1 Juan 3:16 - Kashibo-Kakataibo Biblia

¹⁶ Jesucristo nu nuibati bama cupí cananuna ꞌunanin, usari ca uni nuibati ꞌiti ꞌicë quixun. Usaquin ꞌunánquin cananuna ꞌunanin, Jesucristonën ꞌásaribi oquin cananuna nunribi a ꞌaquincë cupí bamanuxunbi ꞌaquinquin bëtsi uni nuibati ꞌai quixun.

Nukën 'Ibu Diosan ain unikama 'inan ain bana

¹⁶ Jesucristo nu nuibati bama cupí cananuna 'unanin, usari ca uni nuibati 'iti 'icë quixun. Usaquin 'unánquin cananuna 'unanin, Jesucristonën 'ásaribi oquin cananuna nunribi a 'aquincë cupí bamanuxunbi 'aquinquin bëtsi uni nuibati 'ai quixun.

1 Juan 3:16 Iomraidhean Croise

Mateo 20:28

ꞌën ꞌacësaribi oquin. Uni itsían ñu mëëxunun cana ꞌëx uni ꞌinux Nucën Papa Diosnuax uáma ꞌain. ꞌËx cana unicamaxa upí ꞌianan upitax bucuti oquin ꞌaquini uacën. ꞌËx ꞌuchañuma ꞌaísh bamatsianxmabi cana camabi uníxa Nucën Papa Diosbë upí ꞌinun atun ꞌucha ꞌënansa ꞌain bamai uacën.

Juan 10:11

ꞌËx cana ainra carnero upí oquin bërúancë asaribi ꞌain. Ainra carnero upí oquin bërúancë, ax ca aín carnero bamati rabanan bamanuxunbi bëarati ꞌicën.

Juan 13:34

Mitsun ꞌunáncëma bana ió ënëribi cana axa quicësabi oími ꞌinun mitsu cain, mitsúxbi camina bëtsibë bëtsibë nuibananti ꞌain. ꞌËn mitsu nuibacësaribi oi camina micamax bëtsibë bëtsibë upiti nuibananti ꞌain.

Juan 3:16

Camabi uni asérabi nuibaquin ca Nucën Papa Diosan aín Bëchicë achúshi ënë menu xuacëxa, uicamax cara ami catamëtia axa nëtë́timoi abë ꞌinun.

Hechos 20:28

Usa ꞌain camina mitsun mina ñu ꞌaisama ꞌai bërúancati ꞌain. Bërúancanan camina axa Jesucristomi catamëcë unicamaribia upí ꞌinun bërúanti ꞌain. Nucën Papa Diosan Bëru Ñunshin Upitan ca usoquinmi axa Jesucristomi catamëcë unicama bërúanun mitsu ꞌimiaxa. A unicamax ca axa bama cupí Nucën ꞌIbu Jesucristomi catamëcë ꞌaish aín uni ꞌicën.

Romanos 16:4

Atun ca, —Pablo ꞌaquini sapi cananuna bamati ꞌai —quixun ꞌunánquinbi ꞌë bamati ꞌicëbi ꞌaquinquin ië́miaxa. Usaquin ꞌë ꞌacë cupí cana —asábi ca —quixun cain. ꞌËinshima ca judíosma unicama a ꞌën bana ñuixuncë, acamanribi, Priscilabëtan Aquilanën ꞌë ꞌaquincë cupí, —asábi ca —quixun cai cuëënia.

Romanos 5:8

Usa ꞌaínbi ca Nucën Papa Diosan nuxnu ꞌuchañu ꞌicëbi nu nuibaquin nun ꞌucha tërë́nuxa Cristo bamanun mëníocëxa. Usaquian mënío sinánquin cananuna ꞌunanin, uisaira oquin cara nu nuibatia quixun.

2 Corintios 4:12

Aín bana ñuixuncë cupí nu bamamisa tani uni numi ësë́nanmainunbi camina mitsux nun nu ñuicë bana cuati Jesúsmi catamëti nëtë́timoi Nucën Papa Diosnan ꞌinux ië́cë ꞌain.

Efesios 5:2

Nucën Papa Dios cuëëncësabi oquin judíos unin aín ꞌucha cupí rëcë́xa carnero ꞌiásaribiti ca bamatsianxmabi Cristo nu nuibati nun ꞌucha cupí bamacëxa, ami catamëtíshinu ië́nun. Cristonëan nu usoquin nuibacë ꞌain camina mitsúxribi usaribiti bëtsibë bëtsibë nuibananti ꞌain.

Efesios 5:25

Ainan ꞌinun unicama nuibati ca Cristo bamatsianxmabi bamacëxa. Usoquin ca an aín unicama nuibatia. Usaribi oquin ca bëbuxun xanuñu ꞌixun aín xanu nuibati ꞌicën.

