Apocalipsis 3:11 - Kashibo-Kakataibo Biblia

¹¹ Xënibucëma ꞌaínshi cana utëcënti ꞌain. ꞌËx umainun min ꞌacësabi oquin ꞌëmi sinánti ënquinma ꞌën mitsu cacë bana ꞌacë ꞌaish camina ꞌëbë ꞌën nëtënu ꞌi cuëënti ꞌain. Usai ꞌimi ꞌiti cupí camina unían mitsu sinanaminun ꞌamitima ꞌain.

Nukën 'Ibu Diosan ain unikama 'inan ain bana

¹¹ Xënibucëma 'aínshi cana utëcënti 'ain. 'Ëx umainun min 'acësabi oquin 'ëmi sinánti ënquinma 'ën mitsu cacë bana 'acë 'aish camina 'ëbë 'ën nëtënu 'i cuëënti 'ain. Usai 'imi 'iti cupí camina unían mitsu sinanaminun 'amitima 'ain.

Apocalipsis 3:11 Iomraidhean Croise

1 Corintios 9:25

Uni axa cuaiticama ax ca aín nami cushi ꞌinux bachuaquin tania. Aín namia cushi ꞌiti cupí ca ñu ꞌatima ꞌaima. Usai ꞌitancëx abati ax pain bëbaquin ca ñu bitsia. Usai ꞌiquian bicëxbi ca a ñu chëqui ꞌatimatia. Usa ꞌaínbi cananuna nux Jesús cuëëncësabi oi ꞌinux camabi nëtën upí ꞌiti ꞌain. Usai ꞌitancëx cananuna an ꞌimicëx asaribi upí ꞌaish uinsaranbi nëtë́timoi abë tsóti ꞌain.

Filipenses 4:5

Uisa ñu cara ꞌicëbëbi nishímami upí sinánñu ꞌicëa camabi unin mitsu isti cana cuëënin. Nucën ꞌIbu Jesús anun utëcënti nëtë ca ꞌuramatia.

2 Timoteo 2:5

Ënëx ca ësaribi ꞌicën. An pelota ꞌacë unicamax ca usaquin pelota ꞌati ꞌunáncëma ꞌaish ñancábi cuaia. Usai ꞌiquin ca aín cupí bitsima.

2 Timoteo 4:8

Usa ꞌixun cana Nucën ꞌIbu Jesucristonën utancëxun, upí oquin ax cuëëncësabi oquin ꞌën ꞌacë cupí cara uisaira ꞌë ꞌimiti ꞌicë quixun isti ꞌain. An ca asérabi aín quicësabi oquin ꞌati ꞌicën. Usa ꞌixun ca ꞌëishima, an axa uti cuëënquin caíncë unicamaribi, utancëxun uisaira oquin cara aturibi ꞌimiti ꞌicë usoquin ꞌimiti ꞌicën.

Santiago 1:12

An uisa ñu cara ꞌicëbëbi bënë́quinma tanshiquin Jesucristomi catamëti ëncëma unicama a ca usaía ax ami sináncë unicama ꞌiti ñuia quiásabi oquin Nucën Papa Diosan aín nëtënu abë ꞌaish chuámarua ꞌaish cuëënun ꞌimiti ꞌicën.

Santiago 5:9

ꞌËn xucë́antu, Nucën Papa Diosan anun camabi uni aín nuitu ꞌunánquin uisoquin cara ñu ꞌaxa quixun isti nëtë ꞌurama ꞌain, camina mitsúxmi an ꞌuchocëma ꞌinun, uni raíribë ñuianani nishanantima ꞌain.

Apocalipsis 1:3

Anun cuënëo banacama quicësabi oi ꞌiti nëtë ca xënibuiracëma ꞌaínshi uti ꞌicën. A nëtën ca an ënë bana iscë unicama ꞌimainun an uni itsían ñuia cuacë unicama ꞌimainun a bana cuaquin —asérabi ca usaía quicësabi oi ꞌiti ꞌicë —quixun sinánquin a bana quicësabi oquin ꞌacë unicama cuëëinra cuëënti ꞌicën.

Apocalipsis 16:15

“Ësai ca ꞌiti ꞌicën: An ñu mëcamacë uníxa unin sináncëma ꞌaínbi ꞌicësaribicuatsini cana ꞌëx uti ꞌain. ꞌËx ucëbë ca an upí ñu ꞌaquin ꞌëx uti caíncë uni, ax cuëënti ꞌicën. Ax ca chupa upí pañucësa ꞌaish rabíntima ꞌicën. Usa ꞌaish ca chupañuma ꞌicëa uni raírinën iscë́xa uni rabíncësaribi ꞌitima ꞌicën”.

