Mateo 10:2 - Kashibo-Kakataibo Biblia

² A usaquin cacë unicamax ca ꞌiacëxa Simón ꞌicëbi Pedroribi cacë, ꞌimainun aín xucën Andrés. ꞌImainun ca Zebedeonën bëchicë Jacobo cacë a ꞌimainun aín xucën Juan ꞌiacëxa.

Nukën 'Ibu Diosan ain unikama 'inan ain bana

² A usaquin cacë unicamax ca 'iacëxa Simón 'icëbi Pedroribi cacë, 'imainun aín xucën Andrés. 'Imainun ca Zebedeonën bëchicë Jacobo cacë a 'imainun aín xucën Juan 'iacëxa.

Mateo 10:2 Iomraidhean Croise

Mateo 17:1

Usaquin aín ꞌunánmicë unicama catancëx ca mëcën achúshi ꞌimainun achúshi nëtë ꞌicëbë aín ꞌunánmicë uni raíri ëbiani, Pedrocëñun Jacobo ꞌimainun aín xucën Juan, acamaishi buani Jesús matánu cuancëxa.

Mateo 20:20

Usa ꞌain ca Zebedeonën bëchicë rabë́, Juan ꞌimainun Jacobo, aín tita Jesús rapasu cuani a bëtánain rantin puruni tsóbuquin abë banatisa tancëxa.

Mateo 26:37

Usaquin cabiani Pedro ꞌimainun Zebedeonën bëchicë rabë́, Jacobocëñun Juan, acama buani cuaníbi ca Jesús —uisai carana ꞌiti ꞌai —quixun sinani masá nuituacëxa.

Mateo 4:18

Parúmpapa Galilea cuëtani cuanquinbi ca Jesusan rabë́ uni mëracëxa. A uni rabëtax ca achúshi Simón ꞌicëbi Pedroribi cacë, a ꞌimainun aín xucë́n Andrés cacë ꞌiacëxa. A rabëtax an tsatsa bicë uni ꞌixuan tsatsa ricania ca Jesusan mëracëxa.

Mateo 4:21

A uni rabë́ bibiani cuanquinbi ca Jesusan bëtsi uni rabë́ribi, Zebedeonën bëchicë, Jacobo ꞌimainun aín xucën Juan, an aín papa Zebedeobëtan nuntinuxun rica mëníoia mëracëxa.

Marcos 1:29

Anua judíos unicama timë́ti xubunuax cuanx ca Jesúsbë Santiago ꞌimainun Juan a rabëtaxribi Simón ꞌimainun Andrésnën xubunu bëbai anu atsíancëxa.

Marcos 13:3

Usaquin cacëx abë cuanquin ca anuxun Nucën Papa Dios rabiti xubu ꞌuria ꞌicë matá, Olivos, anu tsóbutia Pedro, Jacobo, Juan, Andrés, acaman, unia ꞌaíma ꞌain, atúxëshi abë ꞌixun Jesús cacëxa:

Marcos 6:30

Usa ꞌain ca aín ꞌunánmicë unicaman, an xucëx cuanx anu utëcënxun, atúan ꞌacë ñucama ñuixuanan a uni ꞌunánmicë banacamaribi Jesús ñuixuancëxa.

Lucas 11:49

Nucën Papa Dios an camabi ñu ꞌunáncë ꞌaish ca usaía ꞌicëma pan ꞌain, ësai quiacëxa: “ꞌËn unicama raíri ꞌën bana ꞌunánquian a uni ñuixunun ꞌimianan raíriribi ꞌën bana unicama ꞌunánminun ꞌimiabi ca unin raíri ꞌanan raíri bëtsi bëtsi oti ꞌicën”.

Lucas 22:14

Mëníoquian sënë́on ca Jesús aín ꞌunánmicë unicamabë pinux mesanu tsóbuacëxa.

Lucas 22:8

A nëtë ꞌicëbëtan ca Jesusan Pedrocëñun Juan xuquin cacëxa: —Ënë nëtë́nu a piti ñu pinun camina nu mëníoxuni cuanti ꞌain.

Lucas 5:10

Jacobo ꞌimainun Juan, Zebedeonën bëchicë, an Simón Pedrobëtan tsatsa bicë, axribi ca ratuti sináncasmacëxa. Sináncasmaiabi ca Jesusan Simón Pedro cacëxa: —Racuë́axma ca ꞌit. Mix an tsatsa bicë uni ꞌixunbi camina bërí ꞌën ꞌimicëxun Nucën Papa Diosan bana ñuixunquin uni ꞌëmi sinánmiti ꞌain.

