Apocalipsis 4:2 - Kashibo-Kakataibo Biblia

² Cacëxunshi Nucën Papa Diosan Bëru Ñunshin Upitan ꞌimicëxun cana ꞌuxúnmabi namácësa oquin naicamëꞌëonua anu tsóti upíira upí anu ꞌApuira tsóti, a isan. Isanan cana axa anu tsócë Nucën Papa Dios aribi isan.

Nukën 'Ibu Diosan ain unikama 'inan ain bana

² Cacëxunshi Nucën Papa Diosan Bëru Ñunshin Upitan 'imicëxun cana 'uxúnmabi namácësa oquin naicamë'ëonua anu tsóti upíira upí anu 'Apuira tsóti, a isan. Isanan cana axa anu tsócë Nucën Papa Dios aribi isan.

Apocalipsis 4:2 Iomraidhean Croise

1 Reyes 22:19

Kia ka Micaíasnën kakëxa: —Mix kamina usai kian, usa ꞌain kamina ꞌën ꞌIbun iskë ñu ñuikin mi kamainun upíokin kuati ꞌain: ꞌËn kana Nukën ꞌIbu anua tsótinua tsókë isan, isanan kana aín ángel naínua ꞌikë kamaribi a rapasu sëtë́kë aín mëkeu raíri ꞌimainun aín mëmiu sëtë́kë isan.

Isaías 6:1

A baritian ꞌapu Ozías ñukë anun kana Dios anua tsókë manainra anuxunbia; aín chupa kuëxitan anun anuxun a rabiti xubu a mapukë isan.

Ezequiel 1:26

Kuanan kana anu niti ꞌakë a manámia anu tsóti ꞌakësa maxax upíira zafiro kakë, kuman batsisa isan isanan kana anu tsóti a manámiaribi uni achúshi iskësa ꞌiaxa.

Ezequiel 1:28

ꞌuí ꞌibúnuxa nëtë kuínu nón bai mërakë usaribi ꞌiaxa, usa ꞌain kana ꞌën Dios ax ka kushiira ꞌikë kixun isan. Usa ꞌikë isi kana ꞌëx rantinpuruni memi bëtiki ꞌian.

Daniel 7:9

Usai ꞌikëbëtan abi ꞌën iskëxun ka anu tsótikama nanxa, nankëbë ka anu achúshi uni apan tsóbuaxa. Aín chupax ka matsi uxua iskësa uxuira ꞌiaxa, ꞌimainun ka aín bu axribi xapu uxua upíira iskësa ꞌiaxa. Usa ꞌain ka anua tsókë anun mañakë ax tsi ërë́rukë iskësa usaribi ꞌiaxa,

Mateo 22:43

Cacëxun ca Jesusan cacëxa: —Davitax ca ësai quiacëxa: Nucën ꞌIbu Diosan ca ꞌën ꞌIbu Cristo caxa: Axa mimi nishcë unicama ꞌën mi ꞌibuamimainun camina mix ꞌëbë ꞌApu ꞌaish ꞌën mëqueu ꞌiti ꞌain. Axa aín rëbúnquin ꞌaínbi ca Cristo ñui David Nucën Papa Diosan Bëru Ñunshin Upitan sinánmicëx —Cristo ax ca ꞌën ꞌIbu ꞌicë —quiax quiacëxa. ¿Uisa ꞌaish cara David usai quiacëx?

Hebreos 8:1

Ënë banaxa bëtsi banasama ꞌicëmi mitsun ꞌunánun cananuna ënë ñuiquin mitsu cain, an Nucën Papa Dios aín unicama ñucáxunti, Jesús, ax ca usa ꞌaish bërí aín nëtënu abë ꞌaish, Nucën Papa Diosbë ꞌApu ꞌicën.

Apocalipsis 1:10

Anun Nucën ꞌIbu Dios rabiti nëtën ꞌëx ami sinánquin cana ꞌuxúnmabi namácësa oquin, ꞌë caxucüaxa manë banañu banocë́xa banacësari munuma banaia cuan.

Apocalipsis 12:5

Niracëxuan caínmainun ca a xanu bëbu tuá bacë́anxa, ax canitancëx cushi ꞌixun ca camabi menu ꞌicë unían aín bana cuanun ꞌimiti ꞌicën. Usa ꞌain ca aín tita bacë́ncë ꞌicë, anua ax ꞌicë anu abë ꞌApu ꞌinun Nucën Papa Diosan buánxa.

Apocalipsis 17:3

Usaquin catancëxuan ángelnën, namáquin iscësa oquin isnun anu uni ꞌicëma menu ꞌë buáncëxun cana xanu achúshi ñuinacanꞌëo ushían a camánan tsócë ꞌisan. A ñuinacanꞌëo anu ca ꞌitsa anë cuënëocë ꞌiaxa, anë ꞌaisama, Nucën Papa Diosmi ꞌatimati banacë ca a anëcamax ꞌiaxa. Usa ꞌaish ca aín maxcácama mëcën achúshi ꞌimainun rabë́ ꞌaish aín matúxcacama mëcën rabë́ ꞌiaxa.

Apocalipsis 19:4

Usai ꞌimainun ca mëcën rabë́ ꞌimainun taë rabë́ ꞌimainun rabë́ ꞌimainun rabë́ caniacëcë unicama ꞌimainun axa ꞌitsa bëruñu rabë́ ꞌimainun rabë́ ñu, axribia bamatimoi tsócë, acaman ca aín bëmánon meu bësuquin Nucën Papa Dios, ꞌApuira, a rabi cuëënquin caxa: —Usai ca ꞌiti ꞌicën. Miishi cananuna munuma banaquin rabin.