Apocalipsis 2:10

Unían bëtsi bëtsi oquin ꞌatimocëxbi camina racuë́tima ꞌain. Ñunshin ꞌatimanën ꞌamicëxun ca raíri unin mitsu sipuati ꞌicën, caramina ꞌëmi sinánti ënti ꞌai quixun isnuxun. Mëcën rabë́ nëtën camina paë tani tëmërati ꞌain. Uisai cara ñu ꞌicëbëtanbi camina anúnmi mitsux bamati nëtë utámainun ꞌëmi sinánti ëntima ꞌain. Usaími ꞌia cana mitsu ꞌën nëtënuaxmi nëtë́timoi ꞌëbë cuëënun ꞌimiti ꞌain.

Apocalipsis 2:13

ꞌËn cana ꞌunanin, anumi mitsux ꞌicë anu ca ñunshin ꞌatimanën ꞌapu, Satanás, ax cushi ꞌicën. Anu ꞌicë unicama an sinánmicëxun ꞌatima ñu ꞌacëbëtanbi camina mitsun ꞌëmi sinánti ëncëma ꞌain. Micama achúshi, Antipas cacë, ax ꞌëmi sinánti ëncëma ꞌixun ꞌë ñuiquin bana ñuixuncë cupía axa ꞌëmi sináncëma unicaman ꞌacë́xa bamacëbëtanbi camina mitsun ꞌëmi sinánti ëncëma ꞌain.

Apocalipsis 2:25

ꞌËx utëcëntámainun camina usabii ꞌiti ꞌain.

Apocalipsis 22:12

Xënibucëma ꞌain cana uti ꞌain. Uquin cana an ñu upí ꞌacë ꞌën unicama uisoquin cara ñucama ꞌaxa, usaribi oquin cupíoquin cuëënun ꞌimiti ꞌain.

Apocalipsis 22:20

An ënë ñucama ꞌë ismicë, an ca ꞌë caia: —Cana bënëtishi utëcënti ꞌain. Cacëxun cana cuëëinra cuëënquin —asábi ca, usai ca ꞌiti ꞌicën, ca ut —quixun, Nucën ꞌIbu Jesús cain.

Apocalipsis 22:7

Xënibucëma ꞌaínshi cana uti ꞌain. An, ënë bana quicësabi oi ca asérabi ꞌiti ꞌicë quixun sinánquin a bana cuacë unicama, ax ca cuëëinra cuëënti ꞌicën.

Apocalipsis 3:3

Usoquin ꞌaquin camina mitsua ꞌën sinánmicëxun ꞌën unicaman ñuixuncë bana a sinánti ꞌain. A sinánquin camina a bana quicësabi oquin ꞌanan sinanaquin mitsun ñu ꞌatima ꞌacëcama ënti ꞌain. Usai ꞌicëbëma cana an ñu mëcamacë uníxa, unin sináncëbëmabi ucësaribicuatsini, ꞌëx mitsun ꞌunáncëma nëtën uisoquin carana ꞌati ꞌai usoquin mitsu ꞌai uti ꞌain.

Apocalipsis 4:10

ca mëcën rabë́ ꞌimainun taë rabë́ ꞌimainun rabë́ ꞌimainun rabë́ a caniacëcë unicama an axa xënibua ꞌaínbi bamatimoi tsócë Nucën Papa Dios ami bësui, rantin puruni tsóbuquin a rabiia. Rabiquin ca curi ꞌacë mañuti atúan mañucë Nucën Papa Dios ꞌinánquin anua ax ꞌicë aín bëmánon nanquin rabiquin ësaquin caia:

Apocalipsis 4:4

Anu ax tsócë aribi nëbë́tsioracë ca mëcën rabë́ ꞌimainun taë rabë́ ꞌimainun rabë́ ꞌimainun rabë́ anu tsóti itsi ꞌiaxa. Axa a anu tsótinu tsócëcamax ca mëcën rabë́ ꞌimainun taë rabë́ ꞌimainun rabë́ ꞌimainun rabë́ caniacëcë unicama ꞌiaxa. Acamax ca aín chupa uxua ꞌianan curi ꞌacë mañuti mañucë ꞌiaxa.