Sélimɛ 1:26 - Cebaara Bible 2010

²⁶ A Kolocɔlɔɔ jo: «Ki n yɛlɛ wo syɔɔn faan wolo niwirio, wi pye àmɛɛ wolo nyɛ lè, jàngó syɔɔn í tɛ́ɛn fábèle nyúngo na, ní féjɛɛnri ní ti yìrigí lè, ní kěgi yaweere, wí wɔ́ɔ tɛ́ɛn tári nyúngo na, n fàra yáriree myɛ na di fulolo lè tári na.»

Sélimɛ 1:26 Iomraidhean Croise

Sélimɛ 11:7

Yaa maa wo tìgi wo sa be syɛ́ɛnri nyáʔami yaà beè, koro ga pye pe a ní kɔ́ ra peyɛɛ syɛ́ɛnri lúro í.»

Sélimɛ 2:19

A Yawe Kolocɔlɔɔ tári tɛ́ʔɛ n sìnbirigi yaweere féleye myɛ, ní féjɛɛnri féleye myɛ sámaga n pan ní di ní nǎnw ma, si gi wéle kánmee na wi a ra di mɛ́ɛyi yiri lè. Mɛ́ʔɛ o mɛ́ʔɛ nǎnw ga le gi kàa na lè, gee bee í kòro gi mɛ́ɛgi.

Sélimɛ 3:22

A Yawe Kolocɔlɔɔ jo: «Wéle, tɔ́ɔliw ni syɔɔn n kàri n pye àmɛɛ wolo wàa nyɛ lè n kacǎngèle ní kapeegèle cán. Ki si n yɛlɛ wo wi yérige wi a kɔ́ wi kɔ́gi sánʔa bi wɔ́ɔ sìíw tíige yasangaa cɔɔ bi lìi si kòro beè sìi na làla o làla í.»

Sélimɛ 5:1

Adami yòdaʔayi sɛ́bɛ wi nyɛ wee naa: Cángee na Kolocɔlɔɔ syɔɔn faan lè, wi maa wi sámaga a wi woro Kolocɔlɔɔ wíri.

Sélimɛ 9:6

Wàa ga wi syɛɛnnyɛnnɛ sìsyaan wo, syɔɔnwaa wi a wɔ́ɔ wee bee fɔ́lɔ wóo wo. Níì cán Kolocɔlɔɔ n syɔɔn kpéʔele woro niwirio.

Zyɔbi 35:10

Kàjáa syɔɔn faala o gi nyuu níì jo: ‹Sán mii faanfɔw Kolocɔlɔɔ nyɛ í, woro wee wi kpɔ̀ʔɔrɔli ŋúnuyo kaangi yébiligi ni lè,

Zyɔbi 39:11

A mɔ a mɔ sɔngumi taʔa lé wi na àmɛɛ wi fǎngi nɛʔɛ lè? Mɔ a mɔ faligbanw yaʔa lé wi ma?

Zyɔbi 5:23

Joogaanna a pye mɔ ní séyi kàdɛnɛyɛ nínge ni, seʔe yaweeri a pye bɛ̀ɛlɛ na ní mɔ ní.

Ŋúnuyi 100:3

Ki n yɛlɛ ye gi cán Yawe wi nyɛ Kolocɔlɔɔ! Woro wi wolo faan, wolo i nyɛ wi wòolo, wolo i nyɛ wi syɛ̀ɛnnɛ, ní wi bàala, bele wi náari lè.

Ŋúnuyi 149:2

Isirayɛli n yɛlɛ bàā fundaanra kpéʔele wi Faanfɔw ni. Siyɔn pìíbèle n yɛlɛ bàā muguri be Fànʔafɔw kéele na!

Syɛɛnjóow 7:29

Gee si mii baa nyaa lè koro gi nyɛ: ncan Kolocɔlɔɔ n syɔɔn ye sámaga syɛɛnsinbéle, á pe baa kanmaa saʔa caa n gi gbàn peyɛɛ ma.

Ŋúnudaangi 1:11

Wolo a tɛɛ̀ vèʔebēle sámaga mɔ ma, si wálifiio yárigéle le be na.

Ezayi 45:18

Níì cán Yawe wi syɛ́ɛnri naa joo, woro wee wi nyɛ̀ʔɛgèle sámaga lè, woro wee wi nyɛ lè Kolocɔlɔɔ nibin, wee wi tári sámaga lè n di yirige, níì di sámaga n yérige. Wi ga di faan níì di yaʔa wowaara ní í. Kàjáa wi n di sámaga koro ga pye syɛ̀ɛnnɛ í tɛ́ɛn di ni, wi n jo: «Mii wi nyɛ Yawe, wàa ní o yaà n fàra mii na í.

