Efesios 2:3 - Kashibo-Kakataibo Biblia

³ Nunribi cananuna camaxunbi nun sináncësa oquinshi sinánan nun sinan ꞌatima ꞌixun nux cuëëncësabi oquin ꞌacën. Usai ꞌicë ꞌaish cananuna raíri unicamasaribi ꞌaish numi nishquian Nucën Papa Diosan castícanti ꞌiacën.

Nukën 'Ibu Diosan ain unikama 'inan ain bana

³ Nunribi cananuna camaxunbi nun sináncësa oquinshi sinánan nun sinan 'atima 'ixun nux cuëëncësabi oquin 'acën. Usai 'icë 'aish cananuna raíri unicamasaribi 'aish numi nishquian Nucën Papa Diosan castícanti 'iacën.

Efesios 2:3 Iomraidhean Croise

Génesis 5:3

Adán axa ciento treinta baritiañu ꞌain ka aín bëchikë Set a iskësabi ax bakë́ankëxa.

Génesis 6:5

Nukën ꞌIbu iskëxbi ka unin ꞌucha ꞌaisamaira ënë menu ꞌiakëxa, ꞌimainun a ꞌatima sinánñu ꞌixun ꞌatima ñuishi ꞌati sinánñuirabu ꞌiakëxa,

Génesis 8:21

Usokian ꞌaia ka Nukën ꞌIbu aín sanu upíira ꞌikë anu nukutia xëakëxa, xëti ka kiakëxa: Uinsaranbi kana amiribishi menu ꞌikë ñukama unin ꞌucha kupín këñunuxuma ꞌain, unin ka xura ꞌixuinshi ꞌatima ñu ꞌatishi sinania. ꞌImainun kana amiribishi ñuinakama ꞌaisamokin ꞌën bërí ꞌakësokin këñutëkëntima ꞌain.

Job 14:4

Uínbi ka bëtsi uni asérabi upí ꞌinun ꞌatima ñunua mënioima, usa ꞌain ka kamabi unix aín titan tuákë ꞌikën.

Salmos 51:5

Asérabi kana ꞌën titan tuakëxbi ꞌuchañu ꞌiakën; usa ꞌaish kana ꞌën titan puku ꞌukëmëu ꞌaishi ꞌuchañu ꞌiakën.

Isaías 53:6

Kamabi nukamax kananuna ovejakama nëtë́kësa ꞌinun, nukamax achúshi achúshinëx nun kuëënkësoishi niakën, ꞌaínbi ka Nukën ꞌIbun ainansa ꞌikë nun ñu ꞌatima ꞌakëkama kamabi nukamanua mëníokëxa.

Marcos 4:19

—a bana quicësabi oi cana ꞌiti ꞌai —quixun sinania. Usaquin sinánquinbi ca atun ënë menu ꞌicë ñuishi sinánan —ꞌitsa ñuñu ꞌaish cana cuëënti ꞌai —quixun sinani ꞌitsa ñuñu ꞌiisa tanan bëtsi ñuribi cuëënia. Usa ꞌaish ca Nucën Papa Diosan bana sináncëxbi ñu bëru ꞌapácëa coiabi chucun mapurucë usaribi ꞌaish bimiñumasa ꞌia.

Juan 1:13

Unían aín xanumi bëchicë tuá ax ca unishi ꞌia. Unin bëchicënëxa usa ꞌaínbi ca usama Nucën Papa Diosan bëchicëcama ꞌicën. Ax ca aín cushínshia aín bëchicë ꞌimicë ꞌicën.

Juan 8:44

Mitsun papax ca ñunshin ꞌatimanën ꞌapu ꞌicën. Ainan ꞌixun camina axa cuëëncësa oquinshi ꞌaisa tanin. An ca nëtë ióñubi uni ꞌati sináncëxa. Ax ca cëmë ꞌaish axa ꞌiásabi cëmëia. Cëmëi ca an sináncësa oquinshi sinani banaia. Ainra ca cëmë́ntapun ꞌixun unían uni itsi cëmëquin paránun ꞌimia.

Hechos 14:16

Bëráma ca Nucën Papa Diosan camabi baritian atun cuëëncësa oquin ñu ꞌanun quixun unicama ëancëxa.

Romanos 1:24

Usa ꞌain ca Nucën Papa Diosan atúxa upí ꞌiti ꞌaquinti ëanan a unicaman aín cuëëncësabi oquin ñu ꞌatima ꞌanun ëanxa. Usaquian Nucën Papa Diosan ëncëxun ca atúnbi a ꞌai rabínquinma ꞌatima ñuira ꞌaxa.

