1 Samuel 4:2 - Kashibo-Kakataibo Biblia

² anuxun ka filisteo suntárukaman pain israel suntáru ꞌakin pëuakëxa, pëuax abë ꞌakanankin ñusma oxun ꞌakin ka cuatro mil Israel suntáru rëtëkankëxa.

1 Samuel 4:2 Iomraidhean Croise

Números 14:45

Usai bana purábiani kuaniabi ka amalecita ꞌimainun cananeo unikaman a menu tsókë atun, Israel unibu ꞌakëxa, ꞌakëxa abatia nuibiankin ka Hormá kakë ëmanubi bëbarukin ꞌaisamaira këñutisa okin ꞌakëxa.

1 Samuel 17:21

Usaia israel suntárukamax atu ꞌai kuantishi ꞌaish sëtërakëan ka filisteo suntárukamaxribi atubë isánani ꞌukëmanan sëtë́rakëkë ꞌiakëxa.

1 Samuel 17:8

Usa ꞌixun ka Goliatnën atu ꞌukëmanan nikianxun munuma banakin israel suntárukama kakëxa: —¿Mitsux kaina nubë ꞌakanankatsikiax ënu rikuatsian? ꞌËx kana filisteo uni achúshi ꞌain mitsux kamina Saúlnën suntárukama ꞌain, usa ꞌixun kamina achúshi uni mitsun kaístankëxun ꞌëbëa ꞌakanani unun xuti ꞌain.

1 Samuel 4:1

Usakia kakëxun ka Samuelnën kamabi Israelkama bana ñuixuankëxa. Achúshi nëtën ka filisteo suntárukamax Israel kamabë ꞌakánanti sinanx timë́kankëxa, usaía ꞌikëbë ka israel suntárukamaxribi atubë ꞌakananux mëníokakëxa, mëníokakiani rikianx ka Eben-ézer kakë anu bëbax anu ꞌikankëxa. ꞌImainun ka filisteo suntárukamaxribi ëma Afec kakë me sapan ꞌikë anu timë́akëxa,

1 Samuel 4:10

Usa ꞌain ka filisteo suntárukaman atubë ꞌakanankin israel suntárukama ñusma oxun ꞌaisamaira okin ꞌakëxa, usaira okían ꞌakëx ka anuaxa ukë atun ꞌikënubi abákankëxa. Usakia ꞌakëx ka bamakë unikama ax ꞌaisamaira ꞌaish treinta mil suntáru israel rëtëkë ꞌiakëxa.

1 Samuel 4:3

Usakia ꞌakëx ka anuaxa ꞌakanankë anuax Israel suntáru raírinëx rikiankëxa, rikiankëbë ka atun ꞌapukamax kiakëxa: “¿Uisa kupí kara Nukën ꞌIbu bërí filisteo suntárukaman usakin nu ꞌanun ꞌamiax? Anu kuanxun kamina Siló kakë ëmanu nankë bunántisa okin ꞌakë kurin ratakakakë anua Nukën ꞌIbu Diosan bana kuënëokë ꞌarukë a bitsi kuanti ꞌain, axa nu nëbëtsi aín ka Diosan ax numi nishkë unikamanua nu ië́miti ꞌikën.”