Joel 2:32 - Kashibo-Kakataibo Biblia

³² ꞌAínbi ka kamabi unikama an Nukën ꞌIbun anë rabikë atun bamatinuax ië́ti tanti ꞌikën, usa ꞌain ka aín bashi Sión kakë Jerusalénnu ꞌikë anu ka anua atux ië́ti ꞌiti ꞌikën. Nukën ꞌIbu usai ka ꞌiti ꞌikë kiax kiásabi oi. Usa ꞌain ka an kaískë unikamax bamanuxbi tsókëpan ꞌiti ꞌikën.

Joel 2:32 Iomraidhean Croise

Génesis 4:26

Usa ꞌain ka Setnënribi achúshi bëchikë ꞌakëxa, aín anëx ka Enós kakë ꞌiakëxa. Usa ꞌain ka a nëtëkaman unin Nukën ꞌIbu ꞌakinun kixun ñukákëxa.

Isaías 46:13

ꞌËn kana ꞌën ꞌati ñukama axa ꞌurama ꞌinun ꞌimiti ꞌain; usa ꞌain ka ꞌëx ië́mianankë ax ꞌuramara ꞌikën. ꞌËn kana Sión kakë ëmanu ꞌikë unikama ië́miti ꞌain, ꞌën kana Israel unikama ꞌë ꞌakësaribi okin uisakinbi kanunma ꞌimiti ꞌain.

Jeremías 31:7

Ësai ka Nukën ꞌIbu kiaxa: “Israel unikama Jacobnën rëbúnki, mitsux kamina munuma kantai kuëëni ësai kikanti ꞌain, nux kananuna bëtsi ëma kamasamaira ꞌain. Usa ꞌain kamina ësaiki kantakin mitsun bana kuami ësai kikanti ꞌain. Nukën ꞌIbun ka aín unikama ꞌakinkin ië́miakëxa, nukamax kananuna bëtsi menu bua ꞌaíshbi ñukëma amiribishi utëkëan.

Amós 9:8

ꞌËn kana ënë ëmanu ꞌikë unikama ꞌuchañu isan, usa ꞌain kana ësai kin: “ꞌËn kana ënë menua atu këñuti ꞌain, usa ꞌaínbi kana Jacobnën rëbúnkikama kamaira këñutima ꞌain. ꞌËx Dios ꞌaish kana, ësai kin.

Miqueas 5:3

Usa ꞌain ka bërí Diosan aín unikama ënia, ꞌaínbi ka xanun aín tuá achúshi bakënuxun kainkë usa ꞌiti ꞌikën. Usa ꞌain ka a tuá aín aintsi Israelkama ñatanbiankin buánkama abë birananti ꞌikën.

Juan 10:16

Bëtsi carneroñuribi cana ꞌain. A ꞌaíshbi ca ënë cënënu ꞌicëma ꞌicën. Aribi cana ënë cënënua ꞌinun bëti ꞌain. Acamanribi ca ꞌën bana cuati ꞌicën. Usaquin ꞌën ꞌacëx ca ꞌën carnerocamax achúshi cënënushi ꞌiti ꞌicën, achúshishi ca an a bërúancë ꞌiti ꞌicën.

Juan 4:22

Mitsun camina ui caramina rabi quixun ꞌunaniman. Nun cananuna ui caranuna rabi quixun ꞌunanin. An uni Nucën Papa Diosnan ꞌinun ië́miti, ax ca judío uni ꞌiti ꞌicën. An usaia ꞌinun mënío, a cananuna nun rabin.

Hechos 15:17

Judíos unicamainshima judíosma unicamanribia ꞌënan ꞌinuxun ꞌë ñucácë cupí cana acaman ꞌapu, Davidnën rëbúnqui achúshi ꞌimiti ꞌain.

Hechos 2:39

Ënë banacamax ca mitsu ꞌimainun mitsun bëchicëcama ꞌimainun bëtsi unicamanribi cuati oquin Nucën Papa Diosan mënío ꞌicën. Amia sinánmisa tancë unicamanribi cuati oquin ca usoquin mëníocëxa.

Romanos 11:26

Judíosma unibu ami catamëcëbë ca judíos unibunëxribi ami catamëti ꞌicën, Nucën Papa Diosan bana cuënëo ësai quicësabi oi: An unicama asérabi Nucën Papa Diosnan ꞌinun ië́miti ax ca Siónu ꞌicë judíos unicama achúshi ꞌiti ꞌicën. An ca Jacobnën rëbúnqui judíos unicama ami catamëcëxun atun ꞌucha tërë́nquin atun nuitu upí ꞌimiti ꞌicën.

Romanos 11:5

Usaía bëráma uni ꞌiásaribiti ca bëríribi judíos unicama aín patsan Nucën Papa Diosmi sináncëma ꞌaínbi raírinëx ainan ꞌinúan caíscë ꞌaish Nucën Papa Diosmi sinania.

Romanos 11:7

Usa ꞌain ca ësai ꞌiaxa: Judíos unibunëxa abë upí ꞌiisa taníbi ax quicësabi oi ꞌi Jesucristomi catamëcëma ꞌaish abë upíma ꞌaínbi ca raírinëxëshi Nucën Papa Diosan sinánmicëx Jesucristomi catamëcë ꞌaish abë upí ꞌia. Judíos unicama aín patsanëxa ami sinántisama tania oquin ca Nucën Papa Diosan atux cuëëncësa oía ꞌinun ëanxa.

Romanos 9:24

Raírinëxa judíos uni ꞌimainun raírinëxribi judíosma uni ꞌicëbi ca Nucën Papa Diosan ainan ꞌinun nu ꞌimiaxa.

Romanos 9:27

Isaíasnënribi ca Nucën Papa Diosan ꞌamicëxun judíos unibu ñuiquin ësaquin cacëxa: “Israelnën rëbúnqui ꞌaisamaira, parúnpapa cuëbí ꞌicë masisa, ꞌaíshbi ca acama ꞌitsamanëxëshi asérabi Nucën Papa Diosnan ꞌinux ië́ti ꞌicën.

1 Corintios 1:2

Mitsúxmi Corinto ëmanuax Jesucristomi catamëcë ꞌicë, cana cuënëoxun ënë quirica mitsu buánmin. Mitsux Cristo Jesúsmi catamëcë ꞌaish camina Nucën Papa Diosnan ꞌain. An ca ax cuëëncësabi oíshi ꞌinun mitsu caísacëxa. Camabi menu ꞌicë unicama, an Nucën ꞌIbu Jesucristo aín ꞌuchacama tërë́nxunun quixun ñucácë, a unicama usai ꞌinun caíscësaribi oquin ca Nucën Papa Diosan mitsu caísacëxa. Jesucristo ax ca a unicaman ꞌIbu ꞌianan nun ꞌIburibi ꞌicën.

Hebreos 12:22

Mitsux camina aín bashi Sinaí anuaxa Nucën Papa Dios baná anu cuanma ꞌain. Bëráma camina mitsux Nucën Papa Dios rabinux Sión cacë matá, anua Jerusalén ꞌicë, anu cuancën. Usai ꞌiá ꞌaíshbi camina Jesucristonan ꞌaish, uinu caramina ꞌai anuax, Nucën Papa Dios axa bamatimoi naínu ꞌicë Jerusalén aín nëtënu tsócë, abë banain. Anuxun ca ꞌitsaira ꞌixun aín ángelcama timë́xun a rabia.