Romanos 11:30

Mitsux judíosma unibu ꞌixun aín bana ꞌunanima camina Nucën Papa Dios cuëëncësoi ꞌiáma ꞌain. Usai ꞌiáma ꞌicëbi ca judíos unibu ami sinántisama tancë ꞌain Nucën Papa Diosan ainan ꞌinun mitsu ꞌimiaxa.

Romanos 13:14

Usa ñucama ëni camina Nucën ꞌIbu Jesucristonën mitsu usai ꞌinun quixun sinánmicësabi oi ꞌiti ꞌain. Ënë nëtënu ꞌicë ñuishi sináncë uni an ñu ꞌatima ꞌacësaribi oquin ꞌati camina sinántima ꞌain.

Romanos 2:14

Usa ꞌain ca judíosma unin Nucën Papa Diosan bana Moisésnën cuënëo ꞌunánquinmabi atúnbi sinánquin a bana quicësabi oquin ꞌacë ꞌixun, uisa ñu ꞌati cara ꞌaisama ꞌicë, uisa ñu ꞌati cara upí ꞌicë quixun ꞌunania.

Romanos 5:10

Nuxnu ꞌatimaquinshi sinani ami sináncëma ꞌicëbi ca aín Bëchicë bama cupí Nucën Papa Diosan nun ꞌucha tërë́nquin nu nuibaquin ainan ꞌimiaxa. Nu nuibaquin ainan ꞌimicë ꞌicë ca Jesucristo bamaxbi baísquicë ax nubë ꞌixun nuxnu asérabi upí ꞌinun nu ꞌimia.

Romanos 5:9

Cristo bama cupí nun ꞌucha tërë́ncë ꞌaish cananuna Nucën Papa Diosan iscëx upí ꞌain. Usa ꞌaish cananuna anúan Nucën Papa Diosan camabi unin ñu ꞌacë isti nëtën an iscëx upí ꞌaish asérabi ꞌuchocëma ꞌiti ꞌain.

Romanos 6:12

Usa ꞌixun camina ꞌuchañu ꞌaish ꞌatima sinánñu ꞌixun mitsun sináncësa oquinshi ꞌaisama ñu ꞌatima ꞌain.

Romanos 7:18

Ënëx ca ësa ꞌicën. Cananuna ꞌunanin, nun sinan upíma ꞌixun cananuna ñu upí ꞌatima ꞌain. Ñu upíshi ꞌaisa tanquinbi cananuna nun sinan upíma ꞌixun ꞌaiman.

Romanos 9:22

Nucën Papa Diosanribi ca aín cuëëncësa oquin ꞌaia. Unin ñu ꞌaisama ꞌati ca ax cuëëníma quixuan camabi unin ꞌunánun ca Nucën Papa Diosan an ꞌaisama ñu ꞌacë uni uisoquin cara ꞌati ꞌicë usoquin ꞌati ꞌixunbi caínpainia.

1 Corintios 4:7

¿Uin cara mitsu raíri, bëtsi unicama ꞌicësamaira oími upí ꞌinun ꞌimiaxa? Nucën Papa Diosan ꞌimicëxma camina upí ꞌitsianma. Nucën Papa Diosan ꞌimicëx upí ꞌixun ¿caramina uisa cupí —ꞌëxbi cana upí ꞌai —quixun rabíquin sinanin?

2 Corintios 7:1

ꞌËn nuibacë xucë́antu, a banacama nun cuanun ca Nucën Papa Dios quiacëxa. A banacama ꞌunánquin cananuna nun sinanën upíira oquin sinánan nun nuituribi upí ꞌianan nun ꞌacë ñuribi upí ꞌinun camabi nëtën bërúancati ꞌain. Usai ꞌi cananuna aín bana cuati ainanshi ꞌaish ax cuëëncësabi oíshi ꞌiti ꞌain.

Gálatas 3:22

Usa ꞌaínbi ca Nucën Papa Diosan bana cuënëo —camabi unin ca ñu ꞌatima ꞌaia —quia. A banaxa asérabi ꞌain ca axa Jesucristo cupí ami catamëcë unicamaxëshi Nucën Papa Diosan iscëx upí ꞌiti ꞌicën, an aín rëbúnqui achúshi ñuiquin Abraham cásabi oi.

Efesios 2:2

Ënë nëtënu ꞌicë ñuishia an sináncë unicaman sináncësa oquinshi sinánquin camina ñu ꞌaisama ꞌacën, ñunshin ꞌatimanën ꞌapu cuëëncësabi oquin. An ca an Nucën Papa Diosan bana cuaisama tancë unicama ax cuëëncësabi oquin ꞌanun sinánmia. Usaribiti camina mitsux an sinánmicë ꞌiacën.

