1 Juan 3:10 - Kashibo-Kakataibo Biblia

¹⁰ Ënëx ca ësa ꞌicën. Ui unin cara ñu upí ꞌaima ax ca Nucën Papa Diosnanma ꞌicën, ui unin cara uni itsiribi nuibatima axribi ca Nucën Papa Diosnanma ꞌicën. Usa ꞌain cananuna uinu ꞌicë unix cara Nucën Papa Diosan bëchicë ꞌicë quixun ꞌunánan uinu ꞌicë unix cara ñunshin ꞌatimanën ꞌapunan ꞌicë quixun ꞌunánti ꞌain.

Nukën 'Ibu Diosan ain unikama 'inan ain bana

¹⁰ Ënëx ca ësa 'icën. Ui unin cara ñu upí 'aima ax ca Nucën Papa Diosnanma 'icën, ui unin cara uni itsiribi nuibatima axribi ca Nucën Papa Diosnanma 'icën. Usa 'ain cananuna uinu 'icë unix cara Nucën Papa Diosan bëchicë 'icë quixun 'unánan uinu 'icë unix cara ñunshin 'atimanën 'apunan 'icë quixun 'unánti 'ain.

1 Juan 3:10 Iomraidhean Croise

Mateo 13:38

Anu ñu bëru ꞌapácë naë asaribi ca camabi ënë me ꞌicën. Ñu bëru upí asaribi ca Nucën Papa Diosan unicama ꞌicën. Chucusaribi ca a ñunshin ꞌatimanën ꞌapun sinánmicë unicama ꞌicën.

Lucas 6:35

Usa ꞌaínbi camina mitsun axa mitsumi nishcë uni nuibaquin ꞌaquinsa ꞌicë ꞌaquinti ꞌain. Unían mitsu ñu ñucácëxun camina —anribi ca ꞌë ꞌinántima ꞌicë —quixun ꞌunánquinbi, ꞌinánti ꞌain. Usaquin ꞌaia isquin ca Nucën Papa Dios, manámi ꞌicë, an cuëënun mitsu ꞌimiti ꞌicën. Mitsun usaquin ꞌai camina asérabi aín bëchicë ꞌaish an sináncësaribi oquin sináncë ꞌiti ꞌain. An ca uni ꞌaisama ꞌimainun an —asábi ca —quixun a cacëma uni aribi ñu ꞌinánan ꞌaquinia.

Juan 1:12

Usa ꞌixunbi ca uicamax cara ami sinánan ami catamëtia, acama Nucën Papa Diosan bëchicëa ꞌinun ꞌimiacëxa.

Juan 11:52

Judíos unicamaxëshima bëtsi bëtsi nëtënuaxa ax Nucën Papa Diosmi sináncë unicamaxribia ainan ꞌaish achúshisa ꞌinúan Jesús bamati ñuiquin ca usaquin cacëxa.

Juan 8:44

Mitsun papax ca ñunshin ꞌatimanën ꞌapu ꞌicën. Ainan ꞌixun camina axa cuëëncësa oquinshi ꞌaisa tanin. An ca nëtë ióñubi uni ꞌati sináncëxa. Ax ca cëmë ꞌaish axa ꞌiásabi cëmëia. Cëmëi ca an sináncësa oquinshi sinani banaia. Ainra ca cëmë́ntapun ꞌixun unían uni itsi cëmëquin paránun ꞌimia.

Juan 8:47

Uicamax cara ainan ꞌicë an ca Nucën Papa Diosan bana cuatia. Usa ꞌaínbi camina mitsun, ainanma ꞌixun, Nucën Papa Diosan bana cuatiman.

Hechos 13:10

Ñachaquin ca cacëxa: —Cëmë camina mix ꞌain. ꞌIanan camina ꞌatima uni ꞌaish ñunshin ꞌatimanën sinánmicë ꞌain. Usa ꞌixun camina min ñu upí cuëëniman. Nucën ꞌIbu Diosan banaxa cuaisa ꞌaish upí ꞌaínbi ¿caramina min uisa cupí a cuaxunma ꞌanun quixun uni paranin?

Romanos 13:8

Uni camina ribíntima ꞌain. Usa ꞌixun camina a nuibacëma ꞌaish a ribíncësa ꞌitin rabanan, uni itsi upí oquinra nuibati ꞌain. Asérabi uni nuibacë ꞌixun ca unin uni itsi uisabi otima ꞌicën.

