Apocalipsis 2:3 - Kashibo-Kakataibo Biblia

³ Usai tëmëraquinbi camina mitsun ꞌëmi sinánti ëncëma ꞌain. ꞌËnan ꞌicë cupí unin ꞌatimocëxunbi camina ënquinma ꞌëmi sinánquin ꞌëx cuëëncësabi oquin ꞌan.

Nukën 'Ibu Diosan ain unikama 'inan ain bana

³ Usai tëmëraquinbi camina mitsun 'ëmi sinánti ëncëma 'ain. 'Ënan 'icë cupí unin 'atimocëxunbi camina ënquinma 'ëmi sinánquin 'ëx cuëëncësabi oquin 'an.

Apocalipsis 2:3 Iomraidhean Croise

Salmos 37:7

An ꞌakinun kiax bënë́kinma kamina Nukën ꞌIbun mi munu; ꞌakimainun kaínti ꞌain. Usai ꞌikin kamina an ñu ꞌatima ꞌakë unikaman, ꞌakësokin ñu ꞌatima ꞌati sinántima ꞌain, atun ka ñu ꞌatima ꞌatishi sinania.

Salmos 69:7

Mi kupín kana unin uisakinshi kara ꞌë ñuikëxunbi tënëa; usai ꞌi kana ꞌën bëmanabi xanai rabian;

Marcos 15:21

Buánquinbi ca Cirene nëtënu ꞌicë uni, Simón, Alejandro ꞌimainun Rufo aín papa, aín naënuax anúan cuancë bai, anun aia isquin suntárucaman anu Jesús matásti i curúsocëa ꞌiábianun quixun cacëxa.

Lucas 14:27

An asérabi ꞌëmi catamëquin a ꞌai bamanuxunbi ꞌëmi catamëti bana quicësabi oquin ꞌacëma uni, ax ca ꞌën uni ꞌitima ꞌicën.

Lucas 18:1

Aín unix ca atsani, abë cana banatisama tani quixun sinanima, nëtë camabi Nucën Papa Diosbë banati ꞌicë quixun ꞌunánmiquin ca bana itsi ñuicësoquin,

Lucas 21:19

Tëmëraquinbi ꞌëmi catamëti ëncëma ꞌaish camina ꞌën Papa Diosan nëtënu ꞌëbë ꞌiti ꞌain.

Lucas 5:5

Cacëxun ca Simonan cacëxa: —Cananuna ꞌuxti tëaquin tsatsa biquinmabi ꞌuran ricánëtin. Usa ꞌaínbi cana minmi ꞌë cacëxun ꞌën rica saracatëcënti ꞌain.

Lucas 8:15

Me upínua ñu bëru nipacëcë, usaribi ca raíri uni ꞌicën. A unicamax ca Nucën Papa Diosan bana asérabi cuacë ꞌixun aín nuitunubi racanaquin upí oquin sinánquin, uisai cara ñu ꞌicëbëtanbi ënquinma a bana quicësabi oquin ꞌaia. Atux ca ñu bëru me upínu nipacëax cotancëx canitancëxun tuaia ꞌaisamaira bimiñu usaribi ꞌicën.

Juan 15:21

Nucën Papa Dios an ꞌë xuá a ꞌunáncëma ꞌixun ca ꞌënan cupí raíri unin mitsu bëtsi bëtsi onuxun ꞌaia.

Romanos 12:12

Nucën Papa Diosan ca ax quicësabi oquin mitsu ꞌaquianan abë ꞌinun mitsu ꞌimiti ꞌicë quixun sinani camina chuáma tani cuëëni bucuti ꞌain. Tëmëraibi camina masá nuituti bënë́tima ꞌain. Ënima camina Nucën Papa Diosbë banati ꞌain.

Romanos 16:12

Trifena ꞌimainun Trifosa, a xanu rabë́ Nucën ꞌIbu Jesucristomi catamëcë ꞌixun tëmëraquinbi ax cuëëncësabi oquin ꞌacë, aribi camina bërúanxa ꞌinun ꞌë caxunti ꞌain. Nucën chirabacë Pérsida, a nun sináncë, anribi tëmëraquinbi upí oquin Nucën ꞌIbu Jesucristo cuëëncësabi oquin ñu ꞌacë, aribi camina bërúanxa ꞌinun ꞌë caxunti ꞌain.

