Efesios 4:12 - Kashibo-Kakataibo Biblia

¹² Axa ami catamëcë unicaman upí oquin sinánan ax cuëëncësabi oquin ñu upíshi ꞌati ꞌaquinun ca Cristonën aín unicama bëtsi bëtsi ñu ꞌanun ꞌimia.

Nukën 'Ibu Diosan ain unikama 'inan ain bana

¹² Axa ami catamëcë unicaman upí oquin sinánan ax cuëëncësabi oquin ñu upíshi 'ati 'aquinun ca Cristonën aín unicama bëtsi bëtsi ñu 'anun 'imia.

Efesios 4:12 Iomraidhean Croise

Lucas 22:32

Usa ꞌaínbi cana ꞌëmi catamëti ënxunma ꞌanun Nucën Papa Dios mi ñucáxuan. ꞌËmi ꞌuchaxbi sinanati ꞌëmi cushiquin camina axa ꞌëmi catamëcë uni raíri ꞌëmia asérabi upiti catamënun ꞌaquinti ꞌain.

Hechos 1:17

Judas ax ca nucamacëñunbia Jesusan aín bana ñuixunun caístancëxun ꞌunánmicë ꞌiaxa.

Hechos 11:23

Xucëx cuanx bëbaquin, Nucën Papa Diosanbia atu judíos uni ꞌicëmabi chuámarua ꞌaísha upí nuituñu ꞌinun ainan ꞌimicë isi ca Bernabé cuëëancëxa. Cuëënquin ca ꞌësëquin cacëxa: —Mitsúnmi bëráma ꞌacë ñu ꞌatëcëníma camina Nucën ꞌIbu Jesús ami ëníma catamëti ꞌain.

Hechos 20:24

Usaquian ꞌunánmicëxbi cana ꞌëx uisai carana ꞌiti ꞌai quixun sinani bënëtiman. Bamanuxunbi Nucën ꞌIbu Jesusan cacësabi oquin ꞌai cuëënquin sënë́onti cana cuëënin, Nucën Papa Diosan ca nuibaquin unicama ainan ꞌinun ië́misa tania quixuan camabi unin ꞌunánun.

Hechos 20:28

Usa ꞌain camina mitsun mina ñu ꞌaisama ꞌai bërúancati ꞌain. Bërúancanan camina axa Jesucristomi catamëcë unicamaribia upí ꞌinun bërúanti ꞌain. Nucën Papa Diosan Bëru Ñunshin Upitan ca usoquinmi axa Jesucristomi catamëcë unicama bërúanun mitsu ꞌimiaxa. A unicamax ca axa bama cupí Nucën ꞌIbu Jesucristomi catamëcë ꞌaish aín uni ꞌicën.

Hechos 9:31

Usa ꞌain ca Judea menu ꞌimainun Galilea menu ꞌimainun Samaria menuribi, axa Jesucristomi catamëcë unicama uínbi ubíocëma ꞌaish chuámarua bucüacëxa, usai ꞌi ca Jesucristomi catamëti ꞌitsarui cushiacëxa. Usaía ꞌicëbë ca raíri uniribi abë timëti Nucën ꞌIbu Diosan bana upí oquin cuati, aín Bëru Ñumshin Upitan ꞌaquincëx ꞌitsarui Jesúsmi sináncëxa.

Romanos 12:5

Usaribiti cananuna nux ꞌitsa ꞌaíshbi camáxbi Cristonan ꞌaish ax nubë ꞌain achúshi unisa ꞌain. An ꞌamicëxuan bëtsi bëtsi unin bana ñuixunmainun ca raírinën bëtsi bëtsi ñu ꞌaia. Usoquin bëtsi bëtsi ñu ꞌaíbi cananuna camáxbi Cristonan ꞌaish achúshisa ꞌain.

