Levítico 23:3 - Kashibo-Kakataibo Biblia

³ Mapai achúshi ꞌimainun achúshi nëtë anun kamina mitsun ñu mëëti ꞌati ꞌain, ꞌaínbi kamina a ꞌiónxa pë́karakë anun uisa ñu mëëtibi ꞌatima ꞌain; ax ka anun ñu mëëtima upí nëtë ꞌiti ꞌikën. Anun kamina uinu karamina tsotin anuxunbi timë́xun min ꞌIbu rabikanti ꞌain.

Levítico 23:3 Iomraidhean Croise

Éxodo 16:23

ñuixunkëxun ka Moisésnën kakëxa: —Asérabi ka ësai Nukën ꞌIbu kiaxa: Imë́ishi ka sábado nëtë ꞌia, ax ka achúshi nëtë anun ñu mëëima ꞌianan, anun Nukën ꞌIbu rabiti nëtë ꞌikën. Usa ꞌain kamina imë́ishi piti ꞌati sinánxun bëríbi ꞌaruti a ꞌaruanan xuiti a xuiti ꞌain, ꞌaxun kamina tëxëokë a imë́ishi ꞌati mëníokin nankanti ꞌain.

Éxodo 16:29

Min kamina kati ꞌain, ꞌëx Nukën ꞌIbu ꞌixun kana achúshi nëtë anúan tantiti nëtë ꞌinan, usa ꞌain kana mapai achúshi ꞌimainun achúshi nëtë anunbi rabë́ nëtë ꞌimikin piti ꞌinánti ꞌain. Usa ꞌain ka uíxbi a nëtën aín xubunuax kuaintima ꞌikën.

Éxodo 16:30

Usakian kakëx ka mapai achúshi ꞌimainun rabë́ nëtë ꞌikëbë kamabi unix kuainima tantiakëxa.

Éxodo 34:21

Mitsun kamina mapai achúshi ꞌimainun achúshi nëtë ꞌimikin ñu mëëti ꞌain, ꞌaínbi kamina achúshi nëtë ꞌirutëkënkë anun tantiti ꞌain, a nëtën mitsun ñu ꞌapákë aín bimi bianan ñu mëëti ꞌaínbi kamina a nëtën ꞌatima ꞌain.

Isaías 58:13

Anun ñu mëëtima nëtë ꞌikëbëtan kamina; mitsun maruti ñu marutima ꞌain: ax ka ꞌën nëtë upíira ꞌikën. Usa ꞌain ka a nëtë anun kuëënti nëtë, kakin anëkë ꞌain Nukën ꞌIbun anun rabiti nëtë ꞌain añu ñubi uinu ꞌikë unínbi ꞌatima ꞌikën; usa ꞌain kamina a nëtën mintsun sinánkësa ꞌoíshi bananan, mitsunan ꞌiti ñuishi ꞌanan mitsun ñu marutishi ꞌakantima ꞌain.

Levítico 19:3

Mitsun kamina min papa bana kuanan min titan banaribi kuati ꞌain. ꞌImainun kamina anun ñu mëëtima nëtë ꞌikëbë anun tantiti ꞌain. ꞌËx kana mitsun Dios ꞌain.

Lucas 13:14

Usa ꞌaínbi ca Jesusan anu ñu mëëti nëtën xanu pëxcüan, axa anu judíos unicama timë́ti xubunu ꞌicë ꞌapu nishacëxa. Nishquin ca anu ꞌicë unicama cacëxa: —Anun ñu mëëti nëtëx ca mëcën achúshi ꞌimainun achúshi ꞌicën. Anun ñu mëëtima nëtën camina utima ꞌain, anun ñu mëëti nëtë́inshi camina pëxcucë ꞌinux uti ꞌain.

Lucas 23:56

Isbiani atun xubunu cuanxun ca anun Jesús sanu oti ro buánuxun mëníocëxa. Mëníotancëx ca Moisésnën cuënëo bana quicësabi oi, anun ñu mëëtima nëtë ꞌain, tantiacëxa.

Hechos 15:21

Nucën raracaman ꞌásaribi oquin ca camabi ëmanuxun unin anua judíos unicama timë́ti xubunuxun anun ñu mëëtima nëtëcaman, Moisésnëan cuënëo bana ñuixunia. Usa ꞌixuan Moisésnën usai judíos unicama ꞌiti cuënëo bana ꞌunáncë ꞌicë cananuna ësaquin caquinshi atu quirica buánmiti ꞌain.

Apocalipsis 1:10

Anun Nucën ꞌIbu Dios rabiti nëtën ꞌëx ami sinánquin cana ꞌuxúnmabi namácësa oquin, ꞌë caxucüaxa manë banañu banocë́xa banacësari munuma banaia cuan.