Lucas 9:10

Usa ꞌain ca aín ꞌunánmicë unicaman, an xucëx cuanx anu utëcënxun atun ꞌacë ñucama Jesús ñuixuancëxa. Ñuixuncëxun cuatancëxun ca Jesusan Bëtsaida ëma ꞌurama anu aín ꞌunánmicë unicama buáncëxa.

Juan 12:22

Quixuan cacëx cuanxun ca Felipenën Andrés pain cabiani a rabëtaxbi cuanxun —griego banan banacë unin ca mi istisa tania —quixun Jesús cacëxa.

Juan 13:23

Usa ꞌain ca aín ꞌunánmicë uni achúshi, aira Jesusan nuibacë, ax Jesús rapasu ꞌiacëxa.

Juan 20:2

Usobiani bënëtishi abáquiani cuanxun ca aín ꞌunánmicë uni aira Jesusan nuibacë, acëñun Simón Pedro cacëxa: —Unin sapi ca Nucën ꞌIbu quininua bibianquin buánxa, uinu cara buánxun racánxa cananuna ꞌunaniman.

Juan 21:2

Anu ca Simón Pedro, Tomás ꞌicëbi rabë́ bacë́an ꞌicë Gemelo caquinribi anëcë, a ꞌimainun Natanael, Galileanu ꞌicë Caná cacë ëmanu ꞌicë, a ꞌimainun Zebedeonën bëchicë rabë́ acamabë Jesusan ꞌunánmicë uni rabë́ribishi timë́cë ꞌiacëxa.

Juan 21:20

Usoquian cacëx caxu bësui cuainacëquin ca Pedronën a nuibairacë aín ꞌunánmicë uni, Juan, an Jesús nuibiania isacëxa. Ax ca an abëtan pi a rapasu tsóxun —uin cara uni mi ꞌinánti ꞌicë —quixun Jesús ñucáëxancë, a ꞌiacëxa.

Juan 21:24

ꞌËx Jesusan ꞌunánmicë uni achúshi ꞌixun cana ënë ñu camabi ñuiquin cuënëon. ꞌËn cuënëocë banacama ënëx ca asérabi ꞌicë quixun cananuna ꞌunanin.

Juan 6:67

Usa ꞌain ca atúxa cuan Jesusan mëcën rabë́ ꞌimainun rabë́ aín ꞌunánmicë unicama a cacëxa: —¿Mitsúxribi caramina cuainsa tanin?

Juan 6:70

Cacëxun ca Jesusan cacëxa: —¿ꞌËn carana ꞌën ꞌunánmicë uni ꞌinun micama mëcën rabë́ ꞌimainun rabë́ caísama ꞌain? Usai ꞌinun caísa ꞌaíshbi camina micama achúshinëx ñunshin ꞌatimanën ꞌapun sinánmicë ꞌain.

Juan 6:71

Usai ca Simonan bëchicë, Judas Iscariote, an aín ꞌunánmicë unicama achúshi ꞌixunbi a uni ꞌinánti, a ñui Jesús quiacëxa.

Juan 6:8

Caia ca aín ꞌunánmicë uni itsi, Simón Pedronën xucën, Andrés cacë, an Jesús cacëxa:

Hechos 1:13

Riquianx Jerusalénu bëbatancëx ca anua atux ꞌicë xubunu atsíanx manámia ꞌicë cata itsi anu cëñúruacëxa. Atux ca Pedro, Jacobo, Juan, Andrés, Felipe, Tomás, Bartolomé, Mateo, Alfeonën bëchicë Jacobo, Simón axa aín aintsin rabanan nëëcë, a ꞌimainun Jacobonën xucën Judas, acama ꞌiacëxa.

Hechos 1:26

Catancëxun ca uix cara ꞌiti ꞌicë isnuxun ñuratsu pain niquin tancëxa, tancëxbi ca Matías ꞌiacëxa. Usaquian caíscë ꞌaish ca Jesusan aín bana ñuixunun caíscë uni mëcën rabë́ ꞌimainun achúshi, acamabë Matías biranancëxa.

Hechos 12:2

Bëtsi bëtsi omiquin ca Juanën xucën, Jacobo, a manë xëtocën ꞌamiacëxa.

Hechos 3:1

Usa ꞌain ca bari cuabúcëbë a las tres ꞌain camabi nëtë́an ꞌicësabi, Pedrobë Juan anuxun Nucën Papa Dios rabiti xubunu abë banai cuancëxa.

1 Corintios 15:7

Usai ꞌianan ca Jacobomiribi chiquiracëanan an aín bana ñuixunun caíscë unicamamiribi chiquiracëtëcëancëxa.