Romanos 2:7

Axa —Nucën Papa Diosan ca ꞌë upí isquin abë nëtë́timoi tsónun ꞌimiti ꞌicë —qui cuëëncë uni, an ca ënquinma Nucën Papa Dios cuëëncësabi oquin ñu ꞌaia. Usoquin an ꞌacë uni a ca Nucën Papa Diosan xënibua ꞌaínbi abë ꞌinun ꞌimia.

Romanos 8:25

Usa ꞌaínbi cananuna usaquin nu ꞌimicëma pain ꞌixun usai ꞌiti cainin. Cananuna —bëtsi cana ꞌiti ꞌai —quixun sinánquinbi uisa caranuna ꞌiti ꞌai quixun ꞌunánquinmabi a isnuxun —asérabi ca usai ꞌiti ꞌicë —quixun cuëënquin cainin.

1 Corintios 13:7

An uni nuibacë unin ca amia nishcëxunbi uni, axribi ami nishquinma —sapi ca sinanati ꞌicë —quixun cainia. Axa upíma ꞌaínbi ca ami nishíma usabi abë upí ꞌia.

1 Corintios 16:16

A unicamabë upí ꞌianan camina aín bana cuati ꞌain. An ꞌacësaribi oquin ñu ꞌacë unicama ꞌimainun an unicama ꞌaquinquin ñu mëëcë unicama camina abë upí ꞌianan aín bana cuati ꞌain.

2 Corintios 10:15

Bëtsi unin ꞌaquincë cupía uni Jesucristomi sinania cananuna —ꞌën bana ñuixuncë cupíshi ca usai ꞌiaxa —quixun caiman. Usa ꞌaínbi cananuna mitsúnmi Cristomi catamëquin ënquinma ax quicësabi oquin ꞌacë cupí, aín bana mitsu ꞌunánmitëcëni cuainsa tanin, Nucën Papa Dios cuëëncëbë.

2 Corintios 11:23

¿Atun cara Cristo ñuiquin bana ñuixunin? Sinánñuma uni quicësai cana quin, atun ꞌacësamaira oquin cana ꞌën ꞌacën. Atux ꞌicësamairai cana bana ñuixuni tëmëracën, atu ꞌacësama oquin ca ꞌë ꞌitsa oquin sipuacancëxa, atu ꞌacësama oquin ca ꞌë ꞌitsa oquin rishquicancëxa, ꞌitsai cana bamaibi ië́acën.

2 Corintios 4:1

Ësoquin cana mitsu cain, ꞌuchañuira ꞌicëbi nuibaquin sinanamixun ca Nucën Papa Diosan aín bana uni ñuixunun nu ꞌimiaxa. Usa ꞌain cananuna masá nuituquin ënquinma aín bana uni ñuixunin.

2 Corintios 4:16

Usa ꞌain cananuna masá nuituquinma aín bana ñuitiribi ëniman. Nucën nami axa abiira abi xënibucëbëtanbi ca Nucën Papa Diosan camabi nëtën ami catamëti cuëënun nu cushioia.

2 Corintios 5:9

Usa ꞌain cananuna ënë nëtënu ꞌaish ꞌicësaribiti aín nëtënuxunribi ax cuëëncësa oquin ñu ꞌati cuëënti ꞌain.

2 Corintios 6:5

Unían nu mëëanan sipuanan raíri uni numi tsuáquirumimainun ꞌaisamaira oquin ñu mëëanan, ꞌuxti tëanan ꞌacëñuma ꞌaish panancë ꞌixunbi cananuna bënë́quinma tanshitin.

Gálatas 6:2

Min ñuishi ꞌati sinánquinma camina uni raíriribi ami sinánquin ꞌaquinsa ꞌicë ꞌaquinti ꞌain. Usai camina bëtsibë bëtsibë ꞌaquiananti ꞌain. Usai ꞌi camina Cristo quiásabi oi ꞌiti ꞌain.

Gálatas 6:9

Usa ꞌain cananuna Nucën Papa Dios cuëëncësabi oquin ꞌaquin atsánquin ëntima ꞌain. Usoquin ñu upí oquin ꞌai cananuna ax quiásabi oi an ꞌaquincë ꞌianan aín nëtënu abë ꞌiti ꞌain.