Apocalipsis 20:11

Usaquin istancëxun cana anua ꞌapu tsóti uxua chaira isan, anu tsócë aribi cana isan. Iscëxbi ca ax anu ꞌain, me ꞌimainun naícama ꞌimainun anu ꞌicë ñucama nëtë́axa, nëtëti ca anua ax ꞌiti ꞌaíma ꞌiaxa.

Apocalipsis 21:10

Usaquin catancëxun ca ꞌuxcëmabi namácësoquin ꞌën iscëxun aín bashi chaira anu ꞌë buánxa. Buánquian ismicëxun cana Jerusalén ëma upíira upí, anua Nucën Papa Dios ꞌicë, anuaxa ubutia isan.

Apocalipsis 21:5

A bana ꞌën cuacëbë ca Nucën Papa Dios, axa anu ꞌApuira ꞌaish tsócë, ax ësai quiaxa: —Camina ꞌunánti ꞌain, cana camabi ñu ió ꞌinun ꞌatëcënin. Quianan ca ësairibi quiaxa: —ꞌËx quicësabi oi ca asérabi ꞌiti ꞌicën. Usa ꞌain camina ꞌëx quicë banacama ënë cuënëoti ꞌain.

Apocalipsis 3:21

ꞌAnan cana axa ꞌëmi catamëquin ꞌëx cuëëncësabi oi ꞌiti ëncëma unicamax ꞌëbë ꞌapu ꞌinun ꞌimiti ꞌain, ꞌëx tëmëraibi ax cuëëncësabi oi ꞌiti ëncëma ꞌicëa ꞌën Papan ꞌë abë ꞌapu ꞌinun ꞌimicësaribi oquin.

Apocalipsis 4:10

ca mëcën rabë́ ꞌimainun taë rabë́ ꞌimainun rabë́ ꞌimainun rabë́ a caniacëcë unicama an axa xënibua ꞌaínbi bamatimoi tsócë Nucën Papa Dios ami bësui, rantin puruni tsóbuquin a rabiia. Rabiquin ca curi ꞌacë mañuti atúan mañucë Nucën Papa Dios ꞌinánquin anua ax ꞌicë aín bëmánon nanquin rabiquin ësaquin caia:

Apocalipsis 4:5

Anu tsóti upíira upí anuaxa caná mëriti banaia cana cuan. Cuanan cana anuaxribia bëtsi ñuribi sharatia cuan. Anu Nucën Papa Dios ꞌicë aín bëmánoncüa, cana mëcën achúshi ꞌimainun rabë́ i tëacënu nanxun bimicë́xa ꞌapú rëquirucësaria rëquiruia isan. Isquin cana anu ca Nucën Papa Diosan Bëru Ñunshin Upí ꞌicë quixun ꞌunan.

Apocalipsis 4:9

Usaquian ꞌitsa bëruñu ñu an Nucën Papa Dios, axa anu ꞌApuira tsóti, anu ꞌianan bamatimoi tsócë, a nëtë́timoquin rabianan —ca asábi ꞌicë —quixun cacëbëtan cacëbëtan,

Apocalipsis 5:1

Axa anu tsócë Nucën Papa Dios an aín mëcën mëquenën tuíncë cana quirica taráncë isan. Iscëx ca aín namë́nu cuënëocë ꞌianan aín caxunuribi cuënëocë ꞌiaxa. A quirica aín namë́ istisama ꞌitánun upí oquin tacáshcacë ꞌaish ca anúan tacáshcacë ñu mëcën achúshi ꞌimainun rabë́ ꞌiaxa.

Apocalipsis 5:13

Usai banaia cuanan cana Nucën Papa Diosan unio ñucama, naínu ꞌicë ñucama, ꞌimainun menu ꞌicë ꞌimainun bacanu ꞌicë, anua bamacë unicama ꞌicë anu ꞌicë unicama, acamaxa munuma banai ësai quia cuan: Ax anu tsócë Nucën Papa Dios, a ꞌimainun Carnero ꞌicësaribitia unin ꞌucha cupí bama, aribi ca camaxunbi cuëënquin axribia cuëënun rabiti ꞌicën. Rabianan ca —asábi ca —quixun caquin rabiquin an cacë bana cuati ꞌicën. Ax cushiira ꞌaísha bëtsi ꞌapusama ꞌicë ca camaxunbi xënibua ꞌaínbi a rabiti ꞌicën. Cuëënquin ca axribia cuëënun rabiti ꞌicën.

Apocalipsis 6:16

Unë́quin ca aín bashi ꞌimainun xaxu chacama caxa: —A nëtë anúan axa anu tsóti upíira upí, anu ꞌApuira tsóti, anu tsócë Nucën Papa Dios a ꞌimainun Carnero ꞌicësaribitia unin ꞌucha cupí bama, an axa ami sináncëma unicamami nishquin castícanti nëtë ca uaxa. Usa ꞌain ca unicamax uíxbi ië́tima ꞌicën. Usa ꞌain ca nunu rurucubut, ꞌApuira an nu isnúnma ca rurucubúquin nu unput. Carnero ꞌicësaribitia unin ꞌucha cupí bama, axa nun ꞌucha cupí numi nishcë, an nu castícanxunma ꞌanun ca nu unët.