2 Timɔte 2:15 - Cebaara Bible 2010

¹⁵ Mi lòmaana le, mi miyɛɛ dɛ̀ɛn Kolocɔlɔɔ na àmɛɛ falipyeo nyɛ lè, wee wi mɛ́ɛtanʔa taa wi fáliw ni lè, fɛ̀ɛrɛ si a ba wi taa wi fáliw kéele na í, níì cán wi i kányɛɛgi syɛ́ɛnrɛ nyuu ti jooganmi na.

2 Timɔte 2:15 Iomraidhean Croise

Matye 13:52

A wi be pye: «Koro na Mowizi làlwaw tamafɔlɔ o tamafɔlɔ wi nyɛ lè nyɛ̀ʔɛni fànʔa pìitamawaa, wi i nyɛ àmɛɛ nànwaa nyɛ lè, wee wi nyɛ lè kpaʔafɔlɔ ní i yalɛɛri ní yafɔnri yirigi wi lɔgbanri yárira ni ni tèé.»

Mariki 4:33

Wi maa ni Kolocɔlɔɔ syɛ́ɛnri nyuu be ma ní kàseegèle bee féleye saʔa ní ni yɛlɛgi ní wi syɛɛnloʔobèle cánna ní.

Luki 12:42

A Kàfɔw jo: «Wìí wi nyɛ syɔɔn kacooli kàrigafɔlɔ, wee wi lè tágala syɔ́ɔn níì cìlige, wee kàfɔlɔ wi a wi télege lè wi falipyebèle myɛ nyúngo na, koro ga pye waa be lìíli lɛɛlɛ kaangi be ma li làrigaanni ni?

Kapyegèle 2:22

Yele Isirayɛli ye nǎnbèle, ye syɛ́ɛnri naa lóʔo! Kolocɔlɔɔ maa Zyezu tɛ̀ɛn yele na wi lè Nazarɛti ye wów, kakpoloyi, ní bìngaari kèlē, ní fɛ̀ɛ́bèle báriga ni bele wi da kaan wi ma a wi i kpéʔele yele níngi ni lè, àmɛɛ yele tiimaa gi cán lè, koro ga pye yele í gi cán wi i nyɛ woro wóo kányɛʔɛ ni.

Kapyegèle 20:27

Níì cán mii n Kolocɔlɔɔ nyɛ́nɛ kérigèle myɛ joo yele ma, mii ga li làa faala làriga yele na í.

Wɔrɔmi ye 14:18

Wee wi ga ni báara lè Kirisi ma kánmi bee na, woro kéeli n Kolocɔlɔɔ dɛ́nɛ, á wi mɛ́ɛtanʔa taa syɛ́ɛnbèle ma.

Wɔrɔmi ye 16:10

Ye Apelɛsi syáanri, wee wi mɛ́ɛtanʔa taa lè Kirisi kólogi ni. Ye Arisitobuli kpáagi wòolo syáanri yaà.

Wɔrɔmi ye 6:13

Ki ga wɔ́ɔ̀ yɛlɛ yele í ní yele céri tɛ́ɛyɛ yaʔa kapeebyeri kɔ́yɔ ni bi yi kpéʔele kakolobyeri falipye-yarira í. Kàjáa ki n yɛlɛ ye yeyɛɛ gaan Kolocɔlɔɔ ma bi pye àmɛɛ syɛ́ɛnbèle pèle nyɛ lè, bele be nyán n yiri kúbèle nínge ni lè n pye sìi na, yé yele céri tɛ́ɛyɛ kaan Kolocɔlɔɔ ma yi pye sínni falipye-yarira.

1 Korɛnti ye 2:6

Koro ní ki myɛ ní wolo i sícili-zyɛ́ɛnri nyuu bele nínge ni be nìri n kwɔ́ɔ lè, dulunyanw naa sícilimɛ si ban í, dulunyanw naa fànʔafɔɔlɔ wómɔ wɔ́ɔ ban í, poro i syée kálagili ma.

2 Korɛnti ye 10:18

Níì cán wee wi ga ni wiyɛɛ tiimaa mɛ́ɛtaangi yiri lè, tànʔa o nyɛ wee bee ma í, fwɔɔ Kàfɔw ga ni wee mɛ́ɛtanʔa yiri lè.

2 Korɛnti ye 3:6

Woro wi séew kaan wolo ma wolo í pye joogaanvɔnni falipyebèlē, làlwaw sɛ́bɛ joogaanna ban í, Pìicǎnni wólo lii. Níì cán làlwaw sɛ́bɛrɛ i syɛ́ɛnbèle kúu, Pìicǎnni si i sìi kaangi be ma.

2 Korɛnti ye 4:2

Fɛ̀ɛ́ri kèlē syɛ́ɛnbèle kpéʔele lè làrama ni, wolo n gele bee cée. Wolo o wolo kérigèle kpéʔele ní sícilibeemɛ ní í, wolo o Kolocɔlɔɔ syɛ́ɛnri fɛ̀ɛ́ í. Kàjáa kányɛɛgi wolo fíligi ni nyuu, jàngó syɛ́ɛnbèle myɛ nibin nibin í da wolo mɛ́ɛtaanyi yiri be fúnyi ni Kolocɔlɔɔ yɛ́ʔɛ ma.

