Apocalipsis 15:3 - Kashibo-Kakataibo Biblia

³ Anuax ca Nucën Papa Dios rabi cantaxa. Moisés, an Nucën Papa Diosan cacësabi oquin ꞌá, a sinánan Carnero ꞌicësaribitia unin ꞌucha cupí bama, an Nucën Papa Dios cuëëncësabi oquin ꞌá, aribi sinani ca Nucën Papa Dios rabi cantaxa. Ësai quicë ca a canta ꞌiaxa: Minmi ꞌacë ñucamax ca upíira ꞌicën, unin sináncësamaira oquin sinánquin camina ñu ꞌacën. Mix camina Nucën ꞌIbu Dios ꞌain. Min cushix ca chaira ꞌaish bëtsi cushisama ꞌicën. Mix cushiira ꞌaish camina camabi menu ꞌicë unicaman ꞌApu ꞌain. Usa ꞌaish camina sinánñuira ꞌixun paránquinma atúxribia upí ꞌinun ꞌiminux atun ꞌApu ꞌain.

Nukën 'Ibu Diosan ain unikama 'inan ain bana

³ Anuax ca Nucën Papa Dios rabi cantaxa. Moisés, an Nucën Papa Diosan cacësabi oquin 'á, a sinánan Carnero 'icësaribitia unin 'ucha cupí bama, an Nucën Papa Dios cuëëncësabi oquin 'á, aribi sinani ca Nucën Papa Dios rabi cantaxa. Ësai quicë ca a canta 'iaxa: Minmi 'acë ñucamax ca upíira 'icën, unin sináncësamaira oquin sinánquin camina ñu 'acën. Mix camina Nucën 'Ibu Dios 'ain. Min cushix ca chaira 'aish bëtsi cushisama 'icën. Mix cushiira 'aish camina camabi menu 'icë unicaman 'Apu 'ain. Usa 'aish camina sinánñuira 'ixun paránquinma atúxribia upí 'inun 'iminux atun 'Apu 'ain.

Apocalipsis 15:3 Iomraidhean Croise

Génesis 17:1

Usa ꞌain ka Abram axa noventa ꞌimainun nueve baritiañu ꞌikë, Nukën ꞌIbun amiribishi ami mëratëkënkin ësokin kakëxa: —ꞌËx kana min ꞌIbu Dios kamabi kushiñuira a ꞌain, usa ꞌain kamina ꞌëx kuëënkësabi ꞌoíshi tsóanan ꞌëx kikësabiokin kamabi ñu ꞌati ꞌain,

Nehemías 9:14

ꞌInánkin kamina uisai kara sábado nëtë ꞌikëbë tantiti ꞌikë aribi ꞌunámianan a tanti banakama asérabia min uni Moisésnën upíokin ꞌunánminun ꞌamiakën.

Job 5:9

¡An ka ꞌitsaira ñu ꞌakin unin iskëma chaiirabu ñu ꞌaia, usakin ꞌaia ka uínbi a ñukama uisakin kara ꞌaia kixun ꞌunántima ꞌikën!

Salmos 100:5

Nukën ꞌIbu Dios ax ka upíira ꞌikën; an uni nuibakë ax ka bërí ꞌa ꞌixunma nu nuibakë ꞌikën, ꞌianan ka an upí ñubu ꞌa ax uínsaranbi këñutima oi ꞌia ꞌikën.

Salmos 105:5

ꞌImainun kamina an ñu chabu ꞌa a ꞌianan aín bana sinánti ꞌain;

Salmos 139:14

Usa ꞌixun kana unin iskëma ñu ꞌakinmi ꞌë unio ꞌixun mi rabin, ꞌianan kana min ꞌakë ñukamaxa upí ꞌain mi asábi ka kain. ¡Usa ꞌain kana usakin mi ꞌa ꞌikë asérabi ka ax ꞌikë kixun ꞌunanin!

Salmos 145:17

Nukën ꞌIbu ax ka uisakin ñu ꞌakatsi kara kia, usakinbi kamabi ñu upíokin ꞌaia.

Salmos 145:6

Kikëbëa unikamax min kushínbi kamina anun rakuë́ti ñukama ꞌakën a ñui kimainun kana, ꞌëx min kamina ñu chaiirabu ꞌakën kiax kiti ꞌain.

Isaías 33:22

Usa ꞌain ka Nukën ꞌIbu ax an bana nu mëníoxunkë ꞌixun a tanti banakama nukama ꞌaxunia, ꞌimainun ka ax nukaman ꞌapu ꞌikën, usa ꞌixun ka an nu ië́miti ꞌikën. Axa numi nishkë unikaman atun nunti anun tëkërëkakë itsikaman ka churukukë ꞌixun ami tëkërëkakë i a tuinima, usa ꞌain ka ami tëkërëkakë chupa ax pënimëtima. Usai ꞌikëbëtan kananuna numi nishkë unikaman atun ñu kupíkë bikuanti ꞌain, bimainun ka bëxuñu unikama ꞌimainun aín taëmi ñukë unikamanribi atun ñu kamabi atima onan numi nishkë unikaman ñu bikuanti ꞌikën.