Efesios 5:1

Mitsux aín bëchicë ꞌicë an nuibacë ꞌaish camina usai ꞌiti sinani Nucën Papa Dios ꞌicësaribiti ꞌiti ꞌain.

Colosenses 3:14

Ësai ꞌinux camina bëtsibë nuibananti ꞌain. Bëtsibë nuibanancë ꞌaish camina ꞌitsa ꞌixunbi bëtsin sináncësa oquinshi sinánan ꞌën mitsu cacësabi oi ꞌicanti ꞌain.

1 Timoteo 1:5

Nucën Papa Dios ca cuëënia aín unicamaxa ësai ꞌinúnu ꞌunánmiti: aín nuitu upí ꞌianan aín ꞌuchacama tërë́ncë ꞌixun ꞌatëcënti sináncëma ꞌianan Jesucristomi asérabi catamëcë ꞌixun unicama nuibati.

1 Juan 2:29

Mitsun camina, Jesucristo ax ca asérabi upí ꞌicë quixun ꞌunanin. Usa ꞌixun camina ësaquinribi ꞌunánti ꞌain, an upí ñu ꞌacë unicamax ca Nucën Papa Diosan bëchicë ꞌicë quixun.

1 Juan 3:1

Nux cananuna Nucën Papa Diosan bëchicë ꞌain, an cacësabi oi. An aín bëchicë ca quixun nu cacë cupí cananuna ꞌunánti ꞌain, uisaira oquin cara an nu nuibatia quixun. Usa ꞌaínbi ca an ënë menu ꞌicë ñuishi sináncë unicaman ainanma ꞌixun Nucën Papa Dios ꞌunáncëma cupí, nux cananuna aín bëchicë ꞌai quixun ꞌunanima.

1 Juan 3:2

ꞌËn nuibacë xucë́antu, bërí cananuna Nucën Papa Diosan bëchicë ꞌain. Usa ꞌicëbi ca uisaira caranuna ꞌinuxun ꞌai quixun an nu ꞌunánmicëma pan ꞌicën. Usa ꞌaínbi cananuna ꞌunanin, Jesucristo utëcëncëbëtan cananuna upí oquin uisa cara ax ꞌicë quixun isti ꞌain. A isi cananuna asaribi ꞌiti ꞌain.

1 Juan 4:21

Ënë bana ca Nucën Papa Diosan nu ꞌináncëxa: axa ami sináncë uni ax ca uni itsimiribi sinánti ꞌicën.

1 Juan 4:6

Usa ꞌaínbi cananuna nux Nucën Papa Diosnan ꞌain. Ainan cupí ca uicaman cara ainan ꞌixun a ꞌunánxa an cuni nun bana cuatia. Usa ꞌaínbi ca Nucën Papa Diosnanma unin nun bana cuatima. Usa ꞌain cananuna ꞌunánti ꞌain, uin cara nun bana cuatia ax ca Nucën Papa Diosan sinánmicë ꞌicë quixun. Usaribi oquin cananuna ꞌunánti ꞌain, uin cara nun bana cuatima, ax ca Nucën Papa Diosan sinánmicëma, ñunshin ꞌatimanën sinánmicë ꞌicë quixun.

1 Juan 4:8

Nucën Papa Dios ax ca an unicama nuibairacë a ꞌicën. Usa ꞌain ca an bëtsi uni nuibacëma uni ax Nucën Papa Dios ꞌunáncëma ꞌicën.

1 Juan 5:19

Cananuna ꞌunanin, nuxnu Nucën Papa Diosnan ꞌaínbi ca camabi menu ꞌicë unicamax ainanma ꞌaish ñunshin ꞌatimanën ꞌapunan ꞌicë quixun.

1 Juan 5:2

Usa ꞌain cananuna ꞌunanin, nux ami sinánquin Nucën Papa Dios quicësabi oquin ꞌacë ꞌaish cananuna aín bëchicëcamamiribi sinani quixun.

3 Juan 1:11

ꞌËn nuibacë xucë́n, an ñu ꞌatima ꞌacë unían ꞌacësa oquin ꞌaquinma camina an ñu upí ꞌacë unían ꞌacësa oquinshi ñu ꞌati ꞌain. An ñu upí ꞌacë uni ax ca Nucën Papa Diosnan ꞌicën. Usa ꞌaínbi ca an ñu ꞌatima ꞌacë uni an ainanma ꞌixun Nucën Papa Dios ꞌunáncëma ꞌicën.