Jeremías 15:2 - Kashibo-Kakataibo Biblia

² Kakëxua uinu karanuna kuanti ꞌai kixun ñukákëxun kamina, ꞌën mi kakë ësokinbi kati ꞌain: Uix kara ꞌinsinan bamati nankë ꞌikë, ax ka anunbi bamati ꞌikën; ꞌimainun ka uix kara ꞌakánanti nankë ꞌikë ax ꞌakanani bamati ꞌikën, ꞌianan ka uix kara numin bamati nankë ax numinbi bamati ꞌikën; ꞌianan ka uix kara axa ami nishkë unikaman ñatanbiankin buánti nankë ꞌikë ax ñatanbiankin buánkë ꞌiti ꞌikën.

Jeremías 15:2 Iomraidhean Croise

Jeremías 14:12

Usa ꞌain kana ꞌitsa nëtë imi pima samákin atun ñukákëxunbi kuatima ꞌain; ꞌianan kana ꞌitsaira ñuina xaroxuanan ñu ꞌapákë aín bimi ꞌë bëxun nanxunkëxunbi ꞌën upí istima ꞌain. Usa ꞌain kana ꞌën suntárukama abë ꞌakanankin ꞌakëx ꞌianan, atun piti ꞌaíma ꞌain numin ꞌianan, ꞌinsinan këñunun ꞌimiti ꞌain.

Jeremías 14:16

ꞌImainun ka unikama an atun bana kuakin atu nuikë akamaxribi ami nishkë unikaman ꞌakëx ñuti ꞌikën, ꞌimainun atún xanukama ꞌianan atun bakë bëchikë bëbukama ꞌimainun ꞌini bëchikë xanukamaribi ka numin bamati ꞌikën. Usa ꞌain ka aminishkë unikaman ꞌakëx uni ñukë Jerusalén ëma anun niti baikama anubi an maínti uni ꞌaíma ꞌain uni ñukë rakati ꞌikën. Usakin kana atun ñu ꞌatima ꞌai ꞌuchakë kupí ꞌati ꞌain.

Jeremías 19:7

Ënë menuxun kana atun sinánkësokian Judá menu ꞌikë unikama ꞌimainun Jerusalén ëmanu tsókë unikaman ꞌanun ꞌamitima ꞌain. Usokin ꞌakima kana axa ami nishkë unikaman atuira ꞌakanankin ꞌakëxa, ñuia ñuina pëchiñu ꞌimainun axa pianankë raëkëma ñuinakaman piti ꞌimiti ꞌain.

Ezequiel 33:27

Ësakinribi kamina kati ꞌain: Ësai ka Dios kiaxa: ꞌËx kana axa xënibua ꞌaínbi tsókë a ꞌain usa ꞌain kana ësai kin, axa ëmakama masókë anu ꞌikë unikama atúxribi ka ami nishkë unikaman ꞌakë ꞌiti ꞌikën, ꞌimainun kana axa ninu unëax ꞌikëkama a raëkëma ñuinakama pinun ꞌamiti ꞌain, ꞌimainun ka axa mapara kini uisabi oisama ꞌimainun kininu ꞌikë akamaribi ꞌinsinan bamati ꞌikën.

Daniel 9:12

Min nunu ñu ꞌatimaira ꞌimikin kamina usokin kana ꞌati ꞌai kiaxmi kia usabi okin nu ꞌimianan ꞌapukamanuribi ꞌimian, usa ꞌain ka uínsaran nëtënbi bëría ꞌikë ësai Jerusalénnu ñu ꞌikëma ꞌikën.

Amós 5:19

ꞌIanan kara achúshi uníxa paru ꞌinúanën nuikëx abatibi xaëón manan ꞌirukë usaribi, ꞌianan ka achúshi uni abákuatsini uax tanti ñu sinanimaishi aín xubunu atsíntankëx, këpiti tsóbutiabi achúshi runun ꞌakë usaribiti abáti katamëtima ꞌikën.

Apocalipsis 13:10

Uicaman cara uni itsi sipuanun ꞌinania, acamaxribi ca sipuacë ꞌiti ꞌicën. An uni itsi manë xëtocën ꞌacë uni, a ca bëtsi unínribi usaribi oquin ꞌati ꞌicën. Usa ꞌaínbi ca axa Nucën Papa Diosmi catamëcë unicaman uisai cara ñu ꞌicëbëtanbi Nucën Papa Diosmi sinánti ëntima ꞌicën.