Isaías 45:21

Usa ꞌain ka timë́kankë ꞌain añu karamina mitsun a ax kiti uni anu ꞌiti ꞌikën, ax ka uin kara ësokin ꞌati sinánxun axa kiax bëtsibë bëtsibë ñukákananti ꞌikën: ¿Uin kara bërámabi ënë ñukama ꞌisama ꞌaínbi kitabati usai ka ñu ꞌinuxun ꞌaia kiax kiakëx? ¿Uixira kara bërámabi usaía ñu ꞌiti ñui ꞌitabakëbë usai ka ꞌinuxun ꞌaia kiakëx? ¿ꞌËx karana min ꞌIbu ꞌaish axa a ñukama ñui kia ꞌama ꞌain? Usa ꞌain ka ꞌësaribi Dios uinubi ꞌaíma ꞌikën. Uinubi ka ꞌësaribi Dios an ain unikama bëtsibë ꞌakanania kananmikin ië́mikë ꞌaíma ꞌikën.

Daniel 6:20

Bëbakin ka ꞌurama okin ꞌapun Daniel masá nuitukëishi aín bana ꞌixun ësokin kakëxa: —Daniel Dios këñutima oi tsókë aín uni, ¿ami ax kikësabiokin min ꞌaxunkë an kara paru ꞌinúan kamanua mi ëñëmiax?

Daniel 9:11

Kamabi Israel unikaman ka min ꞌunanmikëxunbi min bana kuaisama tanxa, usa ꞌain ka nunu ꞌatima ñuira min uni Moisésnën usakin kana ꞌatima oti ꞌai kixun kuënëomia usaibi ꞌiaxa, nux kananuna mimi ꞌuchan usa ꞌain.

Oseas 14:9

An ñu ꞌunánkë unikama ꞌimainun sinánñu unikama, akaman ka ënë bana kuati ꞌikën: Kamabi ñu Diosan ꞌá ax ka upíokin ꞌá ꞌikën, usa ꞌain ka an ñu ꞌupíshi akë unikaman ax kikësabiokin ꞌaia; usa ꞌaínbi ka ꞌatima sinánñu unikama usakin ñu ꞌaiama Diosan ꞌatima oia.

Miqueas 7:20

¡ꞌËn ꞌIbu mix upí ꞌixun nu nuibakin kamina bërámami nun chaitiokëkama Abraham ꞌimainun Jacob kásabiokin nuribi ꞌakinti ꞌain!

Zacarías 9:9

(Ësai ka Dios kia.) ¡Sión ëmanu tsókë unikamax ka ꞌitsaira kuëënti ꞌikën! ¡ꞌImainun ka Jerusalén ëmanu tsókë unikama atúxribi kuëëni kantati ꞌikën! Mitsun ꞌapu, upí ainra kamabi ñu kananti ax ka aia, ꞌaínbi ka mënin sinaínshi ꞌaish, achúshi burro xanuntuá bërí kanikë a kamanan tsótax aia.

Juan 1:17

Uisai cara Nucën Papa Diosan uni ꞌiti ꞌicë quixun ca Moisésnën nucën raracama ꞌunánmiacëxa. Usa ꞌaínbi ca axira uxun Jesucristonën asérabi nuibaquin aín ꞌucha tërë́nquin Nucën Papa Dios cuëëncësabi oía aín uni ꞌinun ꞌimiaxa.

Deuteronomio 31:30

Usa ꞌain ka Moisés aín pëukë anuaxbi kantakin pëutankëx kamabi Israel unikaman timëkamë ꞌëoxun kuamainun sënën oi kantakin ꞌunánmiakëxa:

Deuteronomio 32:3

ꞌËx kana Nukën ꞌIbun anë ñui kiti ꞌain: ¡Nukën ꞌIbu Dios ax ka chaiira ꞌianan upí ꞌikë kixun ka unikaman ꞌunánti ꞌikën!

Deuteronomio 34:5

Usa ꞌain ka Moisés Diosan uni ax Moab kakë me anuax Nukën ꞌIbun kakësabi oi ñuakëxa.

1 Timoteo 1:17

Usa ꞌain cananuna Nucën Papa Dios, axa usabi ꞌApuira ꞌiá ꞌaish cëñútimoi usabi ꞌiti, a unin aín bërúnbi iscëma, ꞌianan an camabi ñu ꞌunáncë, axëshia Dios, a xënibua ꞌaínbi rabiti ꞌain. Usai ca ꞌiti ꞌicën.

Hebreos 3:5

Nucën raracama judíos unibu ꞌain ca Moisés atun cushi ꞌiacëxa. Aín cushi ꞌixun ca Nucën Papa Dios cuëëncësabi oquin upí oquin ñu ꞌacëxa. Uisairai ꞌi cara ainan ꞌiti ꞌicë quixuan judíos unicaman ꞌunánuan atu ñuixunun quixun Nucën Papa Diosan cacësabi oquin ca Moisésnën nucën raracama ꞌitsa ñu ñuixuancëxa.

