Lucas 2:34 - Kashibo-Kakataibo Biblia

³⁴ Sináncasmaiabi ca Simeónën acama Nucën Papa Dios ñucáxuntancëxun Jesusan tita, María, cacëxa: —Ënë tuá cania aín bana cuaisama tani ca ꞌitsaira Israel uni Nucën Papa Diosbë upíma ꞌiti ꞌicën. Usai ꞌicëbëbi ca ꞌitsa uníxribi aín bana cuati abë upíira ꞌiti ꞌicën. Uisai cara Nucën Papa Dios cuëënia quixuan unicaman ꞌunánun xucë ꞌaínbi ca ꞌitsa unix aín bana cuati cuëënima a ñui ꞌatimati banati ꞌicën.

Nukën 'Ibu Diosan ain unikama 'inan ain bana

³⁴ Sináncasmaiabi ca Simeónën acama Nucën Papa Dios ñucáxuntancëxun Jesusan tita, María, cacëxa: —Ënë tuá cania aín bana cuaisama tani ca 'itsaira Israel uni Nucën Papa Diosbë upíma 'iti 'icën. Usai 'icëbëbi ca 'itsa uníxribi aín bana cuati abë upíira 'iti 'icën. Uisai cara Nucën Papa Dios cuëënia quixuan unicaman 'unánun xucë 'aínbi ca 'itsa unix aín bana cuati cuëënima a ñui 'atimati banati 'icën.

Lucas 2:34 Iomraidhean Croise

Génesis 14:19

Upíokin sinánxunkin Abram ësokin kakëxa: Mi ka Nukën ꞌIbu Dios naí manámi ꞌikë an naí ꞌimainun mekama unio an ꞌupiokin sinánxunti ꞌikën;

Génesis 47:7

Usa ꞌain ka Josénën aín papa Jacob aribi ꞌapu faraón a ꞌunánmikin aín xubunu uankëxa. Uankëxun ka ꞌurama okin Jacobnën upiokinshi kakin faraón ꞌurama okëxa,

Isaías 8:18

ꞌË ꞌimainun ꞌën bëchikëkama Nukën ꞌIbu Diosan ꞌë ꞌinánkë a kamabë kana unin ꞌunánun unitsin ꞌakëma ñusa Israel unikamanan ꞌain, Nukën ꞌIbu Dios kamabi kushiñuira axa aín bashi Siónnu ꞌikë an nankë kananuna nux ꞌain.

Oseas 14:9

An ñu ꞌunánkë unikama ꞌimainun sinánñu unikama, akaman ka ënë bana kuati ꞌikën: Kamabi ñu Diosan ꞌá ax ka upíokin ꞌá ꞌikën, usa ꞌain ka an ñu ꞌupíshi akë unikaman ax kikësabiokin ꞌaia; usa ꞌaínbi ka ꞌatima sinánñu unikama usakin ñu ꞌaiama Diosan ꞌatima oia.

Mateo 11:19

Usoquian Juanën ꞌacësoquin ꞌaquinma ꞌën camabi ñu pianan xëaia isquin ca unicaman ësaquin ꞌë ñuia: A unix ca picën tapun ꞌianan xëairacë uni ꞌicën. Ax ca an ꞌapu buánmiti curíqui bicë unicama ꞌimainun ꞌuchañu unicamabë nuibanania —quixun. Usaquian Juancëñun unin ꞌë ñuicëbëbi ca Nucën Papa Dios, an ënë menu unun ꞌë xua, an ꞌacë ñucamax asábi ꞌicën. Usa ca quixun ca axa ami sináncë unicaman ꞌunania.

Mateo 12:46

Jesusan anu ꞌicë unicama bana ñuixunmainun uxun ca ëmánxun aín tita ꞌimainun aín xucë́antun —Jesúsbë cananuna banacatsi —quixun anu ꞌicë uni cacëxa.

Mateo 21:44

ꞌImainun ca a maxáxa an cuëëncëma unicama usaribi an ꞌë cuëëncëma uni ꞌicën. Maxáxmi tatiqui chacáquin ca maxáxmi rëracaquin aín namicama chacaia. ꞌImainun ca manánuax nipacëquin maxaxan uni chacaquin chëcaia.

Mateo 27:63

Cuanxun ca cacëxa: —A cëmë unix ca bamacëma pain ꞌaish: ꞌËx cana bamaxbi rabë́ ꞌimainun achúshi nëtë ꞌicëbë baísquiti ꞌai quiax quiaxa. A bana cananuna sinanin.

Lucas 2:35

Usai ꞌia isquin ca an uisoquin cara aín nuitu mëu sinania quixun Nucën Papa Dios ꞌimainun unicamanribi ꞌunánti ꞌicën. Usaía ꞌimainun camina mixribi, María, a sinánxuni masá nuituirati ꞌain. Usaquin ca Simeonën María cacëxa.

Juan 3:20

An ñu ꞌatima ꞌacë unicaman ca an ꞌaia unin isti rabanan xabánuxun ꞌati cuëënquinma bëánquibucënuxun ñu ꞌaia.

Juan 5:18

Usaía Jesús quia cuati ami nishquin ca judíos unicaman ësaquin sináncëxa, —Usai qui ca Nucën Papa Dios ax isa aín papa ꞌicë quianan ax isa Nucën Papa Diossaribi ꞌicë quia. Usaquin sinani ca anun ñu mëëtima nëtën uni pëxcucë cupí ami nishanan, usaía quicë cupíribi ami nishquin, a ꞌacatsi quiax ꞌësë́nancëxa.