Ezayi 6:8

A mii Kàfɔw yákpolo lóʔo a wi jo: «Wìí syɔ́ɔn mii a tun? Wìí wi a tánʔani pye wolo ma?» A mii jo: «Mii wi wee, mii tun.»

Ezayi 64:8

Ee Yawe, mɔ a kɔ́ mɔ fúngi yaʔa gi tanʔa bi sa nan ki dǎnw na í, mɔ a kɔ́ ra sɔ̀ngí da taagi kolomi na bàā syée nya làla o làla í. Koro na gi wéle, wolo myɛ i nyɛ mɔ syɛɛnnɛ.

Zyeremii 27:6

Tɔ́ɔliw ni, mii a tátɛɛyi bee myɛ le Nebukadinezari kɔ́yi ni, wi lè Babilɔni fànʔafɔw, ní i nyɛ mii falipyeo. Mii n wɔ́ɔ̀ sìnbirigi yaweere kaan wi ma jàngó taa báara wi ma.

Zyan 14:23

A Zyezu wi yari: «Syɔ́ɔnwee faala wi ga tàmaga le ní mii ní lè, wee bee a ra mii syɛ́ɛnri lúro, mii Tóow a wɔ́ɔ tàmaga le ní wee bee ní. Mii ní mii Tóow si a pan wee bee ma bi ba kòro ní wi ní.

Zyan 5:17

Kàjáa a Zyezu be yari: «Mii Tóow sèʔé i báara n baa nan níjanʔa na, a mii wɔ́ɔ i báara.»

Kapyegèle 17:20

Kérigèle wolo lóʔo mɔ ma lè, ke n wolo fúnyi wɔ́ɔ. Koro na wolo caa bi ge kɔ́rɔw cán.»

Kapyegèle 17:26

Wi n syɛɛnfeleyi myɛ yirige nàɔn nibin ni, níì be télege télege tári tɛ́ɛyɛ myɛ ni, níì gi kɔ̀rirɔ n be làrigèle ní be tɛɛ̀tɛ́nɛyi láʔagéle wòlo,

1 Korɛnti ye 11:7

Nàɔn ga yɛlɛ wi wi nyúngi tɔ́n í, níì cán woro wi nyɛ Kolocɔlɔɔ niwiriw, ní i Kolocɔlɔɔ nìjanri tèé, céw si i nǎnw nìjanra tèé.

2 Korɛnti ye 3:18

Wolo bele myɛ yɛ́ɛyɛ yi nyɛ womúguyo ní lè, wolo i Kàfɔw nìjanra tèé mɔ a jo dùbale ni, Kàfɔw wi lè Pìicǎnni, wi i wolo kàragí, a nìjanraa i taari tàa na fwɔɔ bi taa wolo í ba woro tiimaa wíri.

2 Korɛnti ye 4:4

Dulunyanw naa kolocɔlɔɔ n sìndagabèle sɔ̀ngurɔ tɔ́n, koro ga pye pe a kɔ́ Syɛɛnjóocǎnri gbɛ̀ɛnmɛ nyaa í, bee bi Kirisi nìjangbɔɔri tèé lè, woro wee wi nyɛ lè Kolocɔlɔɔ niwiriw.

Efɛzi ye 4:24

yé kanvɔnmɔ le yeyɛɛ na, bee Kolocɔlɔɔ kpéʔele lè pi woro wómi wíri sínni, ní funviiri ni ti yìrigí lè kányɛɛgi ma.

Kɔlɔsi ye 1:15

Kolocɔlɔɔ wi lè syɔɔn o wi nyaagi í, wi Jáaw wi nyɛ wi niwiriw, woro wi nyɛ Kolocɔlɔɔ pìiseliw wi yakpéʔeleri myɛ yɛ́ʔɛ na.

Kɔlɔsi ye 3:10

níì kanvɔnmi le yeyɛɛ na, kàa i fàrá kanvɔnmi bee na làla o làla ni yɛlɛgi ní bi faanfɔw kánma ní, koro ga pye yele í ba kérigèle myɛ cán.

Zyaki 3:7

Syɔɔn n fànʔa taa yaweeri féleye myɛ na ni di fwɔɔgi, ti lè tɔlɔyɔ sicɛrɛ-jɛrɛ wóri, ní féjɛɛnri, ní dee ní di fulolo lè, n fàra lǒgi fúngo wóro na, ànbée ki da ni kpéʔele nlaa yaà ki sélimi na.

Zyaki 3:9

Ní loro ní wolo Kàfɔw kpɔ̀ʔɔrɔ́ wi lè wolo Tóow, loro wonijanni ní wolo wɔ́ɔ̄ syɛ́ɛnbèle dángi, poro bele Kolocɔlɔɔ faan a be woro tiimaa wíri lè.

1 Zyan 5:7

Bele be gi séeraw kpéʔele lè pe i nyɛ taanri.