1 Juan 5:6 - Kashibo-Kakataibo Biblia

⁶ Jesucristo ax ca axa ꞌunpaxan nashimicë ꞌianan aín imi ꞌapati bama a ꞌicën. ꞌUnpaxan nashimia ashima aín imi ꞌapati bamaribi ca ax ꞌicën. Nucën Papa Diosan Bëru Ñunshin Upitanribi ca —Jesús ax ca Cristo, asérabi Nucën Papa Diosan Bëchicë, a ꞌicë —quixun nu ꞌunánmia. Nucën Papa Diosan Bëru Ñunshin Upí ax ca Nucën Papa Diosan sinánsaribi ꞌicën.

Nukën 'Ibu Diosan ain unikama 'inan ain bana

⁶ Jesucristo ax ca axa 'unpaxan nashimicë 'ianan aín imi 'apati bama a 'icën. 'Unpaxan nashimia ashima aín imi 'apati bamaribi ca ax 'icën. Nucën Papa Diosan Bëru Ñunshin Upitanribi ca —Jesús ax ca Cristo, asérabi Nucën Papa Diosan Bëchicë, a 'icë —quixun nu 'unánmia. Nucën Papa Diosan Bëru Ñunshin Upí ax ca Nucën Papa Diosan sinánsaribi 'icën.

1 Juan 5:6 Iomraidhean Croise

Ezequiel 36:25

Bëxun kana ꞌumpax upitan chukakësa ꞌitánun ꞌakin mitsun ñu ꞌatima ꞌakëkama a mëníoxuanan, unínbia ꞌaxun rabikë ñukama rabikëxuan an mitsu tsaikë akamaribi mëníoxunti ꞌain,

Zacarías 9:11

Ësai ka Dios kia: Jerusalénnu bukukë unikama mitsun kamina kuati ꞌain, ꞌën kana Israel unikama bëtsi menu ꞌikëbi ië́miti ꞌain, usa ꞌain kana ꞌën anua ꞌumpax biti kini ꞌumpaxñuma ꞌinun ëskikë ꞌikëa anu uni sipuati ꞌakë usanu ꞌikëbi mitsu chikiankën. Usakin kana mitsubëtan achúshi ñu mëníokin ꞌásabiokin biti ꞌain, usa ꞌain kamina mitsun ñuina ꞌë xaroxunuxun aín imi ꞌapamikin ꞌakën.

Mateo 26:28

ꞌËn imi ꞌapati ꞌëx bamacë cupí ca ꞌaisamaira unix aín ꞌuchacama tërë́ncë ꞌaish Nucën Papa Diosnan ꞌiti ꞌicën. Ënëx ca a ꞌapati ꞌëx bamati a ꞌicën.

Mateo 3:16

Usoquin Juanën nashimicëx ca Jesús bacanuax ꞌiruquiani cuancëxa. Cuanquinbi ca Jesusan naí panárabëcëbëtan isquin anuax numacuru tinax uáxa Nucën Papa Diosan Bëru Ñunshin Upí anu ꞌiruia isacëxa.

Marcos 14:24

ꞌAia ca cacëxa: —ꞌËn imi ꞌapati ꞌëx bamacë cupí ca ꞌaisamaira uni aín ꞌuchacama tërë́ncë ꞌaish Nucën Papa Diosnan ꞌiti ꞌicën. Ënëx ca a ꞌapati ꞌëx bamati a ꞌicën.

Lucas 22:20

Cacëxun piti piia sënënia ca Jesusan manë xanpa anu ꞌicë uvas baca biquin catëcëancëxa: —Ënë uvas baca ënëx ca ꞌën imi ꞌapati, ꞌëx bamacë cupía mitsun ꞌuchacama tërë́ncë ꞌaish ainan ꞌinun Nucën Papa Diosan mëníocë, a ꞌicën.

Juan 14:17

Ax ca Nucën Papa Diosan Bëru Ñunshin Upí ꞌicën, an Nucën Papa Diosan sináncë ñucama ꞌunáncë, a. A ca an Nucën Papa Diosan bana sináncëma unin ui cara ax ꞌicë quixun ꞌunántima ꞌicën, ca a istima ꞌicën. Usa ꞌaish ca atux Nucën Papa Diosan Bëru Ñunshin Upíñu ꞌitima ꞌicën. Usa ꞌaínbi camina mitsun a ꞌunánti ꞌain, axa mitsunu ꞌianan xënibua ꞌaínbi mitsubë ꞌicë cupí.