Hechos 13:45

Usaía ꞌitsaira uni timë́cë isi ca judíos unicamax pishui Pablomi nishacëxa. Ami nishi ca —cëmëi ca quia —quiax ꞌatimati Pablomi banacëxa.

Hechos 17:6

Usai quiquinbi mëraquinma ca Jasóncëñun axa Jesucristomi catamëcë unicama raíri nirínbianquin a ëmanu ꞌicë unicaman ꞌapunu buáncëxa. Buani ca munuma sharati quicancëxa: —An camabi menu ꞌicë unicama tsuáquirumicë uni rabëtax ca ënu uaxa.

Hechos 24:5

Ënë unix ca nun iscëx an camabi menua judíos unicama bëtsi bana ñuixunquin ubíoquin tsuáquirumicë ꞌianan nazareno cacë unicaman cushi a ꞌicën.

Hechos 28:22

Cananuna ꞌunanin, mecama oquin ca axa Jesúsmi sináncë unicama ami nishquin unin ñuia. Usa ꞌain cananuna minmi a uisaira cara a ñucama ꞌicë quixun ñuia cuaisa tanin.

Hechos 4:26

Nucën ꞌIbu Diosmi ꞌianan ca aín Bëchicë Jesucristomiribi ꞌi ënë menu ꞌicë ꞌapucama tsuáquiruaxa, aín tucuricucamaxribi ca ami ꞌi timë́axa.

Hechos 6:7

Usa ꞌain ca amiribi amiribia, Jesús ax ca asérabi Cristo ꞌicë quixun Jerusalénuxun cuacocancëbë, ami sinani Nucën Papa Diosnan ꞌi unicamax ꞌitsacëxa. Usai ꞌicëbë ca judíos sacerdotecamaribi ꞌitsaxira Jesúsmi catamëacëxa.

Romanos 9:32

Nucën Papa Diosan ca aín cuëëncësabi oquin ꞌanun ꞌë ꞌaquinti ꞌicë quixun sinani ami catamëquinma —ꞌënbi ñu upí ꞌaia ca ꞌë upí isia —quixun sináncë cupí ca Nucën Papa Diosan atu upí isáma ꞌicën. Judíos unibunën ca —Nucën Papa Diosan ca Cristo ënë menu xuti ꞌicë —quixun ꞌunánquinbi —ami catamëtishi ca unicama Nucën Papa Dios cuëëncësabi oi ꞌiti ꞌicë quixun sinántisama tanxa. Bain cuanía uni bai nëbë́tsi racácë maxáxmi tatíqui chacácë usaribi ca usa uni ꞌicën. A maxáxsa ca Cristo ꞌicën. Judíos unicamax Nucën Papa Dios cuëëncësabi oi ꞌiti ꞌaíshbi ca Cristomi sinántisama tancë cupí ax cuëëncësabi oi ꞌima.

1 Corintios 1:23

A unicamaxa usa ꞌaínbi cananuna nun i curúsocënu matáscë Cristo, a ñuiquin unicama bana ñuixunin. A bananu nun unicama ñuixuncëbë ca judíos unicamax rabini, uisa ꞌaish caraisa Cristo i curúsocënu bamati ꞌicë quixun sinani, ami catamëisama tania. Usaía judíos unicama ꞌimainun ca judíosma unicaman —Diosan Bëchicë ca i curúsocënuax bamacëxa —quixun ñuiquin ꞌusania.

Hebreos 7:1

Mitsux Abrahamnën rëbúnqui ꞌixun camina ꞌunanin, Melquisedec ax ca Salem cacë menu ꞌicë unicaman ꞌapu ꞌiacëxa. Ax ca sacerdote, an unicama Nucën Papa Dios manámi ꞌicë a ñucáxuncë ꞌiacëxa. Usa ꞌain ca bëtsi menu ꞌicë ꞌapucaman Abrahamnën xucënan bëchicë Lot cacë, aín nëtënu ꞌicë unicamabë ꞌacánanquin ñusmotancëxun aín ñucamacëñunbi ꞌitsa uni ꞌimainun xanu ꞌimainun tuáribi buáncëxa. Usoquin ꞌacë cuabiani aín unicama buani cuanxun ca Abrahamnënribi a suntárucama ñusmoxun abámianan anu ꞌicë ꞌapucaman buáncë unicamacëñun camabi ñu bitëcëancëxa. Bibiani cuantëcëni ca Abraham Melquisedecbë mëranancëxa. Abë mërananquin ca Melquisedecnën, Nucën Papa Diosan ca Abraham ꞌaquianxa quixun ꞌunanquin —an ca mi upí oquin sinánxunia —quixun caquin, a Nucën Papa Dios ñucáxuancëxa.

Hebreos 7:7

Uni itsían Nucën Papa Dios ñucáxuncë uni ax ca an Nucën Papa Dios ñucáxuncë uni meu ꞌicën. Uinu ꞌicë unínbi ca —usama ca —quixun caima. Usa ꞌain ca Abraham Melquisedec meu ꞌiacëxa.

1 Pedro 4:14

Cristonan cupía unin mitsumi nishquin ꞌatimaquin ñuicëxbi camina Nucën Papa Diosan Bëru Ñunshin Upí cushiira, axa mitsubë ꞌain, cuëënti ꞌain. Unían ꞌatimaquin ñuiabi camina mitsun Cristo rabin.

1 Samuel 2:20

Buánxunkë ꞌain ka Elínën Elcaná ꞌimainun aín xanu upíokin sinánxuni ësai kiakëxa: Nukën ꞌIbun ka ënë xanumi bëchitëkënun mi ꞌakinti ꞌikën, an ka aín ñu mëëti ꞌanun ënë tuá ꞌimiaxa. Ësokin ꞌatankëx ka aín xubunu kuankëxa,