Romanos 12:7

Nun uni raíri ꞌaquinun an ꞌimicë ꞌixun cananuna upí oquin ꞌaquinti ꞌain. Aín bana unicama ꞌunánminun an ꞌimicë ꞌixun cananuna upí oquin unicama ꞌunánmiti ꞌain.

Romanos 14:19

Usa uni ꞌixun cananuna camáxbia bëtsibë nuibananun uni raíri nuibaquin ꞌaquinti ꞌain. ꞌAquianan cananuna Cristomia upiti sinánun bëtsibë bëtsibë sinánmiananti ꞌain.

Romanos 15:14

ꞌËn xucë́antu, ꞌën cana ꞌunanin, mitsun camina bëtsibë bëtsibë nuibanani ꞌaquiananquin Nucën Papa Diosan bana Cristonën ñuicë a upí oquin ꞌunanin. ꞌUnánan camina ami cushicë ꞌinux raíri unibë ꞌësëanánti ꞌunanin.

Romanos 15:2

Cananuna nun ꞌunáncë unicamabë upí ꞌianan axribia upiti Cristomi catamëti ami cushinun ꞌaquínti ꞌain.

Romanos 15:29

Cana ꞌunanin, ꞌëx mitsubë ꞌain ca Cristonën cushioquin ami sinani cuëënun nu ꞌimiti ꞌicën.

1 Corintios 12:27

Usa ca ënëx ꞌicën. Aín taë, aín mëcën, aín pabí acamaxa ꞌitsa ꞌaínbi ca uni achúshishi ꞌicën. Usaribiti ca Cristobë aín unicama achúshishi ꞌicën.

1 Corintios 12:7

Nucën Papa Diosan ca aín unicama achúshi achúshi, anúan aín unicama raíri upiti Jesucristomi sinánun quixun ꞌaquinun ꞌinania. ꞌInáncëxuan aín Bëru Ñunshin Upíñu ꞌixun upí oquin ñu ꞌaia isquin ca unicaman ꞌunánti ꞌicën, Nucën Papa Diosan Bëru Ñunshin Upitan ꞌamicëxun ca ꞌaia quixun.

1 Corintios 14:12

Mitsux asérabi bëtsi bëtsi ñu ꞌanun Nucën Papa Diosan Bëru Ñunshin Upitan sinánmicë ꞌiisa tanquin camina añu ꞌaquin caramina camabi uníxa Jesucristomi upiti sinani ax cuëëncësabi oi ꞌinun sinánmiti, a ñuishi ꞌati ꞌain.

1 Corintios 14:26

ꞌËn xucë́antu, timë́ax camina ësai ꞌiti ꞌain. Raírinëx camina ꞌiisa tani cantati ꞌain, raírinën camina Nucën Papa Diosan bana ñuixunti ꞌain, raírinën camina añu cara Nucën Papa Diosan mitsu sinánmiaxa a ñuiquin cati ꞌain, ꞌiisa tani camina raírinëx unin cuacëma banan banati ꞌain, raírinën camina uisai quicë cara a bana ꞌicë quixun ñuixunti ꞌain. Timë́xun caramina uisa ñu ꞌai a ꞌai camina camáxbi ami upiti sinani Jesucristo cuëëncësabi oi ꞌinun sinánmiananti ꞌain.

2 Corintios 12:19

Nun usaquin mitsu cacëxun oquin mitsun nu nuibanun quixun isanuna ësaquin mitsu cai quixun sapi camina sináncanin. ꞌAíshbi ca usama ꞌicën. ꞌËn nuibacë xucë́antu, cana mitsu cain, ami catamëti ax quicësabi oíshi ꞌinun cananuna Cristo cuëëncësabi oquin mitsu ꞌaquinsa tanquinshi ënë ñucama mitsu ñuixuan. Asérabi ca usa ꞌicë quixun ca Nucën Papa Diosan ꞌunania.

