Joel 2:12 - Kashibo-Kakataibo Biblia

¹² “ꞌAinbi ka —bërí asérabi Nukën ꞌIbu ësai kiaxa—, amiribishi kamina mitsun nuitunënbi ꞌëmi asérabi sinanakanti ꞌain. ¡Usai ꞌi kamina añubi piima ꞌianan munuma kuënkëni bënëti inkanti ꞌain!”

Joel 2:12 Iomraidhean Croise

Éxodo 33:5

usakian kanun ka Nukën ꞌIbun Moisés kakë ꞌiakëxa: —Israel unikama kamina kati ꞌain: Mitsux kamina sinan iruarakë unibuira ꞌain. ¡ꞌËx mitsubë ꞌixun kana bënë́kinshi mitsu këñúkë ꞌitsian! Usa ꞌain kamina bëríbi mitsun tëñuti ꞌimainun mëñusuti akama uisa karana mitsu oi isnun pañutima ꞌain.

Isaías 58:4

anúnmi pikë mëti nëtë anun kamina mitsux ñukanantankëx mëëanankin bëtsi min mëkënanbi mëëxun rëtëkin a nëtë inumikanin. Usa ka anun pikë mëti achúshi nëtë ax ꞌitima ꞌikën, usai ꞌikin ñukákëxunbi kana ꞌën mitsun bana kuatima ꞌain.

Jeremías 36:7

Usakin mi ꞌaia kuati sinanakin sapika atun ñu ꞌatima ꞌakëkama Nukën ꞌIbu chikinaxunkin ënti ꞌikën. Usa ꞌain ka Nukën ꞌIbu ꞌitsaira nishaxa, usa ꞌain ka usakin unikama ꞌakatsia kikë ax ꞌaisama ñuira atunu ꞌiti ꞌikën.”

Ezequiel 33:11

Usa ꞌaínbi kana ꞌëx Dios ꞌaish atun tsóti ñui ësai kin, ꞌatima sinánñu unikama ñuti kana ꞌëx kuëëniman usa ꞌain ka atun ꞌakë ñu ëni upitax tsóti ꞌikën. Israel unikama ꞌatima ñu ꞌaimi tsókankë akamina ënti ꞌain. ¿Uisa ꞌaish kara usakin ñu ꞌai ñukanti ꞌik?

Daniel 9:3

Usa ꞌain kana añu ñubi pima chupa xëni pañuax chimapunu tsókin ësokin Dios ñukákën.

Oseas 14:1

Israel unikama Nukën ꞌIbu Diosmi kamina sinanatëkënti ꞌain, mitsúxmi ꞌuchakë a kupí kamina ꞌaisama kan.

Oseas 6:1

Kamaxi Diosmi sinanatëkënti kamina ukanti ꞌain. An ka ꞌatimo ꞌixunbi nux ñu ꞌatima ꞌai ꞌuchakëkama nu mëníoxunti ꞌikën; usokin ꞌatimo ꞌixunbi mëníotëkënkin ka chuámarua tanun nu ꞌimiti ꞌikën.

Joel 1:13

Usa ꞌain kamina sacerdotekama anuxun ñuina xarotinu tëkë, ꞌain kushibu mitsux chupa xëni pañutankëx paëi masá sinani inkanti ꞌain, anuxun Dios rabiti xubunu ka ñu bimikama ꞌimainun a Dios ꞌinaínshiti uvas baka vino ꞌakë abi ꞌaíma ꞌikën.

Malaquías 1:9

Mitsun kamina Dios nukama nuibanun kixun abë banakin kati ꞌain. ꞌAínbi kamina usakin a ꞌinánti ñu a ꞌinánkin Diosan ka a ñukama upíokin bitsia kixun mitsun sinánkantima ꞌain. Dios kamabi kushiñu ax ka ësai kia:

Hechos 26:20

ꞌAquin, Jesús ñuiquin, Damasconu ꞌicë unicama ñuixuntancëxun cana Jerusalénu ꞌicë unicama ñuixuanan Judea menu ꞌicë ëmacamanuxunribi bana ñuixuan. Ñuixuanan cana judíosma unicamaribi ñuixunquin ësaquin can: ꞌAtimaquin sináncë ꞌaíshbi sinanati camina Nucën Papa Diosnan ꞌiti ꞌain. Usai ami sinánquin camina ñu ꞌaisama ꞌaquinma ax cuëëncësabi oquinshi ꞌati ꞌain, mix camina ainan ꞌai quixuan camabi unin ꞌunánun.

Jueces 2:4

Ësokin atu katankëxa Nukën ꞌIbun ángel sënë́nkëbëishi ka kamabi Israel unikama munuma sharati ini tsuákiruakëxa.

1 Samuel 7:3

Usa ꞌain ka Samuelnën kamabi israel unikama kakëxa: “Mitsun asérabi mitsun nuitubëtanbi sinánkin a rabikin kamina bëtsi menu tsókë unikaman rabikë diosmi rabikankë a ënkin mitsun ꞌarakakë Astarté tankin ꞌakë a bixun nikanti ꞌain, usakin ꞌatankëxun kamina Nukën ꞌIbu rabikin ax kuëënkësabi okin ꞌakánti ꞌain. Usakin ꞌakëxun ka mitsu filisteo unikama ꞌatima oia chikínti ꞌikën.”

1 Samuel 7:6

Usakin kamikëx ka israel unibu Mispá kakë ëmanu timë́kankëxa, anuxun ka raíri unikaman ꞌumpax bitankëxun a ꞌinaishikësa ꞌitánun menu ampë́nkakëxa. Usakin ꞌakë ax ka Nukën ꞌIbu ꞌinaishiti nankë ñu ꞌiakëxa. Usakin ꞌatankëxun ka a nëtën unikama añu ñubi pima samákin atun ꞌuchakëkama Nukën ꞌIbu chikinaxunkankëxa. Anuxun ka Samuelnën Mispá kakë ëmanuxun Israel unikama aín ꞌapu ꞌixun atu ꞌakinkin pëuakëxa.