Efesios 4:11

An ca ax cuëëncësa oquían bëtsi bëtsi ñu ꞌanun aín unicama ꞌimia. Bëtsi bëtsi unix ca aín bana ñuixunuan ꞌimicë ꞌicën. Raírinën ca Nucën Papa Dios quicë bana unicama ñuixunia. Raírinën ca axa Jesucristomi catamëcëma unicama amia catamënun upí oquin ꞌaquinia. Raírinën ca axa ami catamëcë unicama upiti Jesucristo cuëëncësabi oi ínun áquinia. Raírinën ca uisai cara Nucën Papa Diosan bana cuënëocama quia quixun uni ꞌunánmia.

Hebreos 3:1

ꞌËn xucë́antu, mitsux ainanshi ꞌinun Nucën Papa Diosan ꞌimicë ꞌixun camina, Nucën Papa Diosan a ñuiquin unicama ñuixunun ënë nëtënu xuá ꞌixuan an aín unicama Nucën Papa Dios ñucáxuncë, Cristo Jesús, a uisa uni cara ꞌiacëxa quixun upí oquinra ꞌunánti ꞌain.

1 Pedro 1:1

ꞌËx cana Pedro, aín bana unicama ñuixunuan Jesucristonën caísa ꞌain. Mitsun nëtënuax bëtsi bëtsi menu tsóti cuan ꞌaíshmi Ponto, Galacia, Capadocia, Asia, Bitinia, a nëtëcamanu ꞌicë cana ënë quirica mitsu buánmin.

2 Pedro 1:1

ꞌËx cana Simón Pedro, ax cuëëncësabi oquin ꞌanan aín bana uni ñuixunuan Jesucristonën caísa ꞌain. An nu ië́micë Jesucristo, axbi Nucën Papa Diosribi ꞌaish upí ꞌixuan nu ꞌacësaribi oquin ainan ꞌinun ië́micë, mitsu cana ënë quirica buánmin.

2 Juan 1:1

ꞌËx axa Jesucristomi catamëcë unicaman cushi ꞌixun cana mixmi Nucën Papa Diosan ainan ꞌinun caíscë xanu ꞌicë, ꞌën asérabi a nuibacë min tuácamacëñun, ënë quirica an Nucën Papa Diosan bana ꞌacë unicamabëtan, mi cuënëoxunin.

3 Juan 1:1

ꞌËx axa Jesucristomi catamëcë unicaman cushi ꞌixun cana, axa ꞌëx ꞌicësaribiti asérabi Nucën Papa Diosan uni ꞌaish ꞌë nuibacë Gayo, a ënë quirica buánmin.

Apocalipsis 1:1

Nucën Papa Diosan ca ënë quiricanu cuënëocë ñucama Jesucristo ismiaxa, xënibuiracëma ꞌaínshi ca ësai ꞌiti ꞌicë quixuan aín unicama isminun. Nucën Papa Diosan a ismicë ñucama aín unicaman ꞌunánun ca Jesucristonën aín ángel achúshi Juan isminun xuaxa.

Apocalipsis 1:9

ꞌËx Juan ꞌaish cana mitsúxmi ꞌicësaribiti Jesúsnan ꞌaish mitsun xucë́nsa ꞌain. Mitsúxmi ꞌicësaribiti cana Jesucristonan cupí, unin ꞌatimocë ꞌaíshbi asérabi Nucën Papa Diosan uni ꞌain. Mitsu ꞌacësaribi oquian an cushiocëxun cana uisa ñu cara ꞌicëbëbi bënë́quin ami catamëti ëniman. Usa ꞌixun Nucën Papa Diosan bana ñuixuanan, Jesús ñui quicë banaribi uni ñuixuncë cupí cana Patmos cacë nasínu sipuacësa ꞌinun unin ëncë ꞌain.

Apocalipsis 18:20

Usai quianan ca ësairibi quiaxa: —Aín unicama paë tanmiquin tëmëramicë, a cupíquin ca Nucën Papa Diosan Babilonianu ꞌicë unicama cëñuaxa. Usaquin ꞌan ca naínu ꞌicëcama, ꞌimainun an aín bana ñuixunun Jesusan caíscë unicama, ꞌimainun an Nucën Papa Diosan bana uni ñuixuncë unicama, ꞌimainun axa ami catamëcë aín unicama, camáxbi cuëënti ꞌicën.

Apocalipsis 22:8

ꞌËx Juan ꞌixun cana ꞌën ënë ñucama cuanan isan. Usoquin ënë ñucama cuanan isi cana ángel, an ꞌë ismicë, a rabinux a tanáin rantin purúan.