2 Corintios 13:11

ꞌËn xucë́antu, chuámashi camina ꞌicanti ꞌain. Añu ñucama cara ꞌaisama ꞌicë camina mëníoquin sinántëcëntima ꞌain, ꞌën mitsu cacë banacama cuati camina bëtsin sináncësabi oquin sinani nishananíma nuibananishi ꞌicanti ꞌain. Usai ꞌia ca Nucën Papa Dios, an aín unicama nuibaquin bënëtima chuámarua ꞌinun ꞌimicë, ax mitsubë ꞌiti ꞌicën.

2 Corintios 13:9

Nux cushimasa ꞌixunbi ꞌaquincëxmi mitsux upí ꞌain cananuna cuëënin. Mitsun ñu ꞌatima ꞌacëcama mëníocë ꞌaish upíshi ꞌinun cananuna ënquinma Nucën Papa Dios mitsu ñucáxunin.

2 Corintios 3:8

A bana Nucën Papa Diosan Moisés ꞌinan, asamaira ca —Cristo cupí ca uni aín ꞌuchacama tërë́ncë ꞌianan Nucën Papa Diosnan ꞌaish aín Bëru Ñunshin Upíñu ꞌia —quicë bana ax ꞌicën.

2 Corintios 4:1

Ësoquin cana mitsu cain, ꞌuchañuira ꞌicëbi nuibaquin sinanamixun ca Nucën Papa Diosan aín bana uni ñuixunun nu ꞌimiaxa. Usa ꞌain cananuna masá nuituquin ënquinma aín bana uni ñuixunin.

2 Corintios 5:18

Nucën Papa Diosan ꞌimicëx ca axa Cristomi catamëcë uni usai ꞌia. Cristo cupí nux abë upí ꞌinun ca Nucën Papa Diosan nu ꞌimiacëxa. ꞌImianan ca camabi uníxa abë upí ꞌinun aín bana ñuixunun nu ꞌimiacëxa.

2 Corintios 6:3

Uinu ꞌicë unínbia nun bana —ꞌaisama ca —quixun caquin cuaisama tanunma cananuna ñu ꞌatima ꞌaquinma Nucën Papa Dios cuëëncësabi oquinshi ꞌain.

2 Corintios 7:1

ꞌËn nuibacë xucë́antu, a banacama nun cuanun ca Nucën Papa Dios quiacëxa. A banacama ꞌunánquin cananuna nun sinanën upíira oquin sinánan nun nuituribi upí ꞌianan nun ꞌacë ñuribi upí ꞌinun camabi nëtën bërúancati ꞌain. Usai ꞌi cananuna aín bana cuati ainanshi ꞌaish ax cuëëncësabi oíshi ꞌiti ꞌain.

Efesios 1:23

Axa ami catamëcë unicamax ca ꞌitsa ꞌaíshbi camáxbi Cristonan ꞌicën. Usa ꞌain ca an abë ꞌixun an sináncësaribi oquian sinánun aín unicama ꞌimia. Ax ca uinubi ꞌaímama ꞌicën. Abë ꞌixun ca Cristonën aín unicama an iscëx aín nuitu upí ꞌixuan ax cuëëncësa oquinshi ꞌanun aín cushi ꞌinania.

Efesios 4:16

Nun namicama amanu amanu ꞌaish nun mëcën, nun taë, nun pëñan, nun bëru, acama upiti tacáshquiama ꞌaish cananuna unima ꞌitsían. Usa ꞌaíshbi ca uni camabi aín namia upiti unia ꞌain, asábi ꞌicën. Usaribiti ca axa Jesucristomi catamëcë unicamax amanu amanu sinánquinma Cristonën ꞌaquincëx camaxunbi bëtsin sináncësa oquin sináncë ꞌiti ꞌicën. Usai ꞌi ca Cristonëx cuëëncësabi oi bëtsibë bëtsibë nuibanani, an sináncësaribi oquin sinani Cristosaribi ꞌia.

