Números 10:12 - Kashibo-Kakataibo Biblia

¹² Usai ꞌikëbë ka israel unibu tsuákirukiani anu uni ꞌikëma me aín bashi Sinaí kakë anuax kuankëxa. Kuantankëx ka anu uni ꞌikëma me itsi Parán kakë anua kuin ax nirakëkëbë anuribi israel unikama nirakëaxa.

Números 10:12 Iomraidhean Croise

Génesis 14:6

ꞌanan ka ꞌakánanti ꞌunairakëkamaribi abë ꞌakanankin abámikin Seír me anu ꞌikë bashikama anubi nuibiankin ꞌakëxa, usakian ꞌakëxa kuania ka me anua El-Parán ꞌikë anubi, nuibiankin ꞌakëxa, ax ka anu uni ꞌikëma me a rapasu ꞌiakëxa.

Éxodo 13:20

Usakiani Sucot kakë me anuax kuanx ka Israelkama Etam kakë ëma chukúma anu pain ꞌiakëxa, ax ka anu uni ꞌikëma me pëukukë a ꞌiakëxa.

Habacuc 3:3

Dios ka Temán kakë me amiax uanan, Parán kakë menu ꞌikë bashi anuax Dios upíira ax uti ꞌikën. Aín kushin ka naíkamë ꞌëo kamabi pëkaia, usa ꞌikë ka kamabi menu ꞌikë unikaman a rabiti ꞌikën.

Números 10:33

Usa ꞌain ka Nukën ꞌIbun bashi Sinaí kakë anuax kuani rabë́ ꞌimainun achúshi nëtë ꞌikiani kuankëxa. Kuankian levita uni raírinën Nukën ꞌIbu Diosan bunántisa kurin ratakakakë anua aín ñukama purukë a rëkuë́mibiani kuani uinu kara tantiti ꞌikë kixun baribiamainun ka ꞌaisamaira uni atu kaxú kuankëxa.

Números 13:26

Cadés kakë anu uni ꞌikëma me Parán anubi rikuatsiankëxa. Anu ka Moisés, Aarón ꞌimainun kamabi israel unibu ꞌiakëxa. Anu bëbatankëxun ka uisa kara a mekama ꞌiaxa a ꞌimainun an buánkë bimi akama ismianan a menu ꞌikë unibu isbiankë akamabi Moiséskëñun israel unibu ñuixuankëxa.

Números 13:3

Ësokian kakëxun ka Moisésnën Diosan kakësabiokin a unikama anu uni ꞌikëma me Parán kakë anuxun xuakëxa. A unikamax ka an Israel unibu ꞌakinkë aín kushibukamaishi ꞌiakëxa.

Números 9:17

Uisaran kara xubusa okin chupa ꞌakë aín kaxunuax kuin niruia anun ka Israel unikamax mëníokakiani anua ꞌikë anuax kuani uinu kara kuinsa ax nirakëtia anubi Israel unikamax anu ꞌi nirakëakëxa.

Deuteronomio 1:1

Ënë banakama ka Moisésnën kamabi Israel kama anu uni ꞌikëma me amiaxa bari urukë Jordán kakë baka anuxun ñuixuankëxa, ax ka anua uni ꞌikëma me Arabá kakë Suf kakë a ꞌukëmanan anu ꞌiakëxa, ax ka Parán, Tófel, Haserot ꞌimainun Dizahab kakë anu ꞌiakëxa.

Deuteronomio 1:7

Usa ꞌain kamina mitsun ñu mëniobiani anua amorreo unikama ꞌimainun a ꞌurama ꞌikë unikaman me anuribi kuanti ꞌain: Ax ka Arabá kakë me ꞌimainun bashiñu me ꞌimainun, me sapankama ꞌianan Négueb kakë me ꞌimainun parúmpapa chá aín kuëbí anua cananeokama ꞌikë a këñunbi Líbano, anuxunbi chaiira baka Éufrates kakë akamabi bitsiküanti ꞌain.

Deuteronomio 33:2

ënë banakama ësokin kakëxa: Nukën ꞌIbun ka aín bashi Sinaí kakë anuxunbi Seír kakë me anu bukukëbi nu pë́kakëxa. Pë́kaquin ka aín kushin barin urukin pë́kabëtsinkësokin aín bashi Parán kakë anuxunbia aín kushin pëkakë ax Meribá-Cadés anubi sënë́ankëxa; usai ukin ka unían aín mëkënan tuínxun ñu bëkësa obëtsinkin ax kushiira ꞌixun a tanti aín bana bëakëxa.

1 Samuel 25:1

Usa ꞌain ka Samuel ñukë ꞌain kamabi israel unikama timëkamë ꞌëox masá nuituti inkankëxa. Usai pain ꞌitankëxun ka anua aín xubu ꞌikë Ramá kakë me anubi maínkankëxa. Usokin ꞌan ka anu uni ꞌikëma me Parán kakë anu David kuankëxa.