Zyeremii 11:8 - Cebaara Bible 2010

⁸ Kàjáa pe ga lóʔo í, pe ga líiyi cáan í. A be myɛ nibin nibin taʔa be funbeeyi kasɔngurɔ na. Lǎli bee ni, a mii si wɔ́ɔ̀ joogaanni naa syɛ́ɛnrɛ myɛ foro be na, loro lee kéele mii da joo n gbàn be ma níì jo paa gi kpéʔele àmɛɛ li jo lè, pe si ga fɔ̀lɔ ni gi kpéʔele àmɛɛ li jo lè í.› »

Zyeremii 11:8 Iomraidhean Croise

Nehemii 9:26

Kàjáa pe n yìri n sìnloʔomɔ kpéʔele mɔ kánmi na, pe n kàdoʔo wáa mɔ làlwaw ma. Mɔ kanyaajoobèle pe da ni nyuu ní be ní lè níì jo be lúru pan mɔ ma lè pe n poro kpóo, níì kapeekpoloyo kpéʔele.

Nehemii 9:29

Mɔ n be sàmi jàngó pe ní lúru pan mɔ làlwaw ma, kàjáa a be nɛ̀ɛnyɛnɛgɛ kpéʔele, pe ga fɔ̀lɔ mɔ kajoodɛɛngèle na í. Pe n kapeele pye mɔ làlwaw kajoogéle na, koro gele ge sìi kaangi bele ma pe ge có lè. Pe n bòʔogèle nyɛ́ʔɛ níì céemɛ kpéʔele, pe ga fɔ̀lɔ n lóʔo í.

Zyeremii 13:10

Syɛɛnfelegi bee gi pee lè nya, koro gee gi mii syɛ́ɛnri lóʔolo cée lè, gee gi taʔa gi fungbangi kasɔngurɔ na lè, níì kiyɛɛ bwɔɔ kolocɔlɔbèle pèle nikwɔɔlɔ na ni báara be ma, ní i tíri ni tuun be yɛʔɛ̀ ma, ki a pye àmɛɛ sɛntiiriw naa nyɛ lè, wee wi lè wi a ní gbǎn yafyɛn nyɔɔ í.

Zyeremii 3:17

Lǎli bee ni pe a ra Zyerusalɛmi yiri «Yawe Fàngoli.» Syɛɛnfeleyi myɛ a ra kpóʔoro yaà Yawe mɛ́ɛgi na Zyerusalɛmi ma. Pe a ní peyɛɛ daʔa pe funbeeyi nàʔagbanma na í.

Zyeremii 31:32

Joogaannee mii da kpéʔele ní be toolɛɛbèle ní lè, cángee na mii be cò kɔ́yi na n yirige Ezyipiti tári ni lè, loro félege ban li a pye í, pe n joogaanni bee kálagi, àlí n gi taa mii n pye be tamafɔw,» Yawe wi jo nya.

Zyeremii 32:23

Pe n pan, pe n baa di fáligi taa, kàjáa pe ga mɔ jóomi lóʔo í, pe ga tánʔa n yɛlɛ ní mɔ lalwaw ní í. Gee myɛ mɔ da joo n gbàn be ma níì jo paa gi kpéʔele lè, pe ga gi kpéʔele í. Lǎli bee ni a mɔ wɔʔɔyi bee myɛ cáan be na!

Zyeremii 34:14

Yɛ̀ʔɛlɛ kɔrɔsiin wóli na, syɔɔn o syɔɔn n yɛlɛ yele ni bi wi Heburu-senyɛnnɛ yaʔa waa syée wɔ́rɔɔ, wee wi baa wiyɛɛ pára wi ma lè. Wi a báara mɔ ma yɛ̀ʔɛlɛ kɔrɔni, mɔ si wi yirige mɔ tɛ́ɛgi ni bi yaʔa waa syée wɔ́rɔɔ. Kàjáa yele tóolɛɛbèle ga lóʔo mii ma í, pe ga líiyi cáan mii kàbangi na í.

Zyeremii 35:15

Mii n mii falipyebèle myɛ tun yele ma, pe lè kanyaajoobèle, mii n be tun yele ma sìnyére ni pe ba gi joo yele ma si jo: Yele myɛ nibin nibin n yɛlɛ bi láʔa yele kobeeyi na sáā maa. Ye yele nàʔami fàli, yele a kɔ́ yeyɛɛ bwɔɔ kolocɔlɔbèle pèle na bàā kpɔ̀ʔɔrɔli kpéʔele be ma í, ye kòro kánmi bee na tári ni mii kaan yele ma lè, ní yele tóolɛɛbèle ma lè wɔ́ɔgēle. Kàjáa yele ga líiyi cáan í, yele ga lóʔo mii ma í.