Efesios 4:29

ꞌAtimati banaima upitishi banaquin camina uni Jesucristomia upiti catamënun ꞌaquinti ꞌain. Mitsúxmi usai banaia cuati Jesucristomi upiti catamëtia Nucën Papa Diosan nuibaquin ꞌaquincëx ca cuëënti ꞌicën.

Efesios 4:4

Jesucristonan ꞌaish ca aín unicama achúshisaishi ꞌicën. An atu ꞌaquincë Nucën Papa Diosan Bëru Ñunshin Upí ax ca achúshishi ꞌicën. Usa áin ca bëtsin ꞌunáncësaribi oquin aín unicaman ꞌunania, Nucën Papa Diosan ca aín nëtënu abë ꞌinun nu caísacëxa quixun.

Colosenses 1:24

Mitsux ainan ꞌinun ꞌëx tëmëracë cupí cana cuëënin. Usai ꞌi cana Cristonëan camabi uni ainan ꞌinun tëmëra ꞌain, ꞌëxribi camabi menu ꞌicë unicama a ꞌunánti cupí tëmëraíbi cuëëinra cuëënin.

Colosenses 1:28

Nun cananuna Cristo ashi ñuiquin aín unicama ñuixunin. Ñuixunquin cananuna aín unicaman upí oquin cuanan, Cristonan ꞌaish ax cuëëncësabi oíshi ꞌinun quixun upí oquin ꞌësëquin, aín unicama ꞌunánmin.

Colosenses 4:17

Arquipo aribi camina Nucën ꞌIbu Diosan ꞌináncë ñu mëëti a ënquinma upí oquin ꞌaxunun cati ꞌain.

1 Timoteo 1:12

Nucën ꞌIbu Jesucristonën ca ꞌën an cacësabi oquin ꞌati ꞌunánxun, aín bana ñuixunun caxun, usoquin ꞌanun ꞌë cushioxa. Usa ꞌain cana a ñucama sinánquin —asábi ca —quixun a cain.

2 Timoteo 4:11

Lucasëshi ca ꞌëbë ꞌicën. Usa ꞌain camina Marcos barixun mërabëtsínquin ꞌëa Nucën Papa Diosan bana ñuiquínun bëti ꞌain.

2 Timoteo 4:5

Usa ꞌaínbi camina min upí oquinra sinánxun ñu ꞌati ꞌain. Tëmëraquinbi tanshiquin camina ënquinma —Jesucristomi catamëti ca uni Nucën Papa Diosnan ꞌiti ꞌicë —quixun caquin uni bana ñuixunti ꞌain. Nucën Papa Dios cuëëncësabi oquin camina sënë́onuxun ënquinma min ñu mëëti ꞌati ꞌain.

Hebreos 13:17

Mitsun cushicaman ca mitsúxmi upiti Jesucristomi sinánun mitsu ꞌaquinia. Usaquin mitsu ꞌaquinuan Nucën Papa Diosan caíscë ꞌixun ca an cacësabi oquin upí oquin ꞌaisa tania, ax cuëëntanun. Usa ꞌain camina aín bana cuaquin atux quicësabi oquin ꞌati ꞌain. Mitsun usaquin ꞌaia isquin ca atun masá nuituquinma cuëënquin mitsu ꞌaquinti ꞌicën. A unicaman bana cuaquinbimi an cacësa oquin ꞌaiama isi ca Nucën Papa Dios cuëëntima ꞌicën.

Hebreos 6:1

Usa ꞌain cananuna tuá xuratsu ꞌicësaíma uni apan ꞌicësai ꞌinuxun a paínu cuacë bana Cristo ñui quicë, aíshima bëtsi ñuribi ꞌunánti ꞌain. Cananuna a paínu ꞌunan banacama ësai quicë, a ñuitëcëntima ꞌain: nunbi ñu ꞌatima ꞌacë cupí Nucën Papa Diosnanma ꞌaish bamati ꞌaíshbi sinanati Nucën Papa Diosmi catamëtishi ië́ti,