Apocalipsis 6:9 - Kashibo-Kakataibo Biblia

⁹ Usai ꞌicëbëtan ca Carnero ꞌicësaribitia unin ꞌucha cupí bama, an anúan quirica tacáshcacë ñu itsiribi pëóshaxa. Pëóshcëbëtan cana Nucën Papa Diosan bana cuanan, a banax ca asérabi ꞌicë quiax quicë cupí unin ꞌacë́xa bama unicaman ñunshin, anuxun ñuina xaroti bucúncë maxax, a tëmúcüa isan.

Nukën 'Ibu Diosan ain unikama 'inan ain bana

⁹ Usai 'icëbëtan ca Carnero 'icësaribitia unin 'ucha cupí bama, an anúan quirica tacáshcacë ñu itsiribi pëóshaxa. Pëóshcëbëtan cana Nucën Papa Diosan bana cuanan, a banax ca asérabi 'icë quiax quicë cupí unin 'acë́xa bama unicaman ñunshin, anuxun ñuina xaroti bucúncë maxax, a tëmúcüa isan.

Apocalipsis 6:9 Iomraidhean Croise

Génesis 4:10

Usai kia ka Nukën ꞌIbun kakëxa: —¿Uisa kupín karamina usakin ꞌan? Min xukë́n ꞌanákanën imi menu, ꞌapamikinmi ꞌakë an ka uisa karana oti ꞌai usakin ꞌën mi ꞌanun kia.

Juan 16:2

Mitsúxmi ꞌënan cupí ca anua judíos unicama timë́ti xubunu atsíntëcëanxmami ꞌinun mitsu chiquíncanuxun ꞌaia. Nucën Papa Dios cuëëncësabi oquin isa ꞌaia quixun sinánquin ca unin mitsu bëtsi bëtsi oquin ꞌati ꞌicën. Usai ꞌia camina isti ꞌain.

2 Corintios 5:8

Usa ꞌaish cananuna —an ca abë ꞌinun nu ꞌimiti ꞌicë —quixun ꞌunani chuámashi tani cuëënin. Usai ꞌi cananuna ënë nëtënu ꞌima Nucën ꞌIbu Jesúsbë aín nëtënu ꞌiisa tanin.

Filipenses 1:23

Uisaira carana ꞌiti ꞌai quixun sinani cana sináncasmain. Bamatancëx ënë nëtënuax ꞌicësamairai Cristobë aín nëtënu chuámarua ꞌiti sinani cana anu ꞌiisa tanin.

Filipenses 2:17

Mitsun camina tëmëraquinbi Jesucristomi catamëquin ax cuëëncësabi oquin ꞌaquin Nucën Papa Dios rabin. Mitsúxmi usai ꞌicëbë cana ꞌën mitsu ꞌaquincë cupí mitsux ꞌicësaribiti cuëënin. Cristomi sináncë cupí sapi cana bamati ꞌai quixun ꞌunanibi cana masá nuitutíma mitsúxmi ꞌicësaribiti cuëënin.

2 Timoteo 1:8

Mix ainan ꞌaish camina —ꞌëx cana Nucën ꞌIbu Jesucristonan ꞌai —quixun uni catimi rabíntima ꞌain. ꞌImainun camina Jesucristonën bana uni ñuixunia ꞌë sipuacancë cupí rabíntima ꞌain. Usai ꞌiquinma camina miribia uni Nucën Papa Diosan bana ñuixuncë cupí, unin tëmëramicëxunbi rabínquinma tanshiti ꞌain, Nucën Papa Diosan ax cuëëncësabi oquin mi cushiomainun.

2 Timoteo 4:6

Nucën Papa Dios cuëënminuxun cana aín ñu mëëti ꞌan. Usa ꞌain ca ꞌën bamati nëtë ꞌurama ꞌicën.

Hebreos 12:23

Anuribi uicamax cara ainan ꞌicë, aín anë ꞌacë, acamanribi ca a rabia. Anu ca ax ꞌApuira ꞌixuan an camabi unin ꞌacë ñu iscë, Nucën Papa Dios, ax ꞌicën. Anuribi ca Nucën Papa Diosan ainan ꞌicë upí ꞌimicë ꞌaísha bamacë unicama aín bëru ñunshin ꞌicën.

Apocalipsis 1:2

Xucëxuan ismicëxun ca Juanën uisa ñu cara isaxa quixun cëmëquinma a ñucama cuënëoxa. Usaquin ca Juanën Nucën Papa Dios quicësabi oquian Jesucristonën a ismianan a ñuiquin cacë banacama cuënëoxa.