Juan 14:6

Cacëxun ca Jesusan cacëxa: —ꞌËx cana anun cuanti bai, a ꞌain. ꞌIanan cana an Nucën Papa Diosan sináncë ñucama ꞌunánquin ax cuëëncësabi oquin ꞌacë, a ꞌain. ꞌIanan cana an uni anun tsóti nëtë ꞌináncë, a ꞌain. Uix cara Nucën Papa Diosnu cuainsa tania ax ca ꞌëmi pain catamëti ꞌicën.

Juan 15:26

Unicamax ꞌëmi nishcë ꞌaínbi ca aín Bëru Ñunshin Upí, an Nucën Papa Diosan sináncë ñucama ꞌunánan uni ꞌaquincë, an uisa carana ꞌëx ꞌai quixun mitsu ꞌunánmiti ꞌicën. Ax ca an Nucën Papa Diosan sináncë ñucama ꞌunáncë, a ꞌicën. A cana Nucën Papa Dios cuëëncësabi oquin mitsubëa ꞌinun xuti ꞌain.

Juan 16:13

ꞌAínbi ca Nucën Papa Diosan Bëru Ñunshin Upí, an Nucën Papa Diosan sináncë ñucama ꞌunáncë, an mitsubë ꞌixun, ꞌën mitsu ñuixuncë banacama ax cara uisaira quicë ꞌicë quixun mitsu ꞌunánmianan uisa ñucamax cara upí ꞌicë mitsu ꞌunánmiti ꞌicën. An ca anbi sináncësa oquinma, Nucën Papa Diosan cacëxuan cuacë ñucamaishi mitsu ꞌunánmiti ꞌicën. ꞌUnánmianan ca uisai cara ꞌën unicama ënë nëtënuax ꞌianan Nucën Papa Diosan nëtënuaxribi ꞌiti ꞌicë quixun mitsu ꞌunánmiti ꞌicën.

Juan 3:5

Nicodemonën cacëxun ca Jesusan cacëxa: —Usama ca. Asérabi cana ꞌën mi cain, ꞌunpax ꞌimainun Nucën Papa Diosan Bëru Ñunshin Upitan bacë́ntëcëncëma uni ax ca Nucën Papa Diosnan ꞌitima ꞌicën.

Juan 4:10

Cacëxun ca Jesusan cacëxa: —Ën mi ꞌunpax ñucácë ꞌaínbi camina ui carana ꞌai quixun ꞌë ꞌunaniman. ꞌË ꞌunánan añu cara Nucën Papa Diosan mi ꞌinánti ꞌicë quixun ꞌunáncë ꞌixun camina ꞌë ñucátsian. Ñucácëxun cana anúnmi nëtë́timoi Nucën Papa Diosnan ꞌiti ꞌunpax mi ꞌinántsian.

Juan 4:14

Usa ꞌaínbi ca an ꞌën ꞌináncëxun ꞌunpax ꞌacë uni, ax amiribishi shimatëcëntima ꞌicën. Me ꞌucë mëúcüaxa chiquitia ꞌunpax xobucësaribiti ca ꞌën ꞌináncë ꞌunpax nëtëtima uninu ꞌiti ꞌicën. Usaía ꞌicëbë ca uni nëtë́timoi Nucën Papa Diosnan ꞌiti ꞌicën.

Juan 6:55

Usa unicama cana ꞌën ënë nëtë cëñúcëbëtan baísquimiti ꞌain. Axa asérabi ꞌëmi catamëcë uni ax ca ꞌën nami picësa ꞌianan ꞌën imi xëacësa ꞌicën. ꞌËn imi ꞌapati ꞌëx bamacë cupí ca usai ꞌiti ꞌicën.

Hechos 8:36

Ñuixunbiancëxun ca baca cuëbí ꞌurama cuanquin, a unin Felipe cacëxa: —Ënu ca baca ꞌicën. ¿Anuxun caramina ꞌë nashimitima ꞌain?

Romanos 3:25

Ami catamëtía, uni aín ꞌuchacama tërë́ncë ꞌinun ca camabi unin ꞌucha cupía Cristo bamanun Nucën Papa Diosan mëníocëxa. An Jesucristo bamati mënío ꞌixun ca bëráma ꞌiá uniribi, axa sinanatia Nucën Papa Diosan aín ꞌuchacama ashiquin manumiacëxa. Usaquin an ꞌá cupí ca camabi unin ꞌunánti ꞌicën, Nucën Papa Diosan ca asérabi upíira upí ꞌixun an usai ca ꞌiti ꞌicë quixun mëníosabi oquin ꞌaia quixun.

