমার্ অজানা নয়।

ইফিষীয় 4:27

আর শদানরে কনঅ সুযোগ ন-দুয়ো।

ইফিষীয় 6:11

যুদ্ধোত্যে গোজেনর্ দিয়্যে বেক্ সাজ্-পোজাগ্‌কানি পিনি লঅ, যেন তুমি শদানর্ বেক্‌ চালাগ্‌কানির্ বিরুদ্ধে দরমর ওইনে থিয়্যেই পারঅ।

১ তীমথিয় 2:15

মাত্তর্ তে পুয়ো-ছা জর্ম দেনার্ মাধ্যমে পাপত্তুন্ উদ্ধোর পেবঅ; খালিক্ মিলেগুনোর্ গম বিচের বুদ্ধি বেবহার গুরিনে বিশ্বেজ্, কোচ্‌পানা আর পবিত্রতালোই চলা পড়িবো।

১ তীমথিয় 2:9

মুই ইয়েন্অ চাং যেন মিলেগুনে ভদ্র গুরিনে আর গম্ বিচেরবুদ্ধি বেবহার গুরিনে যগাজ্জ্যে কাবড়-চুগোর্ পিনোন্। তারা যেন নানান্ বাবোত্যে চুলোর্ ঝুদো বানন্, সোনা আর মুক্তোর গয়না পিনোন্ আর মংগা মংগা কাবড়-চুগোড়্‌লোই নিজোরে ন-সাজান্।

১ তীমথিয় 3:11

ঠিগ্ সেবাবোত্যেগুরি তারার্ মোগ্‌কুনেয়ো যেন সর্মানর্ যগাজ্জ্যে অন্। তারা যেন অন্যরে বদ্‌নাঙ্ গুরিনে ন-বেড়ান্ আর নিজোরে দোঙেই রাগান্। বেক্কানি পৌইদ্যেনে যেন তারারে বিশ্বেজ্ গরা যায়।

১ তীমথিয় 3:2

পরিচালক্‌কো সেনত্যে এমন উয়ো পড়িবো যেন কেঅ তারে দুষ্ দি ন-পারন। তাত্তুন্ বানা এক্কো মোক্ থেবঅ। তে নিজোরে দোঙেই রাগেব আর তার্ গম বিচেরবুদ্ধি থেবঅ। তে ভদ্র অবঅ আর গর্‌বা লবিয়োত্ গত্তে কোচ্‌পেবঅ। অন্যগুনোরে শিক্ষ্যে দান গুরিবার খেমতা তাত্তুন্ থেবঅ।

২ তীমথিয় 4:17

মাত্তর্ প্রভু মঅ সমারে এলঅ আর মরে খেমতা দান গোজ্জ্যে। সিয়েনর্ ফলে মুই পুরোপুরি গুরিনে গম হবর্ প্রচার গুরি পাজ্জ্যং আর অযিহূদীগুনে বেক্কুনে সিয়েন শুন্ন্যন্।

তীত 1:8

সিয়েনর্ বদলে গর্‌‌বা-লবিয়োত্ আর দোয়্যের্ কাম গুরিবাত্যে তে যেন গম্‌ পায়। তার গম্ বিচের বুদ্ধি থেবঅ, তে সৎ আর গোজেনর্ বাধ্য অবঅ আর নিজোরে দোঙেই রাগেব।

তীত 2:12

এই দোয়্যেগানে আমারে শিক্ষ্যে দেত্তে যেন আমি গোজেন উগুরে ভোক্তি-নেইয়্যে আর জগদর্ কামনা-বাসনারে এলাফেলা গুরিনে এ জগদত্ নিজোরে দোঙেই রাগেইনে গোজেন-ভোক্তি সমারে গম্ জিংকানি কাদেই,

তীত 2:2

যিগুনে বুড়ো, তারারে কবে যেন তারা বেক্কানি পৌইদ্যেনে নিজোরে দোঙেই রাগান; তারা যেন সর্মান পেবার যগাজ্জ্যে অন্; তারার্ যেন গম বিচেরবুদ্ধি, সত্য বিশ্বেজ্, কোচ্‌পানা আর ধৈজ্জ্যগুণ থায়।

তীত 2:4

সালে তারা গাবুর্ মিলেগুনোরে শিগেই পারিবাক্ যেন তারা নেগরে আর পুয়োগুনোরে কোচ্‌পান,

