Juan 18:8 - El Nuevo Testamento

⁸ Entonces ya habla si Jesus, “Na. Ya habla ya gane yo que amo ya yo. Si conmigo man gale ta busca, deja libre con este maga uban di mio.”

Juan 18:8 Iomraidhean Croise

Mateo 26:56

Pero ya sucede este para ay cumpli el cosa ta habla na Sagrada Escritura.” Despues el maga dicipulo ya abandona con Jesus y ya corre sila todo.

Juan 10:28

Ta dale yo canila vida eterna. Hende sila ay muri y nuay ningunos ay puede saca canila na di mio mano.

Juan 13:1

Ya llega ya el bisperas del Celebracion del Passover y ya sabe si Jesus que corto ya lang el di suyo tiempo aqui na mundo, y hende mas tarda ay volve ya le alla con su Padre Celestial. Tiene le grande amor para con aquellos quien ta tene fe con ele aqui na mundo, y ahora ta demostra ya le si paquilaya de grande el di suyo amor para canila.

Juan 13:36

Despues si Simon Pedro ya pregunta con Jesus, “Señor, donde uste ay anda?” Ya contesta si Jesus, “No puede tu sigui donde yo ahora ay anda, pero despues ya de cuanto tiempo ay puede ya tu sigui.”

Juan 16:32

Acorda ustedes que cerca ya gayot el hora para llega y taqui ya gane, donde todo ustedes ay man calayat y cada uno di ustedes ay volve na di ustedes maga casa, y ay deja conmigo solo solo. Pero hende man gayot yo solo solo, cay el Dios Padre pirmi junto conmigo.

Juan 18:7

Ya pregunta si Jesus otra vez, “Con quien ba gayot ustedes ta busca?” Ya contesta sila, “Con Jesus de Nazaret.”

Juan 18:9

Ya habla le ansina para cumpli el di suyo maga palabra que ya habla le enantes lang, “Dios Padre, nuay ni uno de aquellos que ya dale uste conmigo ya queda perdido.”

1 Corinto 10:13

Debe ustedes entende que todo ese maga tentacion di ustedes igual como de antes pa gayot, amo ya man ese el clase de problema ya pasa con todo el maga otro gente. Pero Dios fiel, y ele hende ya lang ay permiti con ustedes queda tentao mas que puede ustedes aguanta. Si ta sufri man ustedes tentacion, ay dale man ele con ustedes un escape para puede ustedes aguanta con paciencia.

2 Corinto 12:9

pero ya contesta le conmigo, “El di mio gran favor husto para contigo, cay si nuay mas tu poder y fuerza, bien claro ya gayot puede tu mira el di mio poder para sostene contigo.” Y ahora bien alegre gayot yo, masquin ta man orgullo pa yo acerca del di mio debilidad, para puede yo sinti el poder di Jesucristo que ta envolve conmigo.

Efeso 5:25

Y ustedes maga marido debe ama con el di ustedes maga mujer, conforme si Jesucristo ya ama con el iglesia que amo el maga creyente, y ele ya dale su vida para rescata canila.

1 Pedro 5:7

Dale con Dios todo el di ustedes maga lingasa, cay ele ta cuida con ustedes.