1 Juan 3:8 - Kashibo-Kakataibo Biblia

⁸ Usa ꞌaínbi ca an ñu ꞌatima ꞌacë unicama ax ñunshin ꞌatimanën ꞌapun uni ꞌicën, ñunshin ꞌatimanën ꞌapu ax ca nëtë ióñubi ꞌucha ꞌaish usabii bërí nëtë́nbi ꞌuchaia, usa ꞌain. Usa ꞌaínbi ca ñunshin ꞌatimanën ꞌapúan ñu ꞌatima ꞌacëcama cëñui Nucën Papa Diosan Bëchicë uacëxa.

Nukën 'Ibu Diosan ain unikama 'inan ain bana

⁸ Usa 'aínbi ca an ñu 'atima 'acë unicama ax ñunshin 'atimanën 'apun uni 'icën, ñunshin 'atimanën 'apu ax ca nëtë ióñubi 'ucha 'aish usabii bërí nëtë́nbi 'uchaia, usa 'ain. Usa 'aínbi ca ñunshin 'atimanën 'apúan ñu 'atima 'acëcama cëñui Nucën Papa Diosan Bëchicë uacëxa.

1 Juan 3:8 Iomraidhean Croise

Génesis 3:15

ꞌËn kana mixmi xanubë nishananun ꞌimiti ꞌain, ꞌën ꞌimikëx ka min rëbúnki ꞌimainun xanun rëbúnki nishananti ꞌikën. Aín rëbúnkinën ka min maxkánu mi amánuxun ꞌaia, ꞌakëxun kamina aín taë tsipútunu ꞌanuxun ꞌain.

Números 21:9

Usokin ꞌanun kakëxun achúshi runusabi ꞌitánun manë panshian ꞌatankëxun ka Moisésnën i achúshi nitsínkë anu bëntankëxa; bëntankë ꞌikë runu tankin manë ꞌakë ami bësukin isi ka ui uni kara runun pia ax pëxkúakëxa.

Mateo 12:28

Nucën Papa Diosan Bëru Ñunshin Upitan ꞌamicëxun uninua ꞌën ñunshin ꞌatima chiquíncë ꞌain camina ꞌunánti ꞌain, Nucën Papa Diosan ca axa ꞌëmi catamëcë unicama ainan ꞌiminuxun ënë menu unun ꞌë xuaxa quixun.

Mateo 13:38

Anu ñu bëru ꞌapácë naë asaribi ca camabi ënë me ꞌicën. Ñu bëru upí asaribi ca Nucën Papa Diosan unicama ꞌicën. Chucusaribi ca a ñunshin ꞌatimanën ꞌapun sinánmicë unicama ꞌicën.

Mateo 4:3

Panancë ca ñunshin ꞌatimanën ꞌapun anu uxun ꞌatima ñu ꞌamicatsi quixun ësaquin cacëxa: —Asérabi Diosan Bëchicë ꞌixun ca ënë maxáxcama pán ꞌinun cat.

Marcos 1:24

—Jesús, Nazaretnu ꞌicë, min caina nu uisa oti ꞌain? ¿Mix caramina nu cëñui uan? ꞌËn cana mi ꞌunan. Mix camina ainan ꞌaish Diosnuax ucë a ꞌain.

Lucas 10:18

Cacëxun ca Jesusan cacëxa: —Usa ca. Caná naínuax menu bënëtishi ꞌibúcësaria ñunshin ꞌatimanën ꞌapu Satanás naínuax nipacëtia cana isacën.

Juan 12:31

Bërí ca ënë nëtënu ꞌicë unicama, cara ꞌëmi sinania, cara ꞌëmi sinanima quixun Nucën Papa Diosan isti ꞌicën. Isanan ca an ꞌëmi sináncëma unicaman ꞌapu, ñunshin ꞌatimanën ꞌapuribi ax cushi ꞌicëbi ꞌën unicama ꞌibuatimoquin ñusmoti ꞌicën.

Juan 16:11

An ënë nëtënu ꞌicë unicama ꞌibuacë ñunshin ꞌatimanën ꞌapu ca castícanuxun ꞌuchocë ꞌicën. Usa ꞌain ca axa ꞌëmi catamëcëma unicamanribi, usaribiti ca atux castícancë ꞌiti ꞌicë quixun ꞌunánti ꞌicën.

Juan 8:44

Mitsun papax ca ñunshin ꞌatimanën ꞌapu ꞌicën. Ainan ꞌixun camina axa cuëëncësa oquinshi ꞌaisa tanin. An ca nëtë ióñubi uni ꞌati sináncëxa. Ax ca cëmë ꞌaish axa ꞌiásabi cëmëia. Cëmëi ca an sináncësa oquinshi sinani banaia. Ainra ca cëmë́ntapun ꞌixun unían uni itsi cëmëquin paránun ꞌimia.

Romanos 16:20

Usoquin mitsun ꞌacëbëtan ca Nucën Papa Dios, an aín unicama chuámarua ꞌimiti, an ñunshin ꞌatimanën ꞌapu mitsu ubíotëcënxunma ꞌanun bënë́nquinshi ñusmamiti ꞌicën. Nucën ꞌIbu Jesucristonën mitsu nuibaquin ꞌaquincëx mitsux upí ꞌiti cana cuëënin.

