Zyeremii 3:14 - Cebaara Bible 2010

¹⁴ Ye lúru yaa maa jaafɔ-niceeye, Yawe wi jo nya. Níì cán mii wi nyɛ yele Kàfɔw. Mii a yele láa nibin nibin kěyi ni, bi yele láa siin-ziin nariyi ni, bi yele lúrugo pan Siyɔn ma.

Zyeremii 3:14 Iomraidhean Croise

2 Cányi kèlē 30:6

A tundun-jólogobèle kári ní fànʔafɔw, ní wi syɛɛnkpolobèle sɛ́bɛbéle ní, Isirayɛli ní Zyuda tɛ́ɛyi myɛ ni. A be sa ni gi nyuu n yɛlɛ ní gee ní fànʔafɔw joo n gbàn lè níì jo: «Yele Isirayɛli pìíbèle, ye lúru ye pan Yawe ma, wi lè Abirahami, ní Izaaki, ní Isirayɛli Kolocɔlɔw, koro ga pye wi lúru yele ma, yele wogorobèle ye syɔɔ Asirii fànʔafɔbèle ma lè.

Ezayi 1:9

Nyɛ̀ʔɛni Sùlasiibéle Kafɔlɔ wi lè Yawe, kapye wi da wolo pèle cɛɛri yaʔa a wo kòro í, wolo mǎà dée pye àmɛɛ Sodɔmi nyɛ lè, wolo mǎà dée Gomɔri wíri.

Ezayi 10:22

Ee Isirayɛli, àlí mɔ syɛ́ɛnbèle ga nɛʔɛ n pye àmɛɛ sólomi lɔ̀ʔɔ nyɔ́ɔ táminyɔɔ nyɛ lè, pe wogorobéle cɛɛri yagana pe a lúru pan. Kálagili n kɔ̀rirɔ n tímana, li a sínni kaan li nɛʔɛ gbanʔama.

Ezayi 17:6

Yaliikanya cɛɛri yi a kòro yaà, ki a pye àmɛɛ pe gáà olivye tíige nyàʔara lè, si olivyesanya siin wàlá taanri yaʔa yaà gi fínaani na, si olivyesanya sicɛrɛ wàlá kagunɔ yaʔa gi káganyi na,» Yawe, Isirayɛli ye Kolocɔlɔw wi jo nya.

Ezayi 27:12

Cángi bee na Yawe a tíiyi nyàʔara bi séli cábigi nyɔ́ɔ na bi sa nan Ezyipiti lòcoologi na. Isirayɛli jáabèle, pe a yele jóo nibin nibin!

Ezayi 31:6

Isirayɛli pìíbèle, wee yele tɔ̀nɔ n cée lè, ye lúru yaa maa wi ma.

Ezayi 44:22

Mii n mɔ kapeegèle kurugo n láʔa àmɛɛ fàfaanwɔʔɔ nyɛ lè, ní mɔ kolomi kèlē, àmɛɛ fàfanʔa nyɛ lè. Ki n yɛlɛ mi lúru mi pan mii ma, níì cán mii n mɔ nyúngi syɔɔ.»

Ezayi 54:5

Níì cán mɔ Faanfɔw wi nyɛ mɔ nanbɔriw. Wi mɛ́ɛgi gi nyɛ Yawe wi lè Nyɛ̀ʔɛni Sùlasiibéle Kafɔlɔ. Isirayɛli Wojanw wi nyɛ mɔ Nyunzyɔɔw, wi mɛ́ɛgi gi nyɛ tári myɛ Kolocɔlɔɔ.

Ezayi 55:7

Syɛɛnpeew n yɛlɛ wi wi kólogi yaʔa, syɛɛnnaa-sìnzinw n yɛlɛ wi wi sɔ̀ngubeeri yaʔa, wi lúru Yawe ma, woro wee wi a nyinimɛ taa wi na lè, wi lúru wolo Kolocɔlɔw ma, woro wee wi kùsulugi syoo lè saʔa.

Ezayi 57:17

Mii fúngi maa tanʔa Isirayɛli kurugo wi kanaa-sìnzinri kéele na, a mii wi kpúmɔn. Mii fundanʔaratɔw n niyɛɛ làriga. Wi si maa pye sìnloʔoo, wi maa ni syée wi tiimaa funzɔngumi kólogo ni.

Ezayi 6:13

Pe tílaya kɛɛ wógi ga kòro di ni, koro a sógi. Ki si a pye àmɛɛ terebɛnti tíige, wàlá syɛni tíige nyɛ lè, pe ga gi kpúmɔn, ki nyúngi n kòro yaà, syɛɛnfelegi bee nyúngo a ba yòdaʔacànga yirige.»

Zyeremii 2:19

Ki n yɛlɛ mɔ péemi sàra í kaan mɔ ma, mɔ sinzinmi kèlē í wɔʔɔgɔ taʔa mɔ na. Ki n yɛlɛ mɔ í gi cán, si gi nyaa bi cán bi Yawe mɔ Kolocɔlɔw cée, gee bee i nyɛ yapeʔe, ní yasorogo, wàlá bi pye fyáakaanna fun mii kàbangi na,» Nyɛ̀ʔɛni Sùlasiibéle Kafɔlɔ Yawe wi jo nya.

