Zyeremii 13:11 - Cebaara Bible 2010

¹¹ Níì cán àmɛɛ sɛntiiri nyɛ nàɔn sárigéle ni lè, kánmi bee na mii tiimaa da Isirayɛli kpáagi wòolo myɛ ní Zyuda kpáagi wòolo myɛ pwɔɔ niyɛɛ na, Yawe wi jo nya, koro ga pye be pye mii syɛ̀ɛnnɛ, bi pye mii mɛ́ɛgi, ní mii sòololi, ní mii fèreri. Kàjáa pe ga lóʔo í.›

Zyeremii 13:11 Iomraidhean Croise

Ŋúnuyi 135:4

Níì cán Yawe n Zyakɔbi nyɛ́nɛ n wòlo a wi pye woro wóo, wi n Isirayɛli nyɛ́nɛ n wòlo a wi pye woro tiimaa wóo.

Ŋúnuyi 147:20

Wi ga gee bee wonijanga kpéʔele syɛɛnfelegaa faala ma í, ki kàa ga wi làlwaw kajoogéle cán í. Aleluya!

Ŋúnuyi 81:11

Mii wi nyɛ Yawe mɔ Kolocɔlɔw, woro wee wi mɔ yirige Ezyipiti tári ni lè. Mɔ nyɔ́ɔgi múgu fáa, mii a gi nyìn.

Ezayi 43:21

Syɛ́ɛnbèle mii sámaga niyɛɛ wòolo lè, pe a ra mii soololi kèlē jáari.

Ezayi 62:12

Pe a ra be yiri «syɛɛnfele-jànga,» ní «bele nyúnyo Yawe syɔɔ lè.» Mɔ na, pe a ra mɔ yiri: «Kěgi be caa lè,» ní «Kènaa-sìnyaʔagi.»

Zyeremii 13:1

A Yawe syɛ́ɛnri naa joo mii ma níì jo: «Da syée, mɔ a sa lɛn sɛntiiri syɔɔ miyɛɛ kéeli na, si wi tɛ́ʔɛ bi miyɛɛ bwɔɔ mɔ sárigèle ni, kàjáa mɔ a kɔ́ wi cáan lɔ̀ʔɔ ni í.»

Zyeremii 13:10

Syɛɛnfelegi bee gi pee lè nya, koro gee gi mii syɛ́ɛnri lóʔolo cée lè, gee gi taʔa gi fungbangi kasɔngurɔ na lè, níì kiyɛɛ bwɔɔ kolocɔlɔbèle pèle nikwɔɔlɔ na ni báara be ma, ní i tíri ni tuun be yɛʔɛ̀ ma, ki a pye àmɛɛ sɛntiiriw naa nyɛ lè, wee wi lè wi a ní gbǎn yafyɛn nyɔɔ í.

Zyeremii 13:12

«Mɔ a syɛ́ɛnri naa joo be ma si be pye: ‹Yawe wi lè Isirayɛli Kolocɔlɔw woro wi syɛ́ɛnri naa joo níì jo: Kpàbibèle myɛ n yɛlɛ bi nyìn dùvɛɛnw na.› Pe si a mɔ pye: ‹A wolo i nyɛ lé wolo ga gi cán kpàbibèle myɛ n yɛlɛ bi nyìn dùvɛɛnw na í?›

Zyeremii 19:15

«Yawe wi lè Nyɛ̀ʔɛni Sùlasiibéle Kafɔlɔ, Isirayɛli Kolocɔlɔw, woro wi syɛ́ɛnri naa joo níì jo: ‹Wéle, wɔʔɔyi myɛ kéele mii joo kěgi naa kánma na lè, mii a yi yaʔa yi too gi na, ní kěyee myɛ na, yee yi nyɛ gi taana lè. Níì cán pe n be nyùngbaabèle kpee jàngó poro a kɔ́ mii syɛ́ɛnri lóʔo í.› »

Zyeremii 32:20

Mɔ n fɛ̀ɛbēle ní kakpoloyo tɛ̀ɛn Ezyipiti tári ni fwɔɔ n baa nan níjanʔa na Isirayɛli ni, ní syɔɔn ye níngi ni, mɔ n miyɛɛ mɛ́ɛgi kpɔ́ʔɔ àmɛɛ gi nyɛ lè níjanʔa.

