Juan 21:15 - Kashibo-Kakataibo Biblia

¹⁵ Pia sënë́ncë ca Jesusan Simón Pedro cacëxa: —¿Jonásnën bëchicë, Simón, min ñucama sináncësamaira oi caramina ꞌëmi sinánquin ꞌë nuibatin? Cacëxun ca cacëxa: —ꞌËn ꞌIbu, min camina ꞌunanin, ꞌën cana mi nuibatin. Quia ca cacëxa: —ꞌËn carnero bacë ca piminuxun ꞌat.

Nukën 'Ibu Diosan ain unikama 'inan ain bana

¹⁵ Pia sënë́ncë ca Jesusan Simón Pedro cacëxa: —¿Jonásnën bëchicë, Simón, min ñucama sináncësamaira oi caramina 'ëmi sinánquin 'ë nuibatin? Cacëxun ca cacëxa: —'Ën 'Ibu, min camina 'unanin, 'ën cana mi nuibatin. Quia ca cacëxa: —'Ën carnero bacë ca piminuxun 'at.

Juan 21:15 Iomraidhean Croise

Génesis 33:13

Kakëxun ka Jacobnën ësokin kakëxa: —Mix kamina ꞌën nuibakë xukë́n ꞌain, minbi kamina ꞌunan uniakë xuratsu ax kuani ka bënëtishi atsania ꞌimainun kana sinanin ꞌën ovejakama ꞌimainun vaca tuáñu akamaxribi atsani ka achúshi nëtë́inshi kamáxëshi bamati ꞌikën; ꞌianan ka kamabi ovejanën tuakamaxribi bamati ꞌikën.

2 Samuel 7:20

¿ꞌËn ꞌIbu Dios min uni ꞌixun karana uisa banaribi mi kati ꞌain?

Isaías 40:11

ꞌIanan ka an ñuina bërúankë unían aín ñuina bërúankin; aín ñuinakama nuibakin aín shikami okin ꞌikúkin bixun tuianan, axa bërí bakënkëkamaribi bëruinra okë usaribi okin ꞌaia.

Jeremías 23:4

ꞌËn kana an ñuina bërúankë uni ꞌakësa ꞌinua an bërúanti ꞌapu nanti ꞌain, usakin nankëxun bërúai ka uimibi rakuë́tima ꞌianan achúshibi nëtë́nun ꞌimitima ꞌikën. ꞌËx min ꞌIbu ꞌaish kana ësai kin,”

Ezequiel 34:23

ꞌËn kana ꞌën uni David axa utëkënun bëti ꞌain, a kana axëshi ꞌapu ꞌixuan ꞌën unikama bërúanun ꞌimiti ꞌain, ꞌimikëxun ka an ñuina bërúankë unisa ꞌixun ꞌën unikama bërúanti ꞌikën. Ax ka an atu bërúankë unisa ꞌiti ꞌikën.

Mateo 10:37

ꞌËn unicaman ca aín papa, aín tita nuibati ꞌicën. Nuibatibi ca atu nuibacësamaira oi ꞌëmi sinánti ꞌicën. Usai ꞌëmi sináncëma ꞌaish ca ꞌën unimasa ꞌicën. Usaribiti ca ꞌëmi sináncësamaira oquian aín bëchicë nuibacë uni ax ꞌën unimasa ꞌicën.

Mateo 16:17

Cacëxun ca Jesusan cacëxa: —Simón, Jonasan bëchicë, cana mi cain, unin ca usaquin mi sinánmicëma ꞌicën. ꞌËn Papa naínu ꞌicë an ca mi sinánxunquin usoquinmi sinánun mi sinánmiaxa. An ca mi sinánmiaxa quixun ꞌunani camina cuëënti ꞌain.

Mateo 18:10

ꞌËn unicamax ca tuáratsusa ꞌaish ñuuma ꞌicë quixun camina sinántima ꞌain. ꞌËn cana mitsu cain, ca ñuumama ꞌicën. An a bërúancë ángelcamax ca Nucën Papa Diosbëbi ꞌicën.

Mateo 26:33

Usaía quia ca Pedronën cacëxa: —Raírinëxa mi ëbiani axa mimi nishcë unicamami racuëti abácëbëbi cana ꞌëxëshi mi ëbiani abátima ꞌain.

Mateo 26:35

Cacëxun ca Pedronën Jesús cacëxa: —ꞌËx mibë bamanuxunbi cana, ꞌën cana mi ꞌunáncëma ꞌai quixun uni parántima ꞌain. Ësaquian caia ca raírinënribi cacëxa.