Efesios 2:2

Ënë nëtënu ꞌicë ñuishia an sináncë unicaman sináncësa oquinshi sinánquin camina ñu ꞌaisama ꞌacën, ñunshin ꞌatimanën ꞌapu cuëëncësabi oquin. An ca an Nucën Papa Diosan bana cuaisama tancë unicama ax cuëëncësabi oquin ꞌanun sinánmia. Usaribiti camina mitsux an sinánmicë ꞌiacën.

Colosenses 2:15

Usonan ca Cristonën i curúsocënu bamaquin uisa ñunshinax cara uisaira cushiñu ꞌicë, abi camabi unían ꞌunánun ñusmoquin cushiñuma ꞌimiacëxa.

1 Timoteo 3:16

Asérabia unin ꞌunáncëma ñu Nucën Papa Diosan aín unicamaishi ꞌunánmicë ꞌain ca nun ñuicë bana ënëx asérabi ꞌicën: Jesucristo ax ca Diosribi ꞌaish ënë menuax uni ꞌiacëxa. Jesucristonën ca aín nuitu upí ꞌixun upí ñuishi ꞌaia quixun ca Nucën Papa Diosan Bëru Ñunshin Upitan unicama sinánmiacëxa. ꞌImainun ca Jesucristonëx ángelnënribia iscë ꞌiacëxa. Usa ꞌain ca a ñuiquin aín unicaman camabi menuxun uni ꞌunánmia. A ñuicë banax ca asérabi ꞌicë quixun sinani ca camabi menuax, uni ami catamëtia. Usa ꞌaish ca ënë menu ꞌitancëx aín Papabë ꞌi aín nëtënu cuancëxa.

Hebreos 2:14

Achúshi unin bëchicëcamax ca aín xucë́nsaribi ꞌia. Usaribiti ca Nucën Papa Diosan bëchicëcamaxa uni ꞌain, axribi uni ꞌinux Jesús uacëxa. Uni ꞌaish ca, an ñu ꞌatima ꞌati sinánmicë ꞌaísha Nucën Papa Diosbë uni ꞌitima ꞌicëbi ñunshin ꞌatimanën ꞌapu a ñusmonux bamati cupí, Jesús uni ꞌiacëxa.

Hebreos 9:26

ꞌItsai atsínux ca ꞌitsai bama ꞌitsíanxa. Usa ꞌaínbi ca Cristo aín uti nëtë sënë́ncëbë uni ꞌinux uá ꞌaish bamatsianxmabi achúshitishi unin ꞌucha cupí bamacëxa.

2 Pedro 2:4

Nucën Papa Diosan ca axa ꞌuchacë ángelcama aín ꞌucha tërë́nquinma aín nëtënua chiquínquin anúan an camabi uni isti nëtë utámainuan, anu atux tëmërai ꞌiti, bëánquibucënu manë risin tëcërëcacësa ꞌaish anubi ꞌinun ꞌimiacëxa.

1 Juan 1:2

A cananuna nusaribi ꞌaish uni ꞌicë nun ꞌunáncën. Usa ꞌixun cananuna asérabi a isacën. Isá ꞌixun cananuna a mitsu ñuixunin. Ax aín Papabë ꞌitancëxbi ënë menu uá ꞌixun ca bamatimoi tsócë ꞌixun, usaribitinu abë ꞌinun nu ꞌimiti ꞌicë quixun cananuna mitsu ñuixunin.

1 Juan 3:10

Ënëx ca ësa ꞌicën. Ui unin cara ñu upí ꞌaima ax ca Nucën Papa Diosnanma ꞌicën, ui unin cara uni itsiribi nuibatima axribi ca Nucën Papa Diosnanma ꞌicën. Usa ꞌain cananuna uinu ꞌicë unix cara Nucën Papa Diosan bëchicë ꞌicë quixun ꞌunánan uinu ꞌicë unix cara ñunshin ꞌatimanën ꞌapunan ꞌicë quixun ꞌunánti ꞌain.

1 Juan 3:5

Camina ꞌunanin, unin ꞌuchacama tërë́nux ca Jesucristo uacëxa, ax uisa ꞌuchañumabi ꞌixun.

1 Juan 5:19

Cananuna ꞌunanin, nuxnu Nucën Papa Diosnan ꞌaínbi ca camabi menu ꞌicë unicamax ainanma ꞌaish ñunshin ꞌatimanën ꞌapunan ꞌicë quixun.

Judas 1:6

Angelcama raíri, axa Nucën Papa Diosan nëtënubi ꞌiti ꞌaíshbi anu ꞌiisama tancë cupí chiquía, ax ca anúan an camabi uni isti nëtë utámainuan bëánquibucënu uisatima manë risin tëcërëcacësa ꞌaish, anubi ꞌinun Nucën Papa Diosan ëan ꞌicën.

Apocalipsis 20:10

Usoquin cëñuanan ca ñunshin ꞌatimanën ꞌapu, an unicama paráncë, a ꞌianëmëꞌëosa manë tsi, anuaxa azufreribi rëquirucë, anu ꞌinun niaxa. Anua ꞌitsa maxcáñu ꞌianan ꞌitsa matúxcañu ñuinacanꞌëo a ꞌimainun bëtsi ñuinacanꞌëo an Nucën Papa Dios rabiquinma ñuinacanꞌëo rabinun quixun unicama paráncë, anu atux ꞌicë ca ñunshin ꞌatimanën ꞌapuribi anu niaxa. Anuxun ca acaman nëtë́nbi imë́bi xënibua ꞌaínbi nëtë́timoquin paë tanquin tëmërati ꞌicën.