Zyeremii 33:9

Kěgi naa a pye mii ma fundaanra yáriga bi pye sòololo, ní fèrere yáriga, tári syɛɛnfeleye myɛ nínge ni, yoro yee yi a kacǎngèle myɛ kéele lóʔo, gele mii kpéʔele be na lè. Fyáari a tɔ̀nɔ́ be cò paa cɛ̀lɛ́, kacǎnyi myɛ, ní ŋɔ́ndaali myɛ kéele na mii kaangi be ma lè.›

Zyeremii 6:17

Mii n kɔ̀rɔsiifɔɔlɔ yìrige yele ma, ye yákirii yaʔa tòmaagi wìimɛ na. Kàjáa pe i syɛɛnlurugori kaangi níì jo: ‹Wolo a yákirii yaʔa í.›

Zyeremii 7:13

Tɔ́ɔliw ni doò, àmɛɛ yele kapyeri bee myɛ kpéʔele lè, Yawe wi jo nya, ní àmɛɛ mii joo ní yele ní lè sìnyére ni, yele si ga lóʔo í, ní àmɛɛ mii yele yeri lè, yele si ga syɔɔ í,

Zyeremii 7:23

Kàjáa syɛ́ɛnree mii joo n gbàn be ma lè toro di nyɛ dee naa, mii n jo: Ye mii jóomi lóʔo, koro ga pye mii í pye yele Kolocɔlɔw, yele si pye mii syɛ́ɛnbèle. Kóloyee ni mii jo yele í da táanri lè, yaa táanri yee bee myɛ ni, jàngó yele í pye dùba pìibēle.

Zyeremii 7:24

Kàjáa pe ga lóʔo í, pe ga líiyi cáan í, fwɔɔ a be peyɛɛ daʔa láliiw, ní be funbeeyi kasɔngurɔ na. Pe n lúru kàdoʔo ma, pe ga kári yɛʔɛ ma í.

Zyeremii 7:26

Kàjáa pe ga lóʔo mii ma í, pe ga líiyi cáan í, pe n be nyùngbaabèle kpee, pe n kapeele pye n sɔ̀lɔ pe toolɛɛbèle na.›

Amɔsi 3:1

Yele Isirayɛli ye, ki n yɛlɛ ye syɛ́ɛnri naa lóʔo, dee Yawe nyuu yele kéeli na lè, ní narigbaagi myɛ kéele na, gee mii yirige Ezyipiti tári ni lè:

Luki 10:11

‹Alí yele kěgi cíbige ki nyɛ lè wolo tɔ́lɔyi na, wolo a gi kóri wo naa yele kánmi na. Koro ní ki myɛ ní ki n yɛlɛ ye gi cán Kolocɔlɔɔ fǎngi n nùuni yele na.›

Làlwaw Kaanziin 26:18

A Yawe nyɔ́ɔgi fàli mɔ ma níjanʔa n gi tɛ̀ɛn mɔ a pye syɛɛnfelegaa, gee ki a pye lè woro tiimaa wóʔo àmɛɛ wi gi joo mɔ ma lè. Ki si n yɛlɛ mɔ í wi kajoodɛɛngèle myɛ sámaga cò,

Làlwaw Kaanziin 26:19

jàngó syɛɛnfeleyi myɛ wi faan lè, wi mɔ kpɔ́ʔɔ sɔ̀lɔ yee bee na sòololi, ní mɛ́ɛkpɔɔgi, ní nìjanri kàbaan na, mɔ si pye syɛɛnfelegaa, gee ki a yaʔa lè kɔlɔ̀ na Yawe mɔ Kolocɔlɔw ma bi yɛlɛ ní gi ní àmɛɛ wi gi joo mɔ ma lè.»

Làlwaw Kaanziin 4:7

Syɛɛnfele-nɛʔɛgìí má kolocɔlɔbèlē nyɛ, bele be nùuni gi na lè àmɛɛ Yawe wolo Kolocɔlɔw nùuni wolo na lè làlee faala ni wolo ga wi yeri lè?

1 Pyɛri 2:9

Yele si i nyɛ syɛɛnfelegaa, gee Kolocɔlɔɔ nyɛ́nɛ n wòlo lè, ní i nyɛ wi fǎngi sáriga-wòlobēle, ní ní i nyɛ syɛɛncanbéle, bele Kolocɔlɔɔ sámaga n yaʔa wiyɛɛ ma lè, ní wɔ́ɔ i nyɛ wi tiimaa syɛ̀ɛnnɛ, koro ga pye yele í da woro nyɔɔ-mí-foroli kèlē nyuu, woro wee wi yele yeri n yirige lè yébilimi ni n lége wi bìngaari gbɛ̀ɛnmɛ ni lè.