Filipenses 2:16

—Jesucristomi catamëti ca uni Nucën Papa Diosnan ꞌia —quixunmi unicama bana ñuixuncë cupí. Mitsúxmi usa ꞌain cana ꞌën Cristo ucëbëtan —ñancábi cana tëmëraquinbi Cristo ñuiquin Filiposnu ꞌicë unicama bana ñuixuanma ꞌai —quixun ꞌunani cuëënquin upí oquin sinánti ꞌain.

Filipenses 4:3

An ꞌëbëtan Jesucristo ñuiquin uni bana ñuixuncë a cana ësoquin cain, ënë xanu rabë́ camina bëtsibë upí ꞌinun ꞌaquinti ꞌain. Atun ca ꞌë ꞌimainun Clemente, ꞌimainun anribia ꞌën ꞌacësaribi oquin aín bana ñuixuncë a unicamabëtan, Jesucristomia sinánun unicama ꞌaquianxa. An usoquin uni ꞌaquincë unicaman anë ca Nucën Papa Diosbë ꞌitioquian aín nëtënu ꞌicë quiricanu cuënëo ꞌicën.

Colosenses 1:11

ꞌAnan cananuna ax cushiira ꞌixúan, uisa ñu cara ꞌicëbëbi bënëtima cuëënquin tanshinuan mitsu ꞌaquinun quixun a mitsu ñucáxunin.

1 Tesalonicenses 1:3

Nucën Papa Diosbë banaquin cananuna mitsúnmi amiira pain catamëquin ax cuëëncësabi oquin ꞌanan, upí oquin unicama nuibaquin ꞌaquianan, a ëníma, Nucën ꞌIbu Jesucristonën ca ax quicësabi oquin nu ꞌimiti ꞌicë quixun manucëma cupí —asábi ca —quixun a cain.

1 Tesalonicenses 2:9

Nucën xucë́antu, mitsun camina ꞌunanin, nun cananuna pitiñuma ꞌianan nun curíqui cëñuti rabanan tëmërai atsánquinbi ñu mëëan. Micama uinu ꞌicë uníxbia nu ñu ꞌináncasi bënë́nunma cananuna nëtën ꞌanan, imë́ribi nun cuëëncë ñu biti cupí usoquin ꞌan. ꞌAnan cananuna Jesucristomi catamëti ca uni Nucën Papa Diosnan ꞌiti ꞌicë quixun caquin mitsu bana ñuixuan.

1 Tesalonicenses 5:12

Nucën xucë́antu, cananuna mitsu cain, mitsun cushicama ꞌimainun an mitsu ꞌaquincëcama ꞌimainun an mitsu Nucën ꞌIbu Jesús ñuiquin ꞌësëcë unicama acaman mitsu cacësabi oquin ꞌanan camina atun bana cuati ꞌain.

2 Tesalonicenses 3:13

Nucën xucë́antu, camina unicamaxa chuámarua bucunun ñu upí ꞌati, a ꞌaisama tanquin ëntima ꞌain.

2 Tesalonicenses 3:5

Nucën ꞌIbu Jesucristonëan —Nucën Papa Diosan ca asérabi mitsu nuibatia —quixun upí oquin ꞌunánan, ax ꞌicësaribiti uisa ñu cara ꞌicëbëbi bënë́quinma tanshiti ꞌunánun mitsu ꞌaquinti cananuna cuëënin.

2 Tesalonicenses 3:8

Cupíoquinma cananuna unin piti picëma ꞌain. Nun mitsun piti ꞌimainun mitsun curíqui cëñuti rabanan cananuna nëtën ꞌanan imë́ribi tëmërai atsánquinbi ñu mëëan.

1 Timoteo 4:10

Nucën Papa Dios, axa bamatimoi tsócë, an camabi uni ainan ꞌinun ië́misa tanquin Jesucristomia ax catamëcë unicama ië́micë, an ca axa quicësabi oquin ënë menuxun ꞌimianan aín nëtënuxunribi aín unicama upitax ꞌinun ꞌimiti ꞌicë quixun cananuna ꞌunanin. Usa ꞌixun cananuna nun ꞌacësaribi oquian camabi unin ꞌunánun, tëmëranan uni numi ꞌatimati banacë ꞌixunbi unicama Nucën Papa Diosan bana ñuixunin.

1 Timoteo 5:17

Aín cushían upí oquin ꞌaquincëxun ca axa Jesucristomi catamëcë unicaman ami sinánquin nuibaquin aín bana cuati ꞌicën. Usa ꞌixun ca bëtsi ꞌacësamaira oquin an bana ñuixuanan upí oquin ꞌunánmicë, ami sinánquin nuibanan upíira oquin aín bana cuati ꞌicën.