Marcos 14:29

Usaía quia ca Pedronën cacëxa: —Raírinëxa mi ëbiani abácëbëbi cana ꞌëxëshi mi ëbiani abátima ꞌain.

Lucas 12:32

Ësaquinribi ca Jesusan aín ꞌunánmicë unicama cacëxa: —Mitsux camina ꞌënan ꞌain. Usa ꞌaish ꞌitsairama ꞌaínbi ca mitsux ainan ꞌianan aín nëtënu abë ꞌiti Nucën Papa Dios cuëënia. Usaquin ꞌunani camina racuë́tima ꞌain.

Lucas 22:32

Usa ꞌaínbi cana ꞌëmi catamëti ënxunma ꞌanun Nucën Papa Dios mi ñucáxuan. ꞌËmi ꞌuchaxbi sinanati ꞌëmi cushiquin camina axa ꞌëmi catamëcë uni raíri ꞌëmia asérabi upiti catamënun ꞌaquinti ꞌain.

Juan 1:42

Cabianquin ca aín xucën Jesúsnu buáncëxa. Buáncëx bëbaia isquin ca Jesusan bëñachaquin cacëxa: —Mix camina Juanën bëchicë, Simón, a ꞌain. ꞌAíshbi camina Cefas caquin anëcë ꞌiti ꞌain. Cefas quicë bana, ax ca Pedro qui quicë ꞌicën.

Juan 13:37

Cacëxun ca Pedronën cacëxa: —¿Uisa cupí carana bëríbi mibë cuantima ꞌain? Unían ꞌë ꞌanúnbi cana mibë cuanti ꞌain.

Juan 16:27

An ca asérabi mitsu nuibatia. Mitsúxmi ꞌëmi sinánan ꞌëx cana Nucën Papa Diosnuax uá ꞌai quixun sináncë cupí ca an mitsu nuibatia.

Juan 21:12

Usoia ca Jesusan —ca pi ucan —atu cacëxa. Cacëxunbi ca aín ꞌunánmicë unicama achúshinënbi, ënëx ca Nucën ꞌIbu ꞌicë quixun camaxunbi ꞌunánquin, —¿ui caramina ꞌain? —quixun ñucáma ꞌicën.

Juan 21:7

Usocëbëtan ca aín ꞌunánmicë uni achúshi, aira nuibacë, an —ax ca Nucën ꞌIbu ꞌicë —quixun Pedro cacëxa. Cacëxuinshi pëxúan nancë aín chupa bixun pañutancëx ca Pedro nuntinuax bacanu ꞌibúquiani Jesúsnu cuancëxa.

Juan 8:42

Usaquian cacëxun ca Jesusan cacëxa: —Nucën Papa Diosnuax cana ꞌëx ënë menu uacën. ꞌËx cana ꞌëxbi uáma ꞌain, an ca ënu unun ꞌë xuacëxa. Usa ꞌain camina mitsux asérabi Nucën Papa Diosnan ꞌaish ꞌëmi sinántsian.

Hechos 20:28

Usa ꞌain camina mitsun mina ñu ꞌaisama ꞌai bërúancati ꞌain. Bërúancanan camina axa Jesucristomi catamëcë unicamaribia upí ꞌinun bërúanti ꞌain. Nucën Papa Diosan Bëru Ñunshin Upitan ca usoquinmi axa Jesucristomi catamëcë unicama bërúanun mitsu ꞌimiaxa. A unicamax ca axa bama cupí Nucën ꞌIbu Jesucristomi catamëcë ꞌaish aín uni ꞌicën.

Hechos 20:29

ꞌËn cana ꞌunanin, ꞌëx cuancëbë ca uni raíri uti ꞌicën. Uxun ca axa ami sináncë unicama, Jesucristomi catamëti bana a ënun quixun paránti ꞌicën. ꞌInúanëan bëtsi biquin carnero tsuácacësaribi oquin ca a unin axa ami sináncë unicama Jesús manunun quixun parántisa tanti ꞌicën.

Romanos 14:1

Axa Jesucristomi catamëcë unin uisai cara Jesusan uni ꞌiti ꞌicë quixun upí oquin ꞌunáncëma ꞌicëbi camina mitsubë timë́tisa tania cuëënquin biti ꞌain. Uisai cara Jesusan uni ꞌiti ꞌicë qui camina abë cuëbicanántima ꞌain.

Romanos 15:1

Bëtsi bëtsi ñu ꞌati ca asábi ꞌicë quixun nun ꞌunáncë ꞌixunbi cananuna uni itsían, usa ñu ꞌati ca Nucën Papa Dios cuëënima quixun sináncë cupí a ñu ꞌaisa tanquinbi ꞌatima ꞌain.

