Zyeremii 32:41 - Cebaara Bible 2010

⁴¹ Ki a pye mii ma fundaanra bi kacànna kpéʔele be na, mii a tɔ̀nɔ́ be cɔ́rɔ kányɛʔɛ na tári naa ni, ní mii zɔ̌nw myɛ, ní mii fúngi myɛ ní.

Zyeremii 32:41 Iomraidhean Croise

Zyeremii 24:6

Mii a nyapiigèle le be ni pe nyɔɔmɔ kéele na, bi be lúrugo pan tári naa ma. Mii a be sámaga yérige, mii a ní be kálagi í, mii a be cɔ́rɔ, mii a ní be kíle kɔ́n í.

Sofonii 3:17

Yawe mɔ Kolocɔlɔw i nyɛ mɔ níngi ni, nànnirio wii, wee wi syɔɔn syoo lè. Wi fundaanratɔw a ra muguri mɔ kéeli na. Wi a kòro pyèrio mɔ tamagi kéele na. Wi a ra fàndaara mugurumɔ kpéʔele mɔ kéeli na.»

Amɔsi 9:15

Mii a be cɔ́rɔ be tári ni, pe a ní kɔ́n bi yirige be tári ni í, toro dee mii kaan be ma lè,» Yawe mɔ Kolocɔlɔw wi jo nya.

Ezayi 62:5

Amɛɛ nìgɔcariɔ gáà nàngeele sinján pìcaa pɔri lè, ànbée mɔ faanfɔw a mɔ pɔri, ní àmɛɛ cefɔɔn nyɛ lè cefɔnw fɔ́lɔ fundaanra, ànbée mɔ a pye mɔ Kolocɔlɔw fundaanra.

Ezayi 65:19

Mii a ra muguri Zyerusalɛmi kéeli na, mii a pye fundaanra na mii syɛ́ɛnbèle kéele na. Nyɛnimɛ kafulogo a ní lóʔo yaà í, sùpiiwáara kafulogo a ní lóʔo yaà í.

Zyeremii 31:28

Amɛɛ mii da yɛʔɛ̀ wáa be ma n be kíle n kɔ́nɔgi, n be kpúmɔn n cáan, n be kálagi, n be kpóo, n kapeʔe taʔa be na lè, kánmi bee na mii a yɛʔɛ̀ wáa be ma bi be faan, bi be cɔ́rɔ,» Yawe wi jo nya.

Zyeremii 18:9

Mii ga gi joo syɛɛnfelegaa, wàlá fàngaa kéele na níì jo ki faan, ki cɔ́rɔ,

Làlwaw Kaanziin 30:9

Yawe mɔ Kolocɔlɔw a mɔ kɔ́yi fáli báriga bi mɔ tín yacanri na, wi a mɔ láagi pìibēle, ní mɔ yaweeri pìibēle, ní mɔ tásaligi yasanra pye di nɛʔɛ. Níì cán ki a ní pye Yawe fúngi kanidaanna bi ní kacànna pye mɔ na àmɛɛ ki da wi dɛ́nɛ bi kacànna pye mɔ tóolɛɛbèle na lè,

Làlwaw Kaanziin 28:63

Amɛɛ ki da Yawe dɛ́nɛ bi kacànna kpéʔele yele na bi yele nɛʔɛ lè, ànbée ki a wɔ́ɔ wi dɛ́nɛ bi yele kálagi bi yele kwɔ́ɔ. Pe a yele kɔn bi yirige tásaligi ni, gee ni yele a jée lè bi gi syɔɔ taa.

Ŋúnuyi 80:8

Kolocɔlɔɔ, mɔ wi lè Nyɛ̀ʔɛni Sùlasiibéle Kafɔlɔ, ki n yɛlɛ mi wolo lúrugo mi télege! Mí mɔ yɛ́ɛgi gbɛ̀ɛnmɛ yirige koro ga pye wolo a syɔɔ.

Ezayi 62:4

Pe a ní da mɔ yiri: «Céwee be yaʔa lè» í. Mɔ tári a ní wɔ́ɔ ra yiri: «Tɛɛ̀kalagiga» í. Kàjáa pe a ra mɔ yiri: «Wonidaanmaw,» sáā mɔ tári yiri: «Wobɔriw.» Níì cán mɔ n Yawe dɛ́nɛ, nàɔn a wɔ́ɔ pye mɔ tári ma.

Misye 7:18

Wìí wi nyɛ Kolocɔlɔɔ àmɛɛ mɔ nyɛ lè, wee wi kolomi kùsulugo syoo lè, ní i wi kɔ́rigi wogorobéle kakoloyo yaari? Wi o wi fundanʔari kɔngi ni yaari ki kòro nya làla o làla í, níì cán funjǎngi kéele n wi dɛ́nɛ.

Ezayi 60:21

Mɔ syɛ́ɛnbèle myɛ a pye syɛɛnsinbéle, tári a pye pe worò làla o làla. Fíinge gii, gee mii cɔ́rɔ lè, mii kɔ́yi fáli wii, bi mii gbɛ̀ɛngbɔɔmi tɛ̀ɛn.

Ezekyɛli 36:36

Syɛɛnfeleyee yi a kòro beè bi yele màʔa lè, yi a gi cán bi cán mii Yawe, mii n níì gi faan, gee ki da kpúmɔn n cáan lè, ní níì gi cɔ́rɔ, gee ki da kálagi lè. Mii Yawe, mii wi joo, mii si a gi kpéʔele.»

Oze sɛ́bɛw 14:5

Mii a be tágala funmi yáama pɔʔɔ, pe kéeli a mii dɛ́nɛ gbanʔama, níì cán mii fundanʔari n wàli n láʔa be na.