Hebreos 10:36

Jesucristo ucëbë ax quicësabi oi Nucën Papa Diosan nëtënu abë ꞌinuxun camina uni itsían mitsu tëmëramicëxbi a taníma usabi Cristomi catamëquin ax cuëëncësabi oquin ꞌati ꞌain.

Hebreos 12:1

A unicamaxa ꞌiásaribiquin ca nubë ꞌicë ꞌitsa unin tëmëraquinbi —Nucën Papa Diosan ca asérabi aín quicësabi oquin nu ꞌaquinti ꞌicë —quixun ꞌunánquin ami catamëquin ënima. Atúxa ꞌicësaribiti ꞌinuxun cananuna an nu ꞌatimaquin sinánmicë a ñucama ëanan an usabi ꞌitioquin nu ꞌatima ꞌimicë ñucamaribi ënti ꞌain. Acama ënquin cananuna bënë́quinma añu ñu ꞌën ꞌati cara Nucën Papa Dios cuëënia quixun sinánquin upí oquin ꞌati ꞌain. Cuai bëtsibë upiti abáti cupí ca unin an ië́ocë ñu nania, usaribiquin cananuna upí oquin nun ꞌati ñu ꞌanuxun, uisa ñun cara nu ꞌatimaquin sinánmia, a ënti ꞌain.

Hebreos 13:13

Usa ꞌain cananuna Jesús, axa ëma ꞌuracëox ꞌuchañuira uni ꞌicësari bama, a nuxnu ainan ꞌicëa uni itsin tëmëramianan ꞌusáncëxunbi, ainan ꞌiti ëntima ꞌain.

Hebreos 6:10

Nucën Papa Dios, an ca aín sinan upí ꞌixun, mitsúnmi aín unicama nuibaquin upiti bucunun ꞌaquianan bëríribi usoquin mitsun ꞌaia, manuquinma sinania.

Hebreos 6:12

Mitsúxmi chiquish ꞌiti cananuna cuëëniman. Cananuna cuëënin, Nucën Papa Diosan aín quicësabi oquin ꞌaquincë́xa aín uni raírinëx a ëníma ami catamëti upiti ꞌia isími usaribiti ꞌiti.

Hebreos 6:15

Usaquian cacëxun ca Abrahamnën —Nucën Papa Dios quicësabi oi ca ꞌiti ꞌicë —quixun sinánquin bënë́quinma, caíancëxa. Caíncëbë ca Nucën Papa Dios quicësabi oi Abrahamnën xanu tuutancëx Isaac bacë́ancëxa.

2 Pedro 1:6

Usai ꞌiti ꞌunáncë ꞌixun camina ñu ꞌaisama ꞌaisa tanquinbi tënëanan cushixun Nucën Papa Diosan a ꞌanun mitsu ꞌináncë ñu asérabi ꞌati ꞌain. Usaquin ꞌacë ꞌixun camina mitsumi uisa ñu cara ꞌicëbëtanbi bënë́quinma tanshiti ꞌain. Usaquin ꞌai camina Nucën Papa Diosmi asérabi sinánti ꞌain.

Apocalipsis 1:9

ꞌËx Juan ꞌaish cana mitsúxmi ꞌicësaribiti Jesúsnan ꞌaish mitsun xucë́nsa ꞌain. Mitsúxmi ꞌicësaribiti cana Jesucristonan cupí, unin ꞌatimocë ꞌaíshbi asérabi Nucën Papa Diosan uni ꞌain. Mitsu ꞌacësaribi oquian an cushiocëxun cana uisa ñu cara ꞌicëbëbi bënë́quin ami catamëti ëniman. Usa ꞌixun Nucën Papa Diosan bana ñuixuanan, Jesús ñui quicë banaribi uni ñuixuncë cupí cana Patmos cacë nasínu sipuacësa ꞌinun unin ëncë ꞌain.

Apocalipsis 3:10

Mitsun camina uisa ñu cara ꞌicëbëtanbi ꞌëmi catamëanan ꞌën bana quicësabi oquin ꞌati ëncëma ꞌain. Usaími ꞌicë cupí cana anúan unicama paë tani tëmërati nëtëa ucëbëmi tëmëraxma ꞌinun mitsu ꞌimiti ꞌain.