2 Korɛnti ye 5:9

Gee bee na wolo wɔ́ɔ̀ lòmaana le, koro ga pye wolo ga kòro céri naa ni yoo, a wolo náà yiri di ni yoo, wolo kéeli í Kàfɔw dɛ́nɛ.

Galasi ye 1:10

Tɔ́ɔliw ni doò, syɛ́ɛnbèle lé mii caa be fɔ̀lɔ mii na láà, ba fwɔɔ Kolocɔlɔɔ mii caa wi fɔ̀lɔ mii na? Wàlá ba syɛ́ɛnbèle kanidaangéle lé mii caa bàā kpéʔele? Mii ga maa sèʔé ni syɛ́ɛnbèle kanidaangéle kpéʔele, mii mǎà dée pye Kirisi púlo í.

Efɛzi ye 1:13

Kánmi bee na yele wɔ́ɔ baa yele sɔ̀ngumi taʔa wi na àmɛɛ yele kányɛɛgi syɛ́ɛnrɛ lóʔo lè, ti lè yele syɔɔli syɛɛnjóocànra, lǎli ni yele tága lè wi na, a Kolocɔlɔɔ wi fɛ̀ɛ́w taʔa yele na, fɛ̀ɛ́w bee wi nyɛ Pìicǎnni, lee nyɔɔfaliga Kolocɔlɔɔ da kpéʔele lè níì jo woro a li kaan,

1 Tesaloniki ye 2:4

Kàjáa àmɛɛ Kolocɔlɔɔ wolo córo lè n gi nyaa wolo n nyɔɔ n yɛlɛ, koro na wi Syɛɛnjóocǎnri kàlifáa wolo ma, kánmi bee na si wolo wɔ́ɔ̄ di nyuu, wolo o di nyuu syɛ́ɛnbèle kínidɛnɛgɛ kéele na í, fwɔɔ Kolocɔlɔɔ kínidɛnɛgi kéele na, woro wee wi wolo fúnyi sɛʔɛ ni wéle lè.

1 Tesaloniki ye 5:14

Ni senyɛ̀nnɛ, wolo i yele nyɛ́ɛri níì jo, yaa sàlagafɔbèle sàmí, yáā fyáarafɔbèle zɔ̀nbēle nìrí, yé wɔ́ɔ yaa fànʔa-fùnvɔbèle tɔʔɔlɔ, yáā syɛ́ɛnbèle myɛ kpàracó.

1 Timɔte 4:6

Mɔ ga ni wo senyɛnbèle tama kérigèle bee na, mɔ a pye Kirisi Zyezu falipyecàɔn, àmɛɛ mɔ fànʔa taagi lè tágali, ní tamajanni syɛ́ɛnrɛ báriga ni, dee na mɔ taʔa lè.

Heburubèle 4:11

Koro na gi yɛlɛ wolo í da ŋàʔaná gbanʔama jàngó wàa faala a kɔ́ bɔ̀nɔ li jéeli ni céemi bee pàa félege báriga ni í.

Zyaki 1:12

Syɔ́ɔnwee wi kòro ni kpàracogo kpéʔele lè kagbanyi ni, wee bee i nyɛ dùba pyà. Níì cán àmɛɛ yi wi sɛʔɛ n wéle lè á wi fànʔa taa yi na, wi a kpɔ́ʔɔri nyùndɔnnɔ taa li lè sìíw wólo, lee Kolocɔlɔɔ joo wi a kaan bele má be tàmaga le ní woro ní lè.

Zyaki 1:18

Wi n wolo séli n see kavɔn kányɛɛgi syɛ́ɛnrɛ báriga ni, wi n gee bee kpéʔele n yɛlɛ ní wi tiimaa kínidɛnɛgi ní, koro ga pye wolo í pye wozelibèle woro ma wi yafaanri myɛ nínge ni.

2 Pyɛri 1:10

Koro na ni senyɛ̀nnɛ, kéelee na Kolocɔlɔɔ yele yeri lè, ní wɔ́ɔ̀ yele nyɛ́nɛ n wòlo lè, ye sèʔé yaa ŋàʔaná ye kéeli bee sámaga ye cò cama, yele ga ni gee bee kpéʔele, yele a tée kpírige too nyáana í.

2 Pyɛri 1:15

Mii a lòmaana le, koro ga pye, mii kárili kàdoʔo ma, yele í gbǎn ra sɔ̀ngí da taagi kérigèle bee na làla o làla.

2 Pyɛri 3:14

Gee bee na, mii syɛɛn-nidaanmabèle, àmɛɛ yele kérigèle bee sige lè, yaa lòmaana kpéʔele, koro ga pye wi ba yele nyaa fɔɔnrɔ fun, ní tɛɛlɛ fun, yele si wɔ́ɔ pye fûnnyinge na.