1 Corintios 8:11

Min a nami piquin camina, minun rabanan ꞌicësaribitia anun rabananribi Cristo bama uni, a ꞌuchamin.

Gálatas 5:6

Nux asérabi Jesucristonan ꞌaish cananuna ꞌunántioracacë unicama ꞌicësaribiti ꞌunántioracacëma ꞌaíshbi Nucën Papa Diosan iscëx upí ꞌain. Jesucristomi catamëcë ꞌixúan an uni nuibacë uni ax ca Nucën Papa Diosan iscëx upí ꞌicën.

Efesios 4:14

Usai ꞌi cananuna bërámanu ꞌiásaribiti bërí ꞌitima ꞌain. Bërí cananuna tuáxunratsunën unín paráncëxun sinánbëquincësa ꞌaish unín bëtsi bëtsi bana ñuixunquin paráncëxun amanua amanua sinani usaribi ꞌitima ꞌain. An uni paráncë unicaman cëmëquin nu paránquin ñu ꞌatima ꞌanun quixun ꞌimicëx usai ꞌiá ꞌaíshbi cananuna bërí usai ꞌitëcëntima ꞌain.

Efesios 6:24

Mitsúxmi a manutëcëntimoi Nucën ꞌIbu Jesucristomi catamëcë ꞌicëa, Nucën Papa Diosan nuibaquin mitsu ꞌaquinti cana cuëënin. Ashi, Pablo.

Hebreos 13:20

Nucën Papa Dios, an aín unicama abë upí ꞌinun ꞌimicë, an ca Nucën ꞌIbu Jesucristo, an aín unicama bërúainracë, a bamacëbi baísquimiacëxa. An Jesús aín imi ꞌapati bamacë cupí nun ꞌuchacama tërë́nquin nux xënibua ꞌaínbi ainan ꞌinun ꞌimicë,

Hebreos 4:13

Axa an unio ꞌaish Nucën Papa Diosmi unë́ti uisa ñubi ca ꞌaíma ꞌicën. An uni aín ñu ꞌacë cupí, uisa cara oti ꞌicë quixun ꞌunáncë, Nucën Papa Dios, an ca camabi ñua unin ꞌaia ꞌunánan aín nuitu mëúa chiquinaquinma sináncë ñubi ꞌunania.

1 Pedro 1:8

A isúnmabi camina mitsun Jesucristo sinanin. Usa ꞌain camina a isaxmabi ami sinani chuámarua tani cuëëinra cuëënin, anúnmi uisairai caramina cuëëni quixun nu ñuixunti bana ꞌaíma ꞌaínbi.

1 Pedro 2:2

Bërí bacë́ncë tuacën ca anun caninuxun aín titan xuma ꞌati cuëënia. Usaribi oquin camina Nucën Papa Diosan bana upí oquin ꞌunánti cuëënti ꞌain, ainan ꞌaish aín cuëëcësabi oquin ꞌai ami cushicë ꞌinuxun.

1 Pedro 2:25

Carneronëxa ꞌibuñuma ꞌaish ꞌicësari camina mitsux ꞌiacën. Usa ꞌiá ꞌaíshbi camina sinanati Cristomi catamëan. Amia catamëcëxuan aín ꞌibun carnero bëruancësa oquin ca an upími ꞌinun mitsu bërúanquin ꞌaquinia.

1 Juan 4:19

An paían nu nuiba ꞌain cananuna nuxribi Nucën Papa Diosmi sinani ami catamëtin.

1 Juan 5:1

An —Jesús ax ca Cristo, axa utia judíos unicaman caían, Nucën Papa Diosan Bëchicë, a ꞌicë —quixun sináncë unicamax ca Nucën Papa Diosan bëchicëribi ꞌicën. Uicamax cara Nucën Papa Diosmi sinania ax ca aín bëchicëcamamiribi sinania.

Apocalipsis 2:23

ꞌAnan cana a xanun ꞌunánmicë ꞌixuan an ꞌatima ñu ꞌacë unicamaribi aín tuása ꞌicë acama bamamiti ꞌain. ꞌËn usaquin ꞌacëbëtan ca camabi ëmanu ꞌicë axa ꞌëmi catamëcë unicaman ꞌunánti ꞌicën, ꞌën cana camabi unían sináncë ñu ꞌunanin, uisaquin cara aín nuitu mëu sinania quixunribi cana ꞌunanin. ꞌUnánquin cana an upí oquin sinánquin ñu ꞌacë uni axa upitax ꞌinun ꞌimianan, an ꞌatima ñu ꞌacë uni a aín ꞌucha cupí uisoquin carana ꞌati ꞌai usoquin ꞌati ꞌain.