Nehemii 8:10 - Cebaara Bible 2010

¹⁰ A Ɛsidirasi be pye: «Yaa syée kpaaya ma ye sa lìi ní kaara ní, yé yagbaataanya gbaa, syɔ́ɔnwee wi lè wi ga gbàn n yafyɛn sámaga í, ye yaliiraa tórigo wee bee ma, níì cán níjanʔa i nyɛ cangaa, gee gi yaʔa kɔlɔ̀ na lè wolo Kàfɔw ma. Yele a kɔ́ ra funbɛɛnrɛ kpéʔele í, níì cán Yawe fundaanri di nyɛ yele fǎngi.»

Nehemii 8:10 Iomraidhean Croise

1 Fànʔafɔbèle 8:66

Canya kɔrɔtaanri wógi na, a wi syɛ́ɛnbèle yaʔa a be kári. Pe maa dùba kpéʔele fànʔafɔw ma níì lúru n kári be kpaaya ma fundaanra na. Pe fúnyi maa tɔ̀nɔ n nyìn fundaanri na kacǎnni kéele na, lee Yawe kpéʔele wi falipyew Davidi na lè, ní Isirayɛli ye na pe nyɛ lè wi syɛ́ɛnbèle.

1 Cányi kèlē 16:27

Nìjangbɔɔri, ní kpɔ́ʔɔri i nyɛ wi yɛʔɛ̀ ma. Fǎngi, ní fundaanri i nyɛ wi tɛɛkòrogi ni.

Nehemii 8:11

A Levii ye i syɛ́ɛnbèle myɛ kpɛʔɛlɛ ní i gi nyuu be ma níì jo: «Ye pyèri! Níì cán cángi naa i nyɛ canjànga, yele a kɔ́ ra funbɛɛnrɛ kpéʔele í.»

Nehemii 8:12

A syɛ́ɛnbèle myɛ kári be kpaaya ma bi sa lìi si gbaa, si wɔ́ɔ lɛɛgéle tórigo, si fundaangbɔɔrɔ kpéʔele. Níì cán syɛ́ɛnri ti da joo be ma lè, pe maa di kɔ́rɔw cán.

Ɛsitɛri 9:19

Koro na Zyefubèle bele be nyɛ lè wodɛ́ɛnbéle ní tò fun kěyi ni, a poro Adari yégi canya kɛɛ ní sicɛrɛ wógi yaʔa a gi pye fundaanra, ní lìigbɔɔlɔ, ní fɛ́tii canʔa, ní i lɛɛgéle tórogi peyɛɛ ma.

Ɛsitɛri 9:22

Níì cán cányi bee ni Zyefubèle fànʔa taa pe nigoobèle na. Yégi bee ni be fúnyi wɔʔɔgɔ kàri fundaanra, a be kùúw káyaʔa kàri n pye fɛ́tii. A wi jo be cányi bee yaʔa yi pye lìigbɔɔlɔ, ní fundaanra canya, páā lɛɛgéle tórogi peyɛɛ ma, sáā yakaanya kaangi foomɔfɔbèle ma.

Ŋúnuyi 149:2

Isirayɛli n yɛlɛ bàā fundaanra kpéʔele wi Faanfɔw ni. Siyɔn pìíbèle n yɛlɛ bàā muguri be Fànʔafɔw kéele na!

Ŋúnuyi 89:17

Pe i nyɛ fundaanra na canʔa o canʔa mɔ mɛ́ɛgi báriga ni. Pe i nyɔ̌ngbɔɔlɔ táanri mɔ sínni báriga ni.

Kàseegèle 17:22

Fundaanra fúngo i nyɛ tiindaanma, kàjáa funjurugori i kaceleyi waari.

Syɛɛnjóow 11:2

Lɛɛlɛ kaan syɛ̀ɛnnɛ kɔrɔsiin ma, àlí kɔrɔtaanri ma, níì cán wɔʔɔgee ki a ba too tári na lè, mɔ ga gi cán í.

Syɛɛnjóow 2:24

Syɔɔn í lìi si gbaa si fundaanra pye wi fáliw kéele na, yarigaa ga pɔ́rɔ wi ma n sɔ̀lɔ gee bee na í. Mii si wɔ́ɔ i koro wéle n jo ki n yìri Kolocɔlɔɔ kɔ́gi ma.

Syɛɛnjóow 3:13

Syɔɔn o syɔɔn í wɔ́ɔ ra líi sáā gbo sáā gi nyaagi, gee gi nyɔɔ wi fáliw myɛ nínge ni lè, gee bee i nyɛ Kolocɔlɔɔ yakanʔa.

Syɛɛnjóow 5:18

A gi wɔ́ɔ i nyɛ syɔ́ɔnwee ma Kolocɔlɔɔ lɔ́ri ní kɔlɔ̀ yáriri saʔa kaan lè, ní wɔ́ɔ̀ di lìíli fànʔa kaan wi ma a wi i wi lɛɛli taagi di ni, ní wɔ́ɔ i fundaanra kpéʔele wi fáliw nínge ni, koro i nyɛ Kolocɔlɔɔ yakanʔa.

