1 Juan 3:15 - Kashibo-Kakataibo Biblia

¹⁵ An ami nishquin uni raíri nuibacëma uni ax ca an uni ꞌacë unisa ꞌaish ꞌaisama ꞌicën. Camina ꞌunanin, an uni ꞌacë unix ca Nucën Papa Diosnanma ꞌaish xënibua ꞌaínbi abë ꞌitima ꞌicë quixun.

Nukën 'Ibu Diosan ain unikama 'inan ain bana

¹⁵ An ami nishquin uni raíri nuibacëma uni ax ca an uni 'acë unisa 'aish 'aisama 'icën. Camina 'unanin, an uni 'acë unix ca Nucën Papa Diosnanma 'aish xënibua 'aínbi abë 'itima 'icë quixun.

1 Juan 3:15 Iomraidhean Croise

Génesis 27:41

Usakian ꞌakë ꞌain ka Esaúnën ami xuamati nishkin Jacob istisama tankëxa aín papan upíokin sinánxunkin kakë kupín, ꞌimainun ka sinánkëxa: “Ënuax basiramashi kana ꞌën papa ñukëbë ꞌitsaira masá nuituti nitë́xëti ꞌain, usai ꞌikin kana ꞌën xukë́n Jacob rëti ꞌain.”

Mateo 5:28

Usai quiá ꞌaínbi cana ꞌën mitsu cain, uinu ꞌicë unix cara ainanmabi xanu itsi isi aín nuitu mëu cuëënia a unix ca a xanubë ꞌicësa ꞌia.

Marcos 6:19

Juan sipuacë ꞌaínbi ca ami nishquin Herodías an Juan ꞌamicatsi quixun sináncëxa. Usa ꞌixunbi ca uisabi oma ꞌicën.

Juan 4:14

Usa ꞌaínbi ca an ꞌën ꞌináncëxun ꞌunpax ꞌacë uni, ax amiribishi shimatëcëntima ꞌicën. Me ꞌucë mëúcüaxa chiquitia ꞌunpax xobucësaribiti ca ꞌën ꞌináncë ꞌunpax nëtëtima uninu ꞌiti ꞌicën. Usaía ꞌicëbë ca uni nëtë́timoi Nucën Papa Diosnan ꞌiti ꞌicën.

Juan 8:44

Mitsun papax ca ñunshin ꞌatimanën ꞌapu ꞌicën. Ainan ꞌixun camina axa cuëëncësa oquinshi ꞌaisa tanin. An ca nëtë ióñubi uni ꞌati sináncëxa. Ax ca cëmë ꞌaish axa ꞌiásabi cëmëia. Cëmëi ca an sináncësa oquinshi sinani banaia. Ainra ca cëmë́ntapun ꞌixun unían uni itsi cëmëquin paránun ꞌimia.

Hechos 23:12

Usaquian Nucën ꞌIbu Jesusan Pablo can pëcaran ca judíos unicama raírinëx timë́ax ꞌësë́nani ësai canancëxa: Pablo ꞌaxunma cananuna pima ꞌianan añu ñubi xëatima ꞌain. Nun nux quicësabi oquin ꞌacëma ꞌicë ca Nucën Papa Diosan nu uisa cara oti ꞌicë usoquin nu ꞌati ꞌicën.

Hechos 23:14

A unicaman ca anu cuanxun sacerdotenën cushicamacëñun caniacëcë unicama ësaquin cacëxa: —Nux cananuna, Pablo ꞌaxunma cananuna añu ñubi pima quiax canan. Nun nux quicësabi oquin ꞌacëma ꞌicëa Nucën Papa Diosan nu uisa cara oti ꞌicë usoquin nu ꞌanun cananuna quia.

Santiago 1:15

Usaquian sináncë cupí ca unin ñu ꞌatima ꞌaia. Ñu ꞌatima ënquinma amiribi amiribi ꞌai ꞌuchacë cupí ca bamai Nucën Papa Diosbë ꞌitima ꞌicën.

1 Pedro 1:23

Unishi ꞌinuan aín titan tuacë ꞌaish ca uni bamaia. Usa ꞌaínbi ca axa xënibua ꞌaínbi usabi ꞌiti, aín bana a cuatia Nucën Papa Diosan mitsu bacë́ntëcëncësa ꞌimiaxa.

1 Juan 2:11

Usa ꞌaínbi ca nuibatíma bëtsi unimi nishcë uni an Nucën Papa Diosbë upíma ꞌixun ñu ꞌatima ꞌatishi sináncë cupí sinánñumasa ꞌixun uisai cara ꞌiti ꞌicë quixun ꞌunanima.

1 Juan 2:9

Uix cara —ꞌëx cana ainan ꞌaish Nucën Papa Diosbë upí ꞌai —quibi nuibatíma uni itsimi nishia, ax ca Nucën Papa Diosnanma pain ꞌicën.

Apocalipsis 21:8

Usa ꞌaínbi ca racuë́quian an ꞌëmi sinánti ëncë unicama, ꞌimainun an ꞌëmi catamëcëma unicama, ꞌimainun an ñu ꞌatima ꞌacë unicama, ꞌimainun an uni ꞌacëcama, ꞌimainun aín xanuma ꞌicëbi bëtsi xanu cuëëncë unicama ꞌimainun aín bënëma ꞌicëbi bëtsi uni cuëëncë xanucama ꞌimainun ñu xëacë ñubë́ unicama ꞌimainun an Nucën Papa Diosmabi bëtsi ñu rabicë unicama ꞌimainun cëmë unicama, acamax anuaxa ꞌianëmëꞌëosa manë tsi azufrebë rëquirucë anu ꞌiti ꞌicën, anu bamatëcëncë ꞌaish chiquítimoi ꞌinux.