Zyeremii 2:2

«Da syée mi sa yákpoli wáa ní syɛ́ɛnri naa ní mi le Zyerusalɛmi syɛ́ɛnbèle líiweegéle ni mí jo: ‹Yawe n jo: Mii i sɔ̀ngí ni taagi mɔ picaagi làla tàmaga na, ki lè mɔ larijoli tàmaga, lǎli ni mɔ da taʔa mii na lè fìími tára ni, táraa ni, dee di pɛɛn lè.

Zyeremii 23:3

«Mii si mii bàsanbèle kpóʔoro bi yirige tátɛɛyi myɛ ni, yee má mii be cariga n tórigo lè. Mii a be lúrugo pan ba lége pe bàkpogi ni. Pe a ba ra sii bàā nɛʔɛgi.

Zyeremii 29:14

Mii a niyɛɛ yaʔa yele í mii nyaa,› Yawe wi jo nya, ‹mii si ní yele púlobèle lúrugo pan nɛɛ naa, mii a yele yirige syɛɛnfeleyi myɛ, ní tɛ́ɛyi myɛ ni, beè mii yele nɛnɛ n tórigo lè bi yele kpóʔoro,› Yawe wi jo nya. ‹Mii a ní yele lúrugo pan tɛ́ɛgi ma, gee ni mii da yele cò n yirige n tórigo lè.›

Zyeremii 3:1

Yawe n jo: «Lǎli ni nàɔn ga wi cɔɔ̀ yaʔa lè, á wi yiri wi tɛ́ɛgi ni n sáà pye nànwaa nikwɔɔ cɔ́ɔ, a wi nànzeliw a ní gbǎn ba wi láa lé? Tári naa a nɔ́nʔɔ péw ì? A mɔ, mɔ wee wi miyɛɛ bye lè nànjaacɔɔ̀ ní nànbēle saʔa ní, mɔ si ní ba lúru pan lé mii ma?» Yawe wi jo nya.

Zyeremii 3:12

Da syée mi sa ra yákpoli wáa ní syɛ́ɛnri naa ní solomɔkulo kàbangi na mí jo: ‹Lúru maa maa cêkalagiga Isirayɛli,› Yawe wi jo nya, ‹mii yɛ́ɛgi a ní pye wodanʔaga ní yele na í. Níì cán mii i nyɛ nyinidaaɔ,› Yawe wi jo nya. ‹Mii fúngi a kòro nya wodanʔaga ní làla o làla í.

Zyeremii 3:8

Alí àmɛɛ mii Isirayɛli yaʔa lè, wi lè cêkalagiga, wi kanɔnʔɔbyeri myɛ kéele na, níì wi ceyaʔa-sɛ́bɛw kaan wi ma, a mii gi nyaa wi senyɛnjew Zyuda wi lè námarafɔw, woro ga téè fyáa í, a woro wɔ́ɔ̀ kári n sáà kanɔnʔɔrɔ kpéʔele.

Zyeremii 31:12

Pe a pan si ba ra fundaanra yákpogéle wáa Siyɔn ǹjoʔo ma tɛ́ɛgi ni. Pe a kabi fala Yawe yacanri ma, ti lè bilew, ní dùvɛɛnfɔnw, ní sǐnmi, ní yaweeyiligèle, ní yaweekpologèle. Pe fúnyi a pye àmɛɛ nángwɔɔ nyɛ, wee be fɔɔn lè, pe a ní fàngwɔɔrɔ cán í.

Zyeremii 31:32

Joogaannee mii da kpéʔele ní be toolɛɛbèle ní lè, cángee na mii be cò kɔ́yi na n yirige Ezyipiti tári ni lè, loro félege ban li a pye í, pe n joogaanni bee kálagi, àlí n gi taa mii n pye be tamafɔw,» Yawe wi jo nya.

Zyeremii 31:6

Níì cán cangaa i maa, gee ni kɔ̀rɔsiifɔbèle a yákpogèle wáa lè Efirayimi nyanbeleyi na, si jo: ‹Ye yìri wo lúgu wo kári Siyɔn ma, Yawe ma wi lè wolo Kolocɔlɔw.›

Oze sɛ́bɛw 5:15

«Mii a kári, mii a lúru kári mii tɛɛkòrogi ma fwɔɔ bi taa pe ba be kolomi nyaa si lúru bàā mii yɛ́ɛgi caa. Pe ga pye wɔʔɔli ni, pe a ra mii caa kányɛʔɛ na.»

Zakarii 1:4

‹Yele a kɔ́ pye àmɛɛ yele tóolɛɛbèle da pye lè í, poro bele má booma kanyaajoobèle da ni gi nyuu lè níì jo: Yawe wi lè Nyɛ̀ʔɛni Sùlasiibéle Kafɔlɔ wi n jo: Ye láʔa yele kóbeeyi, ní yele nàʔabeemi na. Kàjáa pe ga lóʔo í, pe ga líiyi cáan n lóʔo mii ma í, Yawe wi jo nya.

Wɔrɔmi ye 9:27

Ezayi si maa ni wi yákpoli wáa Isirayɛli ye kéeli na níì jo: «Alí Isirayɛli ye ga nɛʔɛ àmɛɛ sólomi lɔ̀ʔɔ táminyɔɔ nyɛ lè, poro pèle cɛ̀ɛri yagana pe a syɔɔ.