Apocalipsis 1:8

Nucën ꞌIbu Dios, axa usabi ꞌiá ꞌaish usabi ꞌicë, ax ca cushiira ꞌaish, uisa cushi cara, aín cushibëtanbi sënë́nmaira ꞌicën. Usa ꞌaish ca ax ësai quia: —ꞌËx cana uisa ñubia ꞌaíma ꞌaínbi ꞌiacën, usa ꞌaish cana ënë menu ꞌicë ñucama cëñúcëbë usabi ꞌiti ꞌain. Usa ꞌaish cana a pain ꞌunánti bana “A” ꞌimainun tsiánquinribi ꞌunánti bana “Z” asaribi ꞌain.

Apocalipsis 11:17

Rabiquin ca caxa: Nucën ꞌIbu Dios, min cushi ca chaira ꞌaish bëtsi cushisama ꞌicën. Camina usabi ꞌiá ꞌianan usabi ꞌaish, usabi ꞌiti ꞌain. Cushiira ꞌixun camina min cuëëncësabi oquin ꞌain. ꞌAi camina bërí mixëshi min unicaman ꞌApu ꞌain. Usa ꞌicë cananuna bërí —asábi ca —quixun caquin mi rabin.

Apocalipsis 14:3

Acama ciento cuarenta y cuatro mil unicamax ca anun cantacëma, canta iotan cantaxa. A cantax ca anu Nucën Papa Dios ꞌicë a bëmánon ꞌimainun axa bamatimoi tsócë ꞌitsa bëruñu rabë́ ꞌimainun rabë́ ñu, acama ꞌimainun anu ꞌicë caniacëcë unicama mëcën rabë́ ꞌimainun taë rabë́ ꞌimainun rabë́ ꞌimainun rabë́, acaman bëmánauncüaxa cantacë ꞌiaxa. Uinu ꞌicë unínbi ca a canta ꞌunántima ꞌicën, unicama ciento cuarenta y cuatro mil (144,000) a Nucën Papa Diosan ainan ꞌinun ië́micë, acaman cuni ca a canta ꞌunánxa.

Apocalipsis 14:8

Usai quicëbë ca bëtsi ángelribi a caxu ai quiaxa: —Babilonia, a ëma chaira, anu ꞌicë unicaman ca aín xanuma ꞌaínbi xanu itsin ñunshini cuëënti, ꞌimainun ꞌaisamaira ñu ꞌatima, an ꞌacësaribi oquian ꞌanun quixun camabi menu ꞌicë unicama ꞌunánmiaxa. A ëma ꞌimainun anu ꞌicë unicamax ca bërí cëñúaxa, ca ꞌaíma ꞌicën.

Apocalipsis 17:14

Acamax ca Carnero ꞌicësaribitia unin ꞌucha cupí bama abë ꞌacananti ꞌicën. ꞌAcananquin ca Carnero ꞌicësaribitia unin ꞌucha cupí bama, ax cushiira ꞌaish, ꞌibucaman ꞌIbu ꞌianan ꞌapucaman ꞌApu ꞌixun axa abë ꞌacanancëcama ñusmoti ꞌicën. Axa abë ꞌicëcaman ca a amia catamënun caísquin Nucën Papa Diosan sinánmicë ꞌixun uisai cara ñu ꞌicëbëtanbi a ëncëma ꞌicën. Usa ꞌixun ca Carnero ꞌicësaribitia unin ꞌucha cupí bama abë ꞌicëcaman axa abë ꞌacanancëcama ñusmoti ꞌicën.

Apocalipsis 19:16

Aín chupanu ꞌimainun ca aín quisinuribi ësaquin cuënëocë ꞌiaxa: “ꞌApucaman ꞌApu ꞌianan ꞌibucaman ꞌIbu”.

Apocalipsis 19:2

Ax aín sinan upíira ꞌixun ca uisa cara oti ꞌicë usoquin ꞌaia. Ñu ꞌatima cuëënquinma ca usoquin ꞌaia. Usa ꞌixun ca Babilonia ëmanu ꞌicë unicama, an camabi menu ꞌicë unicama ꞌatima ñu ꞌanun ꞌunánmianan ami sinánxma ꞌinun ꞌunánmicë cupí acama ꞌuchoquin castícanxa. Usaquin ꞌaquin ca an aín unicama ꞌacë unicama cupiaxa.

Apocalipsis 4:8

A ñucama achúshi achúshinëx ca anúan nuánti mëcën achúshi ꞌimainun achúshi pëchiñu ꞌiaxa. Aín bërucamax ca ëman ꞌianan ꞌucë mëúribi ꞌiaxa. A ñux ca nëtë́nbi imë́bi nëtëtima Nucën Papa Dios rabi ësai quiaxa: Nucën Papa Dios, ax ca upíira upí, upíira upí upíira upí ꞌicën. Aín cushix ca chaira ꞌaish bëtsi cushisama ꞌicën. Ax ca usabi ꞌiá ꞌaish, usabi ꞌaish, usabi ꞌiti ꞌicën.