Apocalipsis 1:9

ꞌËx Juan ꞌaish cana mitsúxmi ꞌicësaribiti Jesúsnan ꞌaish mitsun xucë́nsa ꞌain. Mitsúxmi ꞌicësaribiti cana Jesucristonan cupí, unin ꞌatimocë ꞌaíshbi asérabi Nucën Papa Diosan uni ꞌain. Mitsu ꞌacësaribi oquian an cushiocëxun cana uisa ñu cara ꞌicëbëbi bënë́quin ami catamëti ëniman. Usa ꞌixun Nucën Papa Diosan bana ñuixuanan, Jesús ñui quicë banaribi uni ñuixuncë cupí cana Patmos cacë nasínu sipuacësa ꞌinun unin ëncë ꞌain.

Apocalipsis 14:18

Buania chiquícëbë ca ángel itsi, an ñu tsi nëënmianan tsi bënánti cushiñu, ax anuxun sanutanun tsëpasa ñu nëënti anuan chiquíaxa. Chiquítancëxun ca munuma banaquin axa manë cuënucëñu ángel caxa: —Uvas bimicama ca pëcëti sënë́anxa. Usa ꞌain camina min manë cuënucë, anun tëaquin uvas bimicama biti ꞌain, bixun camina timëti ꞌain.

Apocalipsis 16:7

Usaquin cuanan cana anuxun tsëpasa ñu sanutanun nëënti, anuax ësai qui banaia cuan: —Usa ca. Nucën ꞌIbu Dios ꞌaish camina min cushi chaira ꞌaish, bëtsi cushisama ꞌain. Min sinan upíira ꞌixun camina uisa caramina oti ꞌai usoquin ꞌan. Mixmi ñu ꞌatima cuëëncëma cupí camina usoquin ꞌan.

Apocalipsis 19:10

Quicëbë cana a rabinux a ángel tanáin rantin purúan. Usai ꞌiabi ca ꞌë caxa: —Usai ꞌiáxma ca ꞌit. Uicaman cara Nucën Papa Dios quicë bana unicama ñuixunia an ca Jesús ñuiquin an ꞌunánmicë banacama uni ñuixunia. Mibëtan ax Jesús quicë banacama quicësabi oi ꞌicë unicaman ꞌacësaribi oquin cana ꞌënribi ax quicësaribi oquin ꞌaquin Nucën Papa Dios rabin. Usa ꞌain ca ꞌë rabixunma Nucën Papa Diosëshi rabit.

Apocalipsis 2:13

ꞌËn cana ꞌunanin, anumi mitsux ꞌicë anu ca ñunshin ꞌatimanën ꞌapu, Satanás, ax cushi ꞌicën. Anu ꞌicë unicama an sinánmicëxun ꞌatima ñu ꞌacëbëtanbi camina mitsun ꞌëmi sinánti ëncëma ꞌain. Micama achúshi, Antipas cacë, ax ꞌëmi sinánti ëncëma ꞌixun ꞌë ñuiquin bana ñuixuncë cupía axa ꞌëmi sináncëma unicaman ꞌacë́xa bamacëbëtanbi camina mitsun ꞌëmi sinánti ëncëma ꞌain.

Apocalipsis 20:4

Acama istancëxun cana anu tsóti cha bëtsi bëtsi isan. Anu ca an uni raíri ñu upí cara ꞌaxa, ñu upíma cara ꞌaxa quixun isti, acama tsócë ꞌiaxa. Acama isanan cana axa —ꞌëx cana Jesúsnan ꞌai —quiquin bana ñuixuncë cupí tëbíscacë unicama, ꞌimainun axa Nucën Papa Diosan bana cuacë cupí tëbíscacë unicama, acaman ñunshínribi isan. Acamax ca ꞌitsa maxcáñu ꞌianan ꞌitsa matúxca ñuinacanꞌëo a rabima, ꞌianan a tanquin unin ꞌacë ñu a rabima, ꞌianan ainan ꞌinun ꞌunántioquin aín bëmánan ꞌimainun aín mëcën cuënëocëma ꞌiaxa. ꞌËn iscëx ca acamax bama aíshbi baísquiaxa. Baísquitancëx ca Cristobë mil baritia ꞌapu ꞌiaxa.

Apocalipsis 8:3

Usa ꞌain ca bëtsi ángelribi, aín curi xanpa tuíanx uax, anua Nucën Papa Dios ꞌicë a bëmánon ꞌicë anuxun sanutanun tsëpasa ñu nëënti, curi ꞌacëribi, a rapasu niracëaxa. Usai ꞌia ca aín unicaman a rabianan ñucácë banacamabëa aín cuin tëxë́quianx ꞌirutanuan nëënun Nucën Papa Diosan ꞌitsaira tsëpasa ñu a ángel ꞌinánxa.

Apocalipsis 9:13

Banoíma ꞌixun ca a rabë́ ángel achúshinën aín manë banañu banoxa. Banocëbëtan cana anua Nucën Papa Dios ꞌicë a bëmánon ꞌicë anuxun sanutanun tsëpasa ñu nëënti, curi ꞌacë, aín cuëbícamanu i, vaca matúxcasa ꞌitánun ꞌacë, rabë́ ꞌimainun rabë́, anuaxa banaia cuan.