Syɛɛnjóow 9:7

Da syée mi sa ra mɔ yaliiri líi ní fundaanra ní, mí wɔ́ɔ maa mɔ duvɛɛnw gbo ní funjànga ní, níì cán Kolocɔlɔɔ n fɔ̀lɔ mɔ kapyegèle na n kwɔ́ɔ.

Ŋúnudaangi 5:1

Mii i jǐn mii nángwɔɔw ni, ni senyɛnjaà, ni pìcaa. Mii a cɔɔ mii míiriw, ní mii nùndaanni yárira ni, mii i mii ségbabigi líi ní mii sárigi ní, mii i mii dùvɛɛnw ní mii nɔ́nɔw gbo. Yaa líi, ni tàannyɛ̀nnɛ, yaa gbo, yaa tàmagi gbo kaa yele cáan!

Ezayi 49:5

Tɔ́ɔliw ni Yawe i nyuu, woro wee wi mii sámaga yaà mii nɔ́ɔw láʔa ni lè jàngó mii í pye woro falipyeo, jàngó mii í Zyakɔbi lúrugo wi pan woro ma, jàngó Isirayɛli ye í kpóʔoro woro taana. Mii n kpɔʔɔrɔ taa Yawe yɛ́ʔɛ ma. Níì cán mii Kolocɔlɔw wi da pye mii fǎngi.

Ezayi 61:10

Mii i fundaangbɔɔrɔ kpéʔele Yawe ni, mii fúngi i muguri mii Kolocɔlɔw ni. Níì cán wi n syɔɔli búroyo le mii na, wi n sínni burogbɔʔɔ tɛ́ʔɛ n mii tɔ́n àmɛɛ cefɔɔn fɔ́lɔ wiyɛɛ vèré ní kpɔʔɔrɔ nyùndɔnnɔ ní lè, àmɛɛ cefɔɔn wiyɛɛ vèré ní wi fèreri yárira ní lè.

Zyowɛli 2:23

Yele Siyɔn pìíbèle, yaa muguri, yáā fundaanra kpéʔele Yawe ni, wi lè yele Kolocɔlɔw, níì cán wi n zěseligi kaan yele ma ki lǎli ni, wi i ki wozeligi ní gi wozangi cáan yele ma n yɛlɛ ní booma kánmi ní.

Zakarii 14:21

Kòdɔɔlɔ o kòdɔɔlɔ li nyɛ lè Zyerusalɛmi, ní Zyuda ni, li a pye yacanga Yawe ma wi lè Nyɛ̀ʔɛni Sùlasiibéle Kafɔlɔ. Bele myɛ pe ga pan ba sáriga wòlo lè, pe a kòdogèle bee kèle láa bàā káari soori. Cángi bee na jàgiwáaɔ faala a ní pye Yawe kpáagi ni í wi lè Nyɛ̀ʔɛni Sùlasiibéle Kafɔlɔ.

Luki 11:41

Kàjáa yáriree di nyɛ lè yaleyi fúnyo ni, ye dee bee kaan foomɔfɔbèle ma, lǎli bee ni yáriri myɛ a sámaga nyɔɔ yele ma.

2 Korɛnti ye 8:2

Wɔʔɔyi yi too be na lè, Kolocɔlɔɔ n be sɛʔɛ n wéle gbanʔama yee bee báriga ni, kàjáa pe fundaangbɔɔri n be kaan a pe be kɔ́yi sánʔa ni kaangi saʔa, àlí bi gi taa fóomi i nyɛ be na gbanʔama.

Filipikaʔa ye 3:4

Koro ní ki myɛ ní tànʔa i nyɛ mii ma mii í mii sɔ̀ngumi taʔa céri kèlē na wɔ́ɔgēle. Níì cán wàa nikwɔɔ ga jo tànʔa i nyɛ woro ma bi wi sɔ̀ngumi taʔa céri kèlē na, ki i nyɛ mii ma n sɔ̀lɔ wee bee na,

Tɛ̀ɛnnɛ 11:10

Tári syɛ̀ɛnnɛ a ra fundaanra kpéʔele be kéeli na, sáā muguri. Pe a ra kpɔʔɔrɔ tórogi peyɛɛ ma, níì cán kanyaajoobèle bee siin maa ni tári syɛ̀ɛnnɛ wɔʔɔ ni caanri.

1 Samyɛli 25:8

Mɔ nigɔcaribèle yíbe kéeli bee na, pe a gi joo mɔ ma. Koro na ki n yɛlɛ mi nyɔɔ mii nìgɔcaribèle na. Níì cán fɛ́tii canʔa ni wolo baa bɛ̀ɛ. Koro na mii i mɔ nyɛ́ɛri níì jo yárigee mɔ ga taa lè, mi gi kaan mɔ falipyebèle ní mɔ jáaw Davidi ma.› »