তীত 2:6

সেবাবোত্যে গুরি গাবুর্ মরদ্‌তুনোরে উপদেচ্‌ দুয়ো যেন তারা নিজোরে দোঙেই রাগান।

যাকোব 4:7

ইয়েনত্যে গোজেনর্ অধীনোত্ থাগঅ। শদান বিরুদ্ধে দরমর গুরি থাগঅ, সালে তে তমাত্তুন্ ধেই যেবঅ।

১ পিতর 1:13

ইয়েনত্যে তমা মনানিরে জাগেই তুলো আর নিজোরে দোঙেই রাগঅ। যীশু খ্রীষ্ট যেক্কে ফগদাং অবঅ সেক্কে তুমি যে বর্ পেবা সেই বরান্ পেবার ভর্‌পুনোং আজালোই বাজ্জ্যেই থাগঅ।

১ পিতর 4:7

ইক্কিনে বেক্কানির্ থুমো সময় ওইয়্যেগি। সেনত্যে তমা মনানি থির্ গরঅ আর নিজোরে দোঙেই রাগঅ যেন তবনা গুরি পারঅ।

ফগদাং পেইয়্যে 12:10

সে পরেদি মুই স্বর্গত্তুন্ দাঙর্ দাঙর্ গুরি একজনরে কধে শুনিলুং, ইক্কিনে উদ্ধোর্, খেমতা আর আমার গোজেনর্ রেজ্য আর তার্ মশীহর খেমতা লুম্মেগি, কিয়া যিবে আমা ভেইবোরে দুষ্ দিদো তারে স্বর্গত্তুন্ ফেলেই দিয়্যে ওইয়্যে। আমা গোজেন মুজুঙোত্ তে দিন-রেত্ তারারে দুষ্ দেগেদ।

ফগদাং পেইয়্যে 12:12

“সেনত্যে ও স্বর্গগান, হুজী অ; তুমি যিগুনে সিধু বজত্তি গরঅ, হুজী অ। মাত্তর্ পিত্‌থিমী আর দোজ্জ্যে সাগরান, অভিশাব্ দুয়োং তমারে! কিয়া শদানে তমা উগুরে লামি এচ্চ্যে। শদানে রাগে ফুলি উত্ত্যে, কিয়া তে কোই পারে তা সময়ান আর্ বেশ্ নেই।”

ফগদাং পেইয়্যে 12:9

সেক্কে সেই দাঙর্ দানপ্পোরে আর তা সমারে তা দুত্‌তুনোরে পিত্‌থিমীত ফেলেই দিয়্যে অলঅ। এই দানপ্পো অলঅ সেই পুরোনা সাব্‌পো যিবেরে দিয়াবল বা শদান্ কুয়ো অয়। তে পিথ্‌তিমীর্ বেক্‌ মানুচ্চুনোরে ভুল্ পধেদি নেযায়।

ফগদাং পেইয়্যে 20:10

যে তারারে ভুল্ পধেদি নেযেয়্যে সেই সদান্নোরে জ্বোল্‌জোল্যে গন্ধক পুয়োরত্ ফেলেই দিয়্যে অলঅ। সিয়েনত্ তারা উমর সং দিন-রেত্ যন্ত্রণাত্ ভুগিবাক্।

ফগদাং পেইয়্যে 20:2

তে সেই দানপ্পোরে, অত্তাৎ সেই পুরোণি সাপ্‌পোরে যিবেরে দিয়াবল আর শদান্ কুয়ো অয় তারে ধুরিনে এক আজার বজরত্যে বানিলো আর সেই সুরুঙো গাঢ্‌তোদ্ ফেলেই দিলো। পরেদি তে সিয়েনত্ তালা দিইনে তা উগুরে সীলমহ্‌র্ গুরিলো, যেনে এই এক আজার বজর্ থুম ন-অনা সং পিত্‌থিমীর জাদ্‌তুনোরে আর সেই ভুল পধেদি নেযেই ন-পারে; সে পরেদি কিজু দিনোত্যে তারে অবুচ্চ্যই ইরি দিয়্যে অবঅ।

বিচের গুরিয়্যেগুন 14:5

সে পরেন্দি শিম্‌শোনে তা মা-বাবঅ লগে তিম্নায়ত্‌ গেলঅ। তিম্নায়ত্‌ আংগুর খেত্‌তানির কায়-কুরে যাদে ন-যাদে আদিক্ক্যেগুরি এক্কো দামারা সিংহ গুজুরি গুজুরি শিম্‌শোনর ইন্দি উজেই এলঅ।