Filipenses 2:17

Mitsun camina tëmëraquinbi Jesucristomi catamëquin ax cuëëncësabi oquin ꞌaquin Nucën Papa Dios rabin. Mitsúxmi usai ꞌicëbë cana ꞌën mitsu ꞌaquincë cupí mitsux ꞌicësaribiti cuëënin. Cristomi sináncë cupí sapi cana bamati ꞌai quixun ꞌunanibi cana masá nuitutíma mitsúxmi ꞌicësaribiti cuëënin.

Filipenses 2:30

ꞌËx ꞌura ꞌicëmi mitsun ꞌë ꞌaquiniamabi ca —sapi cana bamati ꞌai —quixun sinanibi Epafroditonën ënu uxun ꞌë ꞌaquianxa. Asérabi ca Jesucristo cuëëncësabi oquin ꞌacë cupí bamaibi ië́axa.

1 Tesalonicenses 2:8

Usa ꞌixun cananuna ꞌitsaira nuibaquin, Jesucristomi catamëti ië́ti banaishi ñuixunquinma Nucën Papa Diosan nu ꞌunánmicë ñucamaribi mitsu ꞌunánmisaira tan. Usa ꞌixun cananuna nuibairaquin mitsu ꞌitsaira sinanin.

Tito 2:13

Usaquin ꞌunánmianan ca nu ꞌunánmia, nux ainan ꞌixun cananuna ax quiásabi oía an nu ië́micë Jesucristo, ax Nucën Papa Diosribi ꞌaish, aín cushibëbi utëcënti nëtë caínti ꞌai quixun.

1 Pedro 1:18

Mitsun raran Jesucristomi sinánti ꞌunánma ꞌaínmi usaribi oquin sinaniabi ca Nucën Papa Diosan ainan ꞌinun ië́miquin mitsu Jesucristomi sinánmiaxa. Camina ꞌunanin, curi ꞌimainun curíqui ꞌimainun bëtsi ñucama axa cëñúti a cupíbi ca Nucën Papa Diosan mitsu ië́micëma ꞌicën.

1 Pedro 2:24

Nun ꞌuchacama cëñucë ꞌaíshnu amiribishi ñu ꞌatima ꞌatëcënima, ñu upíshi ꞌai tsónun ca Cristo nun ꞌuchacama bicë cupí i curúsocënu bamacëxa. Mitsúxmi ñu ꞌatima ꞌai ꞌinsíncësa ꞌaíshbi upí ꞌinun ca ax ꞌaisamaira oquin paë tënëi bamacëxa.

1 Pedro 3:18

Ax upí ꞌaíshbi ca Cristo camabi unin ꞌucha cupí achúshitishi bamacëxa, unicama ami catamëti Nucën Papa Diosnan ꞌinun. Uni ꞌaish bamatancëxbi aín namibë aín bëru ñunshin ꞌitëcëni baísquiax ca bëtsi ꞌiacëxa.

1 Juan 2:6

Usa ꞌain ca axa —ainan ꞌaish abë ꞌicë ca Nucën Papa Diosan ꞌë sinánmia —quicë uni, ax Jesucristo ꞌiásaribiti ꞌiti ꞌicën.

1 Juan 2:9

Uix cara —ꞌëx cana ainan ꞌaish Nucën Papa Diosbë upí ꞌai —quibi nuibatíma uni itsimi nishia, ax ca Nucën Papa Diosnanma pain ꞌicën.

Apocalipsis 1:5

An uisaira cara Nucën Papa Dios ꞌicë quixun uni ꞌunánmicë, Jesucristonënribia nuibaquin ꞌaquincëxmi mitsux chuámarua ꞌiti cana cuëënin. Ax utëcëncëbë aín unicamaxribi bama ꞌaíshbi baísquinun, ca ax pain bamatancëx baísquiacëxa. Ax ca ënë nëtënu ꞌicë ꞌapucaman ꞌapu a ꞌicën. An ca nu nuibanan nun ꞌucha cupí aín imi ꞌapati bama ꞌixun nun ꞌuchacama tërë́anan,

Apocalipsis 5:9

Carnero ꞌicësaribitia unin ꞌucha cupí bama, ami bësuax ca cantati ió cantaxa, ësai qui: —Min camina bëtsibë sënë́nmaira ꞌixun a quirica anúan tacáshcacë pëóshxun bacati ꞌain. Mix bamax baísquia ꞌixun camina nucama bëtsi bëtsi unibu, bëtsi bëtsi banan banacë, ꞌimainun camabi nëtënuax ucë, ꞌimainun bëtsi bëtsi ꞌapuñu unicama, Nucën Papa Diosnan ꞌinun ië́mian.