Zyeremii 35:17

Koro na, Yawe wi lè Kolocɔlɔw, wi nyɛ lè Nyɛ̀ʔɛni Sùlasiibéle Kafɔlɔ, Isirayɛli Kolocɔlɔw, woro wi syɛ́ɛnri naa joo níì jo: ‹Wéle, wɔʔɔyee myɛ kéele mii joo lè Zyuda ye, ní Zyerusalɛmi ye myɛ kánmi na lè, mii a yi yaʔa yi too be na. Níì cán mii n joo ní be ní, pe ga lóʔo í, mii n be yeri, pe ga syɔɔ í.› »

Zyeremii 38:20

A Zyeremii wi yari: «Pe a mɔ le be kɔ́yi ni í. Ki n yɛlɛ mi Yawe jóomi lóʔo bi yɛlɛ ní gee ní mii nyuu mɔ ma lè, koro ki a pɔ́rɔ mɔ ma, mɔ siiw si syɔɔ.

Zyeremii 44:16

«Syɛ́ɛnri mɔ nyuu wolo ma Yawe mɛ́ɛgi na lè, wolo o caa bi di lóʔo í.

Zyeremii 44:17

Kàjáa wolo i caa bàā gi kpéʔele bi yɛlɛ ní gee myɛ ní gi yiri wolo nyɔ́ɔyi ni lè, koro gi nyɛ bàā nùndaanni yáriga sórogi nyɛ̀ʔɛni fànʔafɔjaa ma, sáā sáriga-yólogow wóo wi ma àmɛɛ wolo da ni gi kpéʔele lè, wolo ní wolo tóobèle, ní wolo fànʔafɔbèle, ní wolo syɛɛnkpolobèle ní, Zyuda kěyi, ní Zyerusalɛmi kàlari-kóloyi ni. Lǎli bee ni wolo maa ni líi ni tíngi páan! Wolo maa pye fundaanra na, wolo da wɔʔɔgɔ cán í.

Zyeremii 44:5

Kàjáa pe ga lóʔo í, pe ga líiyi cáan í. Pe ga kapeegi yaʔa, gee be kpéʔele lè í, pe ga láʔa nùndaanni yáriga sórigolo na kolocɔlɔbèle pèle nikwɔɔlɔ ma í.

Zyeremii 7:13

Tɔ́ɔliw ni doò, àmɛɛ yele kapyeri bee myɛ kpéʔele lè, Yawe wi jo nya, ní àmɛɛ mii joo ní yele ní lè sìnyére ni, yele si ga lóʔo í, ní àmɛɛ mii yele yeri lè, yele si ga syɔɔ í,

Zyeremii 7:24

Kàjáa pe ga lóʔo í, pe ga líiyi cáan í, fwɔɔ a be peyɛɛ daʔa láliiw, ní be funbeeyi kasɔngurɔ na. Pe n lúru kàdoʔo ma, pe ga kári yɛʔɛ ma í.

Zyeremii 7:26

Kàjáa pe ga lóʔo mii ma í, pe ga líiyi cáan í, pe n be nyùngbaabèle kpee, pe n kapeele pye n sɔ̀lɔ pe toolɛɛbèle na.›

Ezekyɛli 20:8

Kàjáa pe n céemɛ le peyɛɛ ni mii kánmi na, pe ga fɔ̀lɔ n lóʔo mii ma í. Pe wàa ga yanɔnʔɔyi wáa, yee yi wi nyapiigèle kíle lè í, pe ga láʔa Ezyipiti ye yasunyi na í. A gi si jée mii sɔ̀nguri ni bi mii fundanʔagbɔɔri yàli be na, bi mii fundanʔari kpéʔele be na sa nan di tɛɛ̀laʔali na Ezyipiti tári nínge ni.

Zakarii 1:4

‹Yele a kɔ́ pye àmɛɛ yele tóolɛɛbèle da pye lè í, poro bele má booma kanyaajoobèle da ni gi nyuu lè níì jo: Yawe wi lè Nyɛ̀ʔɛni Sùlasiibéle Kafɔlɔ wi n jo: Ye láʔa yele kóbeeyi, ní yele nàʔabeemi na. Kàjáa pe ga lóʔo í, pe ga líiyi cáan n lóʔo mii ma í, Yawe wi jo nya.

Zakarii 7:11

Kàjáa a be cée, pe ga fɔ̀lɔ bi lóʔo í, a be céemɛ fókaannyunyo nyɛ́ʔɛ níì be líiweegèle pɛɛn jàngó poro a kɔ́ lóʔo í.