Zyan 7:4 - Cebaara Bible 2010

⁴ Wee wi ga ni caa lè syɛ́ɛnbèle í woro cán, wi o yarigaa kpéʔele làrama ni í. Amɛɛ mɔ kakpoloyi kpéʔele lè nya, ki n yɛlɛ mɔ í sa miyɛɛ dɛ̀ɛn dulunyanw syɛ̀ɛnnɛ na.»

Zyan 7:4 Iomraidhean Croise

1 Fànʔafɔbèle 22:13

Tundunwee wi da kári sa Misye yeri lè, a woro sáà joo ní wi ní kánmi naa na níì jo: «Wéle, kanyaajoobèle myɛ i yaà n bɛ̀ɛ nibin na ní i kacànga nyuu fànʔafɔw ma ki n yɛlɛ mɔ syɛ́ɛnri í sa pínɛ ní be wóri ní, mɔ í kacànga joo.»

Matye 23:5

Pe i be kérigèle myɛ kpéʔele, jàngó syɛ́ɛnbèle í da poro nyaagi. Koro na pe be sápabèle sámagi wogbolobèlē ní, ní i nyámari yirigi wodɔnɔrɔ ní pe búroyi na.

Matye 4:6

níì wi pye: «Kapye mɔ wi nyɛ Kolocɔlɔɔ Jáaw, mi kòro nɛɛ, mí ye mi too tári na. Níì cán ki n sɛ́bɛ níì jo: ‹Kolocɔlɔɔ a mɔ kéeli joo bi gbàn wi tundunbèle ma pe mɔ tɔʔɔ cò be kɔ́yi ni, jàngó mɔ tɔ́lɔgaa a kɔ́ círi kàdɛnɛgaa na í.› »

Matye 6:16

«Yele ga ni súnw nii, ki ga yɛlɛ yele í da yele yɛ́ɛyi taanri àmɛɛ syɛɛnjóotɛɛyi siin joofɔɔlɔ gi kpéʔele lè í. Pe i be yɛ́ɛyi fɛ̀ɛ́, jàngó syɛ́ɛnbèle í da poro nyaagi si gi cán poro i nyɛ sún na. Mii si a gi joo yele ma kányɛʔɛ ni, pe n be tɔ̀nɔw taa n kwɔ́ɔ.

Matye 6:5

«Mɔ ga ni Kolocɔlɔɔ nyɛ́ɛri lǎli ni lè, mɔ a kɔ́ gi pye àmɛɛ syɛɛnjóotɛɛyi siin joofɔɔlɔ nyɛ lè í. Ncan ki n be dɛ́nɛ bàā yèré sáā Kolocɔlɔɔ nyɛ́ɛri sérikpaayi ni ní kobariyi na, jàngó syɛ́ɛnbèle í da poro nyaagi. Mii si a gi joo yele ma kányɛʔɛ ni, poro n be tɔ̀nɔw taa n kwɔ́ɔ.

Luki 6:45

Syɛɛncaɔn i yacanri yirigi wi lɔjanri ni, dee wi kɔn lè wi fúngi ni, syɛɛnpeeo si wɔ́ɔ i yapeeri yirigi wi lɔbeeri ni, dee wi kɔn lè wi fúngi ni. Níì cán yárigee gi syɔɔn fúngi nyìn lè, gee bee gi yirigi wi nyɔ́ɔgi ni.

Zyan 18:20

A Zyezu wi yari: «Mii maa ni mii syɛ́ɛnri nyuu syɛ́ɛnbèle myɛ nyɛ́nɛ na, ní i syɛ́ɛnbèle tama làla o làla sérikpaayi ni, ní kpɔ̀ʔɔrɔli kpaʔa ni, beè Zyefubèle myɛ peyɛɛ gbóʔoro lè. Mii da ni yarigaa nyuu làrama ni í.

Zyan 7:3

a Zyezu cɔnɔbèle wi pye: «Ki n yɛlɛ mɔ í yìri nɛɛ naa bi kári Zyude tári ma, koro ga pye mɔ taʔafɔbèle í wɔ́ɔ sa mɔ kapyegèle sámaga nyaa.

Zyan 7:5

(Wi cɔnɔbèle da kɔ́ɔ̀ tága wi na lǎli bee ni í.)