Efesios 1:7

An ca nun ꞌucha cupínu ainanma ꞌicëbi Cristo bama ꞌain, nun ñu ꞌaisama ꞌacëcama tërë́nquin ainan ꞌinun nu ië́miaxa, an nu nuibaquin.

Colosenses 1:4

Usa ꞌixun cananuna Jesucristomi asérabi catamëtími Nucën Papa Diosan unicamabë nuibanania ñuicania cuan.

1 Timoteo 3:16

Asérabia unin ꞌunáncëma ñu Nucën Papa Diosan aín unicamaishi ꞌunánmicë ꞌain ca nun ñuicë bana ënëx asérabi ꞌicën: Jesucristo ax ca Diosribi ꞌaish ënë menuax uni ꞌiacëxa. Jesucristonën ca aín nuitu upí ꞌixun upí ñuishi ꞌaia quixun ca Nucën Papa Diosan Bëru Ñunshin Upitan unicama sinánmiacëxa. ꞌImainun ca Jesucristonëx ángelnënribia iscë ꞌiacëxa. Usa ꞌain ca a ñuiquin aín unicaman camabi menuxun uni ꞌunánmia. A ñuicë banax ca asérabi ꞌicë quixun sinani ca camabi menuax, uni ami catamëtia. Usa ꞌaish ca ënë menu ꞌitancëx aín Papabë ꞌi aín nëtënu cuancëxa.

Tito 3:5

Usoquin ca nun ñu upí ꞌacë cupíma, nuibaquinshi nu ainan ꞌinun ië́miacëxa. Ië́miquin ca bacë́ntëcëncësa ꞌinun nun ꞌuchacama tërë́nquin aín Bëru Ñunshin Upitan nu bëtsi ocëxa.

Hebreos 10:29

A unia usoquin ꞌásamaira oquin ca axa aín Bëchicë ꞌimainun aín Bëru Ñunshin Upími ꞌatimati banacë uni a Nucën Papa Diosan castícanti ꞌicën. Nucën Papa Diosan Bëchicë, axa unicama ꞌuchañu ꞌicëbi ië́minux aín imi ꞌapati bama, a ami ꞌatimati bananan Nucën Papa Diosan Bëru Ñunshin Upí an uni nuibaquin ꞌaquincë ami ꞌatimati banacë, a unicamax ca an Moisésnën cuënëo bana ꞌacëma unia ꞌacësamaira oquian Nucën Papa Diosan castícancë ꞌiti ꞌicën.

Hebreos 12:24

Anuribi ca ax aín imi ꞌapati bama ꞌixuan an nuxribinu anu ꞌinun mëníocë, Jesús, ax ꞌicën. —Cain, an Abel ꞌacë uni, ax ca cupicë ꞌiti ꞌicë —quiax Nucën Papa Dios quicëbë ca usai ꞌiacëxa. Usa ꞌaínbi ca Jesús bamacë cupí uínbi an ꞌacë uni cupiama ꞌicën. Usoquian Jesús unin ꞌá ꞌixunbi ca aribi cupiquinma uicamax cara ami catamëtia, a aín ꞌucha sinántëcëntimoquin tërënia.

Hebreos 13:20

Nucën Papa Dios, an aín unicama abë upí ꞌinun ꞌimicë, an ca Nucën ꞌIbu Jesucristo, an aín unicama bërúainracë, a bamacëbi baísquimiacëxa. An Jesús aín imi ꞌapati bamacë cupí nun ꞌuchacama tërë́nquin nux xënibua ꞌaínbi ainan ꞌinun ꞌimicë,

Hebreos 9:14

Ñuina rëcë aín imi cupí uni ꞌicësamaira oi cananuna Cristo bama cupí nun ꞌucha tërë́ncë ꞌaish upí ꞌiti ꞌain. Nucën Papa Diosan Bëru Ñunshin Upí, axa usabi ꞌiá ꞌaish usabi ꞌicë, ax abë ꞌain ca Cristo, ax ꞌuchañuma ꞌaíshbi bamatsianxmabi, nun ꞌuchacama tërë́ncë ꞌinun bamacëxa. Xënibua ꞌaínbi abë ꞌitimoinu bamati ꞌicëbi ca nun ꞌuchacama tërë́nquin, ax aín imi ꞌapati bama cupí, Nucën Papa Dios, axa bamatimoi tsócë, a rabinu ax cuëëncësabi oi ꞌinun nu ꞌimia.

