Éxodo 32:8 - Kashibo-Kakataibo Biblia

⁸ Bënëkinshi ka atun usai ꞌiti ꞌën kakë banakama manuxun bëtsi ñu ꞌaxa. ꞌAkin ka vaca bakë tankin ꞌakë kuri unioxa, usakin ꞌaxun ñuina xaroxunkin rabi ka ësai kia: Ënëx ka Israel unibunën dios an nu Egipto menua bëkë a ꞌikën kiax ka kikanxa.

Éxodo 32:8 Iomraidhean Croise

1 Reyes 12:28

Ësokin pain sinántakëx ka an ꞌakinkë aín suntárunën kushikamabë banatankëxun ꞌapu Jeroboamnën rabë́ vaca bakë bërí kanikë tankin uniomiakëxa, uniomitankëxun ka kamabi unikama kakëxa: “Israel unikama mitsux kamina ꞌitsaira nitsi Jerusalénnu kuanin. Usa ꞌain ka ënu an Egipto menua chikínbëtsinkin mitsu bëa Dios a ꞌikën.”

Nehemías 9:18

ꞌImainun ka atúnbi sinánxun vaca bakë tankin achúshi ñu a rabinuxun manë charóxun ꞌakëxa, ꞌatankëx ka ënëx ka nun dios an Egipto menua chikínbëtsinkin nu bëkë a ꞌikë kiax kikankëxa, usakin atun ñu ꞌakë ax ka ꞌaisamaira ñua ꞌakë ꞌiakëxa,

Éxodo 20:23

Uisaxunbi kamina rabinuxun kuri ꞌanan manë uxua ꞌatankëxun ꞌë ꞌakësa okin uniotankëxun a rabitima ꞌain.

Éxodo 32:4

buánxunkëxun timëxun ka kurikama charokëxa, charatia ka vaca bëna tankin i ꞌakë anu ꞌaruakëxa, ꞌarukëxa xëntsai ꞌikë ax ꞌiruia ka manë xëta okë cincel anun ramëniokin vacabi ꞌinun upíokin mëníokëxa. Mëníotankëxun ka atu ꞌinánkëx ka Israel unikamax kiakëxa: —Ënëx ka dios an Egipto menua nukama chikínbëtsinkin bëkë a ꞌikën.

Éxodo 34:15

A menu atsinia anu ꞌikë unikaman mitsubëtan ñu ꞌakatsikixun kakëxunbi kamina ꞌakantima ꞌain, usakin kakima mitsun atubëtan ꞌakëxunbi ka mitsu atun dios rabikin pitia ꞌakë ꞌimainun a ꞌinántia ꞌakë ñukama ꞌakinkin mitsu ꞌuchamiti ꞌikën,

Isaías 46:6

Anu ka unikama ꞌaisamaira kuri aín ñusuti bianan manë uxua, bitankëxun anun ñu tupúnti ꞌakë anun tupunkë ꞌikën; usakin ꞌatankëxun ka an ñu unioti ꞌunánkë achúshi uni baritankëxun abi rantinpuruni tsóbuti ami ñanákian rabinun ꞌaxúnun ꞌinania.

Jeremías 31:32

Ënë achúshi ñu ꞌati ax ꞌën aín chaitiokëkamabëtan ꞌasa usama ꞌiti ꞌikën, atun ka Egipto menua ꞌën mëkënan tuínxun ꞌakësokin chikinkëxunbi; ꞌëx atun bënësa ꞌaínbi ka ꞌën atubëtan ꞌën ꞌakë achúshi ñu ax kikësabiokin ꞌaisama tankëxa. ꞌËx mitsun ꞌIbu ꞌaish kana asérabi ësai kiakën.

Deuteronomio 32:17

ꞌanan ka Diosmabi bëtsi ñunshin ꞌatima ñuina ꞌaxun këñutanun xaroxuankëxa, a ka uinsaranbia ꞌunánma ꞌixunbi bëríra ꞌunánkinbi; aín papakaman rabia ꞌikëmabi rabiakëxa,

Deuteronomio 9:12

ꞌimainun ka ësokinribi ꞌë kakëxa: Ënuax kamina bënëtishi taramëkëbukiani kuanti ꞌain. Egipto menuami chikínbëtsinkin bëkë unikaman ka ꞌatima ñu ꞌai ënananxa. Bënëkinshi ka ꞌën usakia ꞌati kakë bana manuaxa, usa ꞌixun ka a banakama parëkin bëtsi ñu tankin manë charóxun achúshi ñu unioxa kixun.

Deuteronomio 9:16

Bëkinbi kana mitsúxmi Nukën ꞌIbumi ꞌuchakin manë charóxun vaca bakë tankin ꞌaxun rabikin Nukën ꞌIbun kakësabiokin ꞌati ënxun ꞌaia mërakën,

Jueces 2:17

ꞌAínbi ka Israel unikaman usai atux ꞌikëbëtan Diosan ax ꞌapu ꞌixun ꞌakinti uni kaisiabi aín bana kuatima ñunshin nakë́kin unikaman bëtsi dioskama rabikin Nukën ꞌIbu Dios rabiama ꞌikën. Atun chaitiokëkamaxa Nukën ꞌIbun bana ax kikësabi oi ꞌiti bana tan ꞌaínbi ka atux, atun chaitiokëkama ꞌiásai ꞌiti sinánma ꞌikën.

Jueces 8:24

Usa ꞌain kana ꞌën abë ꞌakanankin ñatankë bikë unikama atun mëñusuti ꞌë ꞌinánti kuëënin. A mëñusuti kuri ꞌakë ax ka anu uni ꞌikëma menu ꞌikë unikama suntárunën mëñukë a ꞌiakëxa.