Efesios 4:22

Usaribiti ꞌiquin camina bëráma mitsux cuëëncësabi oquin ñunshínquin ñu ꞌatima ꞌacën. Usaquin ꞌaquin camina mitsun sinan upíma ꞌixun ñu ꞌatima ꞌaquinbi, ax ca ꞌaisama ꞌicë quixun sinani rabíanma ꞌain. Usai ꞌiá ꞌixunbi camina ñu ꞌatimami ꞌá, acama ënti ꞌain.

Colosenses 1:21

Mitsun Nucën Papa Diosmi sináncëma ꞌixun ñu ꞌaisamaishi ꞌacë ꞌaish camina abë upíma ꞌaish ami nishcësa ꞌiacën. Usai ꞌiá ꞌicëbi ca Cristo uni ꞌaish bama cupími abë upí ꞌinun Nucën Papa Diosan mitsu ꞌimiaxa. Mitsúxmi upíira sinánñu ꞌianan ꞌuchañuma ꞌaish Nucën Papa Diosnanshi ꞌinun ca Cristo bamacëxa.

1 Tesalonicenses 4:13

Nucën xucë́antu, bamacë unicamax cara uisai ꞌiti ꞌicë quixun ꞌunáncëma mitsux ꞌiti cananuna cuëëniman, an ënë ñu ꞌunáncëma unicamaxa aín aintsi bamacëbë ꞌicësaribitími mitsux ꞌaisamaira masá nuitutima cupí.

1 Tesalonicenses 5:6

Usa ꞌaish cananuna uni raírisaribi ꞌuxcësa ꞌitima ꞌain. Cananuna manúcëma ꞌaish upí oquin sináncë uni ꞌiti ꞌain.

1 Timoteo 6:9

Axa ꞌaisamaira ñuñu ꞌiti cuëëncë uni a ca ñunshin ꞌatimanën ꞌapun ñu ꞌaisama ꞌanun sinánmia. Sinánmicëxun ca a unicaman, uni sinánñuman ꞌacësaribi oquinshi ꞌati ꞌicën. Atúan usoquin sináncë cupí ca an ꞌaisama ñu ꞌatishi sináncë unicamax, aín sinan ñancáishi ꞌaish xënibua ꞌaínbi Nucën Papa Diosbë ꞌitimoi bamanuxun ꞌaia.

Tito 3:3

Nuxribi cananuna sinánñuma ꞌaish Nucën Papa Diosan bana quicësabi oi ꞌiáma ꞌain. Usa ꞌaish cananuna ñu ꞌatimaishi ꞌanúan bëtsi unin sinánmicëxun ꞌanan nunbi sinani nux cuëëncësabi oi ñunshini ꞌiacën. ꞌAisama ñuishi ꞌanan cananuna bëtsi unimi nutsianan numia uni nishcëx abë nishanancën.

1 Pedro 1:14

Ainan ꞌixun ax quicësabi oquinshi ñu ꞌaquin camina bëráma Jesucristomi catamëquin Nucën Papa Dios ꞌunáncëma ꞌixunmi cuëë́an ñucama ꞌatëcëntima ꞌain.

2 Pedro 2:14

Usa ꞌaish ca xanu isíma isímashi anun cuëënia, aín ꞌucha ëníma ca amiribi amiribi ꞌuchaia. Atúxa ꞌicësaribitia ꞌinun ca axa Jesucristomi upiti sináncëma xanu ꞌimainun bëburibi sinánmia. Ax ñun cuëën ꞌaish ca ꞌitsa ñuñu ꞌiti cuëënia. A unicama ca Nucën Papa Diosan aín ꞌucha cupí uisoquin cara ꞌati ꞌicë, usoquin ꞌati ꞌicën.

2 Pedro 2:18

Usa unicaman ca axbi cërúanan rabiacati sinánñumasa ꞌixun, an ꞌacësaribi oquian ñunshínquin ñu ꞌatima ꞌanun quixun, an ñu ꞌatima ꞌati ëinsa tancë uni raíri sinanamitëcënia.

1 Juan 2:16

An ënë menu ꞌicë ñuishi sináncë unix ca ñunshínquin piti, xëati, xanubë ꞌiti acama sinánan ñu ꞌatima isti cuëëanan —ñuñu cana ꞌai —quixun sinani rabitia. Nucën Papa Diosan ca usaía ꞌinun uni sinánmicëma ꞌicën. Abi ënë menu ꞌicë ñuishi sináncë ꞌaish ca uni usai ꞌia.

1 Juan 2:8

ꞌËn mitsu ñuixuncë bana ióma ꞌaínbi camina a banabi mitsun ꞌásamaira oquin ꞌunáncë ꞌaish ax quicësabi oi ꞌin, Cristo ꞌiásaribiti. Usari ꞌi camina mitsun ñu ꞌatima ꞌacëcama ëni Nucën Papa Diosbë upí ꞌaish ax cuëëncësabi oi ꞌin.