Hebreos 9:7

Acamax ca tabernáculo cata, anu pain atsínti, anuishi atsinia. Usa ꞌaínbi ca cata itsi, Upíira cacë, anu judíos sacerdotenën cushicaman ꞌapu axëshi camabi baritian achúshi oíshi atsinia. Anu atsínquin ca ꞌaracacë ñuinanën imi buania, aín ꞌuchacëñuan judíos unicaman ꞌuchacamaribi Nucën Papa Diosan tërë́nun quixun ánscaquin.

1 Pedro 1:2

An sinánsabi oquin ainan ꞌinun ca Nucën Papa Diosan mitsu caísacëxa. Aín Bëru Ñunshin Upitan ꞌimicëxmi ainanshi ꞌaish ax quicësabi oi ꞌinun mitsu ꞌimianan ca Jesucristo bama cupí mitsun ꞌuchacama tërë́nquin mitsun nuitu upí ꞌimiaxa. Usaími mitsux Nucën Papa Diosan nuibacëx ꞌicësamaira oi chuámarua ꞌaish bucucanti cana cuëënin.

1 Pedro 3:21

Nucën Papa Diosan sinánmicëxa Noé manë nuntinu ꞌiruax ië́asa, usaribiti cananuna nuxribi Nucën Papa Diosmi catamëti ꞌunpaxan nashimicë ꞌaish iëtin. Nun namia chuañuma ꞌinun cananuna nashimicë ꞌitima ꞌain. Usai ꞌíma cananuna —Jesucristo baísquia cupía Nucën Papa Diosan nu upí ꞌimicë ꞌaish cananuna nun ꞌuchacama tërë́nce ꞌaish an iscëx upí ꞌai —quixun sinani nashimicë ꞌain.

1 Juan 1:7

Usa ꞌaínbi cananuna axa ꞌicësaribiti ñu ꞌatima ꞌati sináncëma ꞌianan Nucën Papa Diosbë upí ꞌaish, axa ami catamëcë unicamabëribi upiti nuibananin. Usaínu ꞌia ca an, aín Bëchicë Jesucristo aín imi ꞌapati bama cupí, uisa ñu ꞌai caranuna ꞌuchai, abi nu tërë́nxunia.

1 Juan 4:10

Ami sináncëxunmabi unicama nuibaquin ca Nucën Papa Diosan, a cupí unin ꞌuchacama tërë́ncë ꞌinuan ënë menuax bamanun aín Bëchicë xuacëxa. Usoquin xuá ꞌain cananuna ꞌunanin, usaira oquin ca Nucën Papa Diosan unicama nuibatia quixun.

Apocalipsis 1:5

An uisaira cara Nucën Papa Dios ꞌicë quixun uni ꞌunánmicë, Jesucristonënribia nuibaquin ꞌaquincëxmi mitsux chuámarua ꞌiti cana cuëënin. Ax utëcëncëbë aín unicamaxribi bama ꞌaíshbi baísquinun, ca ax pain bamatancëx baísquiacëxa. Ax ca ënë nëtënu ꞌicë ꞌapucaman ꞌapu a ꞌicën. An ca nu nuibanan nun ꞌucha cupí aín imi ꞌapati bama ꞌixun nun ꞌuchacama tërë́anan,

Apocalipsis 5:9

Carnero ꞌicësaribitia unin ꞌucha cupí bama, ami bësuax ca cantati ió cantaxa, ësai qui: —Min camina bëtsibë sënë́nmaira ꞌixun a quirica anúan tacáshcacë pëóshxun bacati ꞌain. Mix bamax baísquia ꞌixun camina nucama bëtsi bëtsi unibu, bëtsi bëtsi banan banacë, ꞌimainun camabi nëtënuax ucë, ꞌimainun bëtsi bëtsi ꞌapuñu unicama, Nucën Papa Diosnan ꞌinun ië́mian.

Apocalipsis 7:14

Cacëxun cana can: —ꞌËn cana ꞌunaniman. Min camina ꞌunanin. Cacëxun ca ꞌë caxa: —ꞌËnë unicaman ca ami sináncë cupí ꞌaisamaira tëmëraquinbi Nucën Papa Diosmi catamëti ëncëma ꞌicën. Atux ca Carnero ꞌicësaribitia unin ꞌucha cupí aín imi ꞌapati bama, ami catamëti aín ꞌuchacama tërë́ncë ꞌaish aín nuitu upí ꞌaish chucacësa ꞌicën, aín chupa uxuira axa chuañumasa ꞌinun.