১ বংশধর 13:5 - Chakma Bible

⁵ সেনত্তে কিরিয়ৎ-যিয়ারীমত্তুন্‌ গোজেন সুন্দুক্কো আনিবাত্তে দায়ূদ মিসর সীহোর গাঙত্তুন্‌ হমাত ধুজি সং বেক্‌ ইস্রায়েলীয়গুনোরে এগত্তর্‌ গুরিলো।

১ বংশধর 13:5 Iomraidhean Croise

২ শমূয়েল 6:1

দায়ূদে আরঅ ইস্রায়েলীয়গুনো ভিদিরেত্তুন্‌ তিরিশ আজার বেঈ-লোইয়্যে মান্‌জ্যরে এগত্তর্‌ গুরিলো।

১ রাজাবলী 4:21

ইউফ্রেটিস গাঙত্তুন্‌ আরাম্ভ গুরিনে মিসর আর পলেষ্টীয়গুনোর দেজর্‌ ধুজি সং বেক্‌ রেজ্যগানি শলোমনর্ শাজন্ অধীনোত্‌ এলঅ। শলোমনে যেদকদিন বাঁজি এলঅ সেদকদিন এ দেজ্‌ছানি তারে চান্দা দিদো আর তা অধীনোত্‌ এলঅ।

১ রাজাবলী 8:65

এবাবোত্যেগুরি শলোমন আর তা সমারে বেক্‌ ইস্রায়েলীয়গুনে সে অক্তত্‌ আমা গোজেন লগেপ্রভুর মুজুঙোত্‌ সাত দিন আরঅ সাত দিন, বেক্কুনে চোদ্দো দিন সং ইক্কো পরব্‌ গুরিলাক। তারা অলাক্কে ইক্কো বড়্ মান্‌জ্যর্‌ ঝাক; তারা হমাৎ চাগালাত্তুন্‌ মিসর শুগুনো গাঙান্‌ সং পুরো চাগালাত্তুন্‌ এইনে মিজেলাক্।

২ রাজাবলী 25:21

রাজা হমাৎ দেজর রিব্‌লাতদ্‌ এই মানুচ্চুনোরে মারে ফেলেল। এধোক্ক্যেন গুরিনে যিহূদার মানুচ্চুনোরে বানিনে নিজোর দেজত্তুন্‌ দূরোত্‌ নেযা অলঅ।

১ বংশধর 13:4

সেক্কে পুরো দল্লো সিয়েন্‌ গুরিবাত্তে রাজী অলঅ, কিত্তে বেক্‌ মানুচ্চুনো ইদু সিয়েনই গম্‌ বিলি মনে অলঅ।

১ বংশধর 13:6

যিহূদা দেজর্‌ বালা, অত্তাৎ কিরিয়ৎ-যিয়ারীমত্তুন্‌ গোজেন্‌ লগেপ্রভুর সুন্দুক্কো আনিবাত্তে দায়ূদ আর তা সমারে বেক্‌ ইস্রায়েলীয়গুনে সিদু গেলাক্‌। এ সুন্দুক্কো লগেপ্রভুর নাঙে পরিচিত, কিত্তে তে সিদু করূবপুনোর্‌ সংমোধ্যে থেদঅ।

১ বংশধর 15:3

লগেপ্রভুর সুন্দুক্কোত্তে দায়ূদে যে জাগায়ান্‌ যুক্কোল্‌ গোজ্যে সিয়েনত্ সুন্দুক্কো আনিবাত্তে তে বেক্‌ ইস্রায়েলীয়গুনোরে এক্কান্‌ জাগাত্‌ এগত্তর্‌ গুরিলো।

যিশাইয় 23:3

শীহোর গাঙর্, অত্তাৎ য়েল্ গাঙ পারর্ শোজ্যগানি দাঙর্ সাগর উগুরেদি এদঅ; সোরর আয় এলদে সে গাঙ পারর্ খেত-খেত্তিগানি, আর সোর ওই উদিলোদে বেক্ জাদ্‌তুনোর বাজার।‌‌‌

যিরমিয় 2:18

ইক্কিনে নীল গাঙর্ পানিগান হেবাত্তে কিত্তে তুই মিসরত্ যর্? ইউফ্রেটিস গাঙর্ পানিগান হেবাত্তে কিত্তে তুই আসিরিয়া দেজত্ যর্?

যিহোশূয় 9:17

সেক্কে ইস্রায়েলীয়গুনে তারার্‌ চাগালান্দি যাহ্ ধুরিলাক্‌ আর তিন দিনোত্‌ সিদু যেইনে লুমিলাক্‌। তারার্‌ চাগালাত্‌‌ এলাক্কে গিবিয়োন, কফীরা, বেরোৎ আর কিরিয়ৎ-যিয়ারীম শঅরান্‌।

১ শমূয়েল 6:21

সে পরেন্দি তারা কয়েকজন মান্‌জ্যর্ মাধ্যমে কিরিয়ৎ-যিয়ারীমর মানুচ্চুনো ইদু কোই পাদেলাক্, “পলেষ্টীয়গুনে লগেপ্রভুর সুন্দুক্কো ফিরেই দুয়োন। তুমি লামি এইনে সুন্দুক্কো তমা ইদু লোই যঅ।”

১ শমূয়েল 7:1

সেনত্যেই কিরিয়ৎ-যিয়ারীমর মানুচ্চুনে এইনে লগেপ্রভুর সুন্দুক্কো নেযেলাক্। তারা সুন্দুক্কো নেযেইনে মুড়ো উগুরে তারার শঅরত্‌ অবীনাদবর ঘরত্‌ রাগেলাক আর সিবে দেগাশুনো গুরিবাত্যে অবীনাদবর পূঅ ইলিয়াসরে লগেপ্রভুর নাঙে ফারক্‌ গুরি নেযেলাক্।

১ শমূয়েল 7:2

লগেপ্রভুর সুন্দুক্কো কিরিয়ৎ-যিয়ারীমত্‌ রাগেবার পরেন্দি ভালোক্‌ দিন পার ওই গেলঅ, অত্তাৎ ত্রিশ বজর্‌ কাদি গেলঅ। সেই অক্তত্‌ লগেপ্রভুর ইদু ফিরি এবাত্তে ইস্রায়েলীয়